मंगलवार 30 सितंबर 1975 की अव्यक्त मुरली

>

30-09-75 om shanti avyakt baapdaadaamdhuban

saare kalpa mein vishesh part bajaane vaali shreshtha aatmaon ki visheshtaaen

sarva shreshtha part bajaane vaale, apne gyaan ke prakaash se chandrama (brahma) ko solah kala prakaashit karne vaale gyaan soorya shiv baba bole -

svayan ko saare kalpa ke andar sarva aatmaon se shreshtha part bajaane vaali vishesh aatmaayen samajhte ho? aap vishesh aatmaon ki aadi se ant tak kya-kya visheshtaayen hain va aapne kaun-sa vishesh part bajaaya hai, usko jaante ho? ek hota hai vishesh kaam karne ke kaaran vishesh aatma kahlaana,doosra vishesh gunon ke prabhaav ke kaaran vishesh aatma kahlaana, teesra position va status ke kaaran aur chautha sambandh aur samparka dvaara anekon ko vishesh praapti karaane ke kaaran। in sab visheshtaaon ko saamne rakhte hue dekho ki yeh chaar prakaar ki visheshtaayen kis stage tak aur kitne percentage mein hain।

satayug ke aadi mein aap vishesh aatmaon ki first stage kaun-si hoti hai, unki visheshta aaj ke bhakta bhi gaate rehte hain - jismen sampanna aur sampoornata ka gaayan hai woh to sabki smriti mein hai na? ab aage chalo। satayug ke baad kahaan aate ho? - (treta) vahaan ki visheshta kya hai? vahaan ki visheshta bhi itni hi prasiddha hai,ki jo aaj ke kaliyugi neta usi raajya ka svapna dekhte rehte ki aisa hona chaahiye। koi bhi plan sochte hain,to bhi aapki second stage ko ati vishesh samajhte hue use saamne rakhte hain। aur aage chalo treta ke baad kahaan aate hain? (dvaapar) lekin dvaapar mein bhi kahaan pahunche। dvaapar mein bhi raajya satta to hoti hai na?vahaan dharmasatta aur raajya satta do tukdon mein but jaati hai। isliye dvaapar ho jaata hai। do pur ho gaye na?ek raajya-satta doosri dharma satta। phir bhi aap vishesh aatmaon ke vishesh sanskaar gaayab nahin hote। chaahe anya dharma pita, dharma satta ke aadhaar se dharma ki sthaapna bhi karte hain lekin aapki visheshtaaon ka poojan, gaayan aur vandan aarambha ho jaata hai। yaadgaar phir bhi aap vishesh aatmaon ki hi banaayenge। gungaan aap vishesh aatmaon ke hi hote hain। raajya satta mein bhi raajaai thaath aur raajaai powers rehti hai। aapki visheshtaaon ki yaadgaar mein shaastra ban jaate hain। apni visheshtaayen yaad aati hain?achha, isse aage chalo। kahaan pahunche? (kaliyug) vahaan ki visheshta kya hai? aap vishesh aatmaon ke naam se sab kaam shuru hote hain। har kaarya ki vidhi mein aapki visheshtaaon ki siddhi sumiran hoti rehti hai। aapke naam se anek aatmaon ka shareer nirvaah hota hai। naam ki mahima - yeh kaliyug ki visheshta hai। aapka naam sab sthool-sookshm praaptiyon ka aadhaar ban jaata hai। kya is visheshta ko jaante ho? achha phir aage chalo?kahaan pahunche? (sangam) jahaan hain vahaan pahunch gaye।

sangam yug ki visheshtaaon ko to svayan ab anubhav kar hi rahe ho। saare kalpa ki visheshtaaon ko sada smriti mein rakhte hue sada alaukik vichitra raas karte rehte ho। gop-gopiyon ki raas to prasiddha hi hai। to nirantar raas karte ho athva programme se? yeh hai hullaas ka raas। lekin is raas mein sampoorn poornamaasi ki raas prasiddha hai। iska rahasya kya hai?poornamaasi arthaat usmein sampoornatah ki nishaani gaai hui hai। is raas ki visheshtaayen ab tak varnan karte rehte hain। woh kaun-si visheshtaayen?us samay gop-gopiyon ki visheshta kya thi? aapki hi baaten hain na? mukhya visheshta kya thi, teen baaten sunaao?ek visheshta raat ko din banaaya hua tha। din arthaat har ek gop-gopi ke jeevan mein satopradhaanta ka soorya uday tha। logon ke liye kumbhakran ke neend ki raat thi arthaat tamopradhaanta thi। doosri visheshta saara samay jaagti jyoti the। maaya ek sankalp-roop mein bhi aa nahin paati thi। maayaavi log arthaat maaya moorchhit thi aur behosh thi। kyonki sarva jaagti jyoti nirantar baap ke saath lagan mein magna the। teesri visheshta sarva ka haath mein haath mila hua tha aur taal se taal mila hua tha arthaat sanskaar mile hue the। sneh aur sahayog ka sangathan tha। raas mein saarkil arthaat chakra lagaate hain na?saarkil arthaat chakra - yeh shakti swaroop prakriti aur maaya ko gheraav daalne ki va kile ki nishaani hai। yeh hai visheshtaayen isliye is raas ka vishesh mahatva gaaya hua hai। yeh hua sangamayug ki visheshtaaon ka gaayan। to aisi raas nirantar honi chaahiye। kitni baar yeh raas ki hai? anek baar ki hui hai,phir kabhi bhool kyon jaate ho?jab sanskaar milaana arthaat taal se taal milaana,aisi koi paristhiti aati hai to kya kehte ho?us samay bhakta arthaat kamzor ban jaate ho। sanskaar milaana padega,marna padega,jhukna padega, sunna padega aur sahan karna padega - yeh kaise hoga? -aise-aise kahne se bhakta bante ho। isliye ab us bhaktapan ke vansh ke ansh ko bhi khatma karo, tab hi is raas mandal ke andar pahunch sakenge। nahin to dekhne vaale ban jaayenge। jo karne mein maja hai,woh dekhne mein nahin। to apni sarva-visheshtaayen suni na? aisi sarvashreshtha aatmaayen ho?aisi sarvashreshtha aatmaon ke liye baapdaada ko bhi aana padta hai। achha।

aisi vishesh aatmaayen jo baapdaada ko bhi mehmaan banaane vaali hai, aisi mahaan aatmaayen jinhon ka har sankalp anekon ko mahaan banaane vaala hai,aisi takdeervaan jinke mastak par sadaiv takdeer ka sitaara chamakta hai aur aisi padma-padam bhaagyashaali aatmaon ke prati baapdaada ka yaad-pyaar aur namaste।

raashi milne vaale hi manke ke daane

aise raas karne vaale taiyaar hue hain? sanskaaron ka milna arthaat raas se raas milna। raas mein agar koi ka haath oopar, koi ka haath neeche hoga, to raas mein maja nahin aayega। raas arthaat raashi milna। jaise koi bhi connection jodte hain va milan karte hain,to raashi milaate hain na?agar raashi nahin milti to jodi nahin milaate hain। ek-do mein raashi milna arthaat svabhaav, sanskaar,gun aur seva saath-saath milne mein dikhaai de। samaan to nahin ho sakta। number to honge lekin jara-sa antar jo na ke baraabar dikhaai de-aisi raashi milne vaale kitne taiyaar hue hain?kya aadhi maala? jitne bhi taiyaar hue hain, hona to hai, hui padi hai sirf ghoonghat ke andar hai। achha।