गुरुवार 21 दिसंबर 1978 की अव्यक्त मुरली

>

21-12-78om shanti avyakt baapdaadaamdhuban

har kalpa ki ati sameep aatmaon ka roop, rekha aur vela

sarva ke bhaagya vidhaata,jaani jaananhaar shiv baba bachchon prati boleh -

aaj baap-daada amritvele bachchon se madhur milan manaate, chaaron or ke bachchon ko dekhte hue aapas mein ek vishesh baat par rooh-roohaan kar rahe the। kis baat par? har bachche ke divya janma ki roop-rekha va janma ki ghadi arthaat vela ko dekh rahe the। harek ki vela aur roop rekhaaon ke aadhaar par vartamaan sangamayugi jeevan aur bhavishya jeevan ka aadhaar hai। roop mein kya dekha? janmate hi shakti roop ki jhalak rahi va viyog se yog ki rekha rahi arthaat tadap va pyaas-roop raha va sevaadhaari swaroop raha va sada aate hi atiindriy sukh mein sukh roop raha! uske saath rekhaayen kya rahi, aate hi sampoorn parvaane ki rekha rahi va purushaarthi ki rekha rahi?vardaani ki rekha rahi, himmat aur hullaas ki rekha rahi va janmate hi sahayog ke aadhaar par chalne ki rekha rahi। aise hi vela ko bhi dekh rahe the,second mein nishchay buddhi rahe,saptaah course ke baad rahe va aur bhi adhik samay ke baad nishchay buddhi bane va sanshay nishchay ki yuddha chalte-chalte nishchay buddhi bane। va ab bhi yuddha mein hi chal rahe hain। second ka nishchay arthaat nazar se nihaal। second number shreshtha bol se nihaal, teesra number saudaagar se saude ke muaaphik moolya ko baar-baar jaanne ke baad marjeeve bane,chautha number jara sa praapti ke, sneh ke, samparka ke, parivartan ke aadhaar par abhi sanshay abhi nishchay। to baap-daada aaj har bachche ki in baaton ko dekhte hue rooh-roohaan kar rahe the। is marjeeve jeevan ka sada nirvighna va sada teevra purushaarthi,sada praapti dvaara anubhvi moortta va purushaarthi jeevan va chadhti kala va utarti kala, isi raphtaar mein chalne vaali jeevan - in teenon prakaar ki jeevan ka aadhaar roop, rekha aur vela par hai।

jo har kalpa ki ati sameep aatmaayen va padmaapadma bhaagyashaali aatmaayen hain unki roop, rekha aur vela kya hoti hai, woh jaante ho? aisi aatmaayen second mein pahunchi aur baap ki bani। kalpa pahle ke bhaagya ki touching ke aadhaar par janmate hi aise anubhav karenge‘‘brahman banna hai, nahin lekin brahman the,pahle bhi the aur ab bhi hain’’,second mein apna-pan anubhav hoga। dekha aur jaana। aisi vela vaale ki roop-rekha kya hoti hai? pahle number ki vela jo abhi sunaai unka roop kya hoga? janmate hi sirf ek roop -- shakti va shanti va sukh ka nahin, lekin jaise janmate hi sarva property ke adhikaari hote hain, aise har swaroop ke anubhooti ka adhikaar anubhav karenge। jaise beej mein saare vriksha ka saar samaaya hua hai aise number one arthaat baap samaan sameep aatmaayen va number one vela vaali aatmaayen sarva swaroop ki praapti ke khazaane ke aate hi anubhvi honge। aise anubhav karte hain ki yahi swaroop niji swaroop hai। sukh ka anubhav hota, shanti ka nahin va shanti ka hota sukh ka nahin shakti ka nahin, yeh first number ki vela ka anubhav nahin। second mein varse ke adhikaari yeh hai vela aur swaroop।

ab rekha kya hogi? nishchay buddhi banna va nishchay karna hai, yeh sankalp maatra bhi nahin hoga। janmate hi natural nishchay buddhi ki rekha hogi kaise va aise ke vistaar mein nahin jaayenge,hain hi ismen aise aur vaise ka prashn nahin uthta। aise poore jeevan ke atoot nishchay ki rekha anya aatmaon ko bhi spashta dikhaai degi। nishchay ki rekha ki line akhanda hogi, beech-beech mein khandit nahin hogi। aisi rekha vaale ke mastak mein arthaat smriti mein sada vijay ka tilak nazar aayega। aisi rekha vaale, jaise braahmanon ka bhavishya shreekrishna roop mein janma se hi taajdhaari dikhaaya hai, aise janmate hi seva ki jimmevaari ke taajdhaari honge, sada gyaan ratnon se khelne vaale honge। sada yaad aur khushi ke jhoole mein jhoolte hue jeevan bitaane vaale honge। sada har karma mein vardaan ka haath apne oopar anubhav karenge। har dincharya mein apne saath sarva sambandhon se sameep aur saakaar roop mein saath ka anubhav karenge। svatah yogi aur sahaj yogi honge। yeh hai number one roop, rekha aur bela vaalon ki nishaani। ab apne aapko chaik karo - pahle number ki roop,rekha aur vela vaale kitne honge? 8 va 108? aap sab kahaan ho?abhi bhi change kar sakte ho। last so fast ja sakta hai। abhi bhi parivartan ki margin hai। abhi tu let ka board nahin laga hai। gupta purushaarthi din raat ek dridh sankalp ke purushaarthi high jump laga sakte hain। isliye phir bhi apne bhaagya ko sada number one banaane ke purooshaartha ki lottery daalo to number nikal aayega। samjha kya karna hai। last chance hai isliye beeti so beeti karo,bhavishya ko shreshtha banaao। isliye baap-daada phir bhi sabko chance de rahe hain,phir ulhana nahin dena - ham kar sakte the lekin kiya nahin। samay nahin mila, sarakmastaansiz nahin the, abhi bhi merciful baap ke raham ka haath sabke oopar hai isliye apne oopar bhi merciful bano। achha।

aise sada baap ke vardaanon ke haath apne oopar anubhav karne vaale, sada apne oopar aur sarva ke oopar merciful,atoot akhanda nishchaybuddhi,akhanda yogi,sada vijay ke tilakdhaari, janmate hi taajdhaari,aise sada takhtansheen bachchon ko baap-daada ka yaadapyaar aur namaste।

party se mulaakaat –

1. nijdhaam aur nijasvaroop ki smriti se upraam sthiti - apne nijasvaroop aur nijdhaam ki sthiti sada yaad rehti hai?niraakaari duniya aur niraakaari roop donon ki smriti is puraani duniya mein rehte bhi sada nyaara aur pyaara bana deti hai। is duniya ke hain hi nahin। hain hi niraakaari duniya ke nivaasi, yahaan seva arth avatrit hue hain - to jo avtaar hote hain unhon ko kya yaad rehta hai? jis kaarya arth avtaar lete hain vahi kaarya yaad rehta hai na! avtaar avatrit hote hi hain dharma ki sthaapna ke liye - to aap sabhi bhi avatrit arthaat avtaar ho to kya yaad rehta hai?yahi dharma sthaapan karne ka kaarya। svayan dharma aatma ban dharma sthaapan karne ke kaarya mein sada rahne vaale,to shakti avtaar ho na! har ek shakti,avtaar hain। paandav bhi shaktiroop hain। ek sarvashaktivaan hai baaki sab shaktiyaan hain,to sab shakti avtaar hain।

sirf yeh bhi smriti rahe to kitni meethi jeevan ka anubhav karenge। ham is mrityulok ke nahin lekin avtaar hain। sirf yeh chhoti si baat yaad rahe to upraam ho jaayenge। agar apne ko avtaar na samajh grihasthi samajhte ho to grihasthi ki gaadi keechad mein phansi rehti। grihasthi hai hi bojh ki sthiti aur avtaar bilkul halka। woh phansa hua hai woh bilkul nyaara। kabhi avtaar kabhi grihasthi yeh chakkar agar chalta rehta to sangamayugi shreshtha jeevan ka, suhaavne sukh ke jeevan ka kabhi-kabhi anubhav hoga,sada nahin। aise sukh ke din phir kabhi nahin aane hai, ek ek sangam ka din ati priy hai to aise priy din ka suhaavna samay kaise vyateet karte ho? amoolya reeti se vyateet karte ho va saadhaaran reeti se? ek-ek second ki value kya hai - usko jaante ho? 5000varsha ki shreshtha praalabdha ka aadhaar yeh thodi si ghadiyaan hain,to aise amoolya ghadiyon ko amoolya reeti se use karna chaahiye na। ratan ko agar patthar samaan use karenge to result kya hogi? saadhaaran reeti se vyateet karna arthaat ratan ki value patthar ke samaan karna। agar samay ko vyartha ganvaate hain to ratan ko patthar ke samaan use karte hain। samay ka moolya rakhna arthaat apna moolya rakhna। samay ki pahchaan hai hi, lekin pahchaan swaroop hokar chalna - yeh hai attention ki baat। is sangam ka ek second bhi kya nahin kar sakta। ek second mein yahaan se chaaron dhaam ka anubhav karke aa sakte ho। aise anubhvi ho?

chhoti-chhoti baaton mein to time nahin chala jaata। ab high jump lagaao। abhi dheere-dheere chalne ka samay samaapta hua। bachpan naaz nakhre se chalne ka hota, bachpan ka naaz achha bhi lagta - lekin bada hokar naaz se chale to achha lagega! to ab bachpan beet chuka,ab vaanaprastha tak pahunch gaye। ab yeh naaz nakhre shobhte nahin। vaanaprastha mein sirf ek hi kaarya rah jaata - baap ki yaad aur seva, iske sivaay aur koi bhi yaad na aaye,utho to bhi yaad aur seva soo to bhi yaad aur seva - isi ko kaha jaata hai vaanaprastha। abhi tak bhi agar bachpan ki baaten va bachpan ke sanskaar rah gaye hon to samaapta karo। bandhan hai,kya karoon,kaise karoon yeh sab bachpan ke naaz nakhre hain,ab yeh din samaapta ho gaye, hain kya? trikaaldarshi apne ko nahin jaan sakte jo kehte ho kya karoon! ab ismen time nahin ganvaana - hona to chaahiye,hota nahin hai, chaahte hain kar nahin paate,yeh bachpan ki baaton ka khel ab samaapta। iska hi ab samaapti samaaroh manaao। achha।

2. trustee samajhne se powerful stage ki anubhooti –

sabhi sada apne ko trustee samajhkar chalte ho? trustee arthaat sada halka, grihasthi arthaat sada bojh vaala। grihasthi honge to utarti kala mein jaayenge, trustee honge to chadhti kala mein jaayenge। trustee sada bephikar baadshaah hote arthaat phikar se phaarig hote hain unhein roohaani phakhur rehta hai ki ham master sarvashaktivaan hain।kaise bhi sarakmastaansej ho lekin svayan halka rahega, svayan sada nyaara। jara bhi vaataavran ke prabhaav mein nahin aayenge। grihasthi samajhne se kya,kyon shuru ho jaata, trustee samjhenge to fullstop aa jaata, fullstop arthaat powerful stage ka anubhav।

3. angad samaan sthiti banaane ke liye nishchay ka foundation mazboot karo

sabhi angad ke samaan achal ho? maaya ke kisi bhi prakaar ki halchal mein bhi achal। maaya ka koi bhi vaar sthiti ko hila na sake। hilne ka kaaran kya hota hai?nishchay ka foundation mazboot na hone ke kaaran hi hilte hain। agar nishchay ho ki kalyaankaari samay hai, har baat mein kalyaan hai, to kitne bhi tuphaan kyon na aayen lekin hila nahin sakte। ab nishchay ke foundation ko teevra purooshaartha ka paani dekar mazboot karo to sada angad ke samaan rahenge। maaya ke vaar ko vaar nahin samjhenge। abhi hilne ka samay gaya, yadi abhi bhi hilte rahe to last paper mein bhi hil jaayenge to phir janma-janma ke liye fail ho jaayenge। isliye smriti ke sanskaran mazboot karo। sada yaad rakho ki yeh angad ka yaadgaar hamaara hi yaadgaar hai to shakti aayegi।

4.himmat aur hullaas ko ekras banaane ke liye ekras sthiti h

sada himmat aur hullaas ekras rehta hai? jab ekras sthiti hogi to himmat aur hullaas bhi sada ekras hoga,neeche oopar nahin। kabhi bahut, kabhi kam uska kaaran kya hai? sarva praapti ka anubhav sada saamne va smriti mein nahin rehta। aaj alpakaal ki praapti bhi himmat aur hullaas mein laati hai to yeh to sadaakaal ki aur sarva praapti-iska parinaam kya hoga? baap dvaara janma se hi jo praapti hui hai un sabki list saamne rakho। jab praapti atal,achal hai to himmat aur hullaas bhi achal hona chaahiye। achal ke bajaae kab man chanchal ho jaata va sthiti chanchalta mein aa jaati - yeh chanchalta ke sanskaar kis mein hote hain? ab to vishwa mein aap aatmaayen sabse bujurga ho, anubhvi ho phir chanchalta kyon? sada baap aur praapti ko saamne rakhne se achal arthaat ekras ban jaayenge। sab vighna khatma ho jaayenge। janma se hi vijay ka tilak laga hua hai sirf woh mit na jaay yeh attention rakhna hai। sadaiv naya umang, naya hullaas aur naya plan hona chaahiye। koi aise service ke saadhan banaao jisse kam kharcha aur saphalta jyaada ho। abhi bahut seva ki margin hai। usko poora karo, har programme mein visheshta va naveenta zaroor ho। sabko anubhav karaane ka plan banaao। achha।

teachers se baatcheet –

teachers to baap samaan hain na, jaise baap shikshak hai vaise aap bhi shikshak ho to samaanta ho gai na! to samaan vaale ko kya kaha jaata hai?phrend। teacher bhi baap-daada ki phrendsa hain, yeh phrendas ka sambandh bhi yaad rahe to sahajyogi ho jaayenge। phrendsa ka naata bahut sameep ka naata hai। phrendsa aapas mein jitna spashta hote hai utna maa baap se bhi nahin hote। phrendsa ka sambandh yaad rahe to tumheen se khaaoon, tumheen se baithoon, tumheen se kheloon yeh abhyaas sahaj ho jaayega। to sabhi phrendsa ko mubaarak ho। panjaab aur dilli donon ki teachers hain,to donon bhaai-behen ho gaye, dilli hai bhaai panjaab hai behen। panjaab bhi dilli se nikla na।

achha। omshaanti।