शनिवार 3 फ़रवरी 1979 की अव्यक्त मुरली

>

03-02-79om shanti avyakt baapdaadaamdhuban

sarva par raham karo, ‘vaham’aur ‘aham’bhaav ko mitaao

vishwa kalyaankaari, raajya bhaagya praapta karne vaali, dev pad praapta karne vaali aatmaon prati baba bole –

baapdaada sabhi bachchon ko sampanna swaroop, vishwa kalyaankaari roop mein dekh rahe hain। vartamaan samay antim swaroop va antim karttavya vishwa kalyaan ka hi hai। is antim swaroop mein sthit rahne ke liye harek brahman yathaashakti purooshaartha kar rahe hain। lakshya sabka ek hi vishwa kalyaan karne ka hai lekin koi abhi tak sva kalyaan mein hi lage hue hain, aur koi svadesh ke kalyaan karne mein lage hue hain। bahut thode behad ke baap samaan behad arthaat vishwa ki seva mein athva vishwa kalyaankaari swaroop mein sthit rehte hain। vishwa kalyaankaari shrenshtha aatma ki nishaani kya hogi?

1. vishwa kalyaankaari jaante hain ki samay kam hai aur kaarya mahaan hai isliye vishwa kalyaankaari har second va sankalp vishwa kalyaan ke prati hi lagaayenge।

2. tan man aur praapta dhan sada vishwa seva mein arpan karenge।

3. unke mastak aur naynon mein sada vishwa ki sarva aatmaayen smriti va drishti mein hongi ki in apraapta aatmaon ko bhi tripta aatma kaise banaayen। bhikhaari aatmaon ko sampanna banaayen। vanchit hui aatmaon ko samparka aur sambandh mein kaise laayen। din-raat baap dvaara shaktiyon ka vardaan lete hue sarva ko dene vaale daata honge।

4. athak, nirantar sevaadhaari honge। programme pramaan sevaadhaari nahin lekin sada ever ready all-rounder honge।

5. aise vishwa kalyaankaari arthaat merciful aatmaayen hi kaisi bhi avgun vaali aatma ho, kade sanskaar vaali aatma ho, kam buddhi vaali aatma ho, patthar buddhi ho, sada glaani karne vaali aatma ho, sarva aatmaon ke prati kalyaankaari arthaat laaphul aur loveful honge। lakshya sabhi ka aisa hi hai lekin karte kya hain? chalte- chalte raham ke badle do baaton mein badal jaate hain। koi raham karne ke badle aatmaon mein vaham bhaav paida kar dete hain - yeh kabhi badal nahin sakte, yeh hain hi aise, sab to raaja banne vaale nahin hain, is prakaar ke anek vaham bhaav raham ko khatma kar dete hain। doosri baat - raham bhaav ke badle aham bhaav ‘‘main hi sab kuchh hoon - yeh kuchh nahin hai। yeh kuchh nahin kar sakte main sab kuchh kar sakta hoon।’’is prakaar ke aham bhaav arthaat main-pan ka abhimaan merciful banne nahin deta। yeh donon baaten behad ke vishwa kalyaankaari bana nahin sakti। isliye sva kalyaan va sva-desh kalyaan tak rah jaate hain। vishwa kalyaankaari banne ka sahaj saadhan jaante bhi ho lekan samay par bhool jaate ho। kaisi bhi avgundhaari aatma ho -kaisi bhi patit aatma va purooshaarthaheen aatma donon mein se koi bhi ho agyaani patit aatma hogi aur brahman parivaar ki purooshaarthaheen aatma hogi-donon aatmaon ke prati vishwa kalyaankaari arthaat behad ki daata aatma,vishwa parivartan adhikaari aatma sada un aatmaon ki buraai va kamzoriyon ko kalyaankaari hone ke naate pahle kshama karengi। jaise behad ka baap bachchon ko kshama karte hain kis baat par?bachchon ki buraai va kamzoriyon ko dil mein na samaae kshama karte hain, poojya devta bhakton par kshama karte hain। to vishwa kalyaankaari master rachta bhi hain, vishwa adhikaari bhi hain arthaat chhoton ke aage bada raaja ke samaan hain, baap ke samaan hain,poojya aatma hain, in teenon sambandh ke aadhaar se buraai va kamjori dil par na rakh kshama karenge। uske baad aisi aatma ke kalyaan prati sada har aatma ke vaastavik swaroop or gun ko saamne rakhte hue mahima karenge arthaat us aatma ko apni mahaanta ki smriti dilaayenge। kiske bachche ho - kis kul ke ho! sangamayug ki visheshta va vardaan kya hai! baap ka karttavya asambhav ko bhi sambhav karne ka hai, tum aatma aadikaal ki raajvanshi ho,ab brahmaavanshi ho, master sarvashaktivaan ho, is prakaar ki mahima karenge- jisse woh aatma gunon ko sunte hue smriti aur samarthi mein aaye aur kamzori ko va buraai ko mitaane ki himmat mein aaye।

jaise aaj ki duniya mein raajpoot vansh vaale apne vansh ki smriti dilaate to kamzor mein bhi himmat aa jaati - aise vishwa kalyaankaari - kamzor aatma ko bhi mahima se mahaan bana denge। arthaat apni merciful ki shakita se svayan to uske avgun dhaaran nahin karenge lekin usko bhi apne avgun vismrit karaae samartha bana denge। aise samartha dharni banaane ke baad aisi aatma prati thodi-si mehnat karne se, vaham bhaav aur aham bhaav na rakhne se aisi aatma bhi parivartan ho jaayegi। kabhi bhi brahman parivaar mein kamjor aatma ko - ‘‘tum kamjor ho, tum kamjor ho’’ nahin kehna, nahin to jaise shaareerik kamzor aatma agar doctor dvaara sune ki main to marne vaali hoon to heartfail ho jaayega। aise aap sab bhi master authority ho,shreshtha aatmaayen hon,vishwa parivartak ho,aap logon ke mukh se sadaiv har aatma ke prati shubh bol nikalne chaahiye,dilshikasta banaane vaale nahin, dilshikasta banna bhi heartfail hona hain। chaahe kitna bhi kamjor ho usko eeshaara bhi dena ho, shiksha bhi deni ho,to pahle samartha banaakar phir shiksha do। pahle unki visheshta ki mahima karo phir usko aage ke liye aur bhi shreshtha aatma banne ka saadhan, kamzori par attention reeti se dilaao। pahle dharni par himmat aur utsaah ka hal chalaao phir beej daalo to sahaj hi beej ka phal niklega। nahin to himmatheen kamzor sanskaar vash aatma arthaat kalraathi jameen mein beej daalte hain isliye mehnat aur samay jyaada lagta hai aur saphalta bhi kam nikalti hai, vishwa kalyaan ke kaarya mein sochne va karne ki phursat nahin milti,sva kalyaan ya desh kalyaan mein hi lage rehte hain। vishwa kalyaankaari swaroop mein sthit nahin ho sakte। samjha। to vishwa kalyaankaari banne ke liye kya karna hai aur kya na karna hai। tab hi vishwa kalyaan ki seva ki gati teevra ho sakegi। abhi madhyam gati hai isliye is varsha mein vishwa kalyaankaari sthiti ki vidhi dvaara vishwa kalyaan ke seva ki gati teevra banaao,merciful bano। ab tak jo kuchh chala drama anusaar jo chalta tha woh chala। isse bhi aage ke liye kalyaan ki bhaavna le, chadhti kala ki bhaavna le ab aage badho। kamzoriyon ko sada ke liye dridh sankalp dvaara vidaai do aur vidaai dilaao। to vishwa parivartan ka kaarya teevragti se ho jaayega। speed aur stage ko badhaao arthaat har baat ko knowledgeful samartha sthiti dvaara sada sahaj paas karo aur sada paas ho jaao to final stage par paas with honour ho jaayenge। samjha aisi taiyaari karo - jo doosri season mein baapdaada sabko teevra purooshaathri ke roop mein dekhen। sabhi aatmaayen first division vaali aatmaayen hon - aisi mahaan aatmaon ka milan mela manaane aayen। har brahman bachcha sada taaj tilak aur takhtadhaari ho,aisi raajya sabha mein baap aaye। jab yahaan raajya adhikaari sabha banegi tab vahaan raajya darbaar lagegi। nimantran diya jaata hai to vishesh aatmaon ke liye vishesh stage taiyaar karni padti hai। to baapdaada ko bhi phir aane ka nimantran dete ho - to harek practical sampoorn stage taiyaar karenge tab to baapdaada aayenge। isliye harek ek do se shreshtha va sundar stage taiyaar karo। achha ab dekhenge kaun-sa zone number one jaata hai, videsh aage jaata hai,va desh aage jaata hai achha –

aise sada vishwa kalyaankaari, sarva prati merciful,sada shubh chintan mein rahne vaale aur sada shubhaachintak banne vaale, har aatma mein himmat aur hullaas dilaane vaale,aise sada raajya adhikaari sarva ko sada sampanna banaane vaale samartha aatmaon ko baapdaada ka yaad-pyaar aur namaste।

teachers se baatcheet - seva ka bhaagya praapta aatmaayen ho! kitni vanchit aatmaon ko baap ka parichay de tripta aatma banaane vaali ho! seva mein vishesh merciful ka gun yaad rehta hai? merciful baap ke bachche merciful ban kar seva karte to saphalta bahut milti hai। to sabhi baap samaan merciful ho, anjaan aatmaon ke prati taras padta hai? sada sampanna moorta ban vardaani aur mahaadaani bano। kamjor aatmaon ko shakti de aage badhaao। sampanna moorta ban seva karo। achha।

‘‘43 veen shivjayanti mahotsav manaane sambandhit avyakt baapdaada ka sandesh’’ –

is shivraatri par baap ko pratyaksha karne ka kaarya karna hai। authority se nirbhay ho vaastavik parichay dena hai। is shivraatri utsav manaane samay sab aisa programme rakhen jismen sabka attention vishwa ke rachayita tatha jiske dvaara part bajaaya us aadidev arthaat saakaar brahma ko pahchaanen। yeh shivraatri vishesh baap ko pratyaksha karne vaali, naveenta vaali ho। bolne samay yeh vishesh attention rahe ki points mein jyaada na jaaven,bhaashan ka levil theek rahe,points mein jyaada jaane se jo lakshya hota woh khatma ho jaata। bhaashan mein shabd kam hon lekin aise shaktishaali hon jismen baap ka parichay aur sneh samaaya hua ho, jo sneh roopi chumbak aatmaon ko paramatma taraph khainche। bhaashan ka sthool roop to anek log jaante hain lekin harek ke bhaashan mein roohaani nasha ho, shabdon mein parmaatma sneh ho, mastak mein baap ke pratyakshata ki chamak ho tab baap ka saakshaatkaar sabhi ko kara sakenge। yeh shivraatri pratyakshata ki shivraatri karke manaao। sabka attention jaae yeh kaun hain aur kiske prati sambandh jodne vaale hain, sab anubhav karen ki jo aavashyakta hai woh yahaan se hi mil sakti hai,sab sukhon ke khaan ki chaabi yahaan hi milegi। achha।

sabhi shivraatri par vishwa kalyaankaari ban seva mein upasthit hone vaale hovanhaar saphalta ke sitaaron ko yaadapyaar।

party se mulaakaat

1. sva-sthiti ki seat par rahne se paristhitiyon par vijay:-

sada master sarvashaktivaan ki sthiti mein sthit ho har prakaar ki paristhitayon ke oopar vijayi rehte ho? jab tak sva sthiti shaktishaali nahin hogi - to paristhiti ke oopar vijay nahin hogi paristhiti prakriti dvaara aati hai iseeleee paristhiti rachna ho gai aur svasthiti vaala rachta hai। to sada rachna ke oopar vijay hoti hain na। agar rachta rachna se haar kha le to use rachta kahenge? to prakriti dvaara aai hui paristhitiyaan rachna hai, to master rachta arthaat master sarvashaktivaan kabhi haar kha nahin sakte, asambhav hai। agar apni seat chhodte ho to haar hoti, seat par set hone vaale mein shakti hoti,seat chhodi to shaktiheen। to master rachta ki seat par set rehna hai,seat ke aadhaar par shaktiyaan svatah aayegi। neeche nahin aana, neeche hai hi dehaabhimaan roopi maaya ki dhool। neeche aayenge to dhool lag jaayegi arthaat shuddh aatma se ashuddha ho jaayenge। bachcha bhi agar sthaan se neeche aa jaata hai to maila ho jaata hai, bachche ke liye bhi attention rakhte - maila na ho jaae। to dehbhaan mein aana arthaat maila hona। aap shuddh aatma ho, shuddh par agar zara bhi mitti lag jaae to spashta dikhaai deti,jara bhi dehaabhimaan ki mail aap shuddh aatmaon mein spashta dikhaai degi - baar-baar dehbhaan mein aana arthaat mitti mein khelna va mitti khaana। to aise to nahin ho na! kabhi pichhle sanskaar to nahin aa jaate। jab marjeeva ho gaye to pichhla khatma hua। marjeeva arthaat brahman jeevan। brahman kabhi mitti se nahin khelenge,yeh to shoodrapan ki baaten hain। to sada baap ki yaad ki god mein raho। yaad hi yaad hai, laadle bachchon ko maa-baap god mein rakhte, mitti mein nahin jaane dete, to aap laadle bachche ho na - to mitti mein nahin khel sakte। ratnon se khelte raho। mitti mein khelne vaale baap ke bachche ho nahin sakte। royal baap ke bachche mitti se nahin khelte। to sabse bade se bade baap ke bachche sada gyaan ratnon se khelne vaali shreshtha aatmaayen - aise ho na। achha।

kaisi bhi paristhiti ho lekin sada baap ka saath smriti mein rahe to maayaajeet, baap ko saathi banaane se vijayi ratan ho jaayenge। baap ka saath yaad rahe to sada khush aur sada nirvighna rahenge। ek se double ban gaye - to sada mahaaveer rahenge, nirbhay rahenge। baap ka saath hone se maayaajeet ban jaayenge। achha - om shanti।

‘‘praan pyaare avyakt baapdaada ki vyaktigat mulaakaat’’ (bihaar bangaal zone) udeesa :-

jitna vriddhi ko paata jaae utna seva ka inaam milta hai। jo jitni aatmaon ko baap ka parichay dene ke nimitta bante hain utna hi abhi bhi khushi ki praapti hoti hai aur bhavishya mein bhi raajya pad ki praapti hoti hai। vartamaan aur bhavishya donon hi kaal shreshtha ban jaate hain। aisa shreshtha kaarya jisse donon kaal shreshtha ho jaaen to kitna karna chaahiye। laukik mein bhi kisi kaarya mein phaayda adhik hota to din raat lag jaate hain yeh to sabse shreshtha business hai। 21janma ke liye sauda karte ho। is season mein itna jama kar lete ho jo phir aaraam se khaate rahenge। kitni badi lottery milti hai, ek janma ki thodi mehnat aur anek janma khaate rehte। woh had ki lottery hoti usmein ek daalte to laakh ki lottery lag sakti lekin yeh to behad ki avinaashi lottery hai। ghar baithe itni shreshtha praapti hai, ghar baithe bhagwan mil gaya na! to apne bhaagay ki sada mahima karte raho, sada man mein apne bhaagya ke geet gaate hue khush raho,agar kahin bhi lagaav hoga, moh hoga to dukh ki lahar aayegi। kabhi dukh hota hai?baap janma-janmaantar ke liye rona banda karaate hain,dukh hoga to royenge, dukh hi nahin to rona banda। sab sukhdaata ke bachche master ban gaye to dukh to aa nahin sakta। dukh ka darvaaza banda,svarga arthaat sukh ka darvaaza khul gaya। svarga ki ticket le li hai na - sada khushi mein naachte raho, khushi hogi to doosre bhi aapko dekhkar khush honge aur baap ke sameep aayenge। aapki khushi baap ka parichay degi। kabhi bhi viyog mein nahin aana,sada yogi - sangamayug par vishesh praapti baap se milan manaane ki hai। sada milan manaane vaale,aise khushi mein raho। achha –

2. sada apne ko mahaaveer arthaat sada gyaan ke shastradhaari anubhav karte ho?mahaaveer ko sada gyaan ke shastra dikhaate hain। woh hai vijay ki nishaani। aise sada gyaan ke shastran se saje hue mahaaveer ho? shastran ko samay par kaam mein lagaate ho va samay par kaarya nahin karte? aise bhi hota hai cheezen sab hoti hain lekin samay par yaad nahin rahteen। to jaisi paristhiti vaise gyaan ke shastra dvaara mahaaveer ban maayaajeet ban jaate ho। kitne samay mein vijayi hote hain? second mein vijayi bante ho ya time lagta hai। agar time lagta hai to mahaaveer nahin kahenge। agar vijayi banne mein ek ghanta laga aur usi time ke andar antim ghadi aa jaae to kis pad ko praapta honge। to mahaaveer arthaat har ghadi attention। paas with honour vahi hoga jo har paristhiti mein paas hoga - to sada paas hone vaale ho na। achha –

teachers se mulaakaat -teachers ko vishesh lift ki giphÌta hai?kyon? teachers ko sivaae eeshvareey seva ke aur koi bhi bojh nahin। ek ki hi yaad, ek ke hi prati seva। jab ek kaam hai to ek kaam mein achhi tarah se aage badh sakte hain na! pravriti vaalon ko to do kaarya nibhaane padte,teachers sahaj hi ek ras rah sakti hain। baaten karni hain to bhi baap ka parichay dena hai,karmana seva karni hai to bhi baap ne jiske nimitta banaaya। to teachers ko natural gift mili hui hai। is gift ka laabh uthaate raho। teachers arthaat double light। nimitta bankar chalna arthaat double light to sada isi sthiti ka anubhav hona chaahiye। karnakraavanhaar kara rahe hain main nimitta hoon tab saphalta hoti hai। main-pan aaya arthaat maaya ka get khula, nimitta samjha arthaat maaya ka get banda hua। nimitta samajhne se maayaajeet bhi ban jaate, double light bhi ban jaate aur saphalta bhi mil jaati। to teachers ko yeh lift hai। jitna laabh uthaana chaaho utna utha sakti ho। to teachers ko chaik karna chaahiye - hamaara number kya hai! achha - omshaanti।