शुक्रवार 16 अप्रैल 1982 की अव्यक्त मुरली

>

16-04-82 om shanti avyakt baapdaada madhuban

“sangamayugi svaraajya darbaar hi sarvashreshtha darbaar”

baapdaada bole:-

‘‘aaj baapdaada kis darbaar mein aaye hain? aaj ki is darbaar mein baapdaada apne vishwa ke raajya sthaapna ke kaarya mein raajya sahayogi aatmaon ko arthaat apne raajya kaarobaari, raajya adhikaari bachchon ko dekh rahe hain। sangamayugi svaraajya darbaar dekh rahe hain। svaraajya darbaar mein sarva prakaar ki sahayogi aatmaayen chaaron or ki dekh rahe hain। is svaraajya darbaar ke vishesh shiromni ratan baapdaada ke sammukh saakaar roop mein door hote hue bhi maala ke roop mein raajya adhikaari sinhaasan par saamne dikhaai de rahe hain। harek raajya adhikaari sahayogi aatma apni-apni visheshtaaon ki chamak se chamak rahi hain। harek bhinna-bhinna gunon ke gahnon se saje sajaaye hain। sinhaasan ki raajya nishaani kaunsi hoti hai? sabhi darbaar mein baithe ho na! koi aage hain koi peechhe hain lekin hain darbaar mein। to sinhaasan ki raajya nishaani‘chhatrachhaaya roopi chhatri' badi achhi chamak rahi hai। harek double chhatradhaari hai। ek light ka crown arthaat pharishte swaroop ki nishaani saath-saath vishwa kalyaan ke behad seva ke taajdhaari। taaj to sabhi ke oopar hai lekin nambarvaar hain। koi ke donon taaj samaan hain। koi ka ek chhota to doosra bada hai aur koi ke donon hi chhote hain। saath-saath harek raajya adhikaari ke purity ki personality bhi apni-apni hai। roohaaniyat ki royalty apni-apni nambarvaar dikhaai de rahi hai aise svaraajya adhikaari sahayogi aatmaon ki darbaar dekh rahe hain। sangamayugi shreshtha darbaar, bhavishya ki raajya darbaar donon mein kitna antar hai! ab ki darbaar janma-janmaantar ki darbaar ka foundation hai। abhi ke darbaar ki rooprekha bhavishya darbaar ki rooprekha banaane vaali hai। to apne aapko dekh sakte ho ki abhi ke raajya adhikaari sahayogi darbaar mein hamaara sthaan kahaan hai?check karne ka yantra sabhi ke paas hai? jab science vaale naye-naye yantron dvaara dharni se oopar ke aakaashmandal ke chitra kheench sakte hain, vahaan ke vaayumandal ke samaachaar de sakte hain, in advance prakriti ke tatvon ki halchal ke samaachaar de sakte hain to aap sarva shakti-sampanna baap ke authority vaali shreshtha aatmaayen apne divya buddhi ke yantra dvaara teen kaal ki knowledge ke aadhaar se apna vartamaan kaal aur bhavishya kaal nahin jaan sakte? yantra to sabhi ke paas hai na? divya buddhi to sabko praapta hai। is divya buddhi roopi yantra ko kaise use karna hai, kis sthaan par arthaat kis sthiti par sthit ho karke use karna hai,yeh bhi jaante ho! trikaaldarshi-pan ki sthiti ke sthaan par sthit ho teenon kaal ki knowledge ke aadhaar par yantra ko use karo! use karne aata hai? pahle to sthaan par sthit hone aata hai arthaat sthiti mein sthit hone aata hai?to isi yantra dvaara apne aapko dekho ki mera number kaun-sa hai? samjha!

aaj sarvasva tyaagi vaali baat nahin bata rahe hain। abhi last course raha hua hai। aaj baapdaada apne raajya darbaar vaasi saathiyon ko dekh rahe the। sabhi yahaan pahunch gaye hain। aaj ki sabha mein vishesh snehi aatmaayen jyaada hain to snehi aatmaon ko baapdaada bhi sneh ke return mein sneh dene ke liye sneh hi darbaar mein pahunch gaye hain। milan mela manaane ke umang utsaah vaali aatmaayen hain। baapdaada bhi milan manaane ke liye bachchon ke utsaah bhare utsav mein pahunch gaye hain। yeh bhi sneh ke saagar aur nadiyon ka mela hai। to mela manaana arthaat utsav manaana। aaj baapdaada bhi mele ke utsav mein aaye hain। baapdaada mela manaane vaale, sneh paane ke bhaagyashaali aatmaon ko dekh harshit ho rahe hain ki saare itne vishaal vishwa mein athaah sankhya ke beech kaisi-kaisi aatmaon ne milan ka bhaagya le liya! vishwa ke aage na ummeedvaar aatmaon ne apni sarva ummeeden poorn karne ka bhaagya le liya। aur jo vishwa ke aage naameegraami ummeedvaar aatmaayen hain woh sochti aur khojti rah gai। khojna karte-karte khoj mein hi kho gaye। aur aap snehi aatmaon ne sneh ke aadhaar par pa liya। to shreshtha kaun hua? koi shaastraartha karte shaastra mein hi rah gaye। koi mahaatmaayen ban aatma aur paramatma ki chhoti si bhraanti mein apne bhaagya se rah gaye। bachche ban baap ke adhikaar se vanchit rah gaye। bade-bade vaigyaanik khojna karte usi mein kho gaye। raajneetigya yojnaayen banaate-banaate rah gaye। bhole bhakta kan-kan mein dhoondhate hi rah gaye। lekin paaya kinhon ne? bholenaath ke bhole bachchon ne। bade dimaag vaalon ne nahin paaya lekin sachchi dil vaalon ne paaya। isliye kahaavat hai - sachchi dil par saahab raaji। to sabhi sachchi dil se diltakhtansheen ban sakte। sachchi dil se dilaaraam baap ko apna bana sakte। dilaaraam baap sachchi dil ke sivaae second bhi yaad ke roop mein thahar nahin sakte। sachchi dil vaale ki sarvashreshtha sankalp roopi aashaayen sahaj sampanna hoti hain। sachchi dil vaale sada baap ke saath ka saakaar, aakaar,niraakaar teenon roopon mein sada saath ka anubhav karte hain। achha –

aise sada sneh ke saagar se milan manaane vaali bahti gangaayen, sada sneh ke aadhaar se baapdaada ko sarva sambandh mein apna anubhav karne vaale, bholenaath baap se sada ka sauda karne vaale, aise snehi sachchi dil vaali shreshtha aatmaon ko baapdaada ka yaadapyaar aur namaste।''

teachers ke saath:-sevaadhaariyon ko sada buddhi mein kya yaad rehta hai? sirf seva ya yaad aur seva? jab yaad aur seva donon ka balance hoga to vriddhi svatah hoti rahegi। vriddhi ka sahaj upaay hi hai - ‘‘balance''। vartamaan samay ke hisaab se sarva aatmaon ko sabse jyaada shanti ki chaahna hai, to jahaan bhi dekho service vriddhi ko nahin paati, vaise ki vaise rah jaati - vahaan apne sevaakendra ke vaataavran ko aisa banaao jaise ‘shanti-kunda'ho। ek kamra vishesh is vaayumandal aur rooprekha ka banaao jaise baba ka kamra banaate ho aise dhang se banaao jo ghamsaan ke beech mein shanti ka kona dikhaai de। aisa vaayumandal banaane se, shanti ki anubhooti karaane se vriddhi sahaj ho jaayegi। museum theek hai lekin yeh sunne aur dekhne ka saadhan hai। sunne aur jaanne vaalon ke liye museum theek hai lekin jo sun-sun karke thak gaye hain unhon ke liye shanti ka sthaan banaao। majority abhi yahi kehte hain ki aapka sab kuchh sun liya,sab dekh liya। lekin ‘‘pa liya hai'' -aisa koi nahin kehta। anubhav kiya,paaya yeh abhi nahin kehte hain। to anubhav karaane ka saadhan hai - yaad mein bithaao,shanti ka anubhav karaao। do minute bhi shanti ka anubhav kar len to chhod nahin sakte। to donon hi saadhan banaane chaahiye। sirf museum nahin lekin ‘shanti-kunda'ka sthaan bhi। jaise aabu mein museum bhi achha hai lekin shanti ka sthaan bhi aakarshan vaala hai। agar chitron dvaara nahin bhi samajhte to ‘do ghadi'yaad mein bithaane se impression badal jaata hai। ichchha badal jaati hai। samajhte hain ki kuchh mil sakta hai। praapti ho sakti hai। jahaan paane ki ichchha utpanna hoti vahaan aane ke liye bhi kadam uthna sahaj ho jaata। to aise vriddhi ke saadhan apnaao।

baaki sevaadhaari jab sva se aur sarva se santushta hote hain to seva ka, sahayog ka umang utsaah svatah hota hai। kehna karaana nahin padta, santushtata sahaj hi umang ullaas mein laati hai। sevaadhaari ka vishesh yahi lakshya ho ki santushta rehna hai aur karna hai।

2. sada saagar ke kanthe mein rahne vaale holeehans ho। sada saagar ke kanthe par rehte hain aur sada saagar ki lahron se khelte rehte hain। apne ko aise holeehans anubhav karte ho? sada gyaan ratan chugne vaale arthaat dhaaran karne vaale, sada buddhi mein gyaan ratan bharpoor। baaki jo bhi vyartha baat, vyartha drishya… yeh sab kankad ho gaye। hans kabhi kankad nahin lete - sada ratnon ko dhaaran karte। to kabhi bhi kisi bhi vyartha baat ka prabhaav na ho। agar prabhaav mein bhi aa gaye to vahi manan aur vahi varnan hoga। varnan,manan se vaayumandal bhi aisa ban jaata hai। baat kuchh nahin hoti lekin vaayumandal aisa ban jaata hai jaise bade se bada pahaad gir gaya ho। agar apne man mein manan chalta ya mukh se varnan hota to chhoti si baat bhi pahaad ban jaati, kyonki vaayumandal mein phail jaati hai। aur agar us baat ko sama do,saakshi hokar paar kar lo to woh baat raai ho jaayegi। to sada holeehans aur sada saagar ke kanthe par rahne vaale। sada swaroop ki smriti mein raho।

sevaadhaariyon ko sada saphalta swaroop rahne ke liye baap samaan banna hai। ek hi shabd yaad rahe - follow father। jo bhi karma karte ho - check karo ki yeh baap ka kaarya hai? agar baap ka hai to mera bhi hai, baap ka nahin to mera bhi nahin। yeh checking ki kasauti sada saath rahe। to follow father karne vaale arthaat-jo baap ka sankalp vahi mera sankalp,jo baap ka bol vahi mera। isse kya hoga?jaise baap sada saphalta swaroop hai vaise svayan bhi sada saphalta swaroop ho jaayenge। to baap ke kadam par kadam rakhte chalo। koi chalta rahe uske peechhepeechhe jaao to sahaj hi pahunch jaayenge na। to follow father karne vaale mehnat se chhoot jaayenge aur sada sahaj praapti ki anubhooti hoti rahegi।

kumaariyon ke saath:-kumaariyon ka lakshya kya hai? seva karne ke liye pahle svayan mein sarva praapti ka anubhav kar rahi ho? kyonki jitna khajaana apne paas hoga utna auro ko de sakengi। to roj is alaukik padhaai par attention deti ho?padhne ke saath-saath seva ka bhi chance leti ho? sada apne ko godly student samajhte hue study ke taraph attention। jitna svayan study ke taraph attention rakhengi utna auron ko bhi anubhvi ban study kara sakengi। is samay ke hisaab se grihasthi jeevan kya hai, usko bhi dekh rahi ho na! grihasthi jeevan maana is behad ki jel mein phansana। abhi free ho na! kitne bandhanon se mukta ho! to sada hi aise bandhanmukta,jeevanmukta sthiti mein sthit rehna। kabhi bhi yeh sankalp na aaye ki grihasthi jeevan ka bhi anubhav karke dekhen। bahut bhaagyavaan ho jo kumaari jeevan mein baap ki bani ho। to right hainda banna, left hainda nahin।

2. sabhi kumaariyon ne baap se pakka sauda kiya hai?kya sauda kiya hai? aapne kaha - baba ham aapke aur baap ne kaha bachche hamaare, yeh pakka sauda kiya?aur sauda to nahin karengi na! do naanv mein paanv rakhne vaale ka kya haal hoga! na yahaan ke na vahaan ke? to sauda karne mein hoshiyaar ho na! dekho, dete kya ho - puraana shareer jisko sueeyon se silaai karte rehte, kamjor man jismen koi shakti nahin aur kaala dhan… aur lete kya ho? - 21 janma ki guarantee ka raajya। aisa sauda to saare kalpa mein kabhi bhi nahin kiya?to pakka sauda kiya? agreement likh li। baapdaada ko kumaariyaan bahut priy lagti hain - kyonki kumaari surrender hui aur teacher ban gai। kumaar surrender hue to teacher nahin kahlaayenge,sevaadhaari kahlaayenge। kumaari ko teacher ki seat mil jaati hai। aaj kumaari kal usko sab baap samaan nimitta shikshak ki nazar se dekhte hain। to shreshtha ho gai na! kumaari jeevan mein shreshtha ban jaae to ulti seedhi chadhne se bach jaae। aap log na chadhe na utarne ki mehnat। pravritti vaalon ko mehnat karni padti hai। to sada vishwa kalyaankaari kumaari। baapdaada sabhi ko saphalta swaroop samajhte hain - ek do se aage jaao, race karna, rees nahin karna। harek ki visheshta ko dekhkar vishesh aatma banna। achha –

3. kumaari va sevaadhaari ke bajaay apne ko shakti swaroop samjho:- sada apna shiv-shakti swaroop smriti mein rehta hai? shakti swaroop samajhne se seva mein bhi sada shaktishaali aatmaon ki vriddhi hoti rahegi। jaisi dharni hoti hai vaisa phal nikalta hai। to jitni apni svayan ki shaktishaali stage banaate,vaayumandal ko shakti swaroop banaate utna aatmaayen bhi aisi aati hain। nahin to kamjor aatmaayen aayengi aur unke peechhe bahut mehnat karni padegi। to sada apna ‘shiv-shakti swaroop' ‘smriti bhav'। kumaari nahin,sevaadhaari nahin - ‘shiv shakti'। sevaadhaari to bahut hain,yeh title to aajkal bahuton ko mil jaata hai lekin aapki visheshta hai - ‘shiv shakti combined'। isi visheshta ko yaad rakho। seva ki vriddhi mein sahaj aur shreshtha anubhav hota rahega। seva karne ke lift ki gift jo mili hai uska return dena hai। return kya hai? shaktishaali- saphalta moortta।

achha - om shanti।