सोमवार 21 जनवरी 1985 की अव्यक्त मुरली

>

21-01-85om shanti avyakt baapdaadaamdhuban

eeshvareey janma din ki golden gift - ‘‘divya buddhi’’

gyaansaagar, divya buddhi vidhaata baapdaada apne noore jahaan bachchon prati bole

aaj vishwa rachta baap apne jahaan ke noor, noore jahaan bachchon ko dekh rahe hain। aap shreshtha aatmaayen jahaan ke noor ho। arthaat jahaan ki roshni ho। jaise sthool noor nahin to jahaan nahin। kyonki noor arthaat roshni। roshni nahin to andhakaar ke kaaran jahaan nahin। to aap noor nahin to duniya mein roshni nahin। aap hain to roshni ke kaaran jahaan hai। to baapdaada aise jahaan ke noor bachchon ko dekh rahe hain। aise bachchon ki mahima sada gaai aur pooji jaati hai। aise bachche hi vishwa ke raajya bhaagya ke adhikaari bante hain। baapdaada har brahman bachche ko janma lete hi vishesh divya janma-din ki divya do saugaat dete hain। duniya mein manushya aatmaayen, manushya aatma ko gift deti hai lekin brahman bachchon ko svayan baap divya saugaat is sangamayug par dete hain। kya dete hain?ek divya buddhi aur doosra divya netra arthaat roohaani noor। yeh do gift har ek brahman bachche ko janma-din ki gift hai। isi donon gift ko sada saath rakhte in dvaara sada saphalta swaroop rehte ho? divya buddhi hi har bachche ko divya gyaan,divya yaad,divya dhaarna swaroop banaati hai। divya buddhi hi dhaarna karne ki vishesh gift hai। to divya buddhi sada hai arthaat dhaarna swaroop hain। divya buddhi mein arthaat satopradhaan golden buddhi mein jara bhi rajo tamo ka prabhaav padta hai to dhaarna swaroop ke bajaae maaya ke prabhaav mein aa jaate hain। isliye har sahaj baat bhi mushkil anubhav karte hain। sahaj gift ke roop mein praapta hui divya buddhi kamzor hone ke kaaran mehnat anubhav karte hain। jab bhi mushkil va mehnat ka anubhav karte ho to avashya divya buddhi kisi maaya ke roop se prabhaavit hai tab aisa anubhav hota hai। divya buddhi second mein baapdaada ki shreemat dhaaran kar sada samartha,sada achal,sada master sarvashaktivaan sthiti ka anubhav karte hain। shreemat arthaat shreshtha banaane vaali mat। woh kabhi mushkil anubhav nahin kar sakte। shreemat sada sahaj udaane vaali mat hai। lekin dhaaran karne ki divya buddhi zaroor chaahiye। to check karo - apne janma ki saugaat sada saath hai? kabhi maaya apna banaakar divya buddhi ki gift chheen to nahin leti? kabhi maaya ke prabhaav se bhole to nahin ban jaate jo parmaatma gift bhi ganva do। maaya ko bhi eeshvareey gift apna banaane ki chaturaai aati hai। to svayan chatur ban jaati aur aapko bhola bana deti hai। isliye bholenaath baap ke bhole bachche bhale bano lekin maaya ke bhole nahin bano। maaya ke bhole banna arthaat bhoolne vaala banna। eeshvareey divya buddhi ki gift sada chhatrachhaaya hai। aur maaya apni chhaaya daal deti hai। chhatra ud jaata hai, chhaaya rah jaati hai। isliye sada check karo - baap ki gift kaayam hai। divya buddhi ki nishaani gift,lift ka kaarya karti hai। jo shreshtha sankalp roopi switch on kiya us sthiti mein second mein sthit hue। agar divya buddhi ke beech maaya ki chhaaya hai to yeh gift ki lift kaarya nahin karegi। jaise sthool lift bhi kharaab ho jaati hai to kya haalat hoti hai? na oopar na neeche। beech mein latak jaate। shaan ke bajaae pareshaan ho jaate। kitna bhi switch on karenge lekin manjal par pahunchne ki praapti nahin kar sakenge। to yeh gift ki lift kharaab kar dete ho isliye mehnat roopi seedhi chadhni padti hai। phir kya kehte ho? himmat roopi taange chal nahin sakteen। to sahaj ko mushkil kisne banaaya aur kaise banaaya?apne aapko albela banaaya। maaya ki chhaaya mein aa gaye isliye second ki sahaj baat ko bahut samay ki mehnat anubhav karte ho। divya buddhi ki gift alaukik vimaan hai। jis divya vimaan dvaara second ke switch on karne se jahaan chaaho vahaan pahunch sakte ho। switch hai sankalp। science vaale to ek lok ka sair kar sakte। aap teenon lokon ka sair kar sakte ho। second mein vishwa-kalyaankaari swaroop ban saare vishwa ko light aur might de sakte ho। sirf divya buddhi ke vimaan dvaara oonchi sthiti mein sthit ho jaao। jaise unhonne vimaan dvaara himaalay ke oopar raakh daali, nadi mein raakh daali,kislie?chaaron or phailaane ke liye na! unhonne to raakh daali, aap divya buddhi roopi vimaan dvaara sabse oonchi choti ki sthiti mein sthit ho vishwa ki sarva aatmaon ke prati light aur might ki shubh bhaavna aur shreshtha kaamna ke sahayog ki lahar phailaao। vimaan to shaktishaali hai na? sirf use karna aana chaahiye।

baapdaada ki refine shreshtha mat ka saadhan chaahiye। jaise aajkal refine se bhi double refine chalta hai na। to baapdaada ka yeh double refine saadhan hai। jara bhi man-mat, parmat ka kichda hai to kya hoga?oonche jaayenge ya neeche? to yeh check karo - divya buddhi roopi vimaan mein sada double refine saadhan hai?beech mein koi kichda to nahin aa jaata? nahin to yeh vimaan sada sukhdaai hai। jaise satayug mein kabhi bhi koi accident ho nahin sakte। kyonki aapke shreshtha karmon ki shreshtha praalabdha hai। aise koi karma hote nahin jo karma ke bhog ke hisaab se yeh duhkh bhogna pade। aise sangamayugi godly gift divya buddhi sada sarva prakaar ke duhkh aur dhokhe se mukta hain। divya buddhi vaale kabhi dhokhe mein aa nahin sakte। duhkh ki anubhooti kar nahin sakte। sada safe hain। aapdaaon se mukta hain। isliye is godly gift ke mahatva ko jaan is gift ko sada saath rakho। samjha?is gift ka mahatva। gift sabhi ko mili hai ya kisi ki rah gai hai? mili to sabko hain na। sirf sambhaalne aati ya nahin woh aapke oopar hai। sada amritvele check karo - jara bhi kami ho to amritvele theek kar dene se saara din shaktishaali rahega। agar svayan theek nahin kar sakte ho to theek karaao। lekin amritevele hi theek kar do। achha - divya drishti ki baat phir sunaayenge। divya drishti kaho, divya netra kaho, roohaani noor kaho baat ek hi hai। is samay to divya buddhi ki yeh gift sabhi ke paas hai na। sone ka paatra ho na। yahi divya buddhi hai। madhuban mein sabhi divya buddhi roopi sampoorn sone ka paatra lekar aaye ho na। sachche sone mein silver va copper mix to nahin hai na! satopradhaan arthaat sampoorn sona। isko hi divya buddhi kaha jaata hai। achha - jis bhi taraph se aaye ho, sab taraph se gyaan nadiyaan aae saagar mein samaai। nadi aur saagar ka mela hai। mahaan mela manaane aaye ho na। milan mela manaane aaye ho। baapdaada bhi sarva gyaan nadiyon ko dekh harshit hote hain ki kaise umang-utsaah se kahaan-kahaan se is milan mele mein pahunch gaye hain। achha –

sada divya buddhi ke golden gift ko kaarya mein laane vaale, sada baap samaan chatur sujaan ban maaya ki chaturaai ko jaanne vaale,sada baap ki chhatrachhaaya mein rah maaya ki chhaaya se door rahne vaale, sada gyaan saagar se madhur milan mela manaane vaale,har mushkil ko sahaj banaane vaale, vishwa-kalyaankaari,shreshtha sthiti mein sthit rahne vaale, shreshtha aatmaon ko baapdaada ka yaadapyaar aur namaste।’’

personal mulaakaat - 1. drishti badalne se srishti badal gai hai na! drishti shreshtha ho gai to srishti bhi shreshtha ho gai! abhi srishti hi baap hai। baap mein srishti samaai hui hai। aise hi anubhav hota hai na! jahaan bhi dekho, suno to baap bhi saath mein anubhav hota hai na! aisa snehi saare vishwa mein koi ho nahin sakta jo har second, har sankalp mein saath nibhaaye। laukik mein koi kitna bhi snehi ho lekin phir bhi sada saath nahin de sakta। yeh to svapna me bhi saath deta hai। aisa saath nibhaane vaala saathi mila hai, isliye srishti badal gai। abhi laukik mein bhi alaukik anubhav karte ho na! laukik mein jo bhi sambandh dekhte to sachcha sambandh svatah smriti mein aata, isse un aatmaon ko bhi shakti mil jaati। jab baap sada saath hai to bephkar baadshaah ho। theek hoga ya nahin yeh bhi sochne ki jaroorat nahin rehti। jab baap saath hai to sab theek hi theek hai। to saath ka anubhav karte hue udte chalo। sochna bhi baap ka kaam hai, hamaara kaam hai saath mein magan rehna। isliye kamzor soch bhi samaapta। sada bephikar baadshaah raho,abhi bhi baadshaah aur sada ke liye baadshaah।

2. sada apne ko saphalta ke sitaare samjho aur doosri aatmaon ko bhi saphalta ki chaabi dete raho। is seva se sabhi aatmaayen khush hokar aapko dil se aasheervaad dengi। baap aur sarva ki aasheervaaden hi aage badhaati hain।