शुक्रवार 27 नवंबर 1987 की अव्यक्त मुरली

>

27-11-87om shanti avyakt baapdaadaamdhuban

behad ke vairaagi hi sachche raajarishi

rishikumaar/kumaariyon ko brahma baap samaan raajarishi sthiti ki nishaaniyaan bataate hue sarva sahayogi baapdaada bole

aaj baapdaada sarva raajarishiyon ki darbaar ko dekh rahe hain। saare kalpa mein raajaaon ki darbaar anek baar lagti hai lekin yeh raajarishiyon ki darbaar is sangamayug par hi lagti hai। raaja bhi ho aur rishi bhi ho। yeh visheshta is samay ki is darbaar ki gaai hui hai। ek taraph raajaai arthaat sarva praaptiyon ke adhikaari aur doosre taraph rishi arthaat behad ke vairaag vritti vaale। ek taraph sarva praapti ke adhikaar ka nasha aur doosre taraph behad ke vairaag ka alaukik nasha। jitna hi shreshtha bhaagya utna hi shreshtha tyaag। donon ka balance। isko kehte hain raajarishi। aise raajarishi bachchon ka balance dekh rahe the। abhi-abhi adhikaareepan ka nasha aur abhi-abhi vairaag vritti ka nasha - is practice mein kahaan tak sthit ho sakte hain arthaat dono sthitiyon ka samaan abhyaas kahaan tak kar rahe hain - yeh check kar rahe the। nambarvaar abhyaasi to sab bachche hain hi। lekin samay pramaan in donon abhyaas ko aur bhi jyaada se jyaada badhaate chalo। behad ke vairaag vritti ka arth hi hai - vairaag arthaat kinaara karna nahin, lekin sarva praapti hote hue bhi had ki aakarshan man ko va buddhi ko aakarshan mein nahin laave। behad arthaat main sampoorn sampanna aatma baap samaan sada sarva karmendriyon ki raajya adhikaari। in sookshm shaktiyon, man-buddhi-sanskaar ke bhi adhikaari। sankalp maatra bhi adheenta na ho। isko kehte hain raajarishi arthaat behad ki vairaag vritti। yeh puraani deh va deh ki puraani duniya va vyakta bhaav,vaibhvon ka bhaav - is sab aakarshan se sada aur sahaj door rahne vaale।

jaise science ki shakti dharni ki aakarshan se pare kar leti hai, aise silence ki shakti in sab had ki aakarshanon se door le jaati hai। isko kehte hain - sampoorn sampanna baap samaan sthiti। to aisi sthiti ke abhyaasi bane ho? sthool karmendriyaan - yeh to bahut moti baat hai। karmendriy-jeet banna, yeh phir bhi sahaj hai। lekin man-buddhi-sanskaar,in sookshm shaktiyon par vijayi banna - yeh sookshm abhyaas hai। jis samay jo sankalp, jo sanskaar emerge karne chaahen vahi sankalp,vahi sanskaar sahaj apna saken - isko kehte hain sookshm shaktiyon par vijay arthaat raajarishi sthiti। jaise sthool karmendriyon ko order karte ho ki yeh karo,yeh na karo। haath neeche karo,oopar ho,to oopar ho jaata hai na। aise sankalp aur sanskaar aur nirnayshakti‘buddhi'aise hi order par chale। aatma arthaat raaja, man ko arthaat sankalp shakti ko order kare ki abhi-abhi ekaagrachitta ho jaao, ek sankalp mein sthit ho jaao। to raaja ka order usi ghadi usi prakaar se maanna - yeh hai raaj-adhikaari ki nishaani। aise nahin ki teen chaar minute ke abhyaas baad man maane ya ekaagrata ke bajaae halchal ke baad ekaagra bane, isko kya kahenge?adhikaari kahenge? to aisi checking karo। kyonki pahle se hi sunaaya hai ki antim samay ki antim result ka samay ek second ka question ek hi hoga। in sookshm shaktiyon ke adhikaari banne ka abhyaas agar nahin hoga artheet aapka man raaja ka order ek ghadi ke bajaae teen ghadiyon mein maanta hai to raajya adhikaari kahlaayengen va ek second ke antim paper mein paas honge? kitne marks milenge?

aise hi buddhi arthaat nirnay shakti par bhi adhikaar ho । artheet jis samay jo paristhiti hai usi pramaan, usi ghadi nirnay karna - isko kahenge buddhi par adhikaar। aise nahin ki paristhiti va samay beet jaae,phir nirnay ho ki yeh nahin hona chaahiye tha,agar yeh nirnay karte to bahut achha hota। to samay par aur yathaartha nirnay hona - yeh nishaani hai raajya adhikaari aatma ki। to check karo ki saare din mein raajya adhikaari arthaat in sookshm shaktiyon ko bhi order mein chalaane vaale kahaan tak rahe?roj apne karmachaariyon ki darbaar lagaao। check karo ki sthool karmendriyaan va sookshm shaktiyaan - ye karmachaari kantrol mein rahe va nahin rahe? abhi se raajya-adhikaari banne ke sanskaar anek janma raajya- adhikaari banaayenge। samjha? isi prakaar sanskaar kahaan dhokha to nahin dete hain? aadi,anaadi,sanskaar;anaadi shuddh shreshtha paavan sanskaar hain,sarvagun swaroop sanskaar hain aur aadi dev aatma ke raajya adhikaareepan ke sanskaar sarva praaptisva roop ke sanskaar hain, sampanna,sampoorn ke natural sanskaar hain। to sanskaar shakti ke oopar raajya adhikaari arthaat sada anaadi aadi sanskaar emerge hon। natural sanskaar hon। madhya arthaat dvaapar se pravesh hone vaale sanskaar apne taraph aakarshit nahin karen। sanskaaron ke vash majboor na banen। jaise kehte ho na ki mere puraane sanskaar hain। vaastav mein anaadi aur aadi sanskaar hi puraane hain। yeh to madhya,dvaapar se aaye hue sanskaar hain। to puraane sanskaar aadi ke hue va madhya ke hue? koi bhi had ki aakarshan ke sanskaar agar aakarshit karte hain to sanskaaron par raajya adhikaari kahenge? raajya ke andar ek shakti va ek karmachaari ‘karmendriy'bhi agar order par nahin hai to usko sampoorn raajya adhikaari kahenge? aap sab bachche challenge karte ho ki ham ek raajya, ek dharma, ek mat sthaapan karne vaale hain। yeh challenge sabhi brahmaakumaar aur brahmaakumaariyaan karte ho na;to woh kab sthaapan hoga? bhavishya mein sthaapan hoga? sthaapna ke nimitta kaun hai? brahma hai va vishnu hai? brahma dvaara sthaapna hoti hai na। jahaan brahma hai to brahman bhi saath hain hi। brahma dvaara arthaat braahmanon dvaara sthaapna, woh kab hogi? sangam par va satayug mein? vahaan to paalna hogi na। brahma va braahmanon dvaara sthaapna, yeh abhi honi hai। to pahle sva ke raajya mein dekhon ki ek raajya, ek dharma (dhaarna),ek mat hai? agar ek karmendriy bhi maaya ki doosri mat par hai to ek raajya,ek mat nahin kahenge। to pahle yeh check karo ki ek raajya, ek dharma sva ke raajya mein sthaapan kiya hai va kabhi maaya takhta par baith jaati, kabhi aap baith jaate ho? challenge ko practical mein laaya hai va nahin - yeh check karo। chaahe anaadi sanskaar aur emerge ho jaaen madhya ke sanskaar, to yeh adhikaareepan nahin hua na।

to raajarishi arthaat sarva ke raajya adhikaari। raajya adhikaari sada aur sahaj tab hoga jab rishi arthaat behad ke vairaag vritti ke abhyaasi honge। vairaag arthaat lagaav nahin। sada baap ke pyaare। yeh pyaaraapan hi nyaara banaata hai। baap ka pyaara ban, nyaara ban kaarya mein aana - isko kehte hain behad ka vairaagi। baap ka pyaara nahin to nyaara bhi nahin ban sakte,lagaav mein aa jaayenge। baap ka pyaara aur kisi vyakti va vaibhav ka pyaara ho nahin sakta। woh sada aakarshan se pare arthaat nyaare honge। isko kehte hain nirlep sthiti। koi bhi had ki aakarshan ki lep mein aane vaale nahin। rachna va saadhnon ko nirlep hokar kaarya mein laaven। aise behad ke vairaagi, sachche raajarishi bane ho?aise nahin sochna ki sirf ek va do kamzori rah gai hai, sirf ek sookshm shakti va karmendriy kantrol mein kam hai, baaki sab theek hai। lekin jahaan ek bhi kamzori hai to woh maaya ka get hai। chaahe chhota, chaahe bada get ho lekin get to hai na। agar get khula rah gaya to maayaajeet jagatjeet kaise ban sakenge?

ek taraph ek raajya, ek dharma ki sunahri duniya ka aahvaan kar rahe ho aur saath-saath phir kamzori arthaat maaya ka bhi aahvaan kar rahe ho to result kya hogi? duvidha mein rah jaayenge। isliye yeh chhoti baat nahin samjho। samay pada hai, kar lenge। auron mein bhi to bahut kuchh hai,mere mein to sirf ek hi baat hai। doosre ko dekhte-dekhte svayan na rah jaao। ‘si brahma father'kaha hua hai,follow father kaha hua hai। sarva ke sahayogi, snehi zaroor bano, gun graahak zaroor bano lekin follow father। brahma baap ki last stage raajarishi ki dekhi। itna bachchon ka pyaara hote bhi, saamne dekhte hue bhi nyaaraapan hi dekha na। behad ka vairaag - yahi sthiti practical mein dekhi। karmabhog hote bhi karmendriyon par adhikaari ban arthaat raajarishi ban sampoorn sthiti ka anubhav karaaya। isliye kehte hain - ‘follow father'। to apne raajya adhikaariyon,raajya kaarobaariyon ko sada dekhna hai। koi bhi raajya kaarobaari kahaan dhokha na den। samjha? achha।

aaj bhinna-bhinna sthaanon se ek sthaan par pahunch gaye hain। isi ko hi nadi saagar ka mela kaha jaata hai। mele mein milna bhi hota aur maal bhi milta hai। isliye sabhi mele mein pahunch gaye hain। naye bachchon ki season ka yeh last group hai। puraanon ko bhi nayon ke saath chance mil gaya hai। prakriti bhi abhi tak pyaar se sahayog de rahi hai। lekin iska advantage (laabh) nahin lena। nahin to prakriti bhi hoshiyaar hai। achha।

chaaron or ke sada raajarishi bachchon ko, sada sva par raajya karne vaale sada vijayi ban nirvighna raajya kaarobaar chalaane vaale raajya adhikaari bachchon ko, sada behad ke vairaag vritti mein rahne vaale sabhi rishikumaar-kumaariyon ko, sada baap ke pyaare ban nyaare ho kaarya karne vaale nyaare aur pyaare bachchon ko, sada brahma baap ko follow karne vaale vaphaadaar bachchon ko baapdaada ka yaadapyaar aur namaste।''

party se avyakt baapdaada ki mulaakaat

(1) anek baar ki vijayi aatmaayen hain,aisa anubhav karte ho? vijayi banna mushkil lagta hai ya sahaj? kyonki jo sahaj baat hoti hai woh sada ho sakti hai, mushkil baat sada nahin hoti। jo anek baar kaarya kiya hua hota hai, woh svatah hi sahaj ho jaata hai। kabhi koi naya kaam kiya jaata hai to pahle mushkil lagta hai lekin jab kar liya jaata hai to vahi mushkil kaam sahaj lagta hai। to aap sabhi is ek baar ke vijayi nahin ho,anek baar ke vijayi ho। anek baar ke vijayi arthaat sada sahaj vijay ka anubhav karne vaale। jo sahaj vijayi hain unko har kadam mein aise hi anubhav hota ki yeh sab kaarya hue hi pade hain, har kadam mein vijay hui padi hai। hogi ya nahin - yeh sankalp bhi nahin uth sakta। jab nishchay hai ki anek baar ke vijayi hain to hogi ya nahin hogi - yeh question nahin। nishchay ki nishaani hai nasha aur nashe ki nishaani hai khushi। jisko nasha hoga woh sada khushi mein rahega। had ke vijayi mein bhi kitni khushi hoti hai। jab bhi kahaan vijay praapta karte hain, to baaje-gaaje bajaate hain na। to jisko nishchay aur nasha hai to khushi zaroor hogi। woh sada khushi mein naachta rahega। shareer se to koi naach sakte hain, koi nahin bhi naach sakte hain lekin man mein khushi ka naachna - yeh to bed par beemaar bhi naach sakta hai। koi bhi ho, yeh naachna sabke liye sahaj hai। kyonki vijayi hona arthaat svatah khushi ke baaje bajna। jab baaje bajte hain to paanv aapehi chalte rehte hain। jo nahin bhi jaante honge, woh bhi baithe-baithe naachte rahenge। paanv hilega, kaandh hilega। to aap sabhi anek baar ke vijayi ho - isi khushi mein sada aage badhte chalo। duniya mein sabko aavashyakta hi hai khushi ki। chaahe sab praaptiyaan hon lekin khushi ki praapti nahin hai। to jo avinaashi khushi ki aavashyakta duniya ko hai,woh khushi sada baantate raho।

(2) apne ko bhaagyavaan samajh har kadam mein shreshtha bhaagya ka anubhav karte ho?kyonki is samay baap bhaagyavidhaata ban bhaagya dene ke liye aaye hain। bhaagyavidhaata bhaagya baant raha hai। baantane ke samay jo jitna lene chaahe utna le sakta hai। sabhi ko adhikaar hai। jo le, jitna le। to aise samay par kitna bhaagya banaaya hai, yeh check karo। kyonki ab nahin to phir kab nahin। isliye har kadam mein bhaagya ki lakeer kheenchane ka kalam baap ne sabhi bachchon ko diya hai। kalam haath mein hai aur chhutti hai - jitni lakeer kheenchana chaaho utna kheench sakte ho। kitna badhiya chance hai! to sada is bhaagyavaan samay ke mahatva ko jaan itna hi jama karte ho na? aise na ho ki chaahte to bahut the lekin kar na sake,karna to bahut tha lekin kiya itna। yeh apne prati ulhana rah na jaae। samjha? to sada bhaagya ki lakeer shreshtha banaate chalo aur auron ko bhi is shreshtha bhaagya ki pahchaan dete chalo। ‘vaah mera shreshtha bhaagya!' yahi khushi ke geet sada gaate raho।

(3) sada apne ko svadarshan-chakradhaari shreshtha aatmaayen anubhav karte ho?svadarshan-chakra arthaat sada maaya ke anek chakron se chhudaane vaala। svadarshan-chakra sada ke liye chakravarti raajya bhaagya ke adhikaari bana deta hai। yeh svadarshan-chakra ka gyaan is sangamayug par hi praapta hota hai। brahman aatmaayen ho,isliye svadarshan-chakradhaari ho। braahmanon ko sada choti par dikhaate hain। choti arthaat ooncha। brahman arthaat sada shreshtha karma karne vaale, brahman arthaat sada shreshtha dharma (dhaarnaaon) mein rahne vaale - aise brahman ho na? naamdhaari brahman nahin, kaam karne vaale brahman। kyonki braahmanon ka abhi ant mein bhi kitna naam hai! aap sachche braahmanon ka hi yeh yaadgaar ab tak chal raha hai। koi bhi shreshtha kaam hoga to braahmanon ko hi bulaayenge। kyonki brahman hi itne shreshtha hain। to kis samay itne shreshtha bane ho? abhi bane ho, isliye abhi tak bhi shreshtha kaarya ka yaadgaar chala aa raha hai। har sankalp, har bol, har karma shreshtha karne vaale, aise svadarshan- chakradhaari shreshtha brahman hain - sada isi smriti mein raho। achha।