रविवार 19 नवंबर 1989 की अव्यक्त मुरली

>

19-11-89 om shanti avyakt baapdaadaamdhuban

tan,man, dhan aur jan ka bhaagya

avyakt baapdaada apne bachchon prati bole

aaj sachche saaheb apne saahebjaade aur saahebjaadiyon ko dekh rahe hain। baap ko kehte hi hain - ‘satya'। isliye baapdaada dvaara sthaapan kiye hue yug ka naam bhi satayug hai। baap ki mahima bhi sat baap, sat shikshak, satguru kehte hain। satya ki mahima sada hi shreshtha rahi hai, sat baap dvaara aap sabhi satya naaraayan banne ke liye sachchi katha sun rahe ho। aisa sachcha saaheb apne bachchon ko dekh rahe hain ki kitne bachchon ne sachche saaheb ko raaji kiya hai? sachche saaheb ki sabse badi visheshta hai - woh daata,vidhaata, vardaata hai। raaji rahne vaale bachchon ki nishaani - sada daata raaji hai,isliye aisi aatmaayen sada apne ko gyaan ke khazaane, shaktiyon ke khazaane, gunon ke khazaane, sab khazaanon se apne ko bharpoor anubhav karengi,kabhi bhi apne ko khazaanon se khaali nahin samjhengi। koi bhi gun va shakti va gyaan ke guhya raaz se vanchit nahin hongi। gunon ki va shaktiyon ki parsentej ho sakti hai lekin koi gun va koi shakti aisi aatma mein ho hi nahin - yeh nahin ho sakta। jaise samay pramaan kai bachche kehte hain ki mere mein aur shaktiyaan to hain lekin yeh shakti va gun nahin hai। to ‘nahin' shabd nishedh hoga। aise daata ke bachche sada dhanvaan honge arthaat bharpoor va sampanna honge। doosri mahima hai - ‘bhaagyavidhaata'। to bhaagya-vidhaata saaheb ke raaji ki nishaani - aise master bhaagya vidhaata bachchon ke mastak par sada bhaagya ka sitaara chamakta rehta hai arthaat unki moorta aur soorat se sada roohaani chamak dikhaai deti hai। moorta se sada raaji rahne ke features dikhaai denge,soorat se sada roohaani seerat anubhav hogi। isko kehte hain mastak mein chamakta hua bhaagya ka sitaara। har baat mein tan,man, dhan,jan - chaaron roop se apna bhaagya anubhav karenge। aise nahin ki inmen se koi ek bhaagya ke praapti ki kami mahsoos karenge। mere bhaagya mein teen baaten to theek hain, baaki ek baat ki kami hai - aise nahin।

tan ka bhaagya -tan ka hisaab-kitaab kabhi praapti va purooshaartha ke maarga mein vighna anubhav nahin hoga,tan kabhi bhi seva se vanchit hone nahin dega। karmabhog ke samay bhi aise bhaagyavaan kisi-na-kisi prakaar se seva ke nimitta banenge। karmabhog ko chalaayega lekin karmabhog ke vash chillaayega nahin। chillaana arthaat karmabhog ka baar-baar varnan karna va baar-baar karmabhog ki taraph buddhi aur samay lagaate rehna। chhoti-si baat ko bada vistaar karna - isko kehte hain ‘chillaana'aur badi baat ko gyaan ke saar se samaapta karna - isko kehte hain ‘chalaana'। to sada yeh baat yaad rakho -yogi jeevan ke liye chaahe chhota karmabhog ho, chaahe bada ho lekin uska varnan nahin karo, karmabhog ki kahaani ka vistaar nahin karo। kyonki varnan karne mein samay aur shakti usi taraph hone ke kaaran health kaanshiyas ho jaate hain, soul kaanshiyas (aatma-abhimaani) nahin। yahi health kaanshiyasnes roohaani shakti se dheere-dheere narvas bana deti hai, isliye kabhi bhi jyaada varnan nahin karo। yogi jeevan kamarbhog ko karmayog mein parivartan karne vaala hai। yeh hai - tan ke bhaagya ki nishaaniyaan।

man ka bhaagya -man sada harshit rahega। kyonki bhaagya ke praapti ki nishaani harshit rehna hi hai। jo bharpoor hota hai woh sada hi man se muskaraata rehta hai। man ke bhaagyavaan sada ichchha-maatram-avidya ki sthiti vaale hote hain। bhaagyavidhaata ke raaji hone ke kaaran sarva praapti sampanna anubhav karne ke kaaran man ka lagaav va jhukaav vyakti va vastu ke taraph nahin hoga। isko hi saar roop mein kehte ho ‘manmanaabhav'। man ko baap ke taraph lagaane mein mehnat nahin hogi lekin sahaj hi man baap ke muhabbat ke sansaar mein rahega। ‘ek baap doosra na koi' - isi anubhooti ko man ka bhaagya kehte hain।

dhan ka bhaagya -gyaan dhan to hai hi lekin sthool dhan ka bhi mahattva hai। dhan ke bhaagya ka arth yeh nahin ki brahman jeevan mein laakhon-pati va karodapti banenge। lekin dhan ke bhaagya ki nishaani hai ki sangamayug par jitna aap brahman aatmaon ko khaane-peene aur aaraam se rahne ke liye aavashyakta hai,utna aaraam se milega। aur saath-saath dhan chaahiye seva ke liye। to seva ke liye bhi kabhi samay par kami va kheenchaataan anubhav nahin karenge। kaise bhi, kahaan se bhi seva ke samay par bhaagyavidhaata baap kisko nimitta bana hi dete hain। dhan ke bhaagyavaan kabhi bhi apne ‘naam'ki va ‘shaan'ki ichchha ke kaaran seva nahin karenge। agar ‘naam-shaan'ki ichchha hai to aise samay par bhaagyavidhaata sahayog nahin dilaayega।

‘aavashyakta'aur ‘ichchha'mein raat-din ka antar hai। sachchi aavashyakta hai aur sachcha man hai to koi bhi seva ke kaarya mein, kaarya to saphal hoga hi lekin bhandaari mein aur hi bharpoor ho jaayega, bachega। isliye gaayan hai - ‘‘shiv ke bhandaare aur bhandaari sada bharpoor''। to sachchi dil vaalon ki aur sachche saaheb ke raaji hone ki nishaani hai - ‘bhandaara bhi bharpoor, bhandaari bhi bharpoor'। yeh hai dhan ke bhaagya ki nishaani। vistaar to bahut hai lekin saar mein suna rahe hain।

jan ka bhaagya - jan arthaat brahman parivaar va laukik parivaar, laukik sambandh mein aane vaali aatmaayen va alaukik sambandh mein aane vaali aatmaayen। to jan dvaara bhaagyavaan ki pahli nishaani hai - jan ke bhaagyavaan aatma ko jan dvaara sada sneh aur sahayog ki praapti rahegi। kam se kam 95pratishat aatmaon se praapti ka anubhav avashya hoga। pahle bhi sunaaya tha ki 5 pratishat aatmaon ka hisaabkitaab bhi chuktu hota hai, isliye unhon dvaara kabhi sneh milega,kabhi pareeksha bhi hogi। lekin 5pratishat se jyaada nahin hona chaahiye। aisi aatmaon se bhi dheere- dheere shubh bhaavna shubh kaamna dvaara hisaab se chuktu karte raho। jab hisaab chuktu ho jaayega to kitaab bhi khatma ho jaayega na! phir hisaab-kitaab rahega hi nahin। to bhaagyavaan aatma ki nishaani hai - jan ke rahe hue hisaab-kitaab ko sahaj chuktu karte rehna aur 95 pratishat aatmaon dvaara sada sneh aur sahayog ki anubhooti karna। jan ke bhaagyavaan aatmaayen, jan ke samparka-sambandh mein aate ‘sada prasanna rahegi',prashnachitta nahin lekin prasannachitta - yeh aisa kyon karta va kyon kehta, yeh baat aise nahin,aise honi chaahiye। chitta ke andar yeh prashn utpanna hone vaale ko ‘prashnachitta'kaha jaata hai aur prashnachitta kabhi sada prasanna nahin rah sakta। uske chitta mein sada‘kyon ki queue' (line) lagi rehti hai। isliye us queue ko samaapta karne mein hi samay chala jaata hai aur yeh queue phir aisi hoti hai jo aap chhodne chaaho to bhi nahin chhod sakte, samay dena hi padega। kyonki is queue ka rachta aap ho, jab rachna rach li to paalna karni padegi, paalna se bach nahin sakte। chaahe kitne bhi majboor ho jaao, lekin samay, enarji deni hi padegi। isliye is vyartha rachna ko kantrol karo। yeh birth kantrol karo। samjha? himmat hai? jaise log kah dete hain na ki yeh to eeshvar ki den hai, hamaari thodi hi galti hai। aise hi brahman aatmaayen phir kehti hain - drama ki noondh hai। lekin drama ke master creator, master knowledgeful ban har karma ko shreshtha banaate chalo। achha!

teachers ne suna! sachcha saaheb mere upar kitna raaji hai,iska raaz to suna na! raaz sunne se sabhi teachers raazayukta bani va dil mein aata hai ki is bhaagya ki mere mein kami hai? kabhi dhan ki kheenchaataan mein, kabhi jan ki kheenchaataan mein - aisi jeevan ka anubhav to nahin karti ho na! sunaaya tha ek hi slogan vishesh nimitta teachers prati,lekin hai sabhi ke prati। har baat mein baap ki shreemat pramaan ‘ji hajoor-ji hajoor'karte raho। bachchon ka ‘ji hajoor' karna aur baap ka bachchon ke aage‘haajar hajoor'hona। jab hajoor haajar ho gaya to kisi bhi baat ki kami nahin rahegi,sada sampanna ho jaayenge। daata aur bhaagyavidhaata - donon ki praaptiyon ke bhaagya ka sitaara mastak par chamakne lagega। teachers ko to drama anusaar bahut bhaagya mila hua hai। saara din sivaae baap aur seva ke aur kaam hi kya hai! dhandha hi yeh hai। pravritti vaalon ko to kitna nibhaana padta hai। aap logon ka to ek hi kaam hai, kai baaton se svatantra panchhi ho। samajhte ho apne bhaagya ko? koi sone ka pinjara, heeron ka pinjara to nahin bana dete?banaate bhi khud hain, phansate bhi khud hain। baap ne to svatantra panchhi banaaya,udta panchhi banaaya। bahut-bahut-bahut lucky ho। samjha? harek ko bhaagya ki visheshta avashya mili hui hai। pravritti maarga vaalon ki visheshta apni,teachers ki visheshta apni,geeta-paathshaala vaalon ki visheshta apni - bhinna-bhinna visheshtaaon se sabhi vishesh aatmaayen ho। lekin sevaakendra par rahne vaali nimitta teachers ko bahut achha chance hai। achha।

sada sarva prakaar ke bhaagya ko anubhav karne vaale anubhvi aatmaon ko,sada har kadam mein ‘ji hajoor' karne vaale baap ke madad ke adhikaari shreshtha aatmaon ko, sada prashnachit ke badle prasannachit rahne vaale - aise prashansa ke yogya yogi aatmaon ko baapdaada ka yaadapyaar aur namaste।

panjaab, hariyaana, himaachal group:- sabhi apne ko mahaaveer aur mahaaveerniyaan samajhte ho?mahaaveer to ho lekin sada mahaaveer ho? ya kabhi mahaaveer, kabhi thoda kamzor ho jaate ho? sada ke mahaaveer arthaat sada light house aur might house। gyaan hai light aur yog hai might। to mahaaveer arthaat gyaani tu aatma bhi aur yogi tu aatma bhi। gyaan aur yog - donon shaktiyaan - light aur might sampanna hon,isko kehte hain - ‘mahaaveer'। kisi bhi paristhiti mein gyaan arthaat light ki kami nahin ho aur might arthaat yog ki kami nahin ho। agar ek ki bhi kami hai to paristhiti mein second mein paas nahin ho sakenge, time lag jaayega। paas to ho jaayenge lekin samay par paas nahin hue to woh paas kya hue! jaise sthool padhaai mein bhi agar ek subject mein bhi fail ho jaate hain to phir se ek varsha padhna padta hai। saal ke baad phir paas hote hain। to samay gaya na! aise jo gyaani aur yogi tu aatma,light aur might - donon swaroop nahin hain, uski bhi paristhiti se paas hone mein samay lag jaata hai। agar samay par paas na hone ke sanskaar pad jaate hain to final mein bhi woh sanskaar full paas hone nahin dete। to paas hone vaale to hain lekin samay par paas hone vaale nahin। jo sada samay par full paas hota hai,usko kehte hain paas-with-honour। paas-with-honour arthaat dharmaraaj bhi usko honour dega। dharmaraajpuri mein bhi sajaayen nahin hongi,honour hoga। gaayan hoga ki yeh paas-with-honour hain।

to paas-with-honour hone ke liye vishesh apne ko koi baat mein,koi bhi sanskaar mein, svabhaav mein, gunon mein, shakti mein kami nahin rakhna। sab baaton mein complete banna arthaat paas-with-honour banna। to sabhi aise bane ho ya ban rahe ho? (ban rahe hain)। iseelie hi vinaash rooka hua hai। aapne roka hai। vishwa ke vinaash arthaat parivartan ke pahle braahmanon ki kamiyon ka vinaash chaahiye। agar braahmanon ki kamiyon ka vinaash nahin hua to vishwa ka vinaash arthaat parivartan kaise hoga। to parivartan ke aadhaarmoortta aap brahman hain।

panjaab,hariyaana, himaachal vaalon ko to pahle taiyaar hona chaahiye। aap ant laane vaale taiyaar nahin ho, isliye aatankavaadi taiyaar ho gaye hain। to sabhi pahla number lene vaale ho ya jo bhi mile usmein raaji rahenge?anekon se to achhe hain hi - aisa to nahin sochte ho?achhe to ho hi lekin achhe te achha banna hai। koton mein koi ban gaye - yeh badi baat nahin hai, lekin koi mein bhi koi banna hai। isliye sada ever ready। ant mein ready - nahin, ever ready maana sada ready rahne vaale। agar kahenge ban rahe hain to purooshaartha teevra nahin hoga।

baapdaada panjaab zone ko sada aage rakhte hain। isliye ever ready rehna। baap ki najar pahle panjaab par padi na। to jab baap ki najar pahle padi to aana bhi pahle number mein hai। foundation vaale ho। to foundation sadaiv pakka rehta hai, agar kachcha hua to saari building kachchi ho jaati hai। to sada isi vardaan ko yaad rakhna ki har paristhiti mein paas-with-honour banne vaale hain। iski vidhi hai - ever ready rehna। achha!

panjaab zone tatha yu.pi. group:- gyaan saagar baap se nikli hui gyaan gangaayen hain,aisa anubhav karte ho? yu.pi. mein ganga ka mahattva kyon hai? kyonki aur koi nadi ko patit-paavni nahin kehte hain, ganga ko hi patit paavni kehte hain। jamuna nadi ko patit-paavni nahin kehte, use charitra-bhoomi kehte hain। panjaab mein bhi nadiyaan bahut hain। nadi jahaan se niklegi to hara-bhara kar degi na! hariyaali, khushhaali। to aap sabka bhi kaam hai sabko hara-bhara banaana। jo aatmaayen sukh-shanti ke ras se sookhe hue hain, aise sookhe hue ko phir se hara banaana, hariyaali laana - yahi aapka kaam hai। jahaan sookha hota hai vahaan maanav kangaal ban jaata hai aur jahaan hariyaali hoti hai vahaan maanav khushhaal ho jaata hai। to nai duniya hariyaali ki duniya hai aur puraani duniya sookhi duniya hai। aap sab to bahti hui bharpoor nadiyaan ho na! to chalte-phirte apne har kadam se aatmaon ko hara-bhara banaao।

is samay sabka vishesh attention panjaab ki taraph hai। kis baat ke liye? akaale mrityu ke liye। sabse jyaada akaale mrityu panjaab mein ho rahe hain। to aap sabhi akaale mrityu se bachaane vaale ho na। aisi aatmaon ko amar gyaan de amar banaao to janma-janma akaale mrityu se bach jaaen। satayug mein akaale mrityu nahin hoga, apni ichchha se shareer chhodenge। jaise yeh puraana vastra apni ichchha se badli karte hain, majboori se nahin। aise yeh shareer roopi vastra bhi apni ichchha se badli karen। jaise kapde ka samay poora ho jaata hai,puraana ho jaata hai to badal dete ho। aise samay pramaan,aayu ke pramaan shareer parivartan karenge। to aap bachchon ko aisi duhkhi aatmaon ko yeh khushkhabri sunaani chaahiye ki ham aapko 21 janmon ke liye akaale mrityu se bacha sakte hain। aajkal akaale mrityu ka hi dar hai। dar se kha bhi rahe hain, chal bhi rahe hain,so bhi rahe hain। aisi aatmaon ko khushi ki baat sunaakar bhay se chhudaao। maano yeh shareer chala bhi jaata hai, to bhi bhay se nahin marenge kyonki yeh khushi hogi ki ham akaale mrityu se bachaane vaale hain, kuchh saath mein le ja rahe hain, khaali nahin ja rahe hain। to yeh seva karte ho ya darte ho ki humein goli na lag jaae? sabhi bahaadur ho na! apne shanti aur sukh ke vibration se logon ko sukh-chain ki anubhooti karaao। kaisa bhi aatankavaadi ho - woh bhi prem aur shanti ki shakti ke aage parivartan ho jaayega। aap logon ke paas aisa koi aata hai to kya karte ho? pyaar se parivartan karte ho na?apna bhaai bana dete ho na!

sada hi apne ko ‘shaktishaali'aatmaayen hain - is anubhooti mein raho। shaktishaali aatmaon ke aage chaahe maaya ke vighna hon,chaahe vyakti dvaara va prakriti dvaara vighna aayen lekin apna prabhaav nahin daal sakte hain। to aise master sarvashaktivaan bane ho ya kamzor ho? agar ek bhi shakti ki kami hogi to haar ho sakti hai। samay par chhota-sa shastra bhi agar kiske paas nahin hai to nuksaan ho jaata hai। ek bhi shakti kam hogi to samay par dhokha mil sakta hai। isliye master sarvashaktivaan hain - shaktivaan nahin, yahi title yaad rakhna। sada khushhaal rehna aur auron ko bhi khushhaal banaana। kabhi bhi murjhaana nahin। tan bhi khush, man bhi khush aur dhan bhi khushi se kamaane vaale aur khushi se kaarya mein lagaane vaale। jahaan khushi hai vahaan ek sau bhi hajaaron ke samaan hota hai, khushhaali aa jaati hai। aur jahaan khushi nahin vahaan ek laakh bhi ek roopaya hai। to tan-man-dhan se khushhaal rahne vaale hain। daal-roti bhi - 36 prakaar ka bhojan anubhav ho। to yahi vardaan yaad rakhna ki ham sada khushhaal rahne vaale hain। murjhaana kaam maaya ke saathiyon ka hai aur khushhaal rehna kaam baap ke bachchon ka hai।

apne ko gareeb kabhi nahin samajhna। sabse saahookaar ham hain। duniya mein saahookaar dekhna ho to aapko dekhen। kyonki sachcha dhan aapke paas hai। vinaashi dhan to aaj hai, kal nahin hoga। lekin avinaashi dhan aapke paas hai। to sabse saahookaar aap ho। chaahe sookhi roti bhi khaate ho, to bhi saahookaar ho kyonki khushi ki khuraak sookhi roti mein bhari hui hai। uske aage aur koi khuraak nahin। sabse achhi khuraak khaane vaale, sukh ki roti khaane vaale aap log ho। isliye sada khushhaal ho। kabhi yeh nahin sochna ki agar saahookaar hote to yeh karte! saahookaar hote to aate hi nahin, vanchit rah jaate। to aise khushhaal rehna jo aapko khushhaal dekh aur bhi khushhaal ho jaaen। achha! sabse bada zone to madhuban hi hai। sab brahmaakumaar aur brahmaakumaariyon ka asli ghar - madhuban hi hai na। aatmaon ka ghar paramdham hai lekin braahmanon ka ghar madhuban hai। to amritsar ya ludhiyaana ke nahin ho, panjaab ya hariyaana ke nahin ho lekin apni permanent edrais (sthaayi pata) madhuban hai। baaki sab seva sthaan hain। chaahe pravritti mein rehte ho,to bhi seva sthaan hai, ghar nahin hai। sweet hom madhuban hai। aise samajhte ho na! ya vahi ghar yaad aata hai? achha!