मंगलवार 3 नवंबर 1992 की अव्यक्त मुरली

>

03-11-92 om shanti avyakt baapdaadaamdhuban

roohaani royalty ki nishaani- sada bharpoor-sampanna va tripta

sada brahma baap ko follow karne vaali royal aatmaon prati avyakt baapdaada bole -

aaj baapdaada chaaron or ke apne roohaani royal family ko dekh rahe hain। saare kalpa mein sabse royal aap aatmaayen hi ho। vaise had ke raajya-adhikaari royal family bahut gaaye hue hain। lekin roohaani royal family sirf aap hi gaaye hue ho। aap royal family ki aatmaayen aadi kaal mein bhi aur anaadi kaal mein bhi aur vartamaan sangamayug mein bhi roohaani royalty vaali ho। anaadi kaal sweet hom mein bhi aap vishesh aatmaon ki roohaaniyat ki jhalak, chamak sarva aatmaon se shreshtha hai। aatmaayen sabhi chamakti hui jyoti-swaroop hain, phir bhi aapki roohaani royalty ki chamak alaukik hai। jaise saakaari duniya mein aakaash beech sitaare sab chamakte hue dikhaai dete hain, lekin koi vishesh chamakne vaale sitaare svatah hi apni taraph aakarshit karte hain, light hote hue bhi unhon ki light vishesh chamakti hui dikhaai deti hai। aise anaadi kaal paramdham mein bhi aap roohaani sitaaron ki chamak arthaat roohaani royalty ki jhalak vishesh anubhav hoti hai। isi prakaar aadi kaal satayug arthaat svarga mein aap aatmaayen vishwa-raajya ki royal family ke adhikaari bante ho। har ek raaja ki royal family hoti hai।

lekin aap aatmaon ki royal family ki royalty va dev-aatmaon ki royalty saare kalpa mein aur kisi royal family ki ho nahin sakti। itni shreshtha royalty chaitanya swaroop mein praapta ki hai jo aapke jad chitron ki bhi kitni royalty se pooja hoti hai। saare kalpa ke andar royalty ki vidhi pramaan aur koi bhi dharma-pita,dharma-aatma ya mahaan aatma ki aise pooja nahin hoti। to socho-jab jad chitron mein bhi royalty ki pooja hai to chaitanya mein kitne royal family ke bante ho! to itne royal ho?va ban rahe ho? abhi sangam par bhi roohaani royalty arthaat pharishta-swaroop bante ho, roohaani baap ki roohaani royal family bante ho। to anaadi kaal, aadi kaal aur sangamayugi kaal-teenon kaal mein number one royal bante ho। ye nasha rehta hai ki ham teenon kaal mein bhi roohaani royalty vaali aatmaayen hain?

is roohaani royalty ka foundation kya hai? sampoorn purity। sampoorn purity hi royalty hai। to apne se poochho ki roohaani royalty ki jhalak aapke roop se sabko anubhav hoti hai?roohaani royalty ki phalak har charitra se anubhav hoti hai? laukik duniya mein bhi alpakaal ki royalty na jaante hue bhi chehre se, chalan se anubhav hoti hai। to roohaani royalty gupta nahin rah sakti,vo bhi dikhaai deti hai। to har ek knowledge ke darpan mein apne ko dekho ki mere chehre par, chalan mein royalty dikhaai deti hai va saadhaaran chehra,saadhaaran chalan dikhaai deti hai?jaise sachcha heera apni chamak se kahaan bhi chhip nahin sakta,aise roohaani chamak vaale, roohaani royalty vaale chhip nahin sakte।

kai bachche apne ko khush karne ke liye sochte hain aur kehte bhi hain ki-’’ham gupta aatmaayen hain,isliye hamko koi pahchaanta nahin hai। samay aane par aapehi maaloom pad jaayega।’’ gupta purooshaartha bahut achhi baat hai। lekin gupta purushaarthi ki jhalak aur phalak va roohaani royalty ki chamak auron ko anubhav zaroor karaayegi। svayan,svayan ko chaahe kitna bhi gupta rakhen lekin unke bol, unka sambandh-samparka,roohaani vyavhaar ka prabhaav unko pratyaksha karta hai। jisko saadhaaran shabdon mein duniya vaale bol aur chaal kehte hain। to svayan, svayan ko pratyaksha nahin karte, gupta rakhte-yeh nirmaanta ki visheshta hai। lekin doosre unke bol-chaal se anubhav avashya varenge। doosre kahen ki yeh gupta purushaarthi hai। agar svayan ko kehte hain ki main gupta purushaarthi hoon-to yeh gupta rakha ya pratyaksha kiya? kah rahe ho gupta lekin bol rahe ho ki main gupta purushaarthi hoon! yeh gupta hua? bahut patra mein bhi likhte hain ki ham gupta purooshaarthiyon ko nimitta bani hui daadiyaan nahin jaanti hain। phir yeh bhi likhte hain ki-dekh lena aage ham kya karte, kya hota hai-to yeh gupta rahe ya pratyaksha kiya?gupta purushaarthi apne ko gupta rakhen-yeh bahut achha। lekin varnan nahin karo, doosra aapko bole। jo apne aapko hi kahen unko kya kaha jaata hai? (miyaan mitthu ) to miyaan mitthu banna bahut sahaj hai na!

to kya suna? roohaani royalty। royal aatmaayen sada hi ek to bharpoor-sampanna rehti hain aur sampannata ki nishaani-ve sada tripta aatma rehti hain। tripta aatma har paristhiti mein, har aatmaon ke sambandh-samparka mein aate hue,jaante hue santushta rehti hai। chaahe koi kitna bhi asantushta karne ki paristhitiyaan unke aage laaye lekin sampanna, tripta aatma asantushta karne vaale ko bhi santushtata ka gun sahayog ke roop mein degi। aisi aatma ke prati merciful ban shubh bhaavna aur shubh kaamna dvaara unko bhi parivartan karne ka prayatna karenge। roohaani royal aatmaon ka yahi shreshtha karma hai। jaise sthool royal aatmaayen kabhi bhi chhoti-chhoti baaton mein, chhoti-chhoti cheejon mein apni buddhi va samay nahin deteen,dekhte bhi nahin dekhteen,sunte bhi nahin sunteen। aise roohaani royal aatma kisi bhi aatma ki chhoti-chhoti baaton mein, jo royal nahin hain-unmein apni buddhi va samay nahin degi। duniya vaale kehte hain ki royalty arthaat kisi bhi halki baat mein aankh nahin doobti। roohaani royal aatmaon ke mukh se kabhi vyartha va saadhaaran bol nahin niklenge, har bol yuktiyukta hoga। yuktiyukta ka arth hai-vyartha bhaav se pare avyakt bhaav,avyakt bhaavna। isko kaha jaata hai royalty।

is samay ki royalty bhavishya ki royal family mein aane ke adhikaari banaati hai। to check karo-vritti royal hai? vritti royal arthaat sada shubh bhaavna,shubh kaamna ki vritti se har ek aatma se vyavhaar mein aaye। royal drishti arthaat sada pharishta roop se auron ko bhi pharishta roop dekhe। kriti arthaat karma mein sada sukh dena,sukh lena-is shreshtha karma ke pramaan samparka mein aaye। aise royal bane ho? ki banna hai? brahma baap ke bol aur chaal, chehre aur chalan ki royalty ko dekha। aise follow brahma baap। saakaar ko follow karna to sahaj hai na! brahma ko follow kiya to shiv baap ko follow ho hi jaayega। ek ko to follow kar sakte ho na। baap samaan banne ke points to roz sunte ho! sunna arthaat follow karna। copy karna to sahaj hota hai na। ki copy karna bhi nahin aata?

baapdaada aaj muskara rahe the ki madhuban mein aate hain to vishesh guroovaar ke din kya karte hain? ek to bhog lagaate hain। aur kya karte hain jo sirf madhuban mein hi karte hain? jeete-ji marne ka bhog। aap sabne jeete-ji marne ka bhog laga liya hai? baapdaada muskara rahe the ki ‘jeete-ji marna’ kahkar manaana to sahaj hai-stage par baith gaye, tilak laga liya, mar gaye! lekin jeete-ji marna arthaat puraane sanskaaron se marna। puraane sanskaar, puraane sansaar ki aakarshan se marna-yeh hai jeete ji marna। bhog laga diya,bhandaari mein jama kar diya aur jeete ji marna ho gaya-yeh to bahut sahaj hai। lekin mar gaye? baapdaada soch rahe the ki puraane sansaar aur puraane sanskaar-isse sada ke liye sankalp aur svapna mein bhi marna manaana,aisa jeete-ji marna kaun aur kab mana-yenge?agar stage par bithaate hain to sab ke sab baith jaate hain। stage par baithna-yeh to common (aam) baat hai। lekin buddhi ko bithaana-isko kaha jaata hai yathaartha jeete ji marna manaana। jab mar gaye, marna arthaat parivartan hona। to aisa jeete ji marna,uske liye kitne taiyaar honge? ki centre par jaakar ke kahenge ki kya karen, chaahte nahin the lekin ho gaya? yahaan to jeete ji marna manaakar jaate hain, phir jab koi baat saamne aati hai to jinda ho jaate ho। aise nahin karna।

yaadgaar mein bhi dikhaate hain ki raavan ka ek sir khatma karte the to doosra aa jaata tha। yahaan bhi ek baat poori hoti to doosri paida ho jaati,phir samajhte-hamne to raavan ko maar diya, phir yeh kahaan se aa gaya? lekin mool foundation ko samaapta na karne ke kaaran ek roop badal doosre roop mein aa jaate hain। foundation ko khatma kar do to roop badalkar ke maaya vaar nahin karegi, sada ke liye vidaai le jaayegi। samjha, kya banna hai? roohaani royalty vaale। sadaiv yeh check karo ki har karma roohaani royal parivaar ke pramaan hai?jab 99% bol,karma aur sankalp royalty ke hon tab samjho bhavishya mein bhi royal family mein aayenge। aise nahin sochna-ham to aa hi jaayenge। chalo,sampanna nahin bane hain to ek percent (1% ) free dete hain। lekin 99% royalty ke sanskaar, bol aur sankalp natural hone chaahiye। baar-baar yuddha nahin karni pade,natural sanskaar ho jaae। achha!

chaaron or ke roohaani royalty vaali royal aatmaon ko, sada purity dvaara royalty anubhav karaane vaali aatmaon ko,sada parishta swaroop ke sanskaar ko practical mein laane vaali aatmaon ko,sada brahma baap ko follow karne vaali aatmaon ko,sada shreshtha brahman sansaar mein brahman sanskaar anubhav karne vaale roohaani royal parivaar ko baapdaada ka yaad, pyaar aur namaste।

avyakt baapdaada ki personal mulaakaat

group nan.1

seva mein busy raho to sahaj maayaajeet ban jaayenge

sada apni shaktishaali vritti se vaayumandal ko parivartan karne vaali vishwa-parivartak aatmaae ho na। is brahman jeevan ka vishesh occupation kya hai? apni vritti se, vaani se aur karma se vishwa-parivartan karna। aise sampanna ban gaye ya vinaash tak banenge? agar samay sampanna va sampoorn banaaye to rachna powerful hui ya rachta? to samay par nahin banna hai, samay ko sameep laana hai। samay ka intazaar karne vaale nahin ho। jab pa liya to paane ki khushi mein rahne vaale sada hi ever ready rehte hain। kal bhi vinaash ho jaaye to taiyaar ho?ya thoda time chaahiye?ever ready, nashtomoha,smritisvaroop-ismen paas ho? ever ready ka arth hi hai-nashtomoha smritisvaroop। ya us samay yaad aayega ki pata nahin bachche kya kar rahe honge, kahaan honge, chhote-chhote potron ka kya hoga? yahin vinaash ho jaaye to yaad aayenge?pati ka bhi kalyaan ho jaaye, potre ka bhi kalyaan ho jaaye, unhon ko bhi yahaan le aayen-yaad aayega? business ka kya hoga,paise kahaan jaayenge? raaste toot jaayen phir kya karenge?dekhna,achaanak paper hoga।

sada nyaara aur pyaara rehna-yahi baap samaan banna hai। jahaan hain,jaise hain lekin nyaare hain। yeh nyaaraapan baap ke pyaar ka anubhav karaata hai। jara bhi apne mein ya aur kisi mein bhi lagaav nyaara banne nahin dega। nyaare aur pyaarepan ka abhyaas number aage badhaayega। iska sahaj purooshaartha hai nimitta bhaav। nimitta samajhne se nimitta banaane vaala yaad aata hai। mera parivaar hai, mera kaam hai। nahin,main nimitta hoon। nimitta samajhne se paper mein paas ho jaayenge। to sabhi aisi seva karte ho? ya time nahin milta hai? vaani ke liye samay nahin hai to vritti se, mansa-seva se parivartan karne ka samay to hai na। sevaadhaari aatmaae seva ke bina rah nahin sakteen। brahman janma hai hi seva ke liye। aur jitna seva mein busy rahenge utna hi sahaj maayaajeet banenge। to seva ka phal bhi mil jaaye aur maayaajeet bhi sahaj ban jaayen-double phaayda hai na। jara bhi buddhi ko phursat mile to seva mein jut jaao। vaise bhi panjaab-hariyaana mein seva-bhaav jyaada hai। guroodvaaron mein jaakar seva karte hain na। woh hai sthool seva aur yeh hai roohaani seva। seva ke sivaae samay ganvaana nahin hai। nirantar yogi, nirantar sevaadhaari bano-chaahe sankalp se karo,chaahe vaani se, chaahe karma se। apne samparka se bhi seva kar sakte ho। chalo, mansa-seva karna nahin aave lekin apne samparka se,apni chalan se bhi seva kar sakte ho। yeh to sahaj hai na। to check karo ki sada sevaadhaari hain va kabhi-kabhi ke sevaadhaari hain? agar kabhi-kabhi ke sevaadhaari honge to raajya-bhaagya bhi kabhi-kabhi milega। is samay ki seva bhavishya praapti ka aadhaar hai। kabhi bhi koi yeh bahaana nahin de sakte ki chaahte the lekin samay nahin hai। koi kehte hain-shareer nahin chalta hai,taangen nahin chalti hain,kya karen?koi kehti hain-kamar nahin chalti, koi kehti hain-taange nahin chalti। lekin buddhi to chalti hai na! to buddhi dvaara seva karo। aaraam se palang par baithkar seva karo। agar kamar tedhi hai to let jaao lekin seva mein busy raho।

busy rehna hi sahaj purooshaartha hai। mehnat nahin karni padegi। baar-baar maaya aave aur bhagaao-to mehnat hoti hai, yuddha hoti hai। busy rahne vaale yuddha se chhoot jaate hain। busy rahenge to maaya ki himmat nahin hogi aane ki। aur jitna apne ko busy rakhenge utna hi aapki vritti se vaayumandal parivartan hota rahega। koi bhi brahman aatma yeh nahin soch sakti ki-kya karen,vaayumandal bahut kharaab hai। kharaab hai tab to parivartan karte ho। kharaab hi nahin hoga to kya karenge?achhe ko badlenge kya?to vishwa-parivartak ka kaam hai-bure ko achha banaana। to bura to hoga hi, bure ko achha banaane vaale aap ho! vishwa-parivartan ka kaarya kiya hai, tab to ab tak bhi aapka gaayan hai। shaktiyon ke gaayan mein aapki kitni mahima karte hain! to apni mahima sunte hue khushi hoti hai na!

paandavon ki bhi mahima hai। lakshmi ke saath ganesh ko zaroor rakhte hain। to paandav apna kalpa pahle ka yaadgaar abhi svayan dekh rahe hain, sun rahe hain। khushi hoti hai na! itni khushi hai jo kaise bhi dardanaak khel hon lekin aap khushi mein naachte rehte ho! paanv se nahin naachna। man mein khushi se naachte hain। kyon khushi mein naachte ho? kyonki knowledge hai-nothing new,hona hi hai। dardanaak baaten sunkar kabhi ghabraate ho?pakke ho?agar aap brahman aatmaae pakke nahin banenge to kaun banenge?master sarvashaktivaan kabhi ghabraate nahin hain। jab bhi koi aisi paristhiti aave to pahle socho-mera saathi kaun! paandavon ne kitna kuchh sahan kiya lekin baap ka saath hone ke kaaran vijayi bane। to vijay ki guarantee hai। saath mein baap hai to vijayi banne ki guarantee hai। isilae kabhi bhi kisi baat mein bhi kachcha nahin banna। duniya ghabraaye aur aap khushi mein, mauj mein ghabraane vaalon ko bhi shakti do। sada saamne maut ko dekhte hue baap hi yaad aata hai na। to aur hi yaad mein rahne ka vaataavran mila hua hai। vaise bhi kaha jaata hai ki mrityu ke samay kaun yaad aata hai?to aapko bhi akaale mrityu ka samaachaar milta hai। mrityulok ko dekh apna svarga arthaat amar lok yaad aata hai। aaj mrityulok hai, kal hamaara raajya hoga! yeh khushi hai na। aaj ko dekh kal ki yaad aur hi jyaada aati hai। to sabhi nirbhay rahne vaale ho na। achha!

group nan.2

double hero hain-is position ki smriti se har karma shreshtha hoga

sabhi apne ko is drama ke andar part bajaane vaali shreshtha paartadhaari aatmaayen anubhav karte ho?jaise baap oonche te ooncha hai, aise oonche te ooncha part bajaane vaali aap shreshtha aatmaae ho। double hero ho। heere tulya jeevan bhi hai aur hero paartadhaari bhi ho। to kitna nasha har karma mein hona chaahiye! agar smriti mein yeh shreshtha part hai, to jaisi smriti hoti hai vaisi sthiti hoti hai aur jaisi sthiti hogi vaise karma honge। to sada yeh smriti rehti hai? jaise shareer roop mein jo bhi ho, jaisa bhi ho-woh sada yaad rehta hai na। to aatma ka occupation,aatma ka swaroop jo hai,jaisa hai-woh bhi yaad rehna chaahiye na। shareer vinaashi hai lekin uski yaad avinaashi rehti hai। aatma avinaashi hai, to uski yaad bhi avinaashi rehti hai? jaise yeh aadat pad gai hai ki main shareer hoon। hai ulta, wrong hai। lekin aadat to pakki ho gai। to bhoolne chaahte bhi nahin bhoolta। vaise yathaartha apna swaroop bhi aise pakka hona chaahiye। shareer ka occupation svapna mein bhi yaad rehta hai। koi klarka hai,koi vakeel hai,business karne vaala hai-to bhoolta nahin। aise yeh brahman jeevan ka occupation ki main hero paartadhaari hoon-yeh pakka hona chaahiye aur natural hona chaahiye। to check karo ki aise natural jeevan hai?

jo natural cheej hoti hai woh sada hoti hai aur jo annechural (Unnatural;asvaabhaavik) hoti hai woh kabhi-kabhi hoti hai। to yeh smriti sada rahni chaahiye ki ham double hero hain। is nashe mein nuksaan nahin hai, doosre nashe mein nuksaan hai। yeh had ka nasha nahin hai,behad ka roohaani nasha hai। us nashe mein bhi sab baaten svatah hi bhool jaati hain, bhoolni nahin padti hain। yeh roohaani nasha jab hota hai to had ki baaten bhool jaati hain, bhoolne ki mehnat nahin karni padti hai। jab yeh smriti rehti hai ki main hero paartadhaari aatma hoon-to svatah hi har karma shreshtha hota hai। har karma se sabhi ko anubhav hoga ki yeh koi vishesh aatma hai, saadhaaran nahin। aise samajhte ho? va jaise sab hain vaise ham hain?nyaare lagte ho? chaahe kitne bhi agyaani hon lekin anek agyaaniyon ke beech aap ‘gyaani aatma’ pyaari anubhav ho। isko kaha jaata hai hero paartadhaari। aise hai? doosre bhi anubhav karen। aise nahin-sirf apne ko samjhen। andar se samjhen ki ye nyaare hain। na chaahte hue bhi sabhi aapke aage apna sir jhukaayenge। abhimaan ka sir jhukega। parantu itni pakki avastha chaahiye। check karo aur change karo। har karma mein apne ko check karo ki-nyaari hoon,pyaari hoon?double hero sthiti ka anubhav badhaate chalo। ek-do se aage badhna hai aur ek-do ko aage badhaana hai। aise nahin samjho ki doosra aage jaayega to main peechhe ho jaaoonga। nahin,badhaana hi badhna hai। brahman jeevan arthaat badhna aur badhaana।

group nan.3

shreshtha bhaagya ke smritisvaroop bano to duhkh ki lahar aa nahin sakti

sada apne shreshtha bhaagya ko dekh bhaagyavidhaata baap svatah hi yaad aata hai na। bhaagyavidhaata aur bhaagya-donon yaad rehte hain na। kya-kya bhaagya mila hai-uski smriti sada emerge roop mein rahe। aise nahin ki andar mein to yaad hai। nahin, baahar dikhaai de। kyonki saare kalpa mein aisa shreshtha bhaagya kabhi bhi mil nahin sakta। satayug ke bhaagya aur is samay ke bhaagya mein kya antar hai?abhi ka bhaagya shreshtha hai na। kyonki is samay heere tulya ho aur satayug mein sone tulya ho jaayenge। to sada dil mein shreshtha bhaagya ke geet gaate rehte ho। automatic bajta hai ya kabhi banda ho jaata hai? sada bajta hai ya kabhi-kabhi kharaab ho jaata hai?kyonki avinaashi praapti karaane vaala bhaagyavidhaata hai। jo bhaagya mila hai uski agar list nikaalo to kitni lambi list ho jaayegi! lambi list hai na। isliye kaha hi jaata hai-kitna mila,kya mila?to kehte hain-apraapta koi vastu nahin rahi। isse siddha hai ki sab-kuchh mil gaya। jo mila hai usko sambhaalna aata hai?ya kabhi-kabhi koi chori karke chala jaata hai?maaya chori to karke nahin jaati?

maataaon ko kabhi thodi-si bhi duhkh ki lahar aati hai? to us samay apna bhaagya bhool jaata hai na। smriti mein laate ho, isse siddha hai ki vismriti hui। sada smritisvaroop raho। duniya vaale bhaagya ke peechhe bhatak rahe hain aur aapko ghar baithe bhaagyavidhaata baap ne bhaagya de diya! kitna bada parivartan aa gaya! kabhi bhi apne ko is shreshtha bhaagya se alag nahin karo। mera bhaagya hai, to‘mera’kabhi bhoolta hai kya?baap ka diya hua khazaana apna hai na। itni shreshtha bhaagyavaan aatmaayen banti ho jo abhi tak bhi aapke bhaagya ki mahima kitni karte rehte hain! ye keertan kya hai? aapke praapta hue bhaagya ki mahima hai। to jab bhi koi devi-devtaaon ka keertan sunte ho to kya lagta hai?samajhte ho ki hamaari praaptiyon ki mahima kar rahe hain! chaitanya mein apne jad chitra ki mahima sun rahe ho। sabse jyaada khushi kisko hai? koi ko kam nahin hai! nambarvaar to honge na। sabhi number one ho?vighnajeet mein number-one kaun hai? koi bhi vighna aave lekin usko vinaash karne mein number one kaun hai? kitna time lagta hai?ek din lagaaya va ek ghanta lagaaya?number one arthaat koi bhi vighna aane ke pahle hi maaloom pad jaaye। achha!

group nan.4

vighna-vinaashak banne ke liye sarva shaktiyon se sampanna bano

sabhi apne ko baap ke har kaarya mein sada saathi samajhte ho?jo baap ka kaarya hai woh hamaara kaarya hai। baap ka kaarya hai-puraani srishti ko naya banaana, sabko sukh-shanti ka anubhav karaana। yahi baap ka kaarya hai। to jo baap ka kaarya hai woh bachchon ka kaarya hai। to apne ko sada baap ke har kaarya mein saathi samajhne se sahaj hi baap yaad aata hai। kaarya ko yaad karne se kaarya-karta ki yaad svatah hi aati hai। isi ko hi kaha jaata hai sahaj yaad। to sada yaad rehti hai ya karna padta hai? jab koi maaya ka vighna aata hai phir yaad karna padta hai। vaise dekho, aapka yaadgaar hai vighna-vinaashak। ganesh ko kya kehte hain? vighna- vinaashak। to vighna-vinaashak ban gaye ki nahin?vighna-vinaashak arthaat saare vishwa ke vighna-vinaashak। apne hi vighna-vinaashak nahin। apne mein hi lage rahe to vishwa ka kab karenge?to saare vishwa ke vighna-vinaashak ho। itna nasha hai? ki apne hi vighnon ke bhaag-daud mein lage rehte ho?

vighna-vinaashak vahi ban sakta hai jo sada sarva shaktiyon se sampanna hoga। koi bhi vighna vinaash karne ke liye kya aavashyakta hai?shaktiyon ki na। agar koi shakti nahin hogi to vighna vinaash nahin kar sakte। isliye sada smriti rakho ki baap ke sada saathi hain aur vishwa ke vighna-vinaashak hain। vighna-vinaashak ke aage koi bhi vighna aa nahin sakta। agar apne paas hi aata rahega to doosre ka kya vinaash karenge। sarva shaktiyon ka khazaana hai? ya thoda-thoda hai?koi bhi khazaana agar kam hoga to samay par vijay praapta nahin kar sakenge। to sada apna stock check karo ki sarva khazaane hain, sarva shaktiyaan hain?kyonki baap ne sabhi ko sarva shaktiyaan di hain। ya kisko kam di hain, kisko jyaada di hain?sabko sarva shaktiyaan di hain na। aur apne ko kahlaate bhi ho-master sarvashaktivaan। to sarva shaktiyaan mera varsa hai। to varsa kabhi ja nahin sakta। varse ka nasha rehta hai na। agar kisi ko bahut bada varsa mil jaaye to kitna nasha, kitni khushi rehti hai! aapko to avinaashi varsa mila hai। to nasha bhi avi-naashi hona chaahiye। to sada nasha rehta hai?baalak arthaat maalik।

baapdaada bachchon ke seva ki vriddhi ko dekh khush hote hain। quantity aur quality-donon hain na। donon ki seva ka balance hai?ya quantity jyaada hai, quality kam hai? baap ko to quantity bhi chaahiye, quality bhi chaahiye। quality ki seva prati kislie kehte hain? kyonki ek quality vaala anek quantity ko laayega। phir bhi baap ko priy to aajkal ke hisaab se saadhaaran aatmaayen hi hain। vaise to vishesh hain lekin aajkal ke jamaane ke hisaab se saadhaaran gine jaate hain। yahi kamaal hai jo saadhaaran aatmaayen ati shreshtha ban gayeen! jinhon ke liye koi soch bhi nahin sakta ki ye aatmaayen itne varse ke adhikaari banengi! duniya sochti rehti aur aap ban gaye! vo to dhoondhate rehte-kis vesh mein aayenge,kab aayenge?aur aap kya kehte? pa liya। to ‘pa liya’ ki khushi hai na।

sabse bada khazaana hai hi khushi। agar khushi hai to sab-kuchh hai aur khushi nahin to kuchh bhi nahin। to maataayen sada khush rehti ho?ya kabhi-kabhi man mein roti bhi ho? paandav rote hain? aankhon se nahin rote,man se rote ho? udaas hote ho? kabhi-kabhi dhandhedhori mein nuksaan ho jaaye to udaas hote ho na। to yeh udaas hona bhi man ka rona hai। udaas hoga to hansi nahin aayegi,maana khushi gaayab ho gai na। abhi udaas bhi nahin ho sakte। kyonki praaptiyon ke aage ye thoda-bahut kuchh nuksaan hota bhi hai to akhut praaptiyon ke aage yeh kya badi baat hai! jab praaptiyon ko bhool jaate hain to udaas hote hain। kuchh bhi ho jaaye lekin kabhi bhi baap ka khazaana ganvaana nahin। ‘khushi’hai baap ka khazaana, usko chhodna nahin hai। pahle bhi sunaaya tha na ki shareer chala jaaye lekin khushi nahin jaaye। itna pakka banna hi brahman jeevan hai। samjha?udaasi ko talaak de do। talaak dene vaale ko saath nahin rakha jaata hai। talaak de diya to khatma hua।

pees park mein aayojit shanti-mele mein seva ke nimitta sevaadhaariyon prati

seva mein to achhi himmat rakhne vaale hain। mela achha lagaaya hai। anek aatmaon ko sahaj shanti ka anubhav karaana-yeh kitna punya ka kaarya hai! to punyaatma ban punya ki poonji seva dvaara jama kar rahe hain। achhi pyaar se seva kar rahe hain। yeh seva bhi khushi ko badhaati hai। to pahle svayan ko anubhvi banaate hain, phir doosre ko anubhav karaate hain। bhaagya banaane ka golden chance mila hai। achha hai, sahaj saadhan bhi hai aur simple bhi hai। achha! gujraat ke youth nirvighna hain? ya thoda-thoda vighna hai? ‘‘si (See;dekhna) father’’ karne se sada nirvighna rahenge। ‘‘si sister’’, ‘‘si brother’’ karne se koi na koi halchal hoti hai। sada ‘‘si father’’। brahma baap ne kya kiya?achha! maataayen to naachti rehti hain। garba bhi khoob karti hain aur khushi mein naachti rehti hain। garba karte hain to milan hota hai na ek-do se। jo bhi dance karte hain, to ek-do se milaate hain na। ek haath oopar kare, doosra neeche kare-to achha lagega?aise sanskaar milaane ka garba karna hai। samjha? yeh garba to agyaani bhi karte hain। lekin gyaaniyon ko kaunsa garba karna hai? sanskaar milaane ka। sabke sanskaar baap samaan hon। yeh sanskaar milaane ki dance aati hai?ya kabhi aati hai, kabhi nahin aati hai?to ab yeh visheshta dikhaani hai। sanskaar se takkar nahin khaana hai, sanskaar milaana hai। yadi koi doosra gadbad bhi kare to bhi aap milaao, aap gadbad nahin karo। aur hi usko shanti ka sahayog do। to samjha, vighna-vinaashak aatmaayen ho।

sadaiv yeh anubhav karo ki hamaara hi yaadgaar vighna-vinaashak hai। vighna-vinaashak banne ki vidhi kya hai, kaise vighna-vinaashak banenge? shanti se ya saamna karne se ya thoda halchal karne se? shant rehna hai aur shanti se sarva kaarya sampanna karna hai। aise nahin kehna ki thodi halchal karne se attention khinchavaate hain। aise nahin karna। yeh attention nahin khinchavaate lekin tension paida karte hain। isliye vighna-vinaashak banna hai to shanti se, halchal karne se nahin। sada shant। shanti ki shakti-kitna bhi bada vighna ho, usko sahaj samaapta kar deti hai। to shanti ki shakti jama hai na। achha!

group nan.5

brahman jeevan ki safety ka saadhan-baap ki chhatrachhaaya

apne ko har samay har karma karte baap ki chhatrachhaaya ke andar rahne vaale anubhav karte ho? chhatrachhaaya safety ka saadhan ho jaaye। jaise sthool duniya mein dhoop se va baarish se bachne ke liye chhatrachhaaya ka aadhaar lete hain। to woh to hai sthool chhatrachhaaya। yeh hai baap ki chhatrachhaaya jo aatma ko har samay safe rakhti hai-aatma koi bhi alpakaal ki aakarshan mein aakarshit nahin hoti, safe rehti hai। to aise apne ko sada chhatrachhaaya mein rahne vaali safe aatma samajhte ho? safe ho ya thoda-thoda sek aa jaata hai? jara bhi is saakaari duniya ka maaya ke prabhaav ka senk-maatra bhi nahin aaye। kyonki baap ne aisa saadhan diya hai jo sek se bach sakte ho। woh sabse sahaj saadhan hai-chhatrachhaaya। second bhi nahin lagta,baba kaha aur safe! mukh se nahin, mukh se baba-baba kahe aur prabhaav mein khinchata jaaye-aisa kehna nahin। man se baba kaha aur safe। to aise safe ho? kyonki aajkal ki duniya mein sabhi safety ka raasta dhoondhate hain। koi bhi baat karenge to pahle safety sochenge, phir karenge। to aajkal safety sab chaahte hain-chaahe sthool,chaahe sookshm। to baap ne bhi sada brahman jeevan ki safety ka saadhan de diya hai। chaahe kaisi bhi paristhiti aa jaaye lekin aap sada safe rah sakte ho। aise safe ho ya kabhi halchal mein aa jaate ho? kitna sahaj saadhan diya hai! mehnat nahin karni padi।

maarga mehnat ka nahin hai lekin apni kamjori mehnat ka anubhav karaati hai। jab kamjor ho jaate ho tab mehnat lagti hai, jab shaktishaali hote ho to sahaj lagta hai। hai sahaj lekin svayan hi mehnat ka anubhav karaane ke nimitta bante ho। mehnat mein thakaavat hoti hai aur sahaj mein khushi hoti hai। agar koi bhi kaarya sahaj saphal hota rehta hai to khushi hogi na। mehnat karni padi to thakaavat hogi। to khushi achhi ya thakaavat achhi? baapdaada sadaiv bachchon ko yahi kehte hain ki aadha kalpa mehnat ki, abhi bhi mehnat nahin karo, abhi mauj manaao। mauj ke samay bhi mehnat karen to mauj kab manaayenge?abhi nahin to kabhi nahin manaayenge। isliye sada sahaj arthaat sada mauj mein rahne vaale। to sada chhatrachhaaya mein rehte ho। ya baahar nikalkar dekhne mein maja aata hai? kai achhe sthaan par baithe bhi honge, lekin aadat hoti hai dekhne ki to achha sthaan chhodkar bhi dekhte rahenge,baahar chakkar lagaate rahenge। to aisi aadat to nahin hai? chhatrachhaaya ke andar rahne ki mauj ka anubhav karo। yeh kya hai, yeh kyon hai, yeh kaisa hai-ye chhatrachhaaya ke andar se nikalkar chakkar lagaana hai। yeh chhatrachhaaya sada shreshtha safe rahne ki lakeer hai। lakeer se baahar jaane se ‘shok vaatika’ milti hai aur lakeer ke andar rahne se‘ashok vaatika’। koi shok hai kya? kabhi-kabhi duhkh ki lahar aati hai? kisi bhi baat mein thoda-sa bhi,sankalp mein bhi agar duhkh ki lahar aai to ‘shok vaatika’ mein hain। sangamayug mein baap ‘ashok vaatika’ mein rahne ka saadhan bataate hain aur is samay ke abhyaas se anek janma ashok rahenge,shok ka naam-nishaan bhi nahin hoga। to sada safe rahne vaali shreshtha aatmaayen hain-yeh anubhav karte chalo। samartha baap, samartha bachche। to chhatrachhaaya pasanda hai na। achha!

group nan.6

parmaatma-pyaar ke paatra bano to sahaj maayaajeet ban jaayenge

sabhi apne ko parmaatma-shama ke parvaane samajhte ho?parvaane do prakaar ke hote hain-ek hain chakra lagaane vaale aur doosre hain-second mein phida hone vaale। to aap sabhi kaunse parvaane ho? phida ho gaye ho ya hone vaale ho? ya abhi thoda soch rahe ho? sochna arthaat chakra lagaana। phida hone ke baad phir chakra nahin kaatna padega। sabhi ho gaye?jab koi achhi cheej mil jaati hai aur samajh mein aata hai ki isse achhi cheej koi hai hi nahin-to sochne ki aavashyakta nahin hoti। aise hi sauda kiya hai na। baapdaada ko bhi aise nishchaybuddhi vijayi ratnon ko dekh harsha hota hai। jyaada khushi kisko hoti hai-baap ko ya aapko?baap kehte hain-bachchon ko jyaada khushi hai to baap ko pahle hai। baapdaada ne,dekho, kahaan-kahaan se chunkar ek bageeche ke roohaani gulaab bana diya। isi ek parivaar ka banne mein kitni khushi hai! itna parivaar kisi ka bhi hoga?followers ho sakte hain lekin parivaar nahin। kitni khushiyaan hain-baap ki khushi, apne bhaagya ki khushi,parivaar ki khushi! khushiyaan hi khushiyaan hain na। aankh khulte hi amritvele khushi ke jhoole mein jhoolte ho aur sote ho to bhi khushi ke jhoole mein। ateendriy sukh poochhna ho to kisse poochhen? har ek kahega-mere se poochho। yeh shuddh nasha hai,yeh deh-bhaan ka nasha nahin hai। har ek aatma ko apna-apna roohaani nasha hai। sirf roohaani nashe ko had ka nasha nahin banaana।

baapdaada ka sabse jyaada pyaar bachchon se hai,uski nishaani kya hai? koi practical nishaani sunaao। (sabhi ne sunaaya) dekho, har roz itna bada patra (murli) koi nahin likhta hai। aisa pyaar koi nahin karega। parmaatma-pyaar ke paatra ho। kabhi bhi ek din patra miss hua hai? aisa maashook saare kalpa mein nahin ho sakta hai। yeh sab baaten jo sunaai woh yaad rakhna। har samay yahi praaptiyaan yaad rahen to kabhi bhi praapti ke aage aur koi bhi vyakti ya vastu aakarshit nahin kar sakte aur sada sahaj maayaajeet ban auron ko bhi banaayenge। achha!