रविवार 18 जनवरी 1998 की अव्यक्त मुरली

>

18-01-98 om shanti avyakt baapdaadaamdhuban

sakaash dene ki seva karne ke liye lagaav mukta ban behad ke vairaagi bano

aaj ka din vishesh sneh ka din hai। amritvele se lekar chaaron or ke bachche apne dil ke sneh ko baapdaada ke arth aarpit kar rahe the। sarva bachchon ke sneh ke motiyon ki maalaayen baapdaada ke gale mein padti ja rahi thi। aaj ke din ek taraph sneh ke motiyon ki maalaayen, doosre taraph meethe-meethe ulhanon ki maalaayen bhi thi। lekin is varsha ulhanon mein antar dekha। pahle ulhanen hote the humein bhi saath le jaate, hamne saakaar paalna nahin li…। is varsha majority ka ulhana yeh raha ki ab baap samaan ban aapke paas pahunch jaaen। samaan banne ka umang-utsaah majority mein achha raha। samaan banne ki ichchha bahut teevra hai, ban jaayen aur aa jaayen, yeh sankalp roohrihaan mein bahut bachchon ka raha। baapdaada bhi yahi bachchon ko kehte hain - samaan bhav, sampanna bhav, sampoorn bhav। iska saadhan sada ke liye bahut sahaj hai,sabse sahaj saadhan hai - sada sneh ke saagar mein sama jaao। jaise aaj ka din sneh mein samaaye hue the aur kuchh yaad tha?sivaae baapdaada ke aur kuchh yaad raha?uthte, baithte sneh mein samaaye rahe। chalte-phirte kya yaad raha?brahma baap ke charitra aur chitra, chitra bhi saamne raha aur charitra bhi smriti mein rahe। sabhi ne sneh ka anubhav aaj vishesh kiya na?mehnat lagi?sahaj ho gaya na! sneh aisi shakti hai jo sab kuchh bhula deti hai। na deh yaad aati, na deh ki duniya yaad aati। sneh mehnat se chhuda deta hai। jahaan mohabbat hoti hai vahaan mehnat nahin hoti hai। sneh sada sahaj baapdaada ka haath apne oopar anubhav karaata hai। sneh chhatrachhaaya ban maayaajeet bana deta hai। kitni bhi badi samasya roopi pahaad ho, sneh pahaad ko bhi paani jaisa halka bana deta hai। to sneh mein rehna aata hai na? aaj rahkar dekha na! kuchh yaad raha? nahin raha na! baba,baba aur baba… ek hi yaad mein lavleen rahe। to baapdaada kehte hain aur koi purooshaartha nahin karo, sneh ke saagar mein sama jaao। samaana aata hai?kabhi-kabhi bachche sneh ke saagar mein samaate hain lekin thoda sa samay samaaya, phir baahar nikal aate hain। abhi-abhi kahenge baba,meetha baba,pyaara baba aur abhi-abhi baahar nikalte aur baaton mein lag jaate hain। bas sirf thodi-si jaise koi dubki lagaake nikal aata hai na, aise sneh mein samaaya, dubki lagaai, nikal aaye। samaaye raho, to sneh ki shakti sabse sahaj mukta kar degi।

sabhi bachchon ko brahman janma ke aadi ka anubhav,sneh ne brahman banaaya। sneh ne parivartan kiya। apne janma ke aadi samay ka anubhav yaad hai na? gyaan aur yog to mila lekin sneh ne aakarshit kar baap ka banaaya। agar sada sneh ki shakti mein raho to sada ke liye mehnat se mukta ho jaayenge। vaise bhi mukti varsha mana rahe hain na। to mehnat se bhi mukta,uska saadhan hai - sneh mein samaaye hue raho। sneh ka anubhav sabhi ko hai na? ya nahin hai? agar kisi se bhi poochhenge ki baapdaada se sabse jyaada sneh kiska hai? to sabhi haath uthaayenge mera hai। (sabne haath hilaaya) silence ka haath uthaao, aavaaz vaala nahin। to baapdaada aaj yahi kehte hain ki sneh ki shakti sada kaarya mein lagaao। sahaj hai na! yog lagaate ho - deh bhool jaae, deh ki duniya bhool jaae, maayaajeet banen। jab sneh ki chhatrachhaaya mein rahenge,to sneh ki chhatrachhaaya ke andar maaya nahin aa sakti hai। sneh ke saagar ke baahar aate ho na to maaya dekh leti hai aur apna bana leti hai,niklo hi nahin। samaaye raho। snehi koi bhi kaarya karte hue snehi ko nahin bhool sakta। sneh mein khoya hua har kaarya karta। to jaise aaj ke din khoye rahe, aise sada sneh mein nahin rah sakte ho kya? sneh sahaj hi samaan bana dega kyonki jiske saath sneh hai us jaisa banna, yeh mushkil nahin hota hai।

brahma baap se dil ka pyaar hai,brahma baap ka bhi bachchon se ati sneh hai। sada ek-ek bachche ko emerge kar vishesh samaan banne ki sakaash dete rehte hain। jaise past jeevan mein ek-ek ratna ko dekhte,har ek ratna ke moolya ko jaante vishesh kaarya mein lagaate, aise abhi bhi ek-ek ratna ko vishesh roop se visheshta ko kaarya mein lagaane ka sada sankalp dete rehte। aur har ek ke visheshta ki vaah-vaah gaate rehte। vaah mera amoolya ratna। kai bachche sochte hain ki brahma baap vatan mein kya karte hain? ham to yahaan seva karte rehte aur brahma baap vahaan vatan mein kya karte? lekin baap kehte hain jaise saakaar roop mein sada bachchon ke saath rahe, aise vatan mein bhi rehte hain। bachchon ke saath hi rehte hain, akele nahin rehte hain। bachchon ke bina baap ko bhi maja nahin aata। jaise bachchon ko baap ke bina kuchh soojhta nahin,aise baap ko bhi bachchon ke bina aur kuchh nahin soojhta। akele nahin rehte hain, saath mein rehte hain। saakaar mein to saath ka anubhav saakaar roop mein thode bachche kar sakte the, ab to avyakt roop mein, har bachche ke saath jis samay chaahe,jab chaahe saath nibhaate rehte hain। jaise chitron mein dikhaate hain na - unhonne ek-ek gopi ke saath krishna ko dikha diya lekin yeh is samay ka gaayan hai। ab avyakt roop mein har bachche ke saath jab chaahe, chaahe raat ko do baje,adhaai baje hain,kisi bhi time saath nibhaate rehte hain। saakaar mein to centres par chakkar lagaana kabhi-kabhi hota lekin ab avyakt roop mein to pavitra pravritti mein bhi chakkar lagaate hain। baap ko kaam hi kya hai, bachchon ko samaan bana ke saath le jaana,yahi to kaam hai na aur kya hai? to isi mein hi busy rehte hain।

to aaj ke din baapdaada bachchon ko vishesh mehnat se mukta bhav ka vardaan dete hain। koi bhi kaarya karo to double light banke kaarya karo,to mehnat manoranjan anubhav karenge kyonki baapdaada ko bachchon ki mehnat karna,yuddha karna,haar aur jeet ka khel karna - yeh achha nahin lagta। to mukta varsha mana rahe ho na! mana rahe ho ya mehnat mein lage hue ho?aaj ke din vishesh yeh vardaan yaad rakhna - mehnat se mukta bhav। yeh sangamayug mehnat se mukta hone ka yug hai। mauj mein rahne ka hai। agar mehnat hai to mauj nahin ho sakti hai। ek hi yug param aatma aur aatmaon ka mauj manaane ka yug hai। aatma,paramatma ke sneh ka yug hai। milan ka yug hai। to dridh sankalp karo ki aaj se mehnat se mukta ho jaayenge। honge na? phir aise nahin yahaan to haath uthaao aur vahaan jaakar kaho kya karen, kaise karen?kyonki baapdaada ke paas har ek bachche ke dridh sankalp karne ka poora file hai। baapdaada kabhi bachchon ka file dekhte hain। baar-baar dridh sankalp kiya hai na। jab se janma liya aur ab tak kitne baar sankalp kiya hai, yeh karenge, yeh karenge… lekin usko poora nahin kiya hai। roohrihaan bahut achhi karte hain, baapdaada ko bhi khush kar dete hain। jaise jigyaasuon ko prabhaavit kar dete ho na,to baapdaada ko bhi prabhaavit to kar dete hain lekin dridh sankalp ka prabhaav thoda samay rehta hai, sada nahin rehta। to baapdaada ka file to badhta jaata hai। jab bhi koi function hota hai to baapdaada ki file mein ek pratigya patra to jama ho hi jaata hai,isliye baapdaada likhaate nahin hain।

aaj bhi sabhi sankalp to kar rahe hain,abhi kab tak chalta hai, file mein kaagaj kab tak rehta hai,baap bhi dekhte rehte hain। bachchon ka baap samaan banna aur file khatma hoke final ho jaayenge। abhi to dher ke dher file hain। to sirf sneh mein doobe raho, sneh ke saagar se baahar nahin niklo। brahma baap se dil ka sneh hai na?to snehi ko follow karna mushkil nahin hota hai। sneh ke liye kehte bhi ho ki jahaan sneh hai, vahaan jaan bhi kurbaan ho jaati hai। baapdaada to jaan ko kurbaan karne ke liye nahin kehte, puraana jahaan kurbaan kar do। iski final date fix karo। aur function ki date to fix karte ho, 20 taareekh hai, 24 taareekh hai। iski date kab fix karenge? (iski date baapdaada fix karen) baapdaada kab shabd kehte hi nahin hain,ab kehte hain। baapdaada kab par chhodta hai kya? ab kehte hai। jo karna hai vo ab karo। lekin baapdaada to samartha hai na,to samartha ke hisaab se to ab kahenge। bachche kab, kab ki aadat mein hire hue hain। iseelie baapdaada bachchon ko kehte hain ki yeh date kab fix karenge? aap bhi kab, kab kehte hain to baap bhi kab kehte hain।

abhi samay pramaan sabko behad ke vairaagya vritti mein jaana hi hoga। lekin baapdaada samajhte hain ki bachchon ka samay shikshak nahin banen, jab baap shikshak hai to samay par banna - yeh samay ko shikshak banaana hai। usmein marks kam ho jaati hain। abhi bhi kai bachche kehte hain - samay sikha dega, samay badla dega। samay ke anusaar to saare vishwa ki aatmaayen badlengi lekin aap bachche samay ka intajaar nahin karo। samay ko shikshak nahin banaao। aap vishwa ke shikshak ke master vishwa shikshak ho, rachta ho, samay rachna hai to he rachta aatmaayen rachna ko shikshak nahin banaao। brahma baap ne samay ko shikshak nahin banaaya, behad ka vairaagya aadi se ant tak raha। aadi mein dekha itna tan lagaaya, man lagaaya, dhan lagaaya, lekin jara bhi lagaav nahin raha। tan ke liye sada natural bol yahi raha - baba ka rath hai। mera shareer hai, nahin। baba ka rath hai। baba ke rath ko khilaata hoon, main khaata hoon, nahin। tan se bhi behad ka vairaagya। man to manamnaabhav tha hi। dhan bhi lagaaya, lekin kabhi yeh sankalp bhi nahin aaya ki mera dhan lag raha hai। kabhi varnan nahin kiya ki mera dhan lag raha hai ya mainne dhan lagaaya hai। baba ka bhandaara hai,bholenaath ka bhandaara hai। dhan ko mera samajhkar personal apne prati ek roopaye ki cheez bhi use nahin ki। kanyaaon,maataaon ki jimmevaari hai, kanyaaon-maataaon ko will kiya,meraapan nahin। samay, shvaans apne prati nahin,usse bhi behad ke vairaagi rahe। itna sab kuchh prakriti daasi hote hue bhi koi extra saadhan use nahin kiya। sada saadhaaran life mein rahe। koi special cheez apne kaarya mein nahin lagaai। vastra tak, ek hi prakaar ke vastra ant tak rahe। change nahin kiya। bachchon ke liye makaan banaaye lekin svayan use nahin kiya, bachchon ke kahne par bhi sunte hue upraam rahe। sada bachchon ka sneh dekhte hue bhi yahi shabd rahe - sab bachchon ke liye hai। to isko kaha jaata hai behad ki vairaagya vritti pratyaksha jeevan mein rahi। ant mein dekho bachche saamne hain, haath pakda hua hai lekin lagaav raha? behad ki vairaagya vritti। snehi bachche,ananya bachche saamne hote hue phir bhi behad ka vairaagya raha। second mein upraam vritti ka, behad ke vairaagya ka saboot dekha। ek hi lagan seva,seva aur seva… aur sabhi baaton se upraam। isko kaha jaata hai behad ka vairaagya। abhi samay pramaan behad ke vairaagya vritti ko emerge karo। bina behad ke vairaagya vritti ke sakaash ki seva ho nahin sakti। follow father karo। saakaar mein brahma baap raha,niraakaar ki to baat chhodo। saakaar mein sarva praapti ka saadhan hote hue, sarva bachchon ki jimmevaari hote hue, circumstance,samasyaayen aate hue paas ho gaye na! paas with honour ka certificate le liya। vishesh kaaran behad ki vairaagya vritti। abhi sookshm sone ki janjeer ke lagaav, bahut maheen sookshm lagaav bahut hain। kai bachche to lagaav ko samajhte bhi nahin hain ki yeh lagaav hai। samajhte hain - yeh to hota hi hai, yeh to chalta hi hai। mukta hona hai,nahin। lekin aise to chalta hi hai। anek prakaar ke lagaav behad ke vairaagi banne nahin dete hain। chaahna hai banen, sankalp bhi karte hain - banna hi hai। lekin chaahna aur karna donon ka balance nahin hai। chaahna jyaada hai, karna kam hai। karna hi hai - yeh vairaagya vritti abhi emerge nahin hai। beech-beech mein emerge hoti hai,phir merge ho jaati hai। samay to karega hi lekin paas with honour nahin ban sakte। paas honge lekin paas with honour nahin। samay ki raphtaar tej hai, purooshaartha ki raphtaar kam hai। mota-mota purooshaartha to hai lekin sookshm lagaav mein bandh jaate hain।

baapdaada jab bachchon ke geet sunte hain - ud aayen, ud aayen… to sochte hain uda to len lekin lagaav udne denge ya na idhar ke rahenge na udhar ke rahenge? abhi samay pramaan lagaav-mukta behad ke vairaagi bano। man se vairaagya ho। programme pramaan vairaagya jo aata hai woh alpakaal ka hota hai। check karo - apne sookshm lagaav ko। moti-moti baaten abhi khatma hui hain,kuchh bachche mote-mote lagaav se mukta hain bhi lekin sookshm lagaav bahut sookshm hain, jo svayan ko bhi check nahin hote hain। (maaloom nahin padte hain)। check karo,achhi tarah se check karo। sampoornata ke darpan se lagaav ko check karo। yahi brahma baap ke smriti divas ki gift brahma baap ko do। pyaar hai na, to pyaar mein kya kiya jaata hai? gift dete hain na?to yeh gift do। chhodo, sab kinaare chhodo। mukta ho jaao। baapdaada khush bhi hote hain ki bachchon mein umang-utsaah uthta hai, bahut achhe-achhe sva-unnati ke sankalp bhi karte hain। abhi un sankalpon ko karke dikhaao। achha।

aaj vishesh teachers ka sangathan ikaththa hua hai। seva ka return yeh utsav rakha jaata hai। baapdaada khush hote hain ki bachchon ko seva ka phal mil raha hai va mana rahe hain,kha rahe hain। seva mein nambarvaar saphal rahe hain aur rehte rahenge। baapdaada bachchon ke 40 saal ki seva dekh harshit hote hain। haath uthaao jo function ke liye aaye hain। bada group hai। 40 varsha bhi seva mein amar bhav ke vardaani rahe hain iski mubaarak ho। aapke sangathan ko dekh sab bahut khush honge ki 40 varsha seva mein amar rehna - yeh bhi kamaal hai। diamond jubilee hui, silver jubilee hui aur yeh kaun si jubilee hai? yeh vishesh jubilee hai। jyaada mehnat is group ne hi ki hai। yeh group jaise bordar mein military jaati hai na aur commander to peechhe rehte hain lekin bordar par mahaarthi hi jaate hain। to seva ke bordar mein yeh group raha hai। baapdaada samaan sevaadhaari group ko dekh khush hote hain। bordar par jaane vaale pakke hote hain। bahut anubhav hote hain na। saamna karne ki shakti jyaada hoti hai। har group ki visheshta apni-apni hai। to diamond jubilee vaale sthaapna ke nimitta banen, golden jubilee vaale seva mein aadi ratna nimitta banen। silver jubilee vaale right hand ban aage badhe aur badhaaya। aur yeh vishesh group seva ke sarva prakaaron ke anubhvi moorta hain। jyaada anubhav is group ko hai। mehnat bhi ki hai lekin mohabbat mein mehnat ki hai। isliye baapdaada is group ko vishesh sevaadhaari, saphaltaamoorta group kehte hain। jo naye-naye aate hain unki paalna ke nimitta aadhaarmoorta yeh group hai। is group ko ek baat kahen ? sunne ke liye taiyaar ho? order karenge। order karen?ever ready group hai na?

baapdaada ko vishesh seva mein saphalta swaroop aatmaon ko dekh yeh sankalp aata hai ki centre to achhe jama diye hain। jama diye hain na ya hilne vaale hain? abhi is group mein se behad ki seva ke liye koi ratna nikalne chaahiye। ever ready hain ya centre chhodna mushkil hai?mushkil hai ya sahaj hai? abhi haath uthaao। aap niklenge to centre hilenge kya?yeh bhi pakka ho na। aap kaho ham to taiyaar hain centre hile ya nahin, hamaara kya jaata। aisa nahin। baapdaada phir bhi6 maas ka time dete hain,apne centres par aisa right hand banaao jo aap chakravarti ban sako; kyonki baapdaada dekhte hain - chakravarti bankar seva karne vaalon se ek hi jagah par baithkar seva karne vaalon ka number thoda peechhe ho jaata hai। woh chakravti number one raaja ban sakte hain। aur yeh group aisa hai jo number aage le sakte hain। to number lenge? phir daadi order karegi, ever ready।(daadi se) order karengi na? aapko hands chaahiye na? kabhi-kabhi daadi roohrihaan karti hai - madadgaar chaahiye। to kaun yeh pharmaais poori karenge?aap log hi kar sakte hain। baapdaada ummeendavaar aatmaayen samajhte hain। isliye apne- apne sthaan aise pakke karo, majboot banaao jo aap jaise hi chalen, antar nahin pade। brahma baap ne dekha kya ki peechhe kya hoga? nahin dekha na! achha hi hai aur achha hi hona hai। to second mein lagaavmukta aatma ud gai। koi lagaav ne kheencha nahin। to aisa group banaao, koi lagaav nahin। meri yeh duty hai, mere bina koi kar nahin sakega - yeh sankalp nahin aave, isse bhi vairaagya। to suna baapdaada ki baat? dhyaan se suni। achha - abhi 6 maas mein sabhi aise centre pakka karna, phir order hoga। pasanda hai na?vishwa mahaaraajan banna hai ki state ka raaja banna hai?kaun sa raaja banna hai? ek hi centre sambhaalna to state ka raaja banenge। chakravarti banenge to vishwa ke raaja banenge। jaise aap anubhvi bane ho vaise auron ko anubhvi banaao। mushkil kaam to nahin hai?mushkil ho to na kar den। agar mushkil lagta ho to baapdaada kahenge jahaan hain vahaan hi raho। yeh bhi chhutti hai, jiski jo ichchha ho woh kare, lekin baapdaada is group ko aage badhne ke ummeendavaar samajhte hain। theek hai? pasanda hai?

manaane ke pahle phikra to nahin ho gaya? bephikra baadshaah hain। jab brahma baap ne kuchh nahin socha,to follow father। bachchon ne socha kya hoga, kaise hoga, centre chalenge nahin chalenge, murli kahaan se aayegi… kitne question soche, brahma baap ne socha?second mein vyakta se avyakt ho gaye। lekin aur achhe te achha hona hi hai,yeh nishchay raha। aur ho raha hai na? baaki baapdaada ko har group ki visheshta pyaari lagti hai। achha।

chaaron or desh videsh ke sneh mein samaaye hue snehi bachchon ko,sada baap ke sneh ke saagar mein samaaye hue rahne vaale ati sameep aatmaon ko, sada brahma baap ki visheshtaaon ko svayan mein dhaaran karne vaali shreshtha aatmaon ko,sada mehnat mukta ho, mauj mein rahne vaali parmaatma pyaar mein udne vaali aatmaon ko,baap samaan banne ke sankalp ko saakaar mein laane vaale aise dilaaraam baap ke dil mein samaaye hue bachchon ko, vishesh aaj ke din brahma baap ki padam-padam guna yaadapyaar sveekaar ho। baapdaada to sada bachchon ke dil mein rehta hai, vatan mein rehte bhi bachchon ke dil mein rehte hain,to aise dil mein samaane vaale bachchon ko baapdaada ka sneh ke motiyon ki thaaliyaan bhar-bhar kar yaadapyaar aur namaste।

(gujraat ki seva ka tarna hai)achha hai। gujraat vaale anubhvi moorta hain। sameep hone ke kaaran har kaarya mein ever ready ho jaate hain। har ek zone ko yeh seva ka chance bhi achha mila hai। seva karna arthaat sarva ki duaayen lena। to kitni duaayen li hain?bahut li hain na? to gujraat duaaon ki jholi bhar rahe hain। achha। sabhi gujraat ke sevaadhaari haath uthaao। sirf seva nahin kar rahe ho, duaayen jama kar rahe ho। achha।

jo bhaai-bahinen cabin mein baithe hue seva kar rahe hain un sabke prati baapdaada bole:-

yeh bhi mehnat bahut karte hain। yeh department (sound department) bhi mehnat achhi karta hai। jo bhi sabhi cabin mein baithe hain sabhi mehnat achhi karte ho,sabhi ko sukh dete ho। to sukh dene ki duaayen bahut milti hain। purooshaartha mein yeh duaayen add ho jaati hain। nirvighna seva, yeh bahut padamguna phal deti hai। jitni nirvighna seva hoti hai utna automatic marks badhti jaati hain। sabko sukh dena,kisi bhi baat se, chaahe karma se, chaahe vaani se, chaahe mansa se - koi bhi sukh deta hai to uski marks automatic badhti jaati hain। mehnat se itni nahin badhti jitni yeh automatic marks badhti hain। to sukh swaroop bankar sukh do। sukh do aur sukh lo। aise hai na। bahut achha।

madhuban nivaasiyon ko duaayen bahut milti hain। chaahe saphaai karne vaala bhi ho,jhaadu lagaane vaala ho lekin saphaai bhi achhi dekhkar sabki duaayen milti hain। sabse sahaj purooshaartha hai duaayen lo, duaayen do। ismen koi mehnat nahin hai। bahut jaldi maayaajeet ban jaayenge। kisko maryaadaapoorvak duhkh nahin dena hai। aise bhi nahin hai ki maryaada tod karke isko sukh do, nahin। woh sukh ke khaate mein jama nahin hota hai, woh automatic machinery duhkh ke khaate mein jama ho jaati hai। isliye dil se sukh do, maryaadaapoorvak dil se। dikhaava-maatra nahin, dil se। sukh karta ke bachche ek second mein apni mansa dvaara, vaani dvaara, sambandh-samparka dvaara sukh de sakte hain। achha।

(yeh is season ka sabse bada group hai।)

sabhi aaraam se rahe hain। teachers ko to aaraam milta hi hai। teachers to special hain na। (double foreigners bhi 150 ke lagbhag aaye hain) baap vishwa kalyaankaari hai to har group mein desh-videsh hona hi chaahiye। videsh vaalon ko yeh season ka pasanda hai? itni badi sabha pasanda hai? sabhi videshiyon ne bahut achhe anubhav ke patra likhe hain। baapdaada ke paas pahunche hain। kaeeyon ne apna umang- utsaah bahut achha likha hai aur kahaan-kahaan purooshaartha bhi likha hai lekin majority result achhi hai। abhi pahle jaise jaldi-jaldi hilne vaale nahin hain, achal ho gaye hain। isliye double videshiyon ko aage badhne ki mubaarak ho। (160 sthaanon par direct sun rahe hain) achha hai brahma baap ne pahle se hi kaha hai ki ek samay aayega jo saare world mein baap ka sandesh jaayega। abhi sunte hain phir dekhenge bhi। aap sabka saakshaatkaar karenge। jagah-jagah par aapko jaana nahin padega। ek jagah se hi baapdaada sahit aap sabhi bachchon ka saakshaatkaar ho jaayega। achha।