सोमवार 15 मार्च 1999 की अव्यक्त मुरली

>

15-03-99 om shanti avyakt baapdaadaamdhuban

karmaateet avastha tak pahunchne ke liye controlling power ko badhaao,svaraajya adhikaari bano

aaj baapdaada chaaron or ke apne raaj dulaare parmaatma pyaare bachchon ko dekh rahe hain। yeh parmaatma dulaar va parmaatma pyaar bahut thode bachchon ko praapta hota hai। bahut thode aise bhaagya ke adhikaari bante hain। aise bhaagyavaan bachchon ko dekh baapdaada bhi harshit hote hain। raaj dulaare arthaat raaja bachche। to apne ko raaja samajhte ho?naam hi hai raajayogi। to raajayogi arthaat raaje bachche। vartamaan samay bhi raaje ho aur bhavishya mein bhi raaje ho। apna double raajya pad anubhav karte ho na? apne aapko dekho ki main raaja hoon?svaraajya adhikaari hoon?har ek raajya-kaarobaari aapke order mein kaarya kar rahe hain? raaja ki visheshta kya hoti hai,woh to jaante ho na? ruling power aur controlling power donon power aapke paas hain? apne aapse poochho ki raajya kaarobaari sada control mein chal rahe hain?

baapdaada aaj bachchon ki controlling power, ruling power check kar rahe the, to bataao kya dekha hoga? har ek jaante to hain। baapdaada ne dekha ki abhi bhi akhanda raajya adhikaar sabhi ka nahin hai। akhanda, beech-beech mein khandit hota hai। kyon? sada svaraajya ke badle par raajya bhi khandit kar deta hai। par raajya ki nishaani hai - yeh karmendriyaan par-adheen ho jaati hain। maaya ke raajya ka prabhaav arthaat par-adheen banaana। vartamaan samay majority to theek hain lekin majority maaya ke vartamaan samay ke vishesh prabhaav mein aa jaate hain। jo aadi anaadi sanskaar hain uske beech-beech mein madhya ke arthaat dvaapar se abhi ant tak ke sanskaar ke prabhaav mein aa jaate hain। sva ke sanskaar hi svaraajya ko khandit kar dete hain। usmein bhi vishesh sanskaar vyartha sochna,vyartha samay ganvaana aur vyartha bol-chaal mein aana, chaahe sunna, chaahe sunaana। ek taraph vyartha ke sanskaar, doosre taraph albelepan ke sanskaar bhinna-bhinna royal roop mein svaraajya ko khandit kar dete hain। kai bachche kehte hain ki samay sameep aa raha hai lekin jo sanskaar shuru mein emerge nahin the, woh abhi kahaan-kahaan emerge ho rahe hain। vaayumandal mein sanskaar aur emerge ho rahe hain, iska kaaran kya? yeh maaya ke vaar ka ek saadhan hai। maaya isi se apna banaakar parmaatma maarga se dilshikasta bana deti hai। sochte hain ki abhi tak aise hi hai to pata nahin samaanta ki saphalta milegi ya nahin milegi! koi-na-koi baat mein jahaan kamjori hogi, usi kamjori ke roop mein maaya dilshikasta banaane ki koshish karti hai। bahut achha chalte-chalte koi na koi baat mein maaya sanskaar par attack kar,puraane sanskaar emerge karne ka roop rakhkar dilshikasta karne ki koshish karti hai। last mein sab sanskaar samaapta hone hain isliye kabhi-kabhi rahe hue sanskaar emerge ho jaate hain। lekin baapdaada aap sabhi bhaagyavaan bachchon ko ishaara de rahe hain - ghabraao nahin,maaya ki chaal ko samajh jaao। aalasya aur vyartha - ismen negative bhi aa jaata hai - in donon baaton par vishesh attention rakho। samajh jaao ki yeh maaya ka vartamaan samay vaar karne ka saadhan hai।

baap ke saath ka anubhav, combined-pan ka anubhav emerge karo। aise nahin ki baap to hai hi mera, saath hai hi hai। saath ka practical anubhav emerge ho। to yeh maaya ka vaar, vaar nahin hoga, maaya haar kha legi। yeh maaya ki haar hai, vaar nahin hai। sirf ghabraao nahin, kya ho gaya, kyon ho gaya! himmat rakho,baap ke saath ko smriti mein rakho। check karo ki baap ka saath hai? saath ka anubhav merge roop mein to nahin hai?knowledge hai ki baap saath hai,knowledge ke saathsaath baap ki power kya hai?almighty authority hai to sarva shaktiyon ki power emerge roop mein anubhav karo। isko kaha jaata hai baap ke saath ka anubhav hona। albele nahin ban jaao - baap ke sivaae aur hai hi kaun, baap hi to hai। jab baap hi hai to woh power hai?jaise duniya vaalon ko kehte ho agar paramatma vyaapak hai to parmaatma gun anubhav hone chaahiye, dikhaai dene chaahiye। to baapdaada bhi aapko poochhte hain ki agar baap saath hai,combined hai to woh power har karma mein anubhav hoti hai?doosron ko bhi anubhav hoti hai? kya samajhte ho? double foreigners kya samajhte ho?power hai?sada hai? pahle question mein to sab haan kar dete hain। phir jab doosra question aata hai, sada hai?to soch mein pad jaate hain। to akhanda to nahin hua na! aap challenge kya karte ho?akhanda raajya sthaapan kar rahe ho ya khandit raajya sthaapan kar rahe ho? kya kar rahe ho? akhanda hai na! teachers bolo akhanda hai?to abhi check karo akhanda svaraajya hai? raajya arthaat praalabdha sada ka lena hai ya beech-beech mein kat ho jaae to koi harja nahin? aise chaahte ho? lene mein to sada chaahiye aur purooshaartha mein kabhi-kabhi chalta hai, aise?foreigners ko kaha tha na ki apne jeevan ki dictionary se sometime aur something shabd nikaal do। abhi sometime khatma hua?jayanti bolo। result dengi na। to sometime khatma hai? jo samajhte hain, sometime shabd sada ke liye samaapta ho gaya,woh haath uthaao। khatma ho gaya ya khatma hoga? lamba haath uthaao। vatan ki T.vi. mein to aapke haath aa gaye,yahaan ki T.vi. mein sabhi ke nahin aate। yeh kaliyugi T.vi. hai na,vahaan jaadu ki T.vi. hai isliye aa jaata hai। bahut achha phir bhi bahuton ne uthaaya hai, unhon ko sadaakaal ki mubaarak ho। achha। abhi bhaaratvaasi jiska practical sadaakaal svaraajya hai,sarva karmendriyaan law aur order mein hain, woh haath uthaao। pakka haath uthaana, kachcha nahin। sada yaad rakhna ki sabha mein haath uthaaya hai। phir baapdaada ko baaten bahut meethi-meethi bataate hain। kehte hain baba aap to jaante ho na, kabhi-kabhi maaya aa jaati hai na! to apne haath ki laaz rakhna। achha hai। phir bhi himmat rakhi hai to himmat nahin haarna। himmat par baapdaada ki madad hai hi hai।

aaj baapdaada ne dekha ki vartamaan samay ke anusaar apne oopar, har karmendriyon ke oopar arthaat svayan ki svayan prati jo controlling power honi chaahiye woh kam hai, woh aur jyaada chaahiye। baapdaada bachchon ki roohrihaan sun muskara rahe the, bachche kehte hain ki powerful yaad ke chaar ghante hote nahin hain। baapdaada ne aath ghante se 4 ghanta kiya aur bachche kehte hain do ghanta theek hai। to bataao controlling power hui? aur abhi se agar yeh abhyaas nahin hoga to samay par paas with honour, raajya adhikaari kaise ban sakenge! banna to hai na?bachche hansate hain। aaj baapdaada ne bachchon ki baaten bahut suni hain। baapdaada ko hansaate bhi hain, kehte hain traffic control 3minute nahin hota, shareer ka control ho jaata hai, khade ho jaate hain,naam hai man ke control ka lekin man ka control kabhi hota, kabhi nahin bhi hota। kaaran kya hai?controlling power ki kami। ise abhi aur badhaana hai। order karo, jaise haath ko oopar uthaana chaaho to utha lete ho। crack nahin hai to utha lete ho na! aise man,yeh sookshm shakti control mein aani hai। laana hi hai। order karo - stop to stop ho jaae। seva ka socho, seva mein lag jaae। paramdham mein chalo, to paramdham mein chala jaaye। sookshm vatan mein chalo, second mein chala jaae। jo socho woh order mein ho। abhi is shakti ko badhaao। chhote-chhote sanskaaron mein, yuddha mein samay nahin ganvaao, aaj is sanskaar ko bhagaaya, kal usko bhagaaya। controlling power dhaaran karo to alag-alag sanskaar par time nahin lagaana padega। nahin sochna hai,nahin karna hai, nahin bolna hai। stop। to stop ho jaae। yeh hai karmaateet avastha tak pahunchne ki vidhi। to karmaateet banna hai na?baapdaada bhi kehte hain aap ko hi banna hai। aur koi nahin aayenge, aap hi ho। aapko hi saath mein le jaayenge lekin karmaateet ko le jaayenge na। saath chalenge ya peechhe-peechhe aayenge? (saath chalenge) yeh to bahut achha bola। saath chalenge, hisaab chuktu karenge? ismen haan ji nahin bola। karmaateet banke saath chalenge na। saath chalna arthaat saathi bankar chalna। jodi to achhi chaahiye ya lambi aur chhoti? samaan chaahiye na! to karmaateet banna hi hai। to kya karenge?abhi apna raajya achhi tarah se sambhaalo। roj apni darbaar lagaao। raajya adhikaari ho na! to apni darbaar lagaao,karmachaariyon se haalchaal poochho। check karo order mein hain?brahma baap ne bhi roz darbaar lagaai hai। kaapi hai na। inhon ko bataana, dikhaana। brahma baap ne bhi mehnat ki, roz darbaar lagaai tab karmaateet banen। to abhi kitna time chaahiye?ya ever ready ho? is avastha se seva bhi fast hogi। kyon?ek hi samay par mansa shaktishaali,vaacha shaktishaali,sambandh-samparka mein chaal aur chehra shaktishaali। ek hi samay par teenon seva bahut fast result nikaalegi। aise nahin samjho ki is saadhna mein seva kam hogi,nahin। saphalta sahaj anubhav hogi। aur sabhi jo bhi seva ke nimitta hain agar sangathit roop mein aisi stage banaate hain to mehnat kam aur saphalta jyaada hogi। to vishesh attention controlling power ko badhaao। sankalp, samay,sanskaar sab par control ho। bahut baar baapdaada ne kaha hai - aap sab raaje ho। jab chaaho jaise chaaho, jahaan chaaho, jitna samay chaaho aisa man buddhi law aur order mein ho। aap kaho nahin karna hai, aur phir bhi ho raha hai, kar rahe hain to yeh law aur order nahin hai। to svaraajya adhikaari apne raajya ko sada pratyaksha swaroop mein laao। laana hai na? la bhi rahe hain lekin baapdaada ne kaha na - sada shabd add karo। baapdaada abhi last mein aayenge, abhi ek tarna hai। ek tarna mein result poochhenge। 15 din hote hain na। to 15 din mein kuchh to dikhaayenge ya nahin? teachers bolo, 15 din mein result hogi?

achha - madhuban vaale 15 din mein result dikhaayenge। abhi kaho haan ya na! abhi haath uthaao। (sabhi ne haath uthaaya) apne haath ki laaz rakhna। jo samajhte hain koshish karenge, aise koshish vaale haath uthaao। gyaan sarovar,shaantivan vaale utho। (baapdaada ne madhuban, gyaanasrovar,shaantivan ke mukhya nimitta bhaai bahinon ko saamne bulaaya)

baapdaada ne to aap sabka saakshaatkaar karaane ke liye bulaaya hai। aap logon ko dekhkar sabhi khush hote hain। abhi baapdaada chaahte kya hain, woh bata rahe hain। chaahe paandav bhavan,chaahe shaantivan, chaahe gyaan sarovar,chaahe hospital chaar dhaam to hain। paanchava chhota hai। chaaron mein hi baapdaada ki ek aash hai - baapdaada teen maas ke liye chaaron dhaam mein akhanda, nirvighna,atal svaraajyadhaari,raajaaon ka result dekhne chaahte hain। teen maas yahaan vahaan se koi bhi aur baaten nahin sunne mein aaven। sab svaraajya adhikaari number one,kya teen maas ki aisi result ho sakti hai? (nirvair bhaai se) - paandavon ki taraph se aap ho। ho sakta hai? daadi to hai lekin saath mein yeh jo saamne baithe hain, sab hain। to ho sakta hai? (daadi kehti hai ho sakta hai।) jo paandav bhavan vaale baithe hain woh haath uthaao,ho sakta hai। achha maano koi kamjor hai,uska kuchh ho jaata hai phir aap kya karenge? aap samajhte ho ki saath vaalon ko bhi saath dete hue result nikaalenge,itni himmat rakhte ho? ho sakta hai ya sirf apni himmat hai? doosron ki baat ko bhi sama sakte ho? uski galti sama sakte ho? vaayumandal mein phailaao nahin, sama do, itna kar sakte ho?jor se bolo haan ji। mubaarak ho। 3 maas ke baad report dekhenge। kisi bhi sthaan se koi bhi report nahin nikalni chaahiye। ek do ko vibration de sama dena aur pyaar se vibration dena। jhagda nahin ho।

aise hi double videshi bhi result denge na। sabhi ko banna hai na। double videshi jo samajhte hain apne centre par, saathiyon ke saath 3maas ki result nikaalenge,woh haath uthaao। jo samajhte hain koshish karenge,kah nahin sakte, woh koi hain to haath utha lo। saaph dil hain,saaph dil vaalon ko madad milti hai। achha।(phir baapdaada ne sabhi zone ke bhaai bahinon se bhi haath uthvaaye tatha apne sthaan par khada kiya। pahle mahaaraashtra,dilli, kanaartak ke bhaai bahinon ko khada kiya aur vaayda karaaya। phir yu.pi. vaalon ko seva ki mubaarak di। )

yu.pi.:- (1600 hain) pahle yu.pi. vaalon ko seva ki mubaarak hai। sabhi ne achhi himmat kar seva mein apna tan, man, samay aur dhan bhi saphal kiya aur punya ka khaata jama kiya isliye sabhi ki duaayen seva ka phal svatah hi milta hai। to achha kiya,himmat ki aur saphalta praapta ki,isliye mubaarak ho। aur sabki duaayen bhi hain। achha - jo samajhte hain ki result nikaalni hi hai, to haan ji karo। jo samajhte hain koshish karke dekhege woh khade raho baaki baith jaao।

(iske baad gujraat,Indore, panjaab,eastern- (nepaal,aasaam, udeesa,bangaalbihaar) raajasthaan, bhopaal,aagra, taamilnaadu aadi sabhi zone vaalon ko baapdaada ne sabha mein khada karke vaayde karaaye।)

majority to umang-utsaah mein hain baaki jinhonne koshish mein haath uthaaya, woh bhi right hain। lekin baapdaada kehte hain himmat rakhne se, dridh sankalp karne se sab achha ho jaata hai। master sarvashaktivaan ban agar sankalp karo to kya nahin kar sakte ho। jab vishwa ko parivartan kar sakte ho to kya apne ko nahin kar sakte ho! iseelie jinhonne haan ki hai unko baapdaada yahi kehte hain ki sada yeh sankalp amritvele emerge karna ki humein nirvighna rehna hi hai aur koshish vaale sada amritvele yog ke baad yeh dridh sankalp revise karo ki himmate bachche madde baap hai। to isse koshish karne ke bajaae saphalta anubhav karte jaayenge। baaki baapdaada sabhi bachchon ke result ko dekh khush to sada hai hi phir bhi himmat ke oopar vishesh mubaarak de rahe hain। teen maas ka abhyaas sadaakaal ka anubhvi bana dega। agar apne umang-utsaah se kiya to। majboori se kiya 3maas paas karne hain, phir to sadaakaal ka nahin hoga। lekin umang-utsaah se kiya to sadaakaal ke liye anaadi avinaashi sanskaar emerge ho jaayenge। samjha। achha –

chaaron or ke sarva svaraajya adhikaari aatmaon ko,sada akhanda raajya ke paatra aatmaon ko,sada baap ke samaan karmaateet sthiti mein pahunchne vaale, baap ko follow karne vaale teevra purushaarthi aatmaon ko,sada ek do ko shubh bhaavna, shubh kaamna ka sahayog dene vaale shubhaachintak bachchon ko yaadapyaar aur namaste।

daadiyon se

aap nimitta bani hui aatmaon ke andar jo teevra purooshaartha ka sankalp emerge rehta hai woh auron ko bhi bal dekar chla raha hai। dilshikasta aatmaon mein bal bhar raha hai। aur sabhi naya umang lekar jaate hain। chaahe kuchh bhi ho, thodi bahut khitpit to hoti hai parantu apne purooshaartha ka umang majority le jaate hain। isliye dheere-dheere sab theek ho raha hai,ho jaayega। kam nahin hoga,badhta jaayega। achha hai baapdaada ko naaz hai ki brahma baap ke saathi bachche achha saath nibha rahe hain। kam nahin hain। saath nibhaane mein achha part baja rahe hain। to baapdaada donon hi apne saath nibhaane vaale saathi bachchon ko baar-baar mubaarak kya denge,duaayen dete rehte hain। achha part baja rahe ho। saakaar mein stambha ban gaye hain, jiske aadhaar par sab aage chal rahe hain। isliye aap logon ko sahaj purooshaartha hai, duaaon se aapka khaata bahut-bahut badh raha hai। achha hai।

(18 taareekh ko daadi ka chhota operation hai)pata hai, kya hai, kuchh nahin hai। hua pada hai koi aisi baat nahin hai। khitkhit se nikaal dena achha hai। aage bhi to seva karni hai na। mukhya paartadhaari hain to uski jyaada sambhaal ki jaati hai। chalaana nahin padta hai। dhyaan dena hi padta hai। kuchh nahin hai। achha - om shanti।