मंगलवार 30 नवंबर 1999 की अव्यक्त मुरली

>

30-11-99 om shanti avyakt baapdaadaamdhuban

paas with honour banne ke liye sarva khazaanon ke khaate ko jama kar sampanna bano

aaj baapdaada kis sabha ko dekh rahe hain? aaj ki sabha mein har ek bachcha highest aur avinaashi khazaanon se richest hai। duniya vaale kitne bhi richest ho lekin ek janma ke liye richest hain। ek janma bhi richest rahega ya nahin,yeh bhi nishchit nahin hai। chaahe kitna bhi richest in world ho parantu ek janma ke liye,aur aap ho jo nishchay aur nashe se kehte ho ki ham anek janma richest hain kyonki aap sabhi avinaashi khazaanon se sampanna ho। aap sabhi jaante ho ki ham is samay ke purooshaartha se ek din mein bhi bahut kamaai karne vaale hain। jaante ho ki ek din mein aap kitni kamaai karte ho? hisaab jaante ho na! gaaya hua hai,anubhav hai - `ek kadam mein padma'। to ek din mein baap dvaara,baap ki knowledge dvaara,yaad dvaara har kadam mein padma jama hote hain। to saare din mein jitne bhi kadam yaad mein uthaate ho utne padma jama karte ho। to aisa kamaai karne vaala, khazaana jama karne vaala vishwa mein koi hoga! va hai?vishwa mein chakkar lagaakar aao, sivaae aapke itna jama koi kar nahin sakta। isliye baap kehte hain - is shreshtha smriti mein raho ki ham aatmaon ka bhaagya param aatma dvaara aisa shreshtha bana hai।

apne khazaane to jaante ho na! samay ke khazaane ko bhi jaante ho ki is sangamayug ka samay kitna shreshtha hai,jo praapti chaahiye woh adhikaari ban baap se le rahe ho। sarva adhikaar praapta kar liya hai na?ek-ek shreshtha sankalp kitna bada khazaana hai, samay bhi bada khazaana hai, sankalp bhi bada khazaana hai। sarva shaktiyaan bade se bada khazaana hai। ek-ek gyaan-ratna kitna bada khazaana hai। har ek gun kitna bada khazaana hai। duniya vaale bhi maante hain ki shvaanson shvaans yaad se shvaans saphal hote hain। to aap sabke shvaans saphalta swaroop hain, vyartha nahin। har shvaans mein saphalta ka adhikaar samaaya hua hai। baapdaada ne sabhi bachchon ko sarva khajaane ek jaise hi diye hain। sarva bhi diye hain aur samaan diye hain। koi ko ek guna, koi ko das guna,koi ko 100guna… aise nahin diya hai। dene vaale daata ne ek-ek bachche ko sarva khazaane brahman bante hi samaan roop mein diye hain। lekin khazaane ko kitna jama karte hain ya ganvaate hain,yeh har ek ke oopar hai। har ek ko check karna hai ki ham saare din mein kitna jama karte hain ya ganvaate hain?check karte ho?check zaroor karna hai kyonki ek janma ke liye nahin hai lekin har janma ke liye hai। anek janma ke liye jama chaahiye। jama karne ki vidhi jaante ho?bahut sahaj hai। sirf bindi lagaate jaao। bindi yaad hai to jama hota hai। jaise sthool khazaane mein bhi ek ke saath bindi lagaate jaao to badhta jaata hai na! aise hi aatma bhi bindi, baap bhi bindi aur drama mein jo beet chuka woh bhi fullstop arthaat bindi। agar har khazaane ko bindi roop se yaad karo to jama hota jaata। anubhav hai na! bindi lagaai aur vyartha se jama hota jaata hai। bindi lagaane aati hai? kai baar aise hota hai jo koshish karte ho bindi lagaane ki lekin bindi ke bajaae lambi line ho jaati hai, bindi ke bajaae question mark ho jaata hai,aashcharya ki line lag jaati hai। to jama ka khaata badhaane ki vidhi hai `bindi'aur ganvaane ka raasta hai lambi line lagaana, question mark lagaana, aashcharya ki maatra lagaana। sahaj kya hai? bindi hai na! to vidhi bahut sahaj hai - svamaan aur baap ki yaad tatha phaaltu ko fullstop lagaana।

baapdaada ne pahle bhi kaha hai - roz amritvele apne aapko teen bindiyon ki smriti ka tilak lagaao to ek khazaana bhi vyartha nahin jaayega। har samay, har khazaana jama hota jaayega। baapdaada ne sabhi bachchon ke har khazaane ke jama ka chart dekha। usmein kya dekha? abhi tak bhi jama ka khaata jitna hona chaahiye utna nahin hai। samay,sankalp,bol vyartha bhi jaata hai। chalte-chalte kabhi samay ka mahattva emerge roop mein kam hota hai। agar samay ka mahatva sada yaad rahe,emerge rahe to samay ko aur jyaada saphal bana sakte ho। saare din mein saadhaaran roop se samay chala jaata hai। galat nahin lekin saadhaaran। aise hi sankalp bhi bure nahin chalte lekin vyartha chale jaate hain। ek ghante ki checking karo,har ghante mein samay ya sankalp kitne saadhaaran jaate hain? jama nahin hote hain। phir baapdaada ishaara bhi deta hai, to baapdaada ko bhi dilaase bahut dete hain। baba, aise thoda sa sankalp hai bas। baaki nahin, sankalp mein thoda chalta hai। sampoorn ho jaayenge। theek ho jaayenge। abhi ant thode hi aaya hai, thoda samay to pada hai। samay par sampanna ho jaayenge। lekin baapdaada ne baar-baar kah diya hai ki jama bahut samay ka chaahiye। aise nahin jama ka khaata ant mein sampanna karenge,samay aane par ban jaayenge! bahut samay ka jama hua bahut samay chalta hai। varsa lene mein to sabhi kehte hain ham to lakshmi-naaraayan banenge। agar haath uthvaayenge ki tretaayugi banenge?to koi nahin haath uthaata। aur lakshmi-naaraayan banenge? to sabhi haath uthaate। agar bahut samay ka jama ka khaata hoga to poora varsa milega। agar thoda-sa jama hoga to full varsa kaise milega? isliye sarva khazaane ko jitna jama kar sako utna abhi se jama karo। ho jaayega, aa jaayenge…ge ge nahin karo। ``karna hi hai'' -yeh hai dridhta। amritvele jab baithte hain, achhi sthiti mein baithte hain to dil hi dil mein bahut vaayde karte hain - yeh karenge, yeh karenge। kamaal karke dikhaayenge… yeh to achhi baat hai। shreshtha sankalp karte hain lekin baapdaada kehte hain in sab vaaydon ko karma mein laao। sirf vaayda nahin karo lekin jo bhi vaayde karte ho woh man-vachan aur karma mein laao। bachche sankalp bahut achhe-achhe karte hain, baapdaada us samay khush hote hain kyonki himmat to rakhte hain na। yeh banenge, yeh karenge… himmat bahut achhi rakhte hain। to himmat par baapdaada khush hote hain। parantu jab karma mein aana hota hai to kabhi-kabhi ho jaata hai। vaayda karna bahut sahaj hai। lekin karma mein karna maana vaayda nibhaana। vaayde karne vaale to bahut hain lekin nibhaane mein nambarvaar ho jaate hain। to sankalp aur karma ko, plan aur practical donon ko samaan banaao। bana sakte ho na?business vaale aaye hain। business vaale to business karna jaante hain na! jama karna jaante hain na! aur engineer va vaigyaanik bhi practical mein kaam karte hain। aur jo rural (graameen prabhaag) hai,baapdaada unhon ko `ruler' kehte hain, kyonki agar yeh seva nahin karte to koi nahin chal paate। to teenon hi wing jo aaye hain woh karma karne vaale hain। sirf kahne vaale nahin, karne vaale hain। to sabhi vaayde karma mein nibhaane vaali aatmaaye ho na! ya sirf vaayda karne vaale ho?vaayde ke samay to baapdaada ko himmat dikhaakar khush kar dete hain। baapdaada ke paas har ek bachche ke vaaydon ka file hai। vahaan (vatan mein) vaaydon ka file rakhne ke liye almaari va jagah ki to baat hai nahin। kabhi-kabhi baapdaada apni alaukik T.vi. achaanak kholte hain। sada nahin kholte hain, kabhi-kabhi kholte hain to sab sunne mein aata hai। jo aapas mein bolchaal karte hain, woh bhi sunte hain। iseelie baapdaada kehte hain - vyartha ko jama ke khaate mein jama karo।

brahman arthaat alaukik। brahman jeevan ka mahattva bahut bada hai। praaptiyaan bahut badi hain। svamaan bahut bada hai aur sangam ke samay par baap ka banna,yeh bade-se-bada padmaguna bhaagya hai। isliye baapdaada kehte hain ki har khazaane ka mahattva rakho। jaise doosron ko bhaashan mein sangamayug ki kitni mahima sunaate ho। agar aapko koi topic deven ki sangamayug ki mahima karo to kitna samay kar sakte ho? ek ghanta kar sakte ho? teachers bolo। jo kar sakta hai woh haath uthaao। to jaise doosron ko mahattva sunaate ho, mahattva jaante bahut achha ho। baapdaada aise nahin kahega ki jaante nahin hain। jab suna sakte hain to jaante hain tab to sunaate hain। sirf hai kya ki merge ho jaata hai। emerge roop mein smriti rahe - woh kabhi kam ho jaata hai, kabhi jyaada। to apna eeshvareey nasha emerge rakho। haan main to ho gai, ho gaya… nahin। practical mein hoon… yeh emerge roop mein ho। nishchay hai lekin nishchay ki nishaani hai -`roohaani nasha'। to saara samay nasha rahe। roohaani nasha - main kaun! yeh nasha emerge roop mein hoga to har second jama hota jaayega।

to aaj baapdaada ne jama ka khaata dekha isliye aaj vishesh attention dila rahe hain ki samay ki samaapti achaanak honi hai। yeh nahin socho ki maaloom to padta rahega,samay par theek ho jaayenge। jo samay ka aadhaar leta hai,samay theek kar dega, ya samay par ho jaayega… unka teacher kaun? samay ya svayan param-aatma? param-aatma se sampanna nahin ban sake aur samay sampanna banaayega, to isko kya kahenge? samay aapka master hai ya paramatma aapka shikshak hai? to drama anusaar agar samay aapko sikhaayega ya samay ke aadhaar par parivartan hoga to baapdaada jaante hain ki praalabdha bhi samay par milegi kyonki samay teacher hai। samay aapka intajaar kar raha hai, aap samay ka intajaar nahin karo। woh rachna hai, aap master rachta ho। to rachta ka intajaar rachna kare, aap master rachta samay ka intajaar nahin karo। aur mushkil hai bhi kya? sahaj ko svayan hi mushkil banaate ho। mushkil hai nahin, mushkil banaate ho। jab baap kehte hain jo bhi bojh lagta hai woh bojh baap ko de do। woh dena nahin aata। bojh uthaate bhi ho phir thak bhi jaate ho phir baap ko ulhana bhi dete ho - kya karen, kaise karen…! apne oopar bojh uthaate kyon ho? baap offer kar raha hai - apna sab bojh baap ke havaale karo। 63janma bojh uthaane ki aadat padi hui hai na! to aadat se mazboor ho jaate hain, isliye mehnat karni padti hai। kabhi sahaj,kabhi mushkil। ya to koi bhi kaarya sahaj hota hai ya mushkil hota hai। kabhi sahaj kabhi mushkil kyon? koi kaaran hoga na! kaaran hai - aadat se mazboor ho jaate hain aur baapdaada ko bachchon ki mehnat karna,yahi sabse badi baat lagti hai। achhi nahin lagti hai। master sarvashaktivaan aur mushkil?title apne ko kya dete ho? mushkil yogi ya sahaj yogi? nahin to apna title change karo ki ham sahaj yogi nahin hain। kabhi sahajyogi hain,kabhi mushkil yogi?aur yog hai hi kya? bas,yaad karna hai na। aur powerful yog ke saamne mushkil ho hi nahin sakti। yog lagan ki agni hai। agni kitna bhi mushkil cheez ko parivartan kar deti hai। loha bhi mould ho jaata hai। yeh lagan ki agni kya mushkil ko sahaj nahin kar sakti hai?kai bachche bahut achhi-achhi baaten sunaate hain, baba kya karen vaayumandal aisa hai, saathi aisa hai। hans,bagule hain,kya karen puraane hisaab kitaab hain। baaten bahut achhi-achhi kehte hain। baap poochhte hain - aap braahmanon ne kaun sa theka uthaaya hai?theka to uthaaya hai - vishwa-parivartan karenge। to jo vishwa-parivartan karta hai woh apni mushkil ko nahin mita sakta?

to aaj kya karenge? jama ka khaata badhaao। to jo kehte ho sahaj yogi, woh anubhav karenge। kabhi mushkil kabhi sahaj, ismen maja nahin hai। brahman jeevan hai maje ki। sangamayug hai maje ka yug। bojh uthaane ka yug nahin hai। bojh utaarne ka yug hai। to check karo, apne takdeer ki tasveer knowledge ke aaine mein achhi tarah se dekho। aaina to hai na? ya nahin hai? toot to nahin gaya hai na? sabhi ko aaina mila hai? maataayen,aaina mila hai ya chori ho gaya hai? paandav to sambhaalne mein hoshiyaar hain na? aaina hai? haath to achha uthaaya। achha hai। takdeer ki tasveer dekho aur sada apne takdeer ki tasveer dekh vaah-vaah ka geet gaao। vaah meri takdeer! vaah mera baba! vaah mera parivaar! parivaar bhi vaah-vaah hai! aise nahin yeh to bahut vaah-vaah hai,yeh thoda aisa hai! nahin। vaah mera parivaar! vaah mera bhaagya! aur vaah mera baba! brahman jeevan arthaat vaah-vaah! haay-haay nahin। shaareerik vyaadhi mein bhi haay-haay nahin,vaah! yeh bhi bojh utarta hai। agar 10 man se aapka 3-4 man bojh utar jaae to achha hai ya haay-haay?kya hai? vaah bojh utra! haay mera part hi aisa hai! haay mere ko vyaadhi chhodti hi nahin hai! aap chhodo ya vyaadhi chhodegi? vaah-vaah karte jaao to vaah-vaah karne se vyaadhi bhi khush ho jaayegi। dekho,yahaan bhi aise hota hai na,kiski mahima karte ho to vaah-vaah karte hain। to vyaadhi ko bhi vaah-vaah kaho। haay yeh mere paas hi kyon aai, mera hi hisaab hai! praapti ke aage hisaab to kuchh bhi nahin hai। praaptiyaan saamne rakho aur hisaab-kitaab saamne rakho, to woh kya lagega?bahut chhoti si cheez lagegi। matlab to brahman jeevan mein kuchh bhi ho jaae, positive roop mein dekho। negative se positive karna to aata hai na। negative-positive ka course bhi to karaate ho na! to us samay apne aapko course karaao to mushkil sahaj ho jaayega। mushkil shabd braahmanon ki dictionary mein nahin hona chaahae। achha –

koi bhi hisaab hai,aatma se hai,shareer se hai ya prakriti se hai; kyonki prakriti ke yeh5 tatva bhi kai baar mushkil ka anubhav karaate hain। koi bhi hisaab-kitaab yog agni mein bhasma kar lo। samjha kya karna hai? jama ka khaata badhaao। bol mein bhi saadhaaran bol nahin, bol mein bhi bhinna-bhinna bhaav aur bhaavna hoti hai aur bol dvaara bhaav aur bhaavna ka pata pad jaata hai। to sada jo bhi bol bolo usmein aatmik bhaav ho aur shubh va shreshtha bhaavna ho। bol bhi aur bhaavna bhi। maaya ki jo bhaavna hai woh hai eershya,hasad, ghrina… yeh maaya ki bhaavna hai। sada shubh bhaav aur bhaavna ho। aisa hai?check karna। samay ka khazaana,bol ka khazaana, sankalpon ka khazaana, shaktiyon ka khazaana, gyaan ka khazaana, gunon ka khazaana… ek-ek khazaane ko check karo kyonki har khazaane ka khaata jama karna hai। in sarva khazaanon ka khaata bharpoor ho tab kahenge full marks arthaat paas with honour। aise nahin sochna - ek khazaana agar kam jama hai to kya harja hai lekin paas with honour banne ke liye sarva khazaanon mein khaata bharpoor ho।

baapdaada ke saamne jo aap baithe hain sirf unhon ko nahin dekh rahe hain। jo bhi bachche desh mein hain ya videsh mein hain,sabhi ko dekh rahe hain। sammukh nahin hain lekin dil mein hain। aaj aap sammukh ho,kal aur honge। lekin aise nahin ki aapko baapdaada nahin dekhte। woh dil mein hain, aap sammukh ho। aise nahin aap dil mein nahin ho lekin sammukh ho uska mahattva hai। samjha। achha।

business vaale haath uthaao। business vaale kya sochte hain?khaas aapko chance mila hai। business vaalon ko baap se bhi business karaao। sirf khud kiya woh to achha kiya lekin auron ko bhi baap se business karaao kyonki aajkal sarva biznesmain tension mein bahut hain। business samay anusaar neeche ja raha hai। isliye jitna bhi paisa hai,paise ke saath chinta hai - kya hoga! to unhon ko chinta se hataae avinaashi khazaane ka mahatva sunaao। to jitne bhi biznesmain aaye hain chaahe chhota business hai, chaahe bada hai। lekin apne hamjinsa kaarya karne vaalon ko khushi ka raasta bataao। jo bhi aap biznesmain aaye hain unhon ko chinta hai? kya hoga, kaise hoga,chinta hai? chinta nahin hai to haath uthaao। kal kuchh ho jaaye to? bephikar baadshaah hain?biznesmain bephikra baadshaah hain?thodon ne haath uthaaya? jisko thoda-thoda phikar hai woh haath utha sakte ho ya sharma aayega?baapdaada ne title hi diya hai - bephikra baadshaah, begampur ke baadshaah। to jab bhi koi aisi baat aaye, aayegi to zaroor lekin aap begampur mein chale jaana। begampur mein baith jaana to baadshaah bhi ho jaayenge aur begampur mein bhi ho jaayenge। aapne hi aahvaan kiya hai ki puraani duniya jaaye aur nai duniya aaye, to jaayegi kaise?neeche oopar hogi tab to jaayegi। kuchh bhi ho jaae aapko bephikra banna hi hai। aapne hi aahvaan kiya hai, puraani duniya khatma ho। to puraani duniya mein puraane makaan mein kya hota hai? kabhi kya tootta hai,kabhi kya girta hai, to yeh to hoga hi। nothing new। brahma baap ka yahi har baat mein shabd tha - ``nothing new।''hona hi hai,ho raha hai aur ham bephikra baadshaah। aise bephikra ho? bephikra honge to devaala bhi bach jaayega aur phikra mein honge, nirnay theek nahin hoga to ek din mein kya se kya ban jaate hain। yeh to jaante hi ho। bephikra honge, nirnay achha hoga to bach jaayenge। touching hogi - abhi samay anusaar yeh karen ya nahin karen! iseelie phikra maana business bhi girna aur apni sthiti bhi girna। to sadaiv yeh yaad rakho - bephikra baadshaah hain। phikra ki baat bhi badal jaayegi। himmat nahin haaro, dilshikasta kabhi nahin ho। himmat se baap ki madad milti rahegi। baap madad ke liye bandha hua hai lekin himmatheen ka madadgaar nahin hai। aap sochenge ki baap ki madad to mili nahin, lekin pahle yeh socho himmat hai? himmat bachche ki madad baap ki। aadha shabd nahin pakdo, baap ki madad to chaahiye na! lekin himmat rakhi? dilshikasta na hokar himmat rakhte chalo to madad gupta milti rahegi। to bolo kaun ho?biznesmain sabhi bolo kaun ho? bephikra baadshaah ho? yeh yaad rakhna। himmat kabhi nahin chhodna, kuchh bhi ho jaae madad milegi। lekin aadha nahin yaad karna। poora yaad rakhna। achha।

maataayen businessman nahin hain? (hain) to maataayen bhi bephikra baadshaah hain?naukar nahin ban jaana। maalik, baadshaah bankar rehna। chinta hai to udaasi hai। udaasi maana daasi banna। isliye baadshaah banna। achha।

doosre hain - engineer aur vaigyaanik woh haath uthaao।vaigyaanikon ko bahut achha anubhav hai। jaise science dinapratidin ati sookshm,maheen hoti jaati hai। aise aap silence aur science - donon ke anubhvi ho। to apne hamjinsa ko silence ka mahattva sunaao। unka bhi kalyaan karo। kalyaan karna aata hai na? silence bhi ek vigyaan hai, silence ka vigyaan kya hai, uski inhon ko pahchaan do। silence ke vigyaan se kya-kya hota hai, yeh jaanne se science bhi jyaada refine kar sakenge kyonki hamaari nai duniya mein bhi vigyaan to kaam mein aayega na! lekin refine roop mein hoga। abhi ke vigyaan ki invention mein phaayda bhi hai, nuksaan bhi hai। lekin nai duniya mein refine vigyaan hone ke kaaran nuksaan ka naam-nishaan nahin hoga। to aise jo bade-bade vaigyaanik hain unhon ko silence ka gyaan do। to phir apni nai duniya mein refine vigyaan ka kaarya karne mein madadgaar banenge। kitni sankhya hai vaigyaaniyon ki? jo abhi aaye hain woh kitne hain? (350)phir jab aao to kitne aayenge? 350 hi aayenge?kya karenge? ek-ek,ek ko laayenge?laana hai to haath uthaao। aapka naam to note hai। baapdaada dekhenge। ek,ek ko to aap samaan banaakar laao। jo laayenge woh haath uthaao, inhon ka T.vi. nikaalo। yeh bhi ek mauj manaana hai aur kya hai?achha- biznesmain haath uthaao, inka bhi T.vi. nikaalo।

vaigyaanikon ke saath engineer bhi hain। engineer kya karenge?engineer kuchh na kuchh naya banaate hain। to satayug mein nai duniya banaane ke liye auron ko taiyaar karo। aap to raaja banenge na! aap thode hi makaan banaane vaale banenge। to aisi aatmaayen taiyaar karo jo nai duniya ki rachna bahut achhe-se-achhi kar saken। aisi injeeniyri karen jo saare kalpa mein aisi cheejen nahin hon। chaahe dvaapar kaliyug mein bahut badhiya-badhiya cheejen banaate hain lekin nai duniya mein aisi aashcharyajnak cheejen hon jo aajkal ki shreshtha cheejon se sarvashreshtha hon। aise injeeniyarsa ko taiyaar karo। chalo poora gyaan nahin leven,regular nahin banen lekin baap ko to pahchaanen। kai aisi aatmaayen hain jo regular nahin banti hain lekin nishchay aur khushi mein rehti hain। sambandh mein sahayogi rehti hain। aisi aatmaayen bhi taiyaar karo। samjha! bahut achha। dekho aapka khaas part is tarna mein rakha hai। to koi khaas kamaal karenge na! abhi result dekhenge - biznesmain kitne laate hain, engineer aur vaigyaanik kitne laate hain? sankhya ka to pata chalega na। report nikalti hai na ki itni sankhya badh gai। to jo wing ke oopar hain unhon ko ek varsha ki result likhni hai। yeh sab ek varsha ke baad to aayenge na। sankhya dekhenge kitni badhi!

hospital ke trustee -aap sabhi kya kamaal karenge?jo patient aave usko patience dekar doosron ko lekar aao। videsh se bhi laao। achha –

teesra group rural - haath uthaao।ismen maataayen bhi hain, teachers bhi hain। achha aap log kya karenge? gaanv-gaanv ko mahal banaana। gaanv ki aisi seva karo jo satayugi duniya mein woh gaanv mahal ban jaayen। sabhi ko nai duniya ka parichay do। gaanv vaale bahut pyaar se sunte hain। bade-bade log to kam sunte hain lekin gaanv vaale log bahut pyaar se sunte hain aur gaanv ko badalkar dikhaao। jo government ko maaloom pade ki yeh gaanv kitna badal gaya hai। badal sakte ho?koi aisa gaanv ho jismen practical government ke aage ek proof dikhaao। gaanv-gaanv mein seva to ki hai lekin inmen se koi ek gaanv government ko dikhaao ki dekho is gaanv mein kitna parivartan aaya hai। aisa ho sakta hai? (aisi seva ki hai) to woh government tak pahunchaao। government ke aage record rakho। dekho - ek baat hai,government kehti hai ki aap social seva nahin karte। lekin aajkal baambe mein jo bageeche badalkar achhe sundar banaaye hain aur badhte jaate hain। to kichde ke sthaan ko park banaana,anek aatmaon ke nimitta banna,kya yeh desh ka social work nahin hai। kitne gharon ko machchhar aur jo bhi jarmas hain unse bachaaya। social work kya hai? yeh social work to hai। to aisa ekzaampal aas-paas vaalon ka sign lekar government ko do। woh likhkar den ki inhonne bahut achha kaam kiya hai। bachchon ke liye khelne-koodne ka sthaan banaana, unki tandaroosti badhaana… yeh social work nahin hai to kya hai, to aise photo nikaalo, bachchon ke bhi photo nikaalo, badon ke bhi photo nikaalo aur jitnon ka parivartan hua hai, unke bhi sign karaao phir government ko dikhaao ki ham social work karte hain ya nahin karte hain। samjha। aisa record taiyaar karo। jitne bageeche mile hain, un sabka record taiyaar karo। kya hai government ko pata to padta hi nahin hai aur ulti baaten bahut jaldi phailti hain। achhi seva kam phailti hai। isliye yeh social work ka ekzaampal dikhaao। jo kehte hain na social work nahin karte unhon ko yeh dikhaao। kitni khushi praapta hoti hai। social worker kya karte hain? kiska duhkh door karke khushi dete hain। usko set karte hain, aap to dimaag ko set kar dete ho। yeh social work nahin hai to kya hai! to seva bahut karte ho lekin record kam taiyaar karte ho। jaise baambe ki akhbaaren hain usmein daal sakte ho ki itni aatmaayen aati hain,itne bachche aate hain unhon ki khushi ke saadhan hain, unhon ki tandaroosti banti hai, aise-aise record taiyaar karo। achha। (baambe ka kamla nehru park bhi mil raha hai) woh bhi mil jaayega। aur aap logon ko jo aise laitar milte hain,woh aur shahron mein dikhaakar vahaan bhi kar sakte ho। achha।

naye-naye jo pahli baar aaye hain, woh haath uthaao।drama anusaar aaye to abhi hain lekin baapdaada ka slogan yaad hai?last so fast aur fast jaakar first aa sakte hain। margin hai। first ja sakte ho। lekin jama ka khaata jyaada se jyaada ikatthe karo। apna bhaagya yaad rehta hai na? vishesh nayon ko kah rahe hain। jisko bhaagya yaad rehta hai woh haath uthaao।

achha - jo ek second mein apne sankalp ko jahaan chaahe, jo sochna chaahen vahi soch chalta rahe, aise jo samajhte hain,woh haath uthaao।ek second mein mind kantrol ho jaae, aise second mein ho sakta hai? agar kar sakte ho to haath uthaao। aise kahne se nahin,agar kantrol hota hai to haath uthaao? achha jinhonne nahin haath uthaaya unhon ko kya ek minute lagta hai? ya usse bhi jyaada lagta hai? abhi yeh abhyaas bahut zaroori hai kyonki ant ke samay yeh abhyaas bahut kaam mein aayega। jaise is shareer ke organs ko, baanh hai, paanv hai, inko second mein jahaan lekar jaane chaaho vahaan le ja sakte ho na! aise man aur buddhi ko bhi meri kehte ho na! jab man ke maalik ho, yeh sookshm organs hain,to iske oopar kantrol kyon nahin?sanskaar ke oopar bhi kantrol hona chaahiye। jab chaaho, jaise chaaho - jab yeh abhyaas pakka hoga tab samjho paas with honour honge। to banna lakshmi-naaraayan hai, to raajya ko kantrol karne ke pahle sva-raajya adhikaari to bano tab raajya adhikaari banenge। iska bhi saadhan yahi hai ki khajaane jama karo। samjha। achha - is vaayumandal mein, madhuban mein baithe ho। madhuban ka vaayumandal powerful hai,is vaayumandal mein is samay man ko kantrol kar sakte ho? chaahe minute mein karo,chaahe second mein karo lekin kar sakte ho?order do man ko, bas aatma paramdham nivaasi ban jaao। dekho man order maanta hai ya nahin maanta hai? (drill) achha।

chaaron or ke sarva khazaanon ke maalik bachchon ko, sada mushkil ko second mein parivartan karne vaale sada sahajyogi, sada sankalp, samay,bol, karma ko shreshtha banaane vaale,sada bachat ka khaata badhaane vaale, sada man ke maalik,man-buddhi-sanskaar ko order mein chalaane vaale,aise sva-raajya adhikaari bachchon ko, chaahe desh mein hain chaahe videsh mein hain lekin dil se door nahin hain, aise chaaron or ke bachchon ko baapdaada ka yaadapyaar aur namaste।

sevaadhaari jo bhi seva ke prati aaye hain, vishesh -yu.pi. ka tarna hai। yu.pi. ke jo sevaadhaari aaye hain woh haath uthaao। dekho sevaadhaariyon ko kitne phaayde hain। sada gaaya hua hai, braahmanon ki seva mahaan punya hai। bhakti maarga mein 100 ya 200 braahmanon ki seva karte hain aur madhuban mein kitne braahmanon ki seva karte ho aur ek-ek brahman ki dua sevaadhaariyon ko svatah hi milti hai। kahne ki aavashyakta nahin hai lekin jama ho hi jaati hai ek to duaaon ka khaata jama hota, doosra seva ke punya ka khaata jama hota,teesra braahmanon ke sameep sambandh mein aate hain aur baapdaada se milne ka extra tarna mil jaata hai। to seva ka phal kitna hai! sevaadhaari arthaat jama karne vaale। to bahut achhi seva ki। dil se seva ki aur dilaaraam ke paas pahunch gai। yu.pi. vaale theek hain na! to jo bhi sevaadhaari bankar aata hai usko pratyaksha phal milta hai। bhavishya to milega lekin vartamaan samay mein bhi jama hota hai।

double videshi bhi bahut baithe hain। double videshi haath uthaao। dekho, double videshiyon ko chance bhi bahut milta hai। har group mein double videshi hain। double videshiyon ko koi bhi tarna mein mana nahin hai। to yeh kam bhaagya hai kya? aap sabhi jaante ho ki inhon ka tyaag, inhon ki himmat aur dil ki saphaai par baapdaada sada khush hota hai। aap log kya kehte ho?sachchi dil to muraad haansil… to yeh saaph aur sachchi dil vaale hain। agar girenge to bhi sach bataayenge,chhipaayenge nahin aur sach sunaane se aadha maaph ho jaata hai। isliye baapdaada double videshiyon ko sada yaad karte hain aur sada yaadapyaar dete hain। kamaal to hai aur kamaal karte-karte baapdaada ke saath apne ghar mein pahunch jaayenge। to vishesh double videshiyon ko padmaguna yaadapyaar। aise nahin bhaaratvaasiyon ko nahin hai। bhaaratvaasiyon ko phir padma-padmaguna yaadapyaar।

Indore hostel ki kanyaayen - kanyaaon ke liye gaaya hua hai ki har ek kanya 100 braahmanon se uttam hai,kyon uttam hai? kyonki seva kar itne braahmanon ki dua leni hai। to kumaariyaan boarding se nikal kya karengi? kya lakshya rakha hai?seva karengi? sir par taaj rakhengi ya tokri rakhengi? kya karengi? (taaj) naukri ki tokri to nahin uthaayengi? 100 braahmanon se uttam ka arth hi hai 100 brahman ki duaayen lengi। to itni seva karengi?achha। advance mein mubaarak ho। sabhi ki duaayen lena। achha।

(baapdaada poore haal ka chakkar lagaakar sabhi bachchon ko drishti dekar vaapas stage par pahunche hain)

mohini behen ki tabiyat theek nahin hain,ahamdaabaad se checking karaakar baapdaada ke saamne aai hain। hai hi theek। theek thi, theek hai aur theek rahegi। (doctor ne 6-7 din ki rest boli hai) bahut jaldi theek ho gai। himmat rakhi to himmat aur madad se pahunch gai। yeh beech ka chakra lagaakar aai।

daadiyon se - achhi seva ki। bahut achha hai। jo nimitta hain unhon ko samay par extra shakti mil jaati hai। dekho aap sab aadi ratnon ke aadhaar se sthaapna ka kaarya chal raha hai। aise hai na?baapdaada to sada serviceable ratnon ko dekhte rehte hain। theek hai na। shareer ka hisaab hai lekin `sooli se kaanta' ho jaata hai। pareshaan nahin hote। hisaab-kitaab chuktu hota hai lekin pareshaan nahin hote, shaan mein rehte hain। auron ko bhi shaan yaad dilaate hain। maalik hain na। shareer ko chalaane ki ramaz (yukti) seekh gaye hain। shareer ka bhi aapse pyaar hai na! mahaarthiyon se sabka pyaar hai। pyaar hai na। (daadi ji ko) dekho kitna kaam karti hain?lekin sada harshit। seekhte ho na। kabhi thakaavat ke chihna nahin hote। yeh hai baap samaan ki nishaani। brahma baba mahaarthiyon ko, vishesh bachchi ko sab vardaan, shaktiyaan aur zimmevaari sab dekar gaye। aap logon ke liye baapdaada ne vishesh inhon ko athak banne ka vardaan diya hai। aap sab bhi athak ban vishwa ko parivartan kar rahe hain aur karte rahenge। achha। paandav bhi mahaan hain।

omshaanti।