शनिवार 17 मार्च 2007 की अव्यक्त मुरली

> 17-03-2007 om shanti avyakt baapdaada madhuban

"shreshtha vritti se shaktishaali vibration aur vaayumandal banaane ka teevra karo, dua do aur dua lo"

aaj pyaar aur shakti ke saagar baapdaada apne snehi, sikeeldhe, laadle bachcho se milne ke liye aaye hai । sabhi bachche bhi door-door se sneh ki aakarshan se milan manaane ke liye pahunch gaye hai । chaahe sammukh baithe hai, chaahe desh videsh me baithe hue sneh ka milan mana rahe hai । baapdaada chaaro or ke sarva snehi, sarva sahayogi saathi bachcho ko dekh harshit hote hain । baapdaada dekh rahe hain majority bachcho ke dil mein ek hi sankalp hai ki abhi jaldi se jaldi baap ko pratyaksha karen । baap kehte hai sabhi bachcho ka umang bahut achha hai, lekin baap ko pratyaksha tab kar sakenge jab pahle apne ko baap samaan sampanna sampoorn pratyaksha karenge । to bachche poochhte hai baap se ki kab pratyaksha hoga? aur baap bachchon se poochhte hai ki aap bataao, aap kab svayan ko baap samaan pratyaksha karenge ? apne sampanna banne ki date fix ki hai ? foreign vaale to kehte hai ek saal pahle date fix ki jaati hai । to apne ko baap samaan banne ki aapas me meeting karke date fix ki hai?

baapdaada dekhte hain aajkal to har vargaki bhi meetings bahut hoti hai । double foreigners ki bhi meeting baapdaada ne suni । bahut achhi lagi । sab meetings baapdaada ke paas to pahuch hi jaati hain । to baapdaada poochhte hai ki iski date kab fix ki hai ? kya yeh date drama fix karega ya aap fix karenge ? kaun karega ? lakshya to aapko rakhna hi padega । aur lakshya bahut achhe te achha, badhiye te badhiya rakha bhi hai, abhi sirf jaisa lakshya rakha hai usi pramaan lakshan, shreshtha lakshya ke samaan banaana hai । abhi lakshya aur lakshan me antar hai । jab lakshya aur lakshan samaan ho jaayenge to lakshya practical mein aa jaayega । sabhi bachche jab amritvele milan manaate hai aur sankalp karte hai to woh bahut achhe karte hai । baapdaada chaaro or ke har bachche ki roohrihaan sunte hai । bahut sundar baate karte hai । purushaartha bhi bahut achha karte hai lekin purushaartha mein ek baat ki teevrata chaahiye । purushaartha hai lekin teevra purushaartha chaahiye । teevrata ki dridhta uski addition chaahiye ।

baapdaada ki har bachche ke prati yahi aash hai ki samay pramaan har ek teev purushaarthi bane । chaahe nambarvaar hai, baapdaada jaante hai lekin nambarvaar me bhi teevra purushaartha sada rahe, uski aavashyakta hai । samay sampanna hone me teevrata se chal raha hai lekin abhi bachcho ko baap samaan banna hi hai, yeh bhi nishchit hi hai sirf is mein teevrata chaahiye । har ek apne ko check kare ki mai sada teevra purushaarthi hoon? kyonki purushaartha me paper to bahut aate hi hain aur aane hi hai lekin teevra purushaarthi ke liye paper me paas hona itna hi nishchit hai ki teevra purushaarthi paper me paas hua hi pada hai । hona hai nahi, hua hi pada hai, yeh nishchit hai । seva bhi sabhi achhi roochi se kar rahe hai lekin baapdaada ne pahle bhi kaha hai ki vartamaan samay ke pramaan ek hi samay par mansa-vaacha aur karmana arthaat chalan aur chehre dvaara teeno hi prakaar ki seva chaahiye । mansa dvaara anubhav karaana, vaani dvaara gyaan ke khajaane ka parichay karaana aur chalan va chehre dvaara samoorna yogi jeevan ke practical roop ka anubhav karaana, teeno hi seva ek samay karni hai । alag- alag nahin, samay kam hai aur seva abhi bhi bahut karni hai । baapdaada ne dekha ki sabse sahaj seva ka saadhan hai - vritti dvaara vibration banaana aur vibration dvaara vaayumandal banaana kyoki vritti sabse tej saadhan hai । jaise science ki rocket fast jaati hai vaise aapki roohaani shubh bhaavna, shubh kaamna ki vritti, drishti aur srishti ko badal deti hai । ek sthaan par baithe bhi vritti dvaara seva kar sakte hai । suni hui baat phir bhi bhool sakti hai lekin jo vaayumandal ka anubhav hota hai, woh bhoolta nahi hai । jaise madhuban me anubhav kiya hai ki brahma baap ki karmabhoomi, yog bhoomi, charitra bhoomi ka vaayumandal hai । ab tak bhi har ek usi vaayumandal ka jo anubhav karte hai woh bhoolta nahi hai । vaayumandal ka anubhav dil me chhap jaata hai । to vaani dvaara bade-bade programme to karte hi ho lekin har ek ko apni shreshtha roohaani vritti se, vibration se vaayumandal banaana hai, lekin vritti roohaani aur shaktishaali tab hogi jab apne dil me, man me kisi ke prati bhi ulti vritti ka vibration nahi hoga । apne man ki vritti sada svachchha ho kyonki kisi bhi aatma ke prati agar koi vyartha vritti ya gyaan ke hisaab se negative vritti hai to negative maana kichda, agar man mein kichda hai to shubh vritti se seva nahin kar sakenge । to pahle apne aapko check karo ki mere man ki vritti shubh roohaani hai ? negative vritti ko bhi apni shubh bhaavna shubh kaamna se negative ko bhi positive mein change kar sakte ho kyonki negative se apne hi man mein pareshaani to hoti hai na ! vesta thoughts to chalte hain na ! to pahle apne ko check karo ki mere man mein koi khitkhit to nahi hai? nambarvaar to hain, achhe bhi hai to saath me khitkhit vaale bhi hain, lekin yeh aisa hai, yeh samajhna achha hai । jo wrong hai usko wrong samajhna hai, jo right hai usko right samajhna hai lekin dil mein bithaana nahi hai । samajhna alag hai, knowledgeful banna achha hai, wrong ko wrong to kahau na ! kai bachche kehte hain baba aapko pata nahi yeh kaise hai ! aap dekho na to pata pad jaae । baap maante hai aapke kahne se pahle hi maante hai ki aise hai, lekin aisi baaton ko apni dil mein vritti mein rakhne se svayan bhi to pareshaan hote ho । aur kharaab cheej agar man mein hai, dil mein hai to jahaan kharaab cheej hai, vesta thoughts hai, woh vishwa kalyaankaari kaise banenge ? aap sabhi ka occupation kya hai ? koi kahega ham london ke kalyaankaari hain, dilli ke kalyaankaari hain, UP ke kalyaankaari hain ? ya jahaan bhi rehte ho, chalo desh nahin to shahar ke kalyaankaari hai, occupation sab yahi bataate ki vishwa kalyaankaari hain । to sab kaun ho ? vishwa kalyaankaari ho ? hain to haath uthaao । (sabhi ne haath uthaaya) vishwa kalyaankaari ! vishwa kalyaankaari ! achha । to man mein koi bhi kharaabi to nahi hai ? samajhna alag cheej hai, samjho bhale, yeh right hai yeh wrong hai, lekin man mein nahi bithaao । man mein vritti rakhne se drishti aur srishti bhi badal jaati hai ।

baapdaada ne hom work diya tha - kya diya tha ? sabse sahaj purushaartha hai jo sabhi kar sakte hai, maataayen bhi kar sakti hain, boodhe bhi kar sakte hain, yuva bhi kar sakte hain, bachche bhi kar sakte hain, woh yahi vidhi hai sirf ek kaam karo kisi se bhi samparka mein aao - 'dua do aur dua lo।' chaahe woh baddua deta hai, lekin aap course kya karaate ho ? negative ko positive mein badalne ka, to apne ko bhi us samay course karaao । challenge kya hai ? challenge hai ki prakriti ko bhi tamoguni se satoguni banaana hi hai । yeh challenge hai na ! hai ? aap sabne yeh challenge ki hai ki prakriti ko bhi satopradhaan banaana hai ? banaana hai ? kaandh hilaao, haath hilaao । dekho, dekhaadekhi nahin hilaana । dil se hilaana, kyoki abhi samay pramaan vritti se vaayumandal banaane ke teevra purushaartha ki aavashyakta hai । to vritti mein agar jara bhi kichda hoga, to vritti se vaayumandal kaise banaayenge ? prakriti tak aapka vibration jaayega, vaani to nahin jaayegi । vibration jaayega aur vibration banta hai vritti se, aur vibration se vaayumandal banta hai । madhuban mein bhi sab ek jaise to nahi hai । lekin brahma baap aur ananya bachcho ke vritti dvaara, teevra purushaartha dvaara vaayumandal bana hai ।

aaj aapki daadi yaad aa rahi hai, daadi ki visheshta kya dekhi ? kaise control kiya? kabhi bhi kaisi bhi vritti vaale ki kami daadi ne man mein nahi rakhi । sabhi ko umang dilaaya । aapki jagdamba maa ne vaayumandal banaaya । jaante hue bhi apni vritti sada shubh rakhi, jiske vaayumandal ka anubhav aap sabhi kar rahe ho । chaahe follow father hai lekin baapdaada hamesha kehte hain ki har ek ki visheshta ko jaan us visheshta ko apna banaao । aur har ek bachche mein yeh note karna, baapdaada ka jo bachcha bana hai us ek ek bachche me, chaahe teesra number hai lekin yeh drama ki visheshta hai, baapdaada ka vardaan hai, sabhi bachchon mein chaahe 99 galtiyaan bhi ho lekin ek visheshta zaroor hai । jis visheshta se mera baba kahne ka hakdaar hai । parvash hai lekin baap se pyaar atoot hota hai । iseelie baapdaada abhi samay ki sameepta anusaar har ek jo bhi baap ke sthaan hain, chaahe gaanv me hai, chaahe bade zone me hai, centres par hai lekin har ek sthaan aur saathiyon me shreshtha vritti ka vaayumandal aavashyak hai । bas ek akshar yaad rakho agar koi baddua deta bhi hai, to lene vaala kaun ? kya dene vaala, lene vaala ek hota hai ya do ? agar koi aapko koi kharaab cheez de, aap kya karenge? apne paas rakhenge ? ya vaapas karege ya phenk denge ki almaari me sambhaal ke rakhenge ? to dil mein sambhaal ke nahi rakhna kyonki aapki dil baapdaada ka takhta hai । iseelie ek shabd abhi man mein pakka yaad kar lo, mukh me nahin man mein yaad karo - dua dena hai, dua lena hai । koi bhi negative baat man mein nahin rakho । achha ek kaan se suna, doosre kaan se nikaalna to aapka kaam hai ki doosre ka kaam hai ? tab hi vishwa me, aatmaao mein fast gati ki seva vritti se vaayumandal banaane ki kar sakenge । vishwa parivartan karna hai na! to kya yaad rakhenge ? yaad rakha man se ? dua shabd yaad rakho, bas kyonki aapke jad chitra kya dete hai? dua dete hai na ! mandir mein jaate hain to kya maangate hai ? dua maagte hain na ! dua milti hai tabhi to dua maagte hain । aapke jad chitra last janma mein bhi dua dete hai, vritti se unki kaamnaaye poori karte hai । to aap baar-baar aise dua dene vaale bane ho tab aapke chitra bhi aaj tak duaaye dete hain । chalo parvash aatmaao ko agar thoda sa kshama ke saagar ke bachche kshama de di to achha hi hai na ! to aap sabhi kshama ke master saagar ho ? ho ya nahi ho? ho na! kaho pahle mai । ismen he arjun bano । aisa vaayumandal banaao jo koi bhi saamne aaye woh kuchh na kuchh sneh le, sahayog le, kshama ka anubhav kare, himmat ka anubhav kare, sahayog ka anubhav kare, umang-utsaah ka anubhav kare । aise ho sakta hai ? ho sakta hai ? pahli line vaale ho sakta hai ? haath uthaao । pahle karna padega । to sabhi karege ? teachers karegi ?

achha - abhi last tarna me 15 din pade hain, theek hai na । madhuban me to madad hai hi, aap sabhi jitne bhi hai, jahaan ke bhi ho lekin yeh 15 din yeh practice karna ki dua dena hai aur dua lena hai । theek hai ? yeh homework theek hai? karenge ? madhuban vaale, achha hai, madhuban vaalo ko seat bahut achhi mili hai, seat achhi le li hai, hoshiyaar hai madhuban vaale, seat achhi pakad li hai । abhi number one ki bhi seat leni hai kyoki madhuban vaasi banna, bhaagya ki nishaani hai । aur abhi sabhi kahaan ke ho ? london ke, America ke, abhi sabhi madhuban ke ho । is samay to madhuban ke ho na? kitna achha hai । abhi sab madhuban nivaasi hain । to 15 din ke baad baapdaada result lege, theek hai ? peechhe vaale theek hai ? oopar gallery me bhi baithe hai । gailreevaale theek hai? achha । abhi vishwa ko bahut aavashyakta hai । aap nivaaran moorta ban jaao । aapke nivaaran moorta banne se aatmaaye nirvaan mein ja sakengi । agar aap nivaaran moorta nahin banege to aatmaaye bichaari nirvaan mein ja nahi sakegi । nirvaan ka get aapko hi kholna hai । baap ke saath-saath get kholege na ? get ki ceremony karenge na? abhi date banaana aapas me । baapdaada sab meeting sunte hai, baapdaada ko kya hai, switch on kiya, suna । ek hi samay par sabhi zone, sabhi desh ki baaten sun sakte hai, sunne chaahe to । abhi behad me aao । koi koi bachche thode jyaada gambheer bante hai, gambheerta achhi hai lekin jyaada gambheerta serious lagta hai, to serious kisko achha naheen lagta hai । gambheer bano lekin andar gambheerta ho, baahar chehra muskaraata ho । muskaraata hua chehra sabhi ko pasanda aata hai aur aise jyaada gambheer vaala chehra usse darte hai, door bhaagte hai । sahayogi nahi banege । brahma baap ka muskaraana, jagat amba maa ka muskaraana, apni daadi ka muskaraana, yaad hai na ! double foreigners ko bhi daadi ka muskaraata chehra achha lagta hai na ! haath hila rahe hai । hanso nahin, muskaraao । jor se hansana nahi, muskaraana kyonki baapdaada ko abhi teevra purushaartha chaahiye । kyon ? kyonki baapdaada ne dekha ki bahut kaal ka sanskaar aavashyak hai । agar ant mein teevra purushaartha karenge to bahutkaal mein jama nahi hoga । aur bahutkaal mein agar aapka jama nahin hoga to 21 janma ka bahutkaal ka adhikaar bhi kam ho jaayega । to baapdaada nahin chaahta hai ki ek bhi bachche ka adhikaar kam ho, jab mera baba kaha, to mera baba kahne vaale bachche ka adhikaar kam nahin hona chaahiye kyonki baap ka to chaahe last bachcha hai, baap jaanta hai, last hai lekin kabhi murli mein nahin kaha ki woh last bachcha hai । meethe meethe bachche kehte hai to jo kaduve hai unho ko chhodke meethe bachchon ko yaad pyaar, yeh kabhi kaha hai ? jaante to hain ki woh last bachcha hai lekin phir bhi meethe meethe bachche kehte hai, kaduva nahi kehte hai । to baap samaan banna hai na ! baapdaada ko khushi hoti hai, jab sabhi ka lakshya poochhte hain to kehte hain baap samaan banna hai, last number bhi yahi kehta hai, to baapdaada khush hote hai, phir bhi lakshya ooncha rakha hai to lakshan bhi aate jaayenge । bahutkaal zaroor ikattha karna hai phir last mein nahi ulhana dena ki humein to bahutkaal yaad hi nahi tha । 63 janma ke bahutkaal ka prabhaav abhi tak bhi dekh rahe hain । chaahte nahi hai ho jaata hai, yeh kya hai ? bahutkaal ka prabhaav hai । isliye baapdaada har ek pyaare se pyaare bachchon ko yahi kehte hain teevra purushaarthi bhav ! homework yaad rakhna, 15 din ke baad result poonchhegen । 15 din me sanskaar pad jaayege na ! to aage bhi hoga । yahaan to vaayumandal ki madad hai na । aur sab madhuban vaale duty mein hain ya zone jiska tarna hai, woh duty par hai aur to sab free hai । to kya karenge ? daadi (daadi jaanki se) sunaao kya karenge? karke dikhaayenge ? karke hi dikhaana hai । (baba zaroor aapko pratyaksha karke dikhaayenge) pahle apne ko pratyaksha karo tab baap pratyaksha hoga । kyoki aap dvaara hona hai na ! to baap kehte hai aap kab apne ko pratyaksha karenge ? aapse to baap pratyaksha ho hi jaayega । hai umang ? kitna umang hai ? bahut umang hai ? sabhi ko jitna bahut-bahut umang hai utna hi baapdaada padam-padam-padamguna in advance mubaarak de rahe hai । achha ।

jagah jagah se bachcho ke email aur patra to aate hi hain । to jinhonne patra bhi nahi likha hai lekin sankalp kiya hai to sankalp vaalon ka bhi yaad pyaar baapdaada ke paas pahunch gaya hai । patra bahut meethe meethe likhte hain । patra aise likhte hai jo lagta hai ki yeh umang-utsaah mein udte hi rahenge । phir bhi achha hai, patra likhne se apne ko bandhan mein baandh lete hain, vaayda karte hai na ! to chaaron or ke jo jahaan dekh rahe hai ya sun rahe hain, un sabhi ko bhi baapdaada sammukh vaalon se bhi pahle yaadapyaar de rahe hain kyonki baapdaada jaante hain ki kahaan koi time hai, kahaan koi time hai lekin sab bade utsaah se baithe hain, yaad mein sun bhi rahe hai । achha ।

seva ka tarna - UP. aur Indore loan ka hai - (saamne teachers khadi hai) yeh sab teachers hai । dono taraph ki teachers hai । achha hai । baapdaada ko teachers par bhi naaj hai kyonki himmat rakhkar surrender hoke saari jeevan seva ke prati lagaane ka sankalp le liya hai । teachers pakki hai na? pakke hai ki thode thode kachche hai? teachers kachche nahin banna । teachers arthaat apne features se future dikhaane vaali । abhi sangamayug ka future hai - pharishta bhav । aur bhavishya ka features hai - devta bhav । to jo bhi sevaadhaari group aaya hai, unko double nasha hai ki pharishta so devta banna hi hai ! sabhi pakke hai na? haan dekho, aapka photo aa raha hai, to aisa nahin ho ki photo dikhaai nahin de, pakke rehna । kyoki jab kahaan thodi bahut halchal hoti hai na to kai bahut jaldi ghabra jaate hen । gahraai mein nahi jaate, ghabra jaate hai । agar gahraai mein jaaye na, to kabhi bhi kitna bhi bada halchal vaala paper ho ya baat ho lekin gahraai me jaane vaale jaise samudra hota hai na, to samudra ke tale mein jaane vaale bahut maal leke aate hain । oopar-oopar vaale nahi, oopar vaalo ko to machhli milegi lekin gahraai me jaane vaale bahut cheezen le aate hain । to yahaan bhi koi bhi baat hove, baaten to aayegi, baate nahin aayegi - yeh baapdaada nahi kahega । jitna aage jaayege utni sookshm baate aayegi kyoki paas with honour hona hai na । teachers ne kya socha hai ? paas with honour hona hai ya 33 marks se paas hona hai ? paas with honour hona hai to haath uthaao । inho ka achhi tarah se photo nikaalo । achha । to halchal me ghabraana nahin । baapdaada ko us samay bhool jaate ho, akele ban jaate ho na to chhoti baat bhi badi lagti hai । baapdaada combined hai, combined rakho, anubhav karo to dekho pahaad bhi rooi ban jaayega । koi badi baat nahi hai । kitne baari paas hue ho, kitne kalpa paas hue ho, pata hai ? nasha hai ? anek baar main hi paas hua hoon, abhi repeat karna hai । nai baat nahin hai, sirf repeat karna hai, yeh smriti rakho । to Indore aur UP, UP ko to saakaar maa baap ki bahut paalna mili hai । to UP ko to kamaal karna hai । aur Indore ki bhi visheshta hai ki saakaar baap ki prerna se centre khula hai । aise hai na ? donon ki visheshta hai, to abhi donon hi karo kamaal । aisa vaayumandal banaake dikhaao, jaise abhi kisko bhi parichay dete ho to kya kehte ho ? madhuban mein aake dekho, kehte ho na ! to abhi apne zone ko, apne sthaan ko aisa banaao jo kisko bhi kahen ki Indore me jaake dekho, UP me jaake dekho । theek hai na ? pasanda hai na ? kya nahi ho sakta hai ! aap ek-ek master sarvashaktivaan ke sankalp mein itni taakat hai jo chaaho woh ho sakta hai । sirf dridhta chaahiye । dridhta ki chaabi kabhi-kabhi maaya chori kar deti hai । is chaabi ko sada use karo, aise nahi sambhaal ke rakho, dimaag mein hai, chaabi hai lekin samay par use karo । samay beet jaata hai na, phir kya kehte hain, karna to aise tha, tha, tha karte hai । to tha, tha nahi karna । samay par karna । to zone number one ho jaayega । sabhi ka lakshya achha hai, number one hona hai । yahi lakshya hai na, ki jo bhi number mile theek hai ? baapdaada ko bhi har zone pyaare te pyaara hai, kyonki har zone mein koi na koi visheshta hai, lekin abhi khaas visheshta pratyaksha nahin kiya hai । hona to hai hi । hona to hai ! nahi, hua hi pada hai, sirf repeat karo । to sab khush hai ? kabhi khushi to nahi ganvaate ? khushi gai jeevan gai । neeras jeevan mein koi maja nahin । to achha hai, koi kamaal karke dikhaao । abhi baapdaada ne sabhi zone ko kaha hai koi naveenta karke dikhaao । abhi naveenta nahin dikhaai hai । yeh bade programme karna, yeh vargeekran ke programme karna, yeh to ho rahe hai, hote rahenge । ab koi naveenta dikhaao । usmein dekhe kaun sa zone aage jaata hai, videsh jaave ya desh jaaye । jo sab kaapi kar sake, aisi naveenta ho । dekhenge, kaun karta hai । karna to hai hi । achha । bahut achha chance liya, baapdaada kehte hai jo har visheshta me chance lete hain woh chancellor ban jaate hai । yagya seva ka punya jama kiya, bahut bada punya jama kiya kyonki yahaan vaayumandal aur bephikar ki madad hai, koi jimmevaari ka phikar nahi, jo duty mili vahi karni hai, bas । to dono zone ne bahut-bahut kamaai jama ki? thodi to nahi ki, bahut ki? achha ।

96 deshon se 900 videshi bhaai-bahinen aaye hain - videsh vaale sankhya badhaane me achha record dikha rahe hai । ek taraph sankhya badha rahe hai aur doosri taraph area ko sampanna banaane ka bhi umang achha hai । baapdaada ne suna ki majority sabhi taraph abhi ek do ko umang aa raha hai, har ek apni area ko check karke sandesh dene ka programme bana rahe hai । bhinna-bhinna vidhi se kar rahe hai lekin jo bhi kar rahe ho woh achha kar rahe ho । apna ulhana utaar rahe ho । yeh umang-utsaah svayamm ko bhi udaata hai, aur auro me bhi khushi ki lahar phailaata hai । jaise koi doobe hue ko patte ka bhi sahaara mil jaata hai, tinke ka sahaara mil jaata hai na, aise duhkhi aatmaon ko sahaara mil jaata hai । unke man se jo duaaye nikalti hai woh aapke punya ke khaate me jama ho jaati hai । yeh guhya hisaab hai । jitnon ko jo praapti hoti hai, aapke khaate me vo praapti jama ho jaati hai । baaki achha meeting ka bhi samaachaar suna, achha attention de rahe hai । apni avastha ka bhi achha chance lete hai aur seva ke programme me bhi achha bhavishya programme bana dete hai । ek umang achha hai, ki jo snehi sahayogi hai unho ko aur sahajyogi banaane me sameep laaye hai । yeh bhaarat vaale bhi karte hai lekin foreign vaale bhi achha kar rahe hai । abhi sabhi majority jahaan-jahaan seva karte ho chaahe VIP hai, chaahe saadhaaran hai lekin samajhte hai ki yahaan kuchh milta hai । kuchh naveenta hai, abhi yeh vaayumandal pahle se kaaphi change ho gaya hai । pahle kitna mushkil se bulaane par aate the, abhi to woh khud kehte hain ki hamko chance lene do, pharka ho gaya na । to videsh ki seva par bhi baapdaada khush hai । lekin sva ki seva mein kya sunaaya? teevra purushaarthi, purushaarthi sabhi hain lekin teevra purushaarthi banna hai, jo socha woh kiya, baap ne kaha bachchon ne kiya । yahi aapke jagat amba ki yukti thi, number one ho gai । to raat ko aur chalte phirte bhi check karo ki jo baap ne kaha karna hai, chalna hai, sochna hai, woh kiya ? jo baap ne kaha woh karna hi hai । baaki vriddhi bhi hai aur attention bhi hai । programme bhi achhe banaaye hai । double mubaarak ho । achha ।

bhinna-bhinna varga vaale bhi aaye hain, baapdaada ko maaloom hai, apni apni meetings kar rahe hain । jo bhi varga vaale aaye hai, plan to bahut achha bana rahe hai, abhi sirf addition yeh karo ki jab bhi meeting karte hai to hamesha sva aur seva dono ka balance rakh ek do ko seva ka umang bhi dilaao, lekin saath mein svaunnati ka umang-utsaah bhi dilaao । balance rakho । to double karne se double blessing milegi । yeh automatic blessing milti hai, deni nahin padti hai automatic milti hai । baapdaada ne dekha hai - sva-unnati ka bhi samaachaar bheja hai । (SpARC meeting ka samaachaar ramesh bhaai ne likhkar sandeshi dvaara baapdaada ke paas bheja tha) ramesh jo kar rahe hain na, usme sva-unnati ka bhi likha hai, usko baar-baar attention dilaao । jaise seva mein practical kar lete ho na, aise sva-unnati mein practical kiya ya nahi uska bhi chart rakho । baaki samaachaar mila tha, socha achha hai । jinhonne bhi meeting ki hai baapdaada ko samaachaar mila hai । abhi tak baapdaada ko ek baat ka varga vaalo ne respond nahi diya hai, yaad hai ? kaun sa respond nahi diya hai ? baapdaada chaahte hai har ek varga ka ek ek vishesh snehi bhi ho, sahayogi bhi ho, VIP bhi ho, mike bhi ho aur sahjayog ke interest vaala bhi ho, aisa har varga ka ek-ek ka group baap ke aage aave, sabhi varga ka, ek varga ka nahin, kabhi koi IP aate hain, VIP aate hain woh welcome । lekin baapdaada ek hi samay par har varga ke aise qualification vaale group ko dekhne chaahta hai । IPs ka group aata hai lekin vargeekran ka ek vishesh mike ho, aap sakaash bano woh speaker bane । aap might woh mike । to yeh abhi karke dikhaana । foreign vaale to programme karte hai, usme aa jaate hai । kaal aaph time bhi karte hain, usmein bhi IP aa jaate hain । yeh vargeekran ke roop mein mike laana । yeh dhyaan rakhna । (aise har varga ke bhaarat mein taiyaar hain, baapdaada milne ki date den ) abhi sabhi vargo se ek-ek mike ho, aisa group laao, uske liye time denge । achha । sabhi ne sankalp kiya, teevra purushaartha kar number one banna hi hai । kiya? haath uthaao । achha abhi teachers utha rahi hain । pahli line to hai hi na । achha hai -

baapdaada ne yeh bhi direction diya ki saare din me beech-beech mein 5 minute bhi mile, usme man ki exercise karo kyonki aajkal ka jamaana exercise ka hai । to 5 minute mein man ki exercise karo, man ko paramdham me leke aao, sookshm vatan mein pharishtepan ko yaad karo phir poojya roop yaad karo, phir brahman roop yaad karo, phir devta roop yaad karo । kitne hue? paanch । to paanch minute me 5 - yeh exercise karo aur saare din mein chalte phirte yeh kar sakte ho । iske liye maidaan nahi chaahiye, daud nahi lagaani hai, na kursi chaahiye, na seat chaahiye, na masheen chaahiye । jaise aur exercise shareer ki aavashyak hai, woh bhale karo, uski mana nahin hai । lekin yeh man ki drill, exercise, man ko sada khush rakhegi । umang-utsaah mein rakhegi, udti kala ka anubhav karaayegi । to abhi- abhi yeh drill sabhi shuru karo - paramdham se devta tak । (baapdaada ne drill karaai) achha -

chaaron or ke sada apne vritti se roohaani shaktishaali vaayumandal banaane vaale teebra purushaarthi bachchon ko, sada apne sthaan aur sthiti ko shaktishaali vibration mein anubhav karaane vaale dridh sankalp vaale shreshtha aatmaon ko, sada dua dene aur dua lene vaale merciful aatmaon ko, sada apne aapko udti kala ka anubhav karne vaale double light aatmaon ko baapdaada ka yaadapyaar aur namaste ।

daadiyon se - aap logo ka sangathan sabhi ko sakaash deta hai । deta hai na ? kyoki phir bhi anubhvi ho na ! to anubhvi ka prabhaav jyaada padta hai । aadi se aap aatmaon me baap aur maa ne anubhvi moorta banne ka sanskaar daal diya hai । daala hai na ! baapdaada bhi khush hote hain । achha hai, theek hai ? kaisi bhi tabiyat hai lekin yagya ka shrangaar ho । (daadi shaantaamni ko dekhkar) chaahe bhaagdaud nahi bhi kar sakte hai lekin aap logo ko dekh karke bhi, aap logo ki haajiri bhi sabhi ko bal deti hai । aadi ratna ho na ! to aadi ke sanskaar powerful, aadi ki bhatthi sabhi yaad karte hai na ! woh saakaar ki paalna sabhi yaad karte hai । achha ।

mohini behen ne daadi ji ki yaad baapdaada ko di - baapdaada bhi bahut-bahut yaad de rahe hain । baap ko sirf yaad nahi hai, sabhi ko yaad hai । baap bhi yaad karte hai । iseelie jaise brahma baap ek example tha, vaise daadi bhi ek example hai । achaanak ke part ko kitna sahaj kar diya । brahma baap ne yagya ko racha, lekin daadi ne brahma baap se bhi jyaada samay yagya sambhaala । iseelie sabhi ke dil me daadi ki yaad hai hi । kyonki unke gun, uska chehra, uski chalan vishesh rahi hai, iseelie sabke dil me vishesh yaad hai hi hai । abhi sabhi ne yog kiya na, yeh pyaar ki nishaani hai । abhi aur jor se yog karo jo daadi madhuban me pahunch jaayegi । jaise woh oxygen dete hai na, ventilator se dete hai to science power se aapki silence power kam thode hi hai । aur yog lagaao, powerful yog । dekho, aapke yog se doctors ko touching hui, koi to vidhi change ki na । abhi dheere- dheere kar rahe hai, aap sabhi ke dridh sankalp se vidhi bhi nikal aayegi । theek hai na ! aur yog lagaao, yog ko kam nahi karna । achha । jo bhi sevaadhaari hain munni hai, yogini hai, gupta hai aur kumaariyaan bhi hai sabhi dil se seva kar rahe hai, baapdaada aapke dil ki mehnat dekh khush hain aur aapki mehnat avashya roop dikhaayegi ।

nirver bhaai ne sabki yaad di - sabhi ka man yahaan hai, tan vahaan hai । (abhi sabka ek hi sankalp hai daadi chale, phire) hona to hai hi । achha hai ।

brijmohan bhaai se - dilli mein koi aisi nai invention karo jo sab kar sake, chhote bade sab kar sake ।

videsh ki mukhya bahnon se - bahut achha hai, videsh ko anubhvi aatmaayen hone ke kaaran achha aage badha rahe ho kyonki jo aap logon mein baap ki direct paalna ka beej hai, woh beej phal de raha hai । abhi seva ki vriddhi aur umang-utsaah badh raha hai । pahle jo naajukpan tha, abhi naajukpan khatma ho gaya hai । woh culture bhi khatma ho gaya hai, kyoki aap log example ho na, to aapke example ko dekhkar abhi samajh gaye hai ki kya karna hai । baaki plan bahut achha banaaya hai । yeh group-group banaake jo unhonne ke anusaar training dete hai na, woh bahut achha । teachers bhi refresh aur aane vaale bhi refresh ho jaate hen । jis department ko jo chaahiye woh milta hai, yeh achha hai । aur attention dilaana bhi bahut zaroori hai । achha kiya hai । yagya mein bhi attention diya, yeh bhi bahut achha kiya hai kyoki yagya ke ho । sirf seva ke liye baahar gaye hain । to aap logo ka jara bhi ishaara achha hota hai, isme kharaab nahi maano, achha hai । baapdaada khush hai । itna time bhi dete to ho na । abhi aisa ek do ke vichaaro mein sameep aao jo sabhi samjhe ki yeh sab ek hai, 6 nahi hai ek hai, itna ek do ke vichaaro ke bhi najdeek । ho raha hai, baapdaada dekh rahe hain kiya hai aur aage bhi karte rahenge । (dil se bahut thanks) aapko bahut thanks ।