गुरुवार 5 अप्रैल 2018 की दैनिक मुरली

05-04-2018 praatahmurli om shanti "baapdaada"' madhuban

"meethe bachche - aapas mein avinaashi gyaan ratnon ki len-den karke ek do ki paalna karo, gyaan ratnon ka daan karte raho"

prashn:- apne aapko apaar khushi mein rakhne ka purushaartha kya hai?

uttar:- khushi mein rahne ke liye vichaar saagar manthan karo। apne aapse baaten karna seekho। agar karmabhog aata hai to khushi mein rahne ke liye vichaar karo - yeh to puraani jutti hai, ham to 21 janmon ke liye nirogi kaaya vaale ban rahe hain, janma-janmaantar ke liye yeh karmabhog samaapta ho raha hai। koi bhi beemaari chhootti hai, aaphat hat jaati hai to khushi hoti hai na। aise vichaar kar khushi mein raho।

geet:- maata O maata…

om shanti। yeh hai maataaon ki mahima। vande maatram! he maata! tum shivbaaba ke bhandaare se sabki paalna karti ho। kis prakaar ki paalna? avinaashi gyaan ratnon ki paalna karti ho athva gyaan amrit ke kalash se tumhaari paalna hoti hai। tumko shivbaaba ke bhandaare se avinaashi gyaan ratnon ka khajaana milta hai। vaastav mein mahima shivbaaba ki hi hai। woh karan-karaavanhaar hai। maata hai jagat amba। zaroor aur bhi maataayen hongi। to yeh mahima maataaon ki hai। maata hamaari bahut achhi paalna karti hai। shiv baba ke yagya mein jo rahne vaale hain, unhon ki bhi paalna hoti hai aur avinaashi gyaan ratnon se bhi maataaon dvaara paalna hoti hai। majority maataaon ki hai। bahut hain jo bhaai bhi bahnon ki paalna karte hain। donon ek do se gyaan ratnon ki len den karte ek do ki paalna karte hain। bhaai behen ka, behen bhaai ka bahut roohaani pyaar hota hai। is duniya mein to ek do ke dushman bhi hote hain। ek do ko vikaar hi dete hain। yahaan avinaashi gyaan ratnon ka khajaana dete hain। tum ho behen-bhaai, brahmaakumaar-kumaariyaan। tumhaara naam bhi bahut bhaari hai। prajaapita brahma ke zaroor kumaar kumaariyaan honge। yeh buddhi se kaam liya jaata hai। geet mein maataaon ki mahima hai। jagat amba sarasvati hai to zaroor aur bhi bachche, bachchiyaan honge। goya family hogi। yeh bhi samajhne ki baat hai na। prajaapita likha hua hai na। brahma ko kaha jaata hai prajaapita। to zaroor koi samay brahma dvaara praja rachi gai hogi। brahma hai saakaari srishti ka pita। gaaya hua hai - prajaapita brahma dvaara brahman kul ki rachna hui। aadi sanaatan pahle-pahle brahman ho jaate hain। vaastav mein aadi sanaatan devi-devta dharma kehna yeh wrong hai। woh to hai satayug ka dharma। yeh aadi sanaatan braahmanon ka dharma jo hai woh praayahlop ho gaya hai। devta dharma se bhi pahle yeh brahman dharma hai, jisko choti kehte hain। inko kaha jaayega sangamayugi aadi sanaatan brahman dharma। kitna achha raaz hai samjhaane ka।

baba ne samjhaaya hai pahle jab koi aate hain to unko baap ka parichay do। yeh hai mukhya। braahmanon ki to raajdhaani hai nahin। likha jaata hai satayugi deity world sovereignty tumhaara eeshvareey janma siddha adhikaar hai। devi-devta dharma to barobar hai। parantu unhon ko yeh raajdhaani kab aur kaise milti hai - woh bhi samjhaana padta hai, isliye trimoorti chitra saamne rakhna zaroor hai। ismen likha hua hai svarga ki baadshaahi janma siddha adhikaar hai। kis dvaara? woh bhi likhna pade। yeh board banvaakar har ek apne ghar mein laga den। jaise government ke officers ke board hote hain na। koi paas badge (medals) rehte hain। sabki apni-apni nishaani hoti hai। tumhaari bhi nishaani honi chaahiye। baba direction dete hain, amal mein laana to bachchon ka kaam hai na। to kuchh vihang maarga ki service ho। yeh bahut mukhya cheez hai। doctor, barrister aadi sabke ghar mein board lage hue hote hain na। tumhaara bhi board laga hua ho ki aakar samjho shivbaaba brahma dvaara svarga ki baadshaahi kaise dete hain। to manushya dekhkar wonder khaayenge। andar aayenge samajhne liye। flat ke baahar bhi laga sakte ho। jiska jo dhandha hai woh board lagaana chaahiye। bachche kuchh karte nahin to service bhi hoti nahin। ek to maaya ka vaar hota hai। nishchay nahin ki ham baba paas jaate hain। 84 janmon ka part poora hua phir nai duniya svarga mein aakar varsa lenge। yeh yaad nahin rehta hai। baba kehte hain bhal karma karo phir jitna samay mile ismen baba ko yaad karo। ham dhindhora peette hain - yeh sabka antim janma hai। punarjanma mrityulok mein phir nahin lenge। tum bhi jaante ho mrityulok abhi khatma hona hai। pahle nirvaandhaam sweet hom jaana hai। aise-aise apne saath baaten karte rehna chaahiye, isko vichaar saagar manthan kaha jaata hai।

baap kehte hain tum karmayogi ho। kya tumko kachhue jaisa bhi akla nahin hai? woh bhi shareer nirvaah arth ghaas aadi khaakar karmendriyon ko samet shant mein baith jaate hain। tum bachchon ko to baap ki yaad mein rehna hai। svadarshan chakra phiraana hai। apne ko master beejroop samajhna hai। beej mein jhaad ka saara gyaan hai - inki utpatti kaise hoti hai, paalna kaise hoti, drama ka 84 ka chakra kaise phirta hai। 84 ke chakra ke liye yeh gola banaaya jaata hai, jo manushyon ko 84 janmon ka gyaan aa jaae। baap ne samjhaaya hai tum sirf 84 janma lete ho। jo aadi sanaatan devi-devta dharma vaale hain arthaat jo brahman se devta bante hain unke hi 84 janma hote hain। tum 84 janmon ko jaante ho। brahma ki raat aur brahma ka din kehte hain, ismen 84 janma aa jaate hain। to trimoorti ka board banaae likhna chaahiye - yeh eeshvareey janma siddha adhikaar hai। lena ho to aakar lo। ab nahin to kab nahin। is hovanhaar mahaabhaarat ladaai ke pahle purushaartha karna hai। yeh board banaana bahut sahaj hai। chaahe trimoorti lagaao va shiv ka lagaao। naam parampita paramatma shiv to laga hua hai। woh hai geeta ka bhagwan। geeta mein hai hi raajayog ki baaten। tab ham likhte hain daivi svaraajya eeshvareey janma siddha adhikaar hai। yeh hai shivbaaba aur yeh prajaapita brahma, in dvaara varsa milta hai। svarga mein raaja-raani bante hain। raam (shiv) kya dete hain, raavan kya dete hain - yeh tum jaante ho। aadhaakalpa hai raamraajya, aadhaakalpa hai raavan raajya। aise nahin paramatma hi duhkh dete hain, duhkh dene vaala to raavan 5 vikaar hain, jo hi vicious banaate hain। satayug hai shivaalay। bachchon ko bhinna-bhinna prakaar ki samjhaani roz milti hai। to khushi mein rehna chaahiye na। tum jaante ho shivbaaba padhaate hain। aise nahin ki saakaar ko yaad karna hai। shivbaaba hamko brahma dvaara sahaj raajayog sikhaate hain। shivbaaba aate hi hain prajaapita brahma mein। prajaapita brahma aur kisko kah nahin sakte। brahman bhi zaroor chaahiye।

baap aakar sach batlaate hain। gaaya bhi jaata hai second mein raajya-bhaagya। bachche kehte hain ham shivbaaba ke bachche hain। woh hai hi svarga ka rachayita। to zaroor hamko svarga ki raajaai denge aur kya denge? baba kaisa wonderful hai! ek second mein jeevanmukti janak ko mili - yeh bhi gaaya hua hai। tum jaante ho ab ham shivbaaba ke bane hain। shivbaaba ko zaroor yaad karna hai। jab baap ki god li hai, jisse svarga ka varsa milta hai - unko aur varse ko yaad karna hai। jaise bachche dharma ki god lete hain to jaante hain pahle ham phalaane ka bachcha tha, ab phalaane ka hoon। unse dil hatti jaayegi aur inse jutti jaayegi। yahaan bhi tum kahenge ham shivbaaba ke adopted bachche hain। phir us baap ko yaad karne se phaayda hi kya। most beloved baap, itni badi sampatti dene vaala hai। baap hi mehnat karke bachchon ko laayak banaate hain। aise baap ko tum ghadi-ghadi bhool jaate ho aur to sab tumko duhkh dene vaale hain phir bhi unhon ko yaad karte ho aur mujh baap ko tum bhool jaate ho। raho bhal apne ghar mein parantu baba ko yaad karo। ismen mehnat chaahiye, tab hi paap vinaash honge। yeh to saara kabristaan banna hai। bachche mere bane goya vishwa ke maalik bane। tum jaante ho baba ke bane hain phir svarga ke maalik ham avashya banenge। khushi ka paara chadhna chaahiye। yeh bhi jaante ho yeh puraana shareer hai। karmabhog bhogna padta hai। baba mama bhi khushi se karmabhog bhogte hain। phir bhavishya 21 janma ka sukh kitna bhaari hai। yeh to puraani jutti hai, abhi karmabhog bhogte rahenge phir 21 janma liye inse chhoot jaayenge। koi beemaari chhootti jaati hai to khushi hoti hai na। koi aaphat aati phir hat jaati hai to khushi hoti hai na। tum bhi jaante ho ab janma-janmaantar ki aaphten aa rahi hain। abhi ham baba paas jaate hain। yeh hai vichaar saagar manthan kar points nikaalna। baba raay to batlaate hain। aise-aise apne se baaten karo। hamne 84 janmon ka chakra poora kiya, ab baba paas jaate hain। phir baba se varsa paayenge। saakshaatkaar bhi karte hain। ismen paroksha aur aproksha hai। jaise mama ko koi saakshaatkaar nahin hua। baba ne vinaash aur sthaapna ka saakshaatkaar kiya, inko bhavishya ka saakshaatkaar accurate hua hai। parantu pahle yeh samajh mein nahin aata ki ham yeh vishnu banenge। peechhe samajhte gaye। is vikaari grihastha dharma se ab nirvikaari grihastha dharma mein jaate hain tat tvam। tum bhi baba ki padhaai se aise bante ho। race karni chaahiye। baaki geet mein hai mama ki mahima। to tum jaan gaye ho jagat amba kisko kaha jaata hai। vaastav mein maat-pita kaun hai? woh to niraakaar buddhi mein hai। pita to god father theek hai। woh niraakaar hai। maata to niraakaar ho na sake। father niraakaari hai, zaroor varsa denge। to yahaan aana pade na, jo apna parichay de। to inko maat-pita banna pade। to yeh badi maata ho gai। daada hai niraakaar। kitni wonderful baaten hain! daadi (grand mother) to koi ban na sake। yeh brahma to mel ho gaya kyonki mukh vanshaavli hai। baap kehte hain kitna guhya raaz hai, jo ki samjhaata hoon। koi ki buddhi mein baith nahin sakta ki maat-pita kaun hai। woh samajhte hain krishna ke liye। farka sirf yeh kiya hai, isko kaha jaata hai ekaz bhool। koi to kaaran banna chaahiye na। kya bhool hoti hai jo bhaarat itna duhkhi hota hai। abhi tum jaante ho kisne bhulaaya, kaaran kya hua jo bhool gaye। barobar maaya raavan ne bemukh kiya hai। jaise baba karan-karaavanhaar hai vaise maaya bhi karan-karaavanhaar hai। baap karan-karaavanhaar sukhdaata hai, woh karan-karaavanhaar duhkh daata hai। baap se bemukh karaati hai। ab baap khud kehte hain he aatmaayen nirantar mujh baap ko yaad karo। tum hamaare bachche ho। tumko varsa lena hai sirf mujhe yaad karo। tumhaare vikarma vinaash ho jaayenge। yeh behad ke baap se mat milti hai brahma dvaara, guru brahma to mashhoor hai। woh phir kah dete eeshvar sarvavyaapi hai, beanta hai। aage ham bhi samajhte the yeh theek kehte hain। abhi samajhte hain ki yeh to raavan maaya ne kahalvaaya hai। ek taraph kehte naam roop se nyaara hai aur phir kehte sarvavyaapi hai। do baat iktthi ho na saken। bas, guru ne jo kaha so maan liya। maaya bhool karaati, neeche giraati hai, phir baba abhul banaate hain oonch chadhaane liye। baba tadbeer to bahut achhi karaate hain phir apni takdeer banaani hai। baap ko yaad karna hai। yeh to sahaj hai। kanya ki jab sagaai ho jaati hai to unke peechhe ekdam chatak padti hai na। vaise ab tumhaari sagaai hoti hai shivbaaba se, to unko chatak padna chaahiye। baap kehte hain tum mujhe yaad karo। tumhaari aatma pavitra banegi to tum mere saath chaloge। main tumhein nainon ki palkon par le chaloonga। sirf tum mujhe yaad karo to main guarantee karta hoon tum paapon se mukta ho jaayenge। em object bigar purushaartha kaise karenge। yahaan andhashraddha ki baat nahin। yeh shivbaaba ki college hai। woh hai svarga ka rachayita। amarlok ke liye padha rahe hain। ab to mrityulok hai। mrityulok khatma ho jaayega, phir satayug zaroor aayega। yeh chakra phirta hi aata hai। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) kachhue misal sab karmendriyon ko samet baap aur varse ko yaad karna hai। karmayogi banna hai। apne aapse baaten karni hai।

2) aapas mein gyaan ratnon ki len-den kar ek do ki paalna karni hai। sabse roohaani pyaar rakhna hai।

vardaan:- dridh sankalp dvaara vyartha ki beemaari ko sada ke liye khatma karne vaale saphaltaamoorta bhav

saphalta moorta banne ke liye sabhi bachchon ko yahi ek dridh sankalp karna hai ki na kabhi vyartha sochenge, na kabhi vyartha dekhenge, na vyartha sunenge, na vyartha bolenge aur na vyartha karenge...sada saavdhaan rah vyartha ke naam nishaan ko bhi samaapta karenge। yeh vyartha ki beemaari bahut kadi hai jo yogi banne nahin deti, kyonki vyartha hai vistaar, vistaar mein bhatakne vaali buddhi ko sametne ki shakti dvaara saar swaroop mein sthit karo tab sahajyogi, saphaltaamoorta banenge।

slogan:- doosron ko kahkar sikhaane ke bajaae karke sikhaane vaale bano।