शुक्रवार 14 सितंबर 2018 की दैनिक मुरली

14-09-2018 praatahmurli om shanti "baapdaada"' madhuban

''meethe bachche - tumhein purushaartha kar air-condition ki ticket khareed karni hai, air-condition ticket lena arthaat maaya ki garam hava athva vaar se safe rehna''

prashn:- tum bachchon ko mahaavinaash ka duhkh hoga ya nahin? iska paap kis par chadhta hai?

uttar:- tumhein is mahaavinaash ka duhkh ho nahin sakta kyonki tum to pharishta bante ho। tumko knowledge hai ki ab sabhi aatmaon ko machchharon sadrishya vaapis ghar jaana hai। tumhein kisi ki maut par duhkh nahin hota kyonki tum saakshi ho dekhte ho, tum jaante ho aatma to sada amar hai। is vinaash ka paap kisi par bhi nahin lagta, yeh to jaise ladaai ka yagya racha hua hai। sabhi lad markar ghar vaapas jaayenge। yeh bhi drama ki bhaavi hai।

geet:- mahphil mein jal uthi shama…

om shanti। bachchon ne ek line geet ki suni। yeh mahphil hai kiski? gyaan saagar ki। jisko phir manushya indra ki mahphil kehte hain - indrasbha। bahut manushya samajhte hain - indra paani ki varsha barsaate hain। bachche samajhte hain yeh gyaan saagar parampita paramatma ki sabha hai, ismen parvaane baithe hain, jeete ji inke ban jaane arthaat is duniya se mar jaane ke liye kyonki jeev aatmaon ko yeh puraani duniya pasanda nahin hai। ismen sab ek-do se ladte rehte hain। baap kehte hain - main svarga sthaapan karta hoon। to bachchon mein bhi nambarvaar hain। koi pukhraajapri, koi neelam pari hai। naam to bahut hain। yeh bhent ki hui hai। koi bachche achhe sensible ban auron ki service mein lag jaate hain। service par bhi tatpar kaun honge? jo shama par poora phida hue honge। yeh bahut badi mahphil hai। tum jaante ho baba aatmaon ki mahphil mein aaya hua hai। parantu inko jo achhi reeti jaante hain, woh inke sammukh practical mein hain। is samay koto mein koi hi jaante hain। jo parvaane hain vahi jaanenge, jo phida ho jaate hain, baba ke ban jaate hain।

yeh to samjhaaya gaya hai - yeh hai jeete ji marna। baba, main aapka hoon। pahle ham aapke paas ashareeri rehte hain। phir yahaan aakar shareer lete hain। bachchon ko jo bhi gyaan milta hai yeh aur koi de nahin sakta kyonki baap ko nahin jaante। tum bachchon ko parampita paramatma aakar padhaate hain। gaaya hua hai - sabhi ved-shaastra aadi geeta ke patte hain। sab manushya maatra is maandave mein kiske patte hain? is devi-devta dharma se hi sab nikle hain isliye tum jhaad ke chitra mein dekhenge ki shuru mein patte nahin hain। patte baad mein hi paida hote hain। to unhon ko oopar dikhaaya hua hai। foundation devi-devta dharma ka hai। pahle thur ek hota hai phir unse taal-taaliyaan nikalti hain, phir patte। bachchon ki buddhi mein hai ki yeh viraat manushya srishti ke dharmon ka jhaad hai। aajkal ki government dharma ko nahin maanti। kehte hain ham sab aapas mein rah sakte hain। parantu aapas mein thak-thak kitni hai। ladaai aapas mein chalti hi rehti hai। jaise ki ladaai ka yagya racha hua hai। kahaan na kahaan ladte-jhagadte rehte hain। yeh bhi drama mein noondh hai। yukti aisi karte hain ki aapas mein lad maren। aage hindustaan-paakistaan alag-alag thode hi tha। sab ikatthe the। government bhi majboot thi। aapas mein koi lad nahin sakte the kyonki oopar mein bade-bade navaab hote the। jaise ab saari duniya ke liye yu.N. aadi badi-badi committee hain। parantu in sabke liye dhaneedhori to koi hai nahin। do tukde ho gaye hain। duhkh vriddhi ko paata hi rehta hai। ek-do ko maarte hi rehte hain। drama mein dekho kaisa raaz hai। ek-do se ladenge to baap par thode hi paap lagega। ham saakshi ho dekhte hain। tum jaante ho sab ladkar khatma hi ho jaane vaale hain। koi bada aadmi mar jaata hai to 8-10 roz uske liye thoda bahut kaaryakram chalta hai। holy de aadi karte hain। tumhaare liye to kuchh nahin hai। tum to pharishte ban rahe ho। tumko vinaash ka bhi duhkh nahin hota hai। ab to machchharon sadrishya marenge phir kaun kisko dekhenge! yeh raaz tum bachche hi jaante ho।

nai duniya mein rahne vaale to bahut first class chaahiye। yahaan koi mare to tumko thode hi duhkh hoga। tum to saakshi ho dekhte ho - isne jaakar doosra shareer liya apna part bajaane ke liye। tumhaare mein bhi sab nishchaybuddhi nahin hain। grihastha vyavhaar mein rehte paanv se choti tak ab khushi ka paara chadh raha hai, phir koi ka kam, koi ka jaasti। koi ko phir paai ka bhi nahin chadhta, jaise aate mein namak। unko feeka hi kahenge। maaloom padta hai ki kinhon ko naaraayni nasha chadhta hai। maat-pita ki service karte hain। aise nahin, grihastha vyavhaar mein rah service nahin kar sakte। woh to aur hi jaasti service karenge, aur hi jaasti maa-baap ka naam bhi baala karte hain। grihastha vyavhaar mein rahkar kamalphool samaan achal-adol bankar phir auron ko bhi banaate hain। to unhon ki mahima jaasti hai। tum to shurooaat mein nikal pade। woh bhi drama। bhatthi banni thi। usmein se bhi koi kachchi eet nikli, koi pakki bhi nikli। aai.si.S.ke imtahaan mein sab thode hi paas hote hain kyonki government ko bahut pagaar dena padta hai। yahaan bhi aise hai। badi jaaydaad deni padti hai। mukhya 8 paas hote hain, phir 108 ki maala banti hai। purushaartha kar oonch pad paana hai। reserve karaaya jaata hai na - first class, air-condition। eyar condition mein kabhi garam hava nahin lagegi। tumko koi bhi is duniya ki garam hava arthaat maaya ka vaar na lage, itna majboot hona chaahiye। aath to bilkul first class hain phir 108 hain। naam bhi hai mahaarthi, ghodesvaar, pyaade। har ek samajh sakte hain ki ham kaun-si ticket khareed kar rahe hain। har ek ko ticket leni hai। purush ko apni, stri ko apni ticket leni hai। stri ko chance jaasti hai kyonki purush jo karte hain to uska aadha hissa stri ko mil jaata hai। stri jo sauda karti hai, woh kuchh bhi deti hai to uska hissa pati ko nahin milta hai kyonki purush to rachayita hai। paise unke haath mein rehte hain। woh jo karega uska hissa stri ko mil jaata hai। svarga mein to donon maalik rehte hain। bachcha ek hota hai, varsa bhi woh paata hai। kanya bhi apna hissa kaayde anusaar le leti hai। kalpa pahle jo kaayda chala hai vahi chalega। vahaan ki rasma-rivaaj ka khyaal nahin karna chaahiye। baba ne bahut to saakshaatkaar kara diya hai - kaise raajdhaani transfer hoti hai। yahaan transfer hoti hai to brahman gurooon aadi ko bulaaya jaata hai। aage ki rasma-rivaaj bahut achhi thi। jab vaanaprastha lete the to bachche ko bade prem se gaddi par bithaate the ki ab tum kaarobaar sambhaalo। abhi to bilkul boodhe ho jaate hain to bhi chhodte nahin hain। aage bachche maatri-snehi hote the। ab to maatri-drohi ban pade hain। maa ki bhi choti pakad baahar nikaal dete hain। isko kaha jaata hai dhundhakaari, maatri-drohi। satayug mein aisi baaten nahin hoti। tumko to bahut khushi honi chaahiye। mahphil ki mahsoosta tumko yahaan aayegi। yeh gyaan saagar to jahaan hoga vahaan mela hoga। nadiyon ka mela hota hai na। tum nadiyaan to aapas mein milti rehti ho। yeh to hai gyaan saagar aur nadiyon ka mela। yeh hai jagat amba sarasvati, unka bhi naam baala hai। maa ke paas bhi kitne milne aate the kyonki uski murli bahut achhi thi। bachchiyaan bhi mahsoos karti hain ki mama ki murli achhi khainchati thi।

yeh hai saagar aur nadiyon ki mahphil। bahut bachche aa jaate hain। pahle saagar, phir nadiyaan, chhoti nadiyaan ya bade kainaal aadi aadi hote hain na। tum har ek samajh sakte ho ki ham chhoti nadi hain ya badi nadi? badi-badi nadiyon ko bulaate hain ki aakar bhaashan karo। to zaroor woh teekhe hain। mama ko kitna bulaate the। shivbaaba ka mila hua khazaana aakar do। tum bachchiyaan jaakar gyaan-ratnon ka daan karti ho। gyaan ka ek-ek versions laakhon roopayon ka hai। shaastron mein koi gyaan ke versions nahin hain। agar hote to bhaarat bahut saahookaar hota। tumko to ratna milte hain, jinse tum 21 janma ke liye saahookaar bante ho। abhi sangamayug par tum sabse oonche ho। phir satayug-treta mein tumhaari degree kam ho jaati hai। ab tum eeshvareey darbaar mein baithe ho। tum jaante ho baba 21 janmon ka varsa dene vaala hai। unko hi sab yaad karte hain। doosre sab duhkh dene vaale hain। duhkh dene vaali cheez ko hamesha bhoola jaata hai। he baba, hamaare to aap ho, doosra na koi। parantu krishna ka naam suna hai to unko hi yaad karte hain। tum krishna ki raajdhaani mein the। baap is kansapuri ko krishnapuri bana dete hain। aasuri puri se phir daivi puri ban jaayegi। phir dikhaaya hai ki asuron aur devtaaon ki ladaai lagi, devtaaon ki jeet hui। devtaayen rehte hain svarga mein। vaastav mein tumhaari ladaai hai 5 vikaaron se। abhi raamaayan ki badi dhuni lagegi kyonki dashahra aata hai। government bhi manaati hai। raam leela karte hain parantu yeh jaante nahin ki raavan kya cheez hai।

kai bachche kehte hain neshtha mein bithaao। vaastav mein yaad to chalte-phirte karna hai। parantu jo saare din mein yaad nahin karte, unko bithaaya jaata hai ki yahaan baithne se kuchh na kuchh yaad karen। bahut hain jo centres mein jab aate hain to yaad mein rehte hain, ghar gaye to khalaas। yaad karne ki practice nahin hai। buddhi aur-aur taraph bhatakti rehti hai। bachchon ko samjhaaya gaya hai ki aatma star hai jisko bindi bhi kehte hain। star mein to aise kone hote hain। bindi mein nahin hote। stars isliye kehte hain kyonki bhent ki jaati hai। lucky sitaare kaha jaata hai। bindi roop aatma mein gyaan ki chamak hai। aatma bindi mein saara part hai। baap kehte hain mujh bindi mein yeh-yeh part hai jo main bhakti mein bajaata aaya hoon। tum bachchon ka sabse jaasti part hai kyonki tum all-round chakra lagaate ho। to chakravarti raaja bhi tum banenge। duhkh ho, chaahe sukh ho - tum hi paate ho। mera part tumhaare jitna nahin hai। main vaanaprastha mein chala jaata hoon। phir bhakti maarga mein meri service shuru hoti hai। yaad bhi karte hain draamaanusaar, jis-jis devta ki pooja karte hain saakshaatkaar phir bhi main karaata hoon। yeh drama mein mera part hai। woh samajhte hain hamko inse saakshaatkaar hota hai। inmen bhi bhagwan hai। samajhte hain ganesh se saakshaatkaar hua to ganesh mein bhi paramatma hai। isse hi sarvavyaapi ka gyaan utha liya hai। aur tum sab bachche kehte ho ham sab baba ko yaad karte hain arthaat sabmen baba ki yaad hai। to isse bhi sarvavyaapi samajh lete hain। baap kehte hain meri yaad mein bhi sab nambarvaar purushaartha anusaar rehte hain। jitna jo yaad karenge utna vikarma vinaash honge। baaki aatma to har ek mein apni-apni vyaapak hai। main koi bachche mein bhi pravesh kar kiska bhi kalyaan kar sakta hoon। parantu unhonne phir ulta arth kar diya hai। drama mein woh bhi noondh hai। drama anusaar sabko part mila hua hai। yeh shaastra aadi banaane ka bhi drama mein part hai। banaayenge vahi jinhonne aage banaaye the। geeta sunaate hain phir kalpa baad aise hi sunaayenge। to ab bachchon ki mahphil mein baap baithe hain। jo mujhe jaante hain main unhon ke beech mein hi shobhta hoon। baaki jo jaante hi nahin us mahphil mein baith kya karenge? tum bhaashan aadi karte ho to bahut aate hain। unki shama ke saath mahphil nahin kahenge। shama ke saath mahphil to yahaan hai। koi phida hote hain, phir aur taraph buddhiyog chala jaata hai। jab tak sampoorn banen, buddhi jaati hai। karmaateet avastha, sampoorn nirvikaari avastha abhi nahin kah sakte। woh ant mein hogi। phir yeh puraana shareer chhoot jaayega। yeh puraani khaal hai। aatma in puraani karmendriyon se kaam leti hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) shivbaaba se mila hua khazaana sabhi ko baantana hai। avinaashi gyaan-ratnon ka daan karke 21 janmon ke liye saahookaar banna hai।

2) apni avastha achal-adol banaani hai। grihastha vyavhaar mein rehte bhi kamal phool samaan ban baap ka naam baala karna hai। service mein tatpar rehna hai।

vardaan:- sochna, kehna aur karna in teenon ko samaan banaane vaale baap samaan sampanna bhav

baapdaada ab sabhi bachchon ko samaan aur sampanna dekhna chaahte hain। sampanna banne ke liye sochna, kehna aur karna teenon samaan ho। iske liye sab taiyaari bhi karte ho, sankalp bhi hai, ichchha bhi yahi hai। lekin yeh ichchha poori tab hogi jab aur sab ichchhaaon se ichchha maatram avidya banenge। chhoti-chhoti anek prakaar ki ichchhaayen hi is ek ichchha ko poorn karne nahin deti hain।

slogan:- avyakt va karmaateet sthiti ka anubhav karna hai to kathni, karni aur rahni ko samaan banaao।