रविवार 15 दिसंबर 2019 की दैनिक मुरली

15-12-19 praatahmurli om shanti ''avyakt-baapdaada'' revise 21-03-85 madhuban

svadarshan chakra se vijay chakra ki praapti

aaj baapdaada roohaani senaapti ke roop mein apni roohaani sena ko dekh rahe hain। is roohaani sena mein kaun se, kaun se mahaaveer hain, kaun se shaktishaali shastra dhaaran kiye hue hain। jaise jismaani shastradhaari din pratidin ati sookshm aur teevragti ke shakti sampanna saadhan banaate jaate hain, aise roohaani sena ati sookshm shaktishaali shastradhaari bani hai? jaise vinaashkaari aatmaon ne ek sthaan par baithe hue kitne mile door vinaashkaari reziz (kirnon) dvaara vinaash karaane ke liye saadhan bana liye hain। vahaan jaane ki bhi aavashyakta nahin। door baithe nishaana laga sakte hain। aise roohaani sena sthaapnaakaari sena hai। woh vinaashkaari, aap sthaapnaakaari ho। woh vinaash ke plan sochte aap nai rachna ke, vishwa parivartan ke plan sochte। sthaapnaakaari sena, aise teevragti ke roohaani saadhan dhaaran kar liye hai? ek sthaan par baithe jahaan chaaho vahaan roohaani yaad ki reziz (kirnon) dvaara kisi bhi aatma ko touch kar sakte ho। parivartan shakti itni teevragti ki seva karne liye taiyaar hai? knowledge arthaat shakti sabhi ko praapta ho rahi hai na। knowledge ki shakti dvaara aise shaktishaali shastradhaari bane ho? mahaaveer bane ho va veer bane ho? vijay ka chakra praapta kar liya hai? jismaani sena ko anek prakaar ke chakra inaam mein milte hain। aap sabhi ko saphalta ka inaam vijay chakra mila hai? vijay praapta hui padi hai! aise nishchay buddhi mahaaveer aatmaayen vijay chakra ke adhikaari hain।

baapdaada dekh rahe the ki kisko vijay chakra praapta hai! svadarshan chakra se vijay chakra praapta karte ho। to sabhi shastradhaari bane ho na! in roohaani shastron ka yaadgaar sthool roop mein aapke yaadgaar chitron mein dikhaaya hai। deviyon ke chitron mein shastradhaari dikhaate hain na। paandavon ko bhi shastradhaari dikhaate hain na। yeh roohaani shastra arthaat roohaani shaktiyaan sthool shastra roop mein dikha di hain। vaastav mein sabhi bachchon ko baapdaada dvaara ek hi samay ek jaisi knowledge ki shakti praapta hoti hai। alag-alag knowledge nahin dete phir bhi nambarvaar kyon bante hain? baapdaada ne kabhi kisi ko alag padhaaya hai kya? ikattha hi padhaai padhaate hain na। sabhi ko ek hi padhaai padhaate hain na, ki kisi group ko koi padhaai padhaate, kisko koi!

yahaan 6 maas ka godly student ho ya 50 varsha ka ho, ek hi class mein baithte hain। alag-alag baithte hain kya? baapdaada ek hi samay ek padhaai aur sabhi ko ikattha hi padhaata hai। agar koi peechhe bhi aaye hain to jo pahle padhaai chal chuki hai vahi padhaai aap sab abhi bhi padhaate rehte ho। jo revise course chal raha hai vahi aap bhi padh rahe ho ki puraanon ka course alag hai, aapka alag hai? ek hi course hai na। 40 varsha vaalon ke liye alag murli aur 6 maas vaalon ke liye alag murli to nahin hai na। ek hi murli hai na! padhaai ek, padhaane vaala ek phir nambarvaar kyon hote? va sabhi number one hain? number kyon bante? kyonki padhaai bhale sab padhte hain lekin padhaai ki arthaat gyaan ki ek-ek baat ko shastra va shakti ke roop mein dhaaran karna, aur gyaan ki baat ko point ke roop mein dhaaran karna - ismen antar ho jaata hai। koi sunkar sirf points ke roop mein buddhi mein dhaaran karte hain। aur un dhaaran ki hui points ka varnan bhi bahut achha karte hain। bhaashan karne mein course dene mein majority hoshiyaar hain। baapdaada bhi bachchon ke bhaashan va course karaana dekh khush hote hain। kai bachche to baapdaada se bhi achha bhaashan karte hain। points bhi bahut achhi varnan karte hain lekin antar yeh hai-gyaan ko points ke roop mein dhaaran karna aur gyaan ki ek-ek baat ko shakti ke roop mein dhaaran karna-ismen antar pad jaata hai। jaise drama ki points uthaao। yeh bahut bada vijay praapta karne ka shaktishaali shastra hai। jisko drama ke gyaan ki shakti practical jeevan mein dhaaran hai woh kabhi bhi halchal mein nahin aa sakta। sada ekras achal adol banne aur banaane ki vishesh shakti yeh drama ki point hai। shakti ke roop mein dhaaran karne vaala kabhi haar nahin kha sakta। lekin jo sirf point ke roop mein dhaaran karte hain woh kya karte hain? drama ki point varnan bhi karenge। halchal mein bhi aa rahe hain aur drama ki point bhi bol rahe hain। kabhi-kabhi okhon se osu bhi bahaate jaate hain! pata nahin kya ho gaya, pata nahin kya hai। aur drama ki point bhi bolte jaate hain। haan vijayi to banna hi hai। hoon to vijayi ratna। drama yaad hai lekin pata nahin kya ho gaya।

to isko kya kahenge? shakti ke roop se, shastra ke roop se dhaaran kiya va sirf point ke reeti se dhaaran kiya? aise hi aatma ke prati bhi kahenge hoon to shaktishaali aatma, sarva shaktivaan ki bachchi hoon lekin yeh baat bahut badi hai। aisi baat kab hamne sochi nahin thi। kahaan master sarvashaktivaan aatma aur kahaan yeh bol? achhe lagte hain? to isko kya kahenge? to ek aatma ka paath, param aatma ka paath, drama ka paath, 84 janmon ka paath, kitne paath hain? sabhi ko shakti arthaat shastra ke roop mein dhaaran karna arthaat vijayi banna hai। sirf point ki reeti se dhaaran karna to kabhi point kaam karti bhi hai kabhi nahin karti। phir bhi point ke roop mein bhi dhaaran karne vaale seva mein busy hone kaaran aur points ka baar-baar varnan karne ke kaaran maaya se safe rehte hain। lekin jab koi paristhiti va maaya ka royal roop saamne aata hai to sada vijayi nahin ban sakte hain। vahi points varnan karte rahenge lekin shakti na hone kaaran sada maayaajeet nahin ban sakte hain।

to samjha nambarvaar kyon bante hain? ab yeh check karo ki har gyaan ki point shakti ke roop se, shastra ke roop se dhaaran ki? sirf gyaanvaan bane ho va shaktishaali bhi bane ho? knowledgeful ke saath powerful bhi bane ho va sirf knowledgeful bane ho! yathaartha knowledge light aur might ka swaroop hai। usi roop se dhaaran kiya hai? agar samay par knowledge vijayi nahin banaati hai to knowledge ko shakti roop se dhaaran nahin kiya hai। agar koi yoddha samay par shastra kaarya mein nahin la sake to usko kya kahenge? mahaaveer kahenge? yeh knowledge ki shakti kislie mili hai? maayaajeet banne ke liye mili hai na! ki samay beet jaane ke baad point yaad karenge, karna to yeh tha, socha to yeh tha। to yeh check karo। abhi force ka course kahaan tak kiya hai! course karaane ke liye sab taiyaar ho na! aisa koi hai jo course nahin kara sakta! sabhi kara sakte hain aur bahut pyaar se achhe roop se course karaate ho। baapdaada dekhte hain ki bahut pyaar se, athak ban karke, lagan se karte aur karaate ho। bahut achhe programmes karte ho। tan-man-dhan lagaate ho। tab to itni vriddhi hui hai। yeh to bahut achha karte ho। lekin abhi samay pramaan yeh to paas kar liya। bachpan poora hua na, ab yuva avastha mein ho va vaanaprastha mein ho। kahaan tak pahunche ho? is group mein majority naye-naye hain। lekin videsh seva ke itne varsha poore hue to abhi bachpan nahin, abhi yuva tak pahunch gaye ho। ab force ka course karo aur karaao।

aise bhi youth mein shakti bahut hoti hai। youth aayu bahut shaktishaali hoti hai। jo chaahe woh kar sakte hain isliye dekho aajkal ki government bhi youth se ghabraati hai kyonki youth group mein laukik roop se buddhi ki bhi shakti hai to shareer ki bhi shakti hai। aur yahaan tod-phod karne vaale nahin hain। banaane vaale hain। woh josh vaale hain aur yahaan shant swaroop aatmaayen hain। bigdi ko banaane vaali hain। sabke duhkh door karne vaale hain। woh duhkh dene vaale hain aur aap duhkh door karne vaale ho। duhkh harta sukh karta। jaise baap vaise bachche। sada har sankalp, har aatma ke prati va sva ke prati sukh-daai sankalp hai kyonki duhkh ki duniya se nikal gaye। abhi duhkh ki duniya mein nahin ho। duhkhadhaam se sangamayug mein pahunch gaye ho। purushottam yug mein baithe ho। woh kaliyugi youth hain। aap sangamayugi youth ho isliye abhi yeh sada apne mein knowledge ko shakti ke roop mein dhaaran karo bhi aur karaao bhi। jitna svayan force ka course kiya hua hoga utna doosre ko bhi karaayenge। nahin to sirf point ka course karaate hain। ab course ko phir se revise karna, ek-ek point mein kya-kya shakti hai, kitni shakti hai, kis samay kaun-si shakti ko kis roop se use kar sakte hain, yeh training svayan ko svayan bhi de sakte ho। to yeh check karo-aatma ke point roopi shaktishaali shastra saare din mein practical kaarya mein laaya? apni training aape hi kar sakte ho kyonki knowledgeful to hain hi। aatma ke prati points nikaalne ke liye kahen to kitni points nikaalenge! bahut hain na! bhaashan karne mein to hoshiyaar ho। lekin ek-ek point ko dekho paristhiti ke samay kahaan tak kaarya mein laate hain। yeh nahin socho vaise to theek rehte, lekin aisi baat ho gai, paristhiti aai tab aise hua। shastra kislie hota hai? jab dushman aata hai uske liye hota hai ya dushman aa gaya isliye main haar gaya! maaya aa gai isliye dagmag ho gaye! lekin maaya (dushman) ke liye hi to shastra hain na! shaktiyaan kislie dhaaran ki hain? samay par vijay paane ke liye shaktishaali bane ho na! to samjha kya karna hai? aapas mein achhi rooh-roohaan karte rehte hain। baapdaada ko sab samaachaar milta hai। baap-daada to bachchon ka yeh umang dekh khush hote hain, padhaai se pyaar hai। baap se pyaar hai। seva se pyaar hai lekin kabhi-kabhi jo naajuk ban jaate hain, shastra chhoot jaate hain, us samay inhon ki film nikaal phir inhon ko hi dikhaani chaahiye। hota thode time ke liye hi hai, jyaada nahin hota lekin phir bhi lagaataar arthaat sada nirvighna rehna aur vighna nirvighna chalta rahe, pharka to hai na! dhaage mein jitna gaanth padti hai utna dhaaga kamjor hota hai। jud to jaata hai lekin judi hui cheej aur saabut cheez mein pharka to hota hai na। jod vaali cheez achhi lagegi? to yeh vighna aaya phir nirvighna bane phir vighna aave, toota joda to jod to hua na isliye bhi iska prabhaav avastha par padta hai।

koi bahut achhe teevra purooshaarthi bhi hain। knowledgeful, serviceable bhi hain। baapdaada, parivaar ki nazron mein bhi hain lekin jod tod hone vaali aatma sada shaktishaali nahin rahegi। chhoti-chhoti baat par usko mehnat karni padegi। kabhi sada halke, harshit khushi mein naachne vaale honge। lekin aise sada nazar nahin aayenge। honge mahaarthi ki list mein lekin aise sanskaar vaale kamjor zaroor rehte hain। iska kaaran kya hota hai? yeh todne jodne ke sanskaar unko andar se kamjor kar dete hain। baahar se koi baat nahin hogi। bahut achhe dikhaai denge isliye yeh sanskaar kabhi nahin banaana। yeh nahin sochna maaya aa gai। chal to rahe hain। lekin aise chalna, kabhi todna kabhi judna yeh kya hua? sada juta rahe, sada nirvighna rahe, sada harshit, sada chhatrachhaaya mein rahe woh aur yeh jeevan mein antar hai na isliye baapdaada kehte hain koi-koi ki janma-patri ka kaagaz bilkul hi saaph hai। koi-koi ka beech-beech mein daag hai। bhale daag mitaate hain lekin woh bhi dikhaai to dete hain na। daag ho hi nahin। saaph kaagaj aur daag mitaaya hua kaagaj…achha kya lagega? saaph kaagaz rakhne ka aadhaar bahut sahaj hai। ghabra nahin jaana ki yeh to bada mushkil hai। nahin। bahut sahaj hai kyonki samay sameep aa raha hai। samay ko bhi vishesh vardaan mile hue hain। jitna jo peechhe aata hai usko samay pramaan extra lift ki gift bhi milti hai। aur ab to avyakt roop ka part hai hi vardaani part। to samay ki bhi aapko madad hai। avyakti part ki, avyakt sahayog ki bhi madad hai। fast gati ka samay hai, iski bhi madad hai। pahle invention nikalne mein samay laga। abhi bana banaaya hai। aap bane banaaye par pahunche ho। yeh bhi vardaan kam nahin hai। jo pahle aaye unhon ne maakhan nikaala, aap log maakhan khaane par pahunch gaye। to vardaani ho na! sirf thoda-sa attention rakho। baaki koi badi baat nahin hai। sabhi prakaar ki madad aapke saath hai। abhi aap logon ko mahaarthi nimitta aatmaon ki jitni paalna milti hai utni pahle vaalon ko nahin mili। ek-ek se kitni mehnat karte time dete hain। pahle general paalna mili। lekin aap to sikeeldhe ban pal rahe ho। paalna ka return bhi dene vaale ho na। mushkil nahin hai। sirf ek-ek baat ko shakti ke roop se use karne ka attention rakho। samjha! achha!

sada mahaaveer ban vijay chhatradhaari aatmaayen, sada gyaan ki shakti ko samay pramaan kaarya mein laane vaali, sada atal, achal akhanda sthiti dhaaran karne vaali, sada svayan ko master sarvashaktivaan anubhav karne vaali, aisi shreshtha sada maayaajeet vijayi bachchon ko baapdaada ka yaadapyaar aur namaste।

daadiyon se:- ananya ratnon ke har kadam mein svayan ko to padmon ki kamaai hai lekin auron ko bhi padmon ki kamaai hai। ananya ratna sada hi har kadam mein aage badhte hi rehte hain। anaadi chaabi mili hui hai। automatic chaabi hai। nimitta banna arthaat automatic chaabi lagaana। ananya ratnon ko anaadi chaabi se aage badhna hi hai। aap sabke har sankalp mein seva bhari hui hai। ek nimitta banta hai anek aatmaon ko umang-utsaah mein laane ke। mehnat nahin karni padti lekin nimitta ko dekhne se hi woh lahar phail jaati hai। jaise ek do ko dekhkar rang lag jaata hai na। to yeh automatic umang utsaah ki lahar auron ke bhi umang-utsaah ko badhaati hai। vaise bhi koi achhi dance karta hai to dekhne vaalon ke paanv naachne lag jaate hain, lahar phail jaati hai। to na chaahte bhi haath paanv chalne lagte hain। achha!

madhuban ki sab karobaar theek hai। madhuban nivaasiyon se madhuban saja hua hai। baapdaada to nimitta bachchon ko dekh sada nishchinta hain kyonki bachche kitne hoshiyaar hain। bachche bhi kam nahin hain। baap ka bachchon mein poora faith hai to bachche baap se bhi aage hain। nimitta bane hue sada hi baap ko bhi nishchinta karne vaale hain। aise chinta to hai bhi nahin phir bhi baap ko khushkhabri sunaane vaale hain। aise bachche kahaan bhi nahin honge jo ek-ek bachcha ek do se aage ho, harek bachcha vishesh ho। koi ke itne bachche aise nahin ho sakte। koi ladne vaala hoga, koi padhne vaala hoga। yahaan to harek vishesh maniyaan ho, harek ki visheshta hai।

vardaan:- pavitrata ki shaktishaali drishti vritti dvaara sarva praaptiyaan karaane vaale duhkh harta sukh karta bhav

science ki davaai mein alpakaal ki shakti hai jo duhkh darda ko samaapta kar leti hai lekin pavitrata ki shakti arthaat silence ki shakti mein to dua ki shakti hai। yeh pavitrata ki shaktishaali drishti va vritti sadaakaal ki praapti karaane vaali hai isliye aapke jad chitron ke saamne O dayaalu, daya karo kahkar daya va dua maangate hain। to jab chaitanya mein aise master duhkh harta sukh karta ban daya ki hai tab to bhakti mein pooje jaate ho।

slogan:- samay ki sameepta pramaan sachchi tapasya va saadhna hai hi behad ka vairaagya।

soochna:-aaj maas ka teesra ravivaar hai, sabhi sangathit roop mein saayan 6.30 se 7.30 baje tak antarraashtreey yog mein sammilit ho, apne ko avatrit hui avtaar aatma hoon, is smriti se shareer mein pravesh karen aur shareer se nyaare ho jaaen। apne beej swaroop sthiti mein baith parmaatma shaktiyon ko vaayumandal mein phailaane ki seva karen।