शुक्रवार 8 मई 2020 की दैनिक मुरली

08-05-2020 praatahmurli om shanti "baapdaada"' madhuban

“meethe bachche - baba aaya hai tum bachchon ko avinaashi kamaai karaane, abhi tum gyaan ratnon ki jitni kamaai karne chaaho kar sakte ho”

prashn:- aasuri sanskaaron ko badalkar daivi sanskaar banaane ke liye kaun-sa vishesh purooshaartha chaahiye?

uttar:- sanskaaron ko badalne ke liye jitna ho sake dehi-abhimaani rahne ka abhyaas karo। deh-abhimaan mein aane se hi aasuri sanskaar bante hain। baap aasuri sanskaaron ko daivi sanskaar banaane ke liye aaye hain, purooshaartha karo pahle main dehi aatma hoon, peechhe yeh shareer hai।

geet:- toone raat ganvaai so ke …

om shanti। yeh geet to bachchon ne bahut baar sune hain। roohaani bachchon prati roohaani baap saavdhaani dete rehte hain ki yeh samay khone ka nahin hai। yeh samay bahut bhaari kamaai karne ka hai। kamaai karaane ke liye hi baap aaya hua hai। kamaai bhi athaah hai, jisko jitni kamaai karni ho utni kar sakte hain। yeh hai avinaashi gyaan ratnon se jholi bharne ki kamaai। yeh hai bhavishya ke liye। woh hai bhakti, yeh hai gyaan। manushya yeh nahin jaante hain ki bhakti tab shuru hoti hai jab raavan raajya shuru hota hai। phir gyaan tab shuru hota hai jab baap aakar raamraajya sthaapan karte hain। gyaan hai hi nai duniya ke liye, bhakti hai puraani duniya ke liye। ab baap kehte hain pahle to apne ko dehi (aatma) samajhna hai। tum bachchon ki buddhi mein hai - ham pahle aatma hain, peechhe shareer hain। parantu drama plan anusaar manushya sab wrong ho gaye hain isliye ulta samajh liya hai ki pahle ham deh hain phir dehi hain। baap kehte hain yeh to vinaashi hai। isko tum lete aur chhodte ho। sanskaar aatma mein rehte hain। deh-abhimaan mein aane se sanskaar aasuri ban jaate hain। phir aasuri sanskaaron ko daivi banaane ke liye baap ko aana padta hai। yeh saari rachna us ek rachta baap ki hi hai। unko sab father kehte hain। jaise laukik baap ko bhi father hi kaha jaata hai। baba aur mama yeh donon akshar bahut meethe hain। rachta to baap ko hi kahenge। woh pahle maa ko adopt karte hain phir rachna rachte hain। behad ka baap bhi kehte hain ki main aakar inmen pravesh karta hoon, inka naam baala hai। kehte bhi hain bhaageerath। manushya ka hi chitra dikhaate hain। koi bail aadi nahin hai। bhaageerath manushya ka tan hai। baap hi aakar bachchon ko apna parichay dete hain। tum hamesha kaho ham baapdaada ke paas jaate hain। sirf baap kahenge to woh niraakaar ho jaata। niraakaar baap ke paas to tab ja sakte jab shareer chhode, aise to koi bhi ja nahin sakte। yeh knowledge baap hi dete hain। yeh knowledge hai bhi baap ke paas। avinaashi gyaan ratnon ka khajaana hai। baap hai gyaan ratnon ka saagar। paani ki baat nahin। gyaan ratnon ka bhandaara hai। unmein knowledge hai। knowledge paani ko nahin kaha jaata। jaise manushya ko bairistari, doktari aadi ki knowledge hoti hai, yeh bhi knowledge hai। is knowledge ke liye hi rishi-muni aadi sab kehte the ki rachta aur rachna ke aadi-madhya-ant ki knowledge ham nahin jaante। woh to ek rachta hi jaane। jhaad ka beejroop bhi vahi hai। srishti ke aadi-madhya-ant ka knowledge usmein hain। woh jab aaye tab sunaaye। abhi tumko knowledge mili hai to tum is knowledge se devta bante ho। knowledge paakar phir praalabdha paate ho। vahaan phir is knowledge ki darkaar nahin rahegi। aise nahin ki devtaaon mein yeh gyaan nahin hai to agyaani hain। nahin, woh to is knowledge se pad praapta kar lete hain। baap ko pukaarte hi hain ki baba aao, ham patit se paavan kaise banen, uske liye raasta athva knowledge bataao kyonki jaante nahin। abhi tum jaante ho ham aatmaayen shantidham se aai hain। vahaan aatmaayen shant mein rehti hain। yahaan aaye hain part bajaane। yeh puraani duniya hai, to zaroor nai duniya thi। woh kab thi, kaun raajya karte the - yeh koi nahin jaante। tumne abhi baap dvaara jaana hai। baap hai hi gyaan ka saagar, sadgati daata। unko hi pukaarte hain ki baba aakar hamaare duhkh haro, sukh-shanti do। aatma jaanti hai parantu tamopradhaan ho gai hai isliye phir se baap aakar parichay de rahe hain। manushya na aatma ko, na paramatma ko jaante hain। aatma ko gyaan hi nahin jo parmaatma-abhimaani banen। aage tum bhi nahin jaante the। abhi gyaan mila hai to samajhte hain barobar soorat manushya ki thi aur seerat bandar ki thi।

abhi baap ne knowledge di hai to ham bhi knowledgeful ban gaye hain। rachta aur rachna ka gyaan mila hai। tum jaante ho hamko bhagwan padhaate hain, to kitna nasha rehna chaahiye। baba hai gyaan ka saagar, unmein behad ka gyaan hai। tum kiske paas bhi jaao - srishti ke aadi-madhya-ant ka gyaan to kya parantu ham aatma kya cheej hain, woh bhi nahin jaante। baap ko yaad bhi karte hain, duhkh harta sukh karta, phir bhi eeshvar sarvavyaapi kah dete hain। baap kehte hain drama anusaar unhon ka bhi koi dosh nahin। maaya bilkul hi tuchchha buddhi bana deti hai। keedon ko phir gand mein hi sukh bhaasta hai। baap aate hain gand se nikaalne। manushya daldal mein phanse hue hain। gyaan ka pata hi nahin hai to kya karen। duban mein phanse pade hain phir unko nikaalna hi mushkil ho jaata hai। nikaal kar aadha pauna tak le jaao phir bhi haath chhudaae gir padte hain। kai bachche auron ko gyaan dete-dete svayan hi maaya ka thappad kha lete hain kyonki baap ke direction ke virooddha kaarya kar lete hain। doosron ko nikaalne ki koshish karte aur khud gir padte hain phir unko nikaalne mein kitni mehnat ho jaati hai kyonki maaya se haar jaate hain। unko apna paap hi andar khaata hai। maaya ki ladaai hai na। abhi tum yuddha ke maidaan par ho। woh hain baahubal se ladne vaali hinsak senaayen। tum ho ahinsak। tum raajya lete ho ahinsa se। hinsa do prakaar ki hoti hai na। ek hai kaam kataari chalaana aur doosri hinsa hai kisko maarna-peetna। tum abhi double ahinsak bante ho। yeh gyaan bal ki ladaai koi nahin jaante। ahinsa kisko kaha jaata yeh koi nahin jaante। bhakti maarga ki saamagri kitni bhaari hai। gaate bhi hain patit-paavan aao parantu main kaise aakar paavan banaata hoon - yeh koi nahin jaante। geeta mein hi bhool kar di hai jo manushya ko bhagwan kah diya hai। shaastra manushyon ne hi banaaye hain। manushya hi padhte hain। devtaaon ko to shaastra padhne ki darkaar nahin। vahaan koi shaastra nahin hote hain। gyaan, bhakti peechhe hai vairaagya। kiska vairaagya? bhakti ka, puraani duniya ka vairaagya hai। puraane shareer ka vairaagya hai। baap kehte hain in aankhon se jo kuchh dekhte ho woh nahin rahega। is saari chhi-chhi duniya se vairaagya hai। baaki nai duniya ka tum divya drishti se saakshaatkaar karte ho। tum padhte hi ho nai duniya ke liye। yeh padhaai koi is janma ke liye nahin hai। aur jo bhi padhaai hain, woh hoti hain usi samay usi janma ke liye। ab to hai sangam isliye tum jo padhte ho uski praalabdha tumko nai duniya mein milti hai। behad ke baap se kitni badi praalabdha tumko milti hai! behad ke baap se behad sukh ki praapti hoti hai। to bachchon ko poora purooshaartha kar shreemat par chalna chaahiye। baap hai shreshtha te shreshtha। unse tum shreshtha bante ho। woh to sadaiv hai hi shreshtha। tumko shreshtha banaate hain। 84 janma lete-lete phir tum bhrashta ban jaate ho। baap kehte main to janma-maran mein nahin aata hoon। main abhi bhaagyashaali rath mein hi pravesh karta hoon, jisko tum bachchon ne pahchaana hai। tumhaara abhi chhota jhaad hai। jhaad ko toofaan bhi lagte hain na। patte jhadte rehte hain। dher phool nikalte hain phir toofaan lagne se gir padte hain। koi-koi achhi reeti phal lag jaate hain phir bhi maaya ke toofaan se gir padte hain। maaya ka toofaan bahut tej hai। us taraph hai baahubal, is taraph yogbal athva yaad ka bal। tum yaad akshar pakka kar lo। vo log yog-yog akshar kehte rehte hain। tumhaari hai yaad। chalte-phirte baap ko yaad karte ho, isko yog nahin kahenge। yog akshar sannyaasiyon ka naameegraami hai। anek prakaar ke yog sikhaate hain। baap kitna sahaj batlaate hain - uthte-baithte, chalte-phirte baap ko yaad karo। tum aadhaakalpa ke aashik ho। mujhe yaad karte aaye ho। ab main aaya hoon। aatma ko koi bhi nahin jaante isliye baap aakar realise karaate hain। yeh bhi samajhne ki badi maheen baaten hain। aatma ati sookshm aur avinaashi hai। na aatma vinaash hone vaali hai, na unka part vinaash ho sakta hai। yeh baaten moti buddhi vaale mushkil samajh sakte hain। shaastron mein bhi yeh baaten nahin hain।

tum bachchon ko baap ko yaad karne ki bahut mehnat karni padti hai। gyaan to bahut sahaj hai। baaki vinaash kaale preet buddhi aur vipreet buddhi yeh yaad ke liye kaha jaata hai। yaad achhi hai to preet buddhi kaha jaata hai। preet bhi avyabhichaari chaahiye। apne se poochhna hai - ham baba ko kitna yaad karte hain? yeh bhi samajhte hain baba se preet rakhte-rakhte jab karmaateet avastha hogi tab yeh shareer chhootega aur ladaai lagegi। jitna baap se preet hogi to tamopradhaan se satopradhaan ban jaayenge। imtahaan to ek hi samay hoga na। jab poora samay aata hai, sabki preet buddhi ho jaati hai, us samay phir vinaash hota hai। tab tak jhagde aadi lagte rehte hain। vilaayat vaale bhi samajhte hain abhi maut saamne hai, koi prerak hai, jo hamse bombs banvaate hain। parantu kar kya sakte hain। drama ki noondh hai na। apni hi science bal se apne kul ka maut laate hain। bachche kehte hain paavan duniya mein le jaao, to shareeron ko thode hi le jaayenge। baap kaalon ka kaal hai na। yeh baaten koi nahin jaante। gaaya hua hai mirooa maut malooka shikaar। woh kehte vinaash banda ho jaae, shanti ho jaae। are, vinaash bigar sukh-shanti kaise sthaapan hogi isliye chakra par zaroor samjhaao। abhi svarga ke get khul rahe hain। baba ne kaha hai is par bhi ek pustak chhapaao - get ve tu shantidham-sukhdhaam। inka arth bhi nahin samjhenge। hai bahut sahaj, parantu koton mein koi mushkil samajhte hain। tumko pradarshani aadi mein kabhi dilshikasta nahin hona chaahiye। praja to banti hai na। manzil badi hai, mehnat lagti hai। mehnat hai yaad ki। usmein bahut fail hote hain। yaad bhi avyabhichaari chaahiye। maaya ghadi-ghadi bhula deti hai। mehnat bigar thode hi koi vishwa ke maalik ban sakte hain। poora purooshaartha karna chaahiye - ham sukhdhaam ke maalik the। anek baar chakra lagaaya hai। ab baap ko yaad karna hai। maaya bahut vighna daalti hai। baba ke paas service ke bhi samaachaar aate hain। aaj vidvat mandali ko samjhaaya, aaj yeh kiya.... drama anusaar maataaon ka naam baala hona hai। tum bachchon ko yeh khyaal rakhna hai, maataaon ko aage karna hai। yeh hai chaitanya dilvaala mandir। tum chaitanya mein ban jaayenge phir tum raajya karte rahenge। bhakti maarga ke mandir aadi rahenge nahin। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) ek baap se avyabhichaari preet rakhte-rakhte karmaateet avastha ko paana hai। is puraani deh aur puraani duniya se behad ka vairaagya ho।

2) koi bhi kartavya baap ke direction ke virooddha nahin karna hai। yuddha ke maidaan mein kabhi bhi haar nahin khaani hai। double ahinsak banna hai।

vardaan:- apni roohaani laaitas dvaara vaayumandal ko parivartan karne ki seva karne vaale sahaj saphaltaamoorta bhav

jaise saakaar srishti mein jis rang ki light jalaate ho vahi vaataavran ho jaata hai। agar hari light hoti hai to chaaron or vahi prakaash chha jaata hai। laal light jalaate ho to yaad ka vaayumandal ban jaata hai। jab sthool light vaayumandal ko parivartan kar deti hai to aap light house bhi pavitrata ki light va sukh ki light se vaayumandal parivartan karne ki seva karo to saphaltaamoorta ban jaayenge। sthool light aankhon se dekhte hain, roohaani light anubhav se jaanenge।

slogan:- vyartha baaton mein samay aur sankalp ganvaana - yeh bhi apvitrata hai।