गुरुवार 18 जून 2020 की दैनिक मुरली

18-06-2020 praatahmurli om shanti "baapdaada"' madhuban

“meethe bachche - baap tumhein nai duniya ke liye raajayog sikhla rahe hain, isliye is puraani duniya ka vinaash bhi zaroor hona hai''

prashn:- manushyon mein kaun-si ek achhi aadat padi hui hai lekin usse bhi praapti nahin hoti?

uttar:- manushyon mein bhagwan ko yaad karne ki jaise aadat padi hui hai, jab koi baat hoti hai to kah dete hain-he bhagwan! saamne shivling aa jaata hai lekin pahchaan yathaartha na hone ke kaaran praapti nahin hoti hai phir kah dete sukh-duhkh sab vahi deta hai। tum bachche abhi aise nahin kahenge।

om shanti। baap jisko rachta kaha jaata hai, kiska rachta? nai duniya ka rachta। nai duniya ko kaha jaata hai svarga va sukhdhaam, naam kehte hain parantu samajhte nahin hain। krishna ke mandir ko bhi sukhdhaam kehte hain। ab woh to ho gaya chhota mandir। krishna to vishwa ka maalik tha। behad ke maalik ko jaise ki had ka maalik bana dete hain। krishna ke chhote se mandir ko sukhdhaam kehte hain। buddhi mein yeh nahin aata hai ki woh to vishwa ka maalik tha। bhaarat mein hi rahne vaala tha। tumko bhi pahle kuchh pata nahin tha। baap ko to sab kuchh pata hai, woh srishti ke aadi-madhya-ant ko jaante hain। abhi tum bachche jaante ho, duniya mein to yeh bhi kisko pata nahin hai-brahma-vishnu-shankar kaun hain? shiv to hai oonch te oonch bhagwan। achha, phir prajaapita brahma kahaan se aaya? hai to manushya hi। prajaapita brahma to zaroor yahaan hi chaahiye na jisse brahman paida ho। prajaapita maana hi mukh se adopt karne vaala, tum ho mukh vanshaavli। ab tum jaante ho ki kaise brahma ko baap ne apna banaakar mukh vanshaavli banaaya hai, inmen pravesh bhi kiya phir kaha ki yeh hamaara bachcha bhi hai। tum jaante ho brahma naam kaise pada, kaise paida hua, yeh aur koi nahin jaante hain। sirf mahima gaate hain ki parampita paramatma oonch te oonch hai, parantu yeh koi ki buddhi mein nahin aata ki oonch te oonch baap hai। ham sabhi aatmaon ka woh pita hai। woh bhi bindu roop hi hai, unmein srishti ke aadi-madhya-ant ka gyaan hai। yeh knowledge bhi tumko abhi mili hai। pahle zara bhi yeh gyaan nahin tha। manushya sirf kehte rehte hain brahma-vishnu-shankar, parantu jaante kuchh bhi nahin। to unhon ko hi samjhaana hai। abhi tum samajhdaar bane ho। jaante ho ki baap gyaan ka saagar hai, jo hamko gyaan sunaate hain, padhaate hain। yeh raajayog hai hi satayug nai duniya ke liye to zaroor puraani duniya ka vinaash hona chaahiye। uske liye yeh mahaabhaarat ladaai hai। aadhaakalpa se lekar tum bhakti maarga ke shaastra padhte aaye ho। ab to baap se direct sunte ho। baap koi shaastra nahin baithkar sunaate hain। jap tap karna, shaastra aadi padhna yeh sab bhakti hai। ab bhakton ko bhakti ka phal chaahiye kyonki mehnat karte hi hain bhagwan se milne ke liye। parantu gyaan se hai sadgati। gyaan aur bhakti donon ikatthe chal na saken। abhi hai hi bhakti ka raajya। sab bhagat hain। har ek ke mukh se O god father zaroor niklega। ab tum bachche jaante ho ki baap ne apna parichay diya hai ki main chhoti bindu hoon। mujhe hi gyaan ka saagar kehte hain। mujh bindu mein saara gyaan bhara hua hai। aatma mein hi knowledge rehti hai। abhi tum bachche samajhte ho ki unko parampita paramatma kaha jaata hai। woh hai supreme soul arthaat sabse oonch te oonch patit-paavan baap hi supreme hai na। manushya he bhagwan kahenge to shivling hi yaad padega। woh bhi yathaartha reeti se nahin। ek jaise ki aadat pad gai hai ki bhagwan ko yaad karna hai। bhagwan hi sukh-duhkh deta hai। abhi tum bachche aise nahin kahenge। tum jaante ho ki baap to sukhdaata hai। satayug mein sukhdhaam tha। vahaan duhkh ka naam nahin tha। kaliyug mein hai hi duhkh, yahaan sukh ka naam hi nahin। oonch te oonch bhagwan, woh hai sarva aatmaon ka baap। yeh kisko pata nahin hai ki aatmaon ka baap bhi hai, kehte bhi hain ham sab brothers hain। to zaroor sab ek baap ke bachche thahre na। koi phir kah dete ki woh to sarvavyaapi hai-tere mein bhi hai, mere mein bhi hai…। are, tum to aatma ho, yeh tumhaara shareer hai phir teesri cheez kaise ho sakti hai! aatma ko paramatma thode hi kahenge। jeev aatma kaha jaata hai। jeev paramatma nahin kaha jaata। phir paramatma sarvavyaapi kaise ho sakta! baap sarvavyaapi hota to phir fatherhood ho jaata, father ko father se varsa thode hi milega। baap se to bachcha hi varsa leta hai। sab father kaise ho sakte। itni chhoti-si baat bhi koi ki samajh mein nahin aati hai। tab baap kehte hain-bachche, hamne aaj se 5 hazaar varsha pahle tumko kitna samajhdaar banaaya tha, tum ever healthy, wealthy, samajhdaar the। isse jaasti samajhdaar koi ho nahin sakta। tumko abhi jo samajh milti hai yeh phir vahaan nahin hogi। vahaan yeh thode hi maaloom rehta ki ham phir girenge। yeh maaloom ho to phir sukh ki bhaasna hi na aaye। yeh gyaan phir praayah lop ho jaata hai। yeh drama ka gyaan sirf abhi tumhaari buddhi mein hai। brahman hi adhikaari rehte hain। tumhaari buddhi mein hai ki ab ham brahman varna ke hain। braahmanon ko hi baap gyaan sunaate hain। brahman phir sabko sunaate hain। gaayan bhi hai ki bhagwan ne aakar svarga ki sthaapna ki thi, raajayog sikhaaya tha। dekho krishna jayanti manaate hain, samajhte hain ki krishna vaikuntha ka maalik tha, parantu woh vishwa ka maalik tha-yeh buddhi mein nahin aata। jab unka raajya tha to aur koi dharma nahin tha। unka hi saare vishwa par raajya tha aur jamuna ke kinaare tha। ab tumko yeh kaun samjha rahe hain? bhagvaanuvaach। baaki woh jo bhi ved-shaastra aadi sunaate woh hai bhakti maarga ke। yahaan to khud bhagwan tumko suna rahe hain। abhi tum samajhte ho ham purooshottam ban rahe hain। tumko hi yeh buddhi mein hai ki ham shantidham ke rahne vaale hain phir ham aakar 21 janmon ki praalabdha bhogenge।

tum bachchon ko andar mein khushi se gadgad hona chaahiye ki behad ka baba shivbaaba hamko padha rahe hain, woh gyaan ka saagar hai, srishti ke aadi-madhya-ant ko jaanta hai। aisa baba hamaare liye aaya hai to khushi mein gudgudi hoti hai। baba ko kehte hain baba hamne aapko apna vaaris banaaya hai। baap bachchon par vaari jaate hain। bachche phir kehte hain ki bhagwan aap jab aayenge to ham aap par vaari jaayenge arthaat bachcha banaayenge। yeh bhi apne bachchon ko hi vaaris banaate hain। baba ko vaaris kaise banaayenge। yeh bhi guhya baat hai। apna sab kuchh exchange karna-ismen buddhi ka kaam hai। gareeb to jhat exchange kar lenge, saahookaar mushkil karenge। jab tak ki poori reeti gyaan na uthaaven। itni himmat nahin rehti। gareeb to jhat kah dete-baba ham to aapko hi vaaris banaayenge। hamaare paas rakha hi kya hai। vaaris banaakar phir shareer nirvaah bhi apna karna hai। sirf trustee samajhkar rehna hai। yuktiyaan bahut bataate rehte hain। baap to sirf dekhte hain ki koi paap karma mein to paise kharaab nahin karte hain? manushya ko punya aatma banaane mein paisa lagaate hain? service bhi kaaydesir karte hain? yeh poori jaanch karenge, phir sab raay denge। yeh bhi dhandhe mein eeshvar arth nikaalte the na। woh to tha indirect। abhi baap direct aaye hain। manushya samajhte hain ham jo kuchh karte hain unka phal eeshvar doosre janma mein dete hain। koi gareeb duhkhi hai to samjhenge karma hi aisa kiya hua hai। achhe karma kiye hain to sukhi hain। baap tum bachchon ko karmon ki gati par samjhaate hain, raavan raajya mein tumhaare sab karma vikarma hi ho jaate hain। satayug aur treta mein raavan hi nahin isliye vahaan koi karma vikarma nahin hota hai। yahaan jo achhe karma karte hain unka alpakaal ke liye sukh milta hai। phir bhi koi na koi rog khitpit to rehti hi hai kyonki alpakaal ka sukh hai। abhi baap kehte hain yeh raavan raajya hi khatma hona hai। raam raajya ki sthaapna shivbaaba kar rahe hain।

tum jaante ho yeh chakra kaise phirta hai। bhaarat hi phir gareeb ho jaata hai। bhaarat aaj se 5 hazaar varsha pahle svarga tha, in lakshmi-naaraayan ka raajya tha। pahle gaddi inki chali thi। krishna prince phir svayanvar kiya to raaja bana। naaraayan naam pada। yeh bhi tum abhi samajhte ho to tumko wonder lagta hai। baba aap saare rachta aur rachna ki knowledge sunaate ho। aap hamko kitna oonch padhaate ho। balihaar jaaoon, hamko to sivaae ek baap ke aur koi ko yaad nahin karna hai। ant tak padhna hai to zaroor teacher ko yaad karna hai। school mein teacher ko yaad karte hain na। un school mein to kitne teachers hote hain। har ek darje ka teacher alag hota hai, yahaan to ek hi teacher hai। kitna lovely hai। baap lovely, teacher lovely..... aage bhakti maarga mein andhashraddha se yaad karte the। abhi to direct baap padhaate hain to kitni khushi honi chaahiye phir bhi kehte baba bhool jaate hain। pata nahin hamaari buddhi aapko kyon nahin yaad karti hai। gaate bhi hain eeshvar ki gati-mati nyaari hai। baba aapki gati aur sadgati ki mat to badi wonderful hai। aise baap ko yaad karna chaahiye। stri apne pati ke gun gaati hai na। bada achha hai, yeh-yeh unki property hai, andar mein khushi rehti hai na। yeh to patiyon ka pati, baapon ka baap hai, inse kitna hamko sukh milta hai। aur sabse to duhkh milta hai। haan, teacher se sukh milta hai kyonki padhaai se income hoti hai। guru hamesha kiya jaata hai vaanaprastha mein। baap bhi kehte hain main vaanaprastha mein aaya hoon। yeh bhi vaanaprasthi, main bhi vaanaprasthi। yeh sab mere bachche bhi vaanaprasthi hain। baap teacher guru teenon hi ikatthe hain। baap teacher bhi bante hain phir guru ban saath le jaate hain। us ek baap ki hi mahima hai, yeh baaten aur koi shaastra aadi mein nahin hain। baba har baat achhi reeti samjhaate hain। inse oonchi knowledge koi hoti nahin, na jaanne ki darkaar rehti hai। ham sab kuchh jaankar vishwa ke maalik ban jaate hain aur jaasti kya karenge। bachchon ki buddhi mein yeh ho tab khushi mein aur usi yaad mein rahen। punya aatma banne ke liye yaad mein zaroor rehna chaahiye। maaya ka dharma hai tumhaare yog ko todna। yog mein hi maaya vighna daalti hai। bhool jaate ho। maaya ke toofaan bahut aate hain। yeh bhi drama mein noondh hai। sabse aage to yeh hai, to inko sab anubhav hote hain। mere paas jab aayen tab to sabko samjhaaoon na। yeh sab maaya ke toofaan aayenge। baba ke paas bhi aate hain। tumko bhi aayenge। maaya ka toofaan hi na aaye, yog laga hi rahe to karmaateet avastha ho jaae। phir ham yahaan rah na saken। karmaateet avastha ho jaayegi to phir sab chale jaayenge। shiv ki baraat gaai hui hai na। shivbaaba aaye tab ham sab aatmaayen jaayen। shivbaaba aate hi hain sabko le jaane। satayug mein itni aatmaayen thode hi hongi। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) shivbaaba ko apna vaaris banaakar sab kuchh exchange kar dena hai। vaaris banaakar shareer nirvaah bhi karna hai, trustee samajhkar rehna hai। paise koi bhi paap karma mein nahin lagaane hain।

2) andar khushi mein gudgudi hoti rahe ki svayan gyaan ka saagar baba hamko padha rahe hain। punya aatma banne ke liye yaad mein rehna hai, maaya ke toofaanon se darna nahin hai।

vardaan:- roohaaniyat ki sthiti dvaara vyartha baaton ka stock khatma karne vaale khushi ke khajaane se sampanna bhav

roohaaniyat ki sthiti dvaara vyartha baaton ke stock ko samaapta karo, nahin to ek do ke avgunon ka varnan karte beemaari ke jarmas vaayumandal mein phailaate rahenge, isse vaataavran powerful nahin banega। aapke paas anek bhaavon se anek aatmaayen aayengi lekin aapki taraph se shubh bhaavna ki baaten hi le jaaen। yeh tab hoga jab svayan ke paas khushi ki baaton ka stock jama hoga। yadi dil mein kisi ke prati koi vyartha baaten hogi to jahaan baaten hain vahaan baap nahin, paap hai।

slogan:- smriti ka switch on ho to mood oph ho nahin sakti।