सोमवार 6 जुलाई 2020 की दैनिक मुरली

06-07-2020 praatahmurli om shanti "baapdaada"' madhuban

“meethe bachche - sadaiv khushi mein raho ki humein kaun padhaata hai, to yeh bhi manamna-bhav hai, tumhein khushi hai ki kal ham patthar buddhi the, aaj paaras buddhi bane hain''

prashn:- takdeer khulne ka aadhaar kya hai?

uttar:- nishchay। agar takdeer khulne mein deri hogi to langadaate rahenge। nishchay buddhi achhi reeti padhkar gallop karte rahenge। koi bhi baat mein sanshay hai to peechhe rah jaayenge। jo nishchay buddhi ban apni buddhi ko baap tak daudaate rehte hain woh satopradhaan ban jaate hain।

om shanti। student sab school mein padhte hain to unko yeh maaloom rehta hai ki hamko padhkar kya banne ka hai। meethe-meethe roohaani bachchon ki buddhi mein aana chaahiye ki ham satayug paaraspuri ke maalik bante hain। is deh ke sambandh aadi sab chhodne hain। ab hamko paaraspuri ka maalik paarasnaath banna hai, saara din yeh khushi rahni chaahiye। samajhte ho - paaraspuri kisko kaha jaata hai? vahaan makaan aadi sab sone-chaandi ke hote hain। yahaan to pattharon eeton ke makaan hain। ab phir tum patthar buddhi se paaras buddhi bante ho। patthar buddhi ko paaras buddhi jab paarasnaath banaane vaala baap aaye tab banaaye na! tum yahaan baithe ho, jaante ho hamaara school oonch te oonch hai। isse bada school koi hota nahin। is school se tum karod padma bhaagyashaali vishwa ke maalik bante ho, to tum bachchon ko kitni khushi rahni chaahiye। is pattharpuri se paaraspuri mein jaane ka yeh purushottam sangamayug hai। kal patthar buddhi the, aaj paaras buddhi ban rahe hain। yeh baat sadaiv buddhi mein rahe to bhi manamnaabhav hi hai। school mein teacher aate hain padhaane liye। student ko dil mein rehta hai abhi teacher aaya ki aaya। tum bachche bhi samajhte ho - hamaara teacher to svayan bhagwan hai। woh hamko svarga ka maalik banaate hain to zaroor sangam par aayenge। abhi tum jaante ho manushya pukaarte rehte hain aur woh yahaan aa gaye hain। kalpa pahle bhi aisa hua tha tab to likha hua hai vinaashkaale vipreet buddhi kyonki woh hain patthar buddhi। tumhaari hai vinaash kaale preet buddhi। tum paaras buddhi ban rahe ho। to aisi koi yukti nikaalni chaahiye jo manushya jaldi samjhen। yahaan bhi bahuton ko le aate hain, to bhi kehte hain shivbaaba brahma tan mein kaise padhaate honge! kaise aate honge! kuchh bhi samajhte nahin hain। itne sab centres par aate hain। nishchay buddhi hain na। sab kehte hain shiv bhagvaanuvaach, shiv hi sabhi ka baap hai। krishna ko thode hi sabka baap kahenge। ismen moonjhane ki to baat hi nahin। parantu takdeer deri se khulne ki hai to phir langadaate rehte hain। kam padhne vaale ko kaha jaata hai - yeh langadaate hain। sanshay buddhi peechhe rah jaayenge। nishchay buddhi achhi reeti padhne vaale aage gallop karte rahenge। kitna simple samjhaaya jaata hai। jaise bachche daudi lagaakar nishaan tak jaakar phir laut aate hain। baap bhi kehte hain buddhi ko jaldi shivbaaba paas daudaayenge to satopradhaan ban jaayenge। yahaan samajhte bhi achha hain। teer lagta hai phir bhi baahar jaane se khalaas ho jaate। baba gyaan injection lagaate hain to uska nasha chadhna chaahiye na। lekin chadhta hi nahin hai। yahaan gyaan amrit ka pyaala peete hain to asar hota hai। baahar jaane se hi bhool jaate hain। bachche jaante hain - gyaan saagar, patit-paavan sadgati daata liberator ek hi baap hai। vahi har baat ka varsa dete hain। kehte hain bachche tum bhi poore saagar bano। jitna mere mein gyaan hai utna tum bhi dhaaran karo।

shivbaaba ko deh ka nasha nahin hai। baap kehte hain bachche ham to sadaiv shant rehte hain। tumko bhi jab deh nahin thi to nasha nahin tha। shivbaaba thode hi kehte hain yeh hamaari cheez hai। yeh tan loan liya hai, loan li hui cheez apni thode hi hui। hamne inmen pravesh kiya hai, thode time ke liye service karne arth। abhi tum bachchon ko vaapas ghar chalna hai, daudi lagaani hai bhagwan se milne ke liye। itne yagya-tap aadi karte rehte hain, samajhte thode hi hain woh milega kaise। samajhte hain koi na koi roop mein bhagwan aa jaayega। baap samjhaate to bahut sahaj hain, pradarshani mein bhi tum samjhaao। satayug-treta ki aayu bhi likhi hui hai। usmein 2500 varsha tak bilkul accurate hai। sooryavanshi ke baad hote hain chandravanshi phir dikhaao raavan ka raajya shuru hua aur bhaarat patit hone laga। dvaapar-kaliyug mein raavan raajya hua, tithi-taareekh lagi hui hai। beech mein rakho sangamayug। rathi bhi zaroor chaahiye na। is rath mein pravesh ho baap raajayog sikhlaate hain, jisse yeh lakshmi-naaraayan bante hain। kisko bhi samjhaana to bahut sahaj hai। lakshmi-naaraayan ki dynasty kitna samay chalti hai। aur sab gharaane hain had ke, yeh hai behad ka। is behad ki history-geography ko jaanna chaahiye na। abhi hai sangamayug। phir daivi raajya sthaapan ho raha hai। is pattharpuri, puraani duniya ka vinaash hona hai। vinaash na ho to nai duniya kaise banengi! ab kehte hain new dehli। abhi tum bachche jaante ho new dehli kab hogi। nai duniya mein nai dilli hoti hai। gaate bhi hain jamuna ke kanthe par mahal hote hain। jab in lakshmi-naaraayan ka raajya hai tab kahenge new dilli, paaraspuri। naya raajya to satayug mein lakshmi-naaraayan ka hi hota hai। manushya to yeh bhi bhool gaye hain ki drama kaise shuru hota hai। kaun-kaun mukhya actors hain, woh jaanna chaahiye na। actors to bahut hain isliye mukhya actors ko tum jaante ho। tum bhi mukhya actors ban rahe ho। sabse mukhya part tum baja rahe ho। tum roohaani social workers ho। baaki sab social workers hain jismaani। tum roohon ko samjhaate ho, padhti rooh hai। manushya samajhte hain jisma padhta hai। yeh kisko bhi pata nahin hai ki aatma in organs dvaara padhti hai। ham aatma barrister aadi banta hoon। baba hamko padhaate hain। sanskaar bhi aatma mein rehte hain। sanskaar le jaayenge phir aakar nai duniya mein raajya karenge। jaise satayug mein raajdhaani chali thi vaise hi shuru ho jaayegi। ismen kuchh poochhne ki darkaar nahin rehti। mukhya baat hai - deh-abhimaan mein kabhi nahin aao। apne ko aatma samjho। koi bhi vikarma nahin karo। yaad mein raho, nahin to ek vikarma ka bojh sau guna ho jaayega। hadgud ekdam toot jaate hain। usmein bhi mukhya vikaar hai kaam। kai kehte hain - bachche tang karte hain phir maarna padta hai। ab yeh koi poochhne ka nahin rehta hai। yeh to chhota paai-paise ka paap kahenge। tumhaare sir par to janma-janmaantar ke paap hain, pahle unko to bhasma karo। baap paavan hone ka bahut sahaj upaay batlaate hain। tum ek baap ki yaad se paavan ban jaayenge। bhagvaanuvaach - bachchon prati, tum aatmaon se baat karta hoon। aur koi manushya aise samajh na saken। woh to apne ko shareer hi samajhte hain। baap kehte hain main aatmaon ko samjhaata hoon। gaaya bhi jaata hai, aatmaon aur paramatma ka mela lagta hai, ismen koi aavaaz aadi nahin karni hai। yeh to padhaai hai। door-door se aate hain baba ke paas। nishchay buddhi jo honge unko jor se kashish hogi aage chalkar। abhi itni kashish koi ko hoti nahin hai kyonki yaad nahin karte hain। musaaphiri se jab lautte hain, ghar ke najdeek aate hain to makaan yaad aayega, bachche yaad aayenge, ghar pahunchte hi khushi mein aakar milenge। khushi badhti jaayegi। pahle-pahle stri yaad aayegi phir baal-bachche aadi yaad aayenge। tumko yaad aayega ki ham ghar jaate hain vahaan baap aur bachche hi hote hain। double khushi hoti hai। shantidham ghar jaayenge phir aayenge raajdhaani mein। bas yaad hi karna hai, baap kehte hain manamnaabhav। apne ko aatma samajh baap aur varse ko yaad karo। baba tum bachchon ko gul-gul banaakar, naynon par bithaakar saath le jaate hain। zara bhi takleeph nahin। jaise machchharon ka jhunda jaata hai na। tum aatmaayen bhi aise jaayengi baap ke saath। paavan banne ke liye tum baap ko yaad karte ho, ghar ko nahin।

baba ki nazar pahle-pahle gareeb bachchon par jaati hai। baba gareeb nivaaz hai na। tum bhi gaanv mein service karne jaate ho। baap kehte hain main bhi tumhaare gaanv ko aakar paaraspuri banaata hoon। abhi to yeh narka puraani duniya hai। inko zaroor todna pade। nai duniya mein nai dilli, woh satayug mein hi hogi। vahaan raajya bhi tumhaara hoga। tumko nasha chadhta hai ham phir se apni raajdhaani sthaapan karenge। jaise kalpa pahle ki thi। yeh thode hi kahenge ham aise-aise makaan banaayenge। nahin, tum jaayenge vahaan to automatic tum woh banaane lag padenge kyonki woh aatma mein part bhara hua hai। yahaan part hai sirf padhne ka। vahaan tumhaari buddhi mein aapehi aayega ki aise-aise ham mahal banaayen। jaise kalpa pahle banaaya tha, woh banaane lag padenge। aatma mein bhi pahle se hi noondh hai। tum vahi mahal banaayenge jin mahlon mein tum kalpa-kalpa rehte ho। in baaton ko naya koi samajh na sake। tum samajhte ho ham aate hain, nai-nai points sun refresh hokar jaate hain। nai-nai points nikalti hain, woh bhi drama mein noondh hai।

baba kehte hain bachche, main is bail par (rath par) sadaiv savaari karoon, ismen mujhe sukh nahin bhaasta hai। main to tum bachchon ko padhaane aata hoon। aise nahin, bail par savaari kar baithe hi hain। raat-din bail par savaari hoti hai kya? unka to second mein aana-jaana hota hai। sadaiv baithne ka kaayda hi nahin। baba kitna door se aate hain padhaane ke liye, ghar to unka woh hai na। saara din shareer mein thode hi baithega, unko sukh hi nahin aayega। jaise pinjade mein tota phans jaata hai। main to yeh loan leta hoon tumko samjhaane ke liye। tum kahenge gyaan ka saagar baba aate hain hamko padhaane ke liye। khushi mein romaanch khade ho jaane chaahiye। woh khushi phir kam thode hi honi chaahiye। yeh dhani to sthaai baithe hain। ek bail par do ki savaari sadaiv hogi kya? shivbaaba rehta hai apne dhaam mein। yahaan aate hain, aane mein deri thode hi lagti hai। rocket dekho kitne teekhe hote hain। aavaaz se bhi teekhe। aatma bhi bahut chhota rocket hai। aatma bhaagti kaise hai, yahaan se jhat gai london। ek second mein jeevanmukti gaai hai। baba khud bhi rocket hai। kehte hain main tumko padhaane ke liye aata hoon। phir jaata hoon apne ghar। is samay bahut busy rehta hoon। divya drishti daata hoon, to bhakton ko raazi karna hota hai। tumko padhaata hoon। bhakton ki dil hoti hai saakshaatkaar ho ya kuchh na kuchh bheekh maangate hain। sabse jaasti bheekh jagat amba se maangate hain। tum jagat amba ho na। tum vishwa ki baadshaahi ki bheekh deti ho। gareebon ko bheekh milti hai na। ham bhi gareeb hain to shivbaaba svarga ki baadshaahi bheekh mein dete hain। bheekh kuchh aur nahin, sirf kehte hain baap ko yaad karo to vikarma vinaash honge। shantidham mein chale jaayenge। mujhe yaad karo to main guarantee karta hoon tumhaari aayu bhi badi ho jaayegi। satayug mein mrityu ka naam nahin hota। woh hai amarlok, vahaan mrityu ka naam nahin hota। sirf ek khaal chhod doosri lete hain, isko mrityu kahenge kya! woh hai amarpuri। saakshaatkaar hota hai hamko bachcha banna hai। khushi ki baat hai। baba ki dil hoti hai ab jaakar bachcha banoon। jaante hain golden spoon in mouth hoga। ek hi sikeeldha baap ka bachcha hoon। baap ne adopt kiya hai। main sikeeldha bachcha hoon to baba kitna pyaar karte hain। ekdam pravesh kar lete hain। yeh bhi khel hai na। khel mein hamesha khushi hoti hai। yeh bhi jaante hain zaroor bahut-bahut bhaagyashaali rath hoga। jiske liye gaayan hai gyaan saagar, inmen pravesh kar tumko gyaan dete hain। tum bachchon ke liye ek hi khushi bahut hai - bhagwan aakar padhaate hain। bhagwan svarga ki raajaai sthaapan karte hain। ham unke bachche hain to phir ham narka mein kyon hain! yeh kiski bhi buddhi mein nahin aata। tum to bhaagyashaali ho jo vishwa ka maalik banne ke liye padhte ho। aisi padhaai par kitna attention dena chaahiye। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) isi double khushi mein rehna hai ki ab musaaphiri poori hui, pahle ham apne ghar shantidham mein jaayenge phir apni raajdhaani mein aayenge।

2) sir par jo janma-janmaantar ke paapon ka bojh hai use bhasma karna hai, deh-abhimaan mein aakar koi bhi vikarma nahin karna hai।

vardaan:- man ki svatantrata dvaara sarva aatmaon ko shanti ka daan dene vaale mansa mahaadaani bhav

baandheliyaan tan se bhal partantra hain lekin man se yadi svatantra hain to apni vritti dvaara, shuddh sankalp dvaara vishwa ke vaayumandal ko badalne ki seva kar sakti hain। aajkal vishwa ko aavashyakta hai man ke shanti ki। to man se svatantra aatma mansa dvaara shanti ke vibration phaila sakti hai। shanti ke saagar baap ki yaad mein rahne se automatic shanti ki kirnen phailti hain। aise shanti ka daan dene vaale hi mansa mahaadaani hain।

slogan:- sneh roop ka anubhav to sunaate ho ab shakti roop ka anubhav sunaao।