रविवार 19 जुलाई 2020 की दैनिक मुरली

19-07-20 praatahmurli om shanti ''avyakt-baapdaada'' revise 25-02-86 madhuban

double videshi bhaai-bahinon ke samarpan samaaroh par avyakt baapdaada ke mahaavaakya

aaj baapdaada vishesh shreshtha din ki vishesh sneh bhari mubaarak de rahe hain। aaj kaun-sa samaaroh manaaya? baahar ka drishya to sundar tha hi। lekin sabhi ke umang-utsaah aur dridh sakanlpa ka, dil ka aavaaj dilaaraam baap ke paas pahuncha। to aaj ke din ko vishesh umang-utsaah bhara dridh sankalp samaaroh kahenge। jab se baap ke bane tab se sambandh hai aur rahega। lekin yeh vishesh din vishesh roop se manaaya isko kahenge dridh sankalp kiya। kuchh bhi ho jaae chaahe maaya ke toofaan aayen, chaahe logon ki bhinna-bhinna baaten aayen, chaahe prakriti ka koi bhi halchal ka nazaara ho। chaahe laukik va alaukik sambandh mein kisi bhi prakaar ke circumstance hon, man ke sakanlpon ka bahut jor se toofaan bhi ho to bhi ek baap doosra na koi। ek bal ek bharosa aisa dridh sankalp kiya va sirf stage par baithe! double stage par baithe the ya single stage par? ek thi yeh sthool stage, doosri thi dridh sankalp ki stage, dridhta ki stage। to double stage par baithe the na? haar bhi bahut sundar pahne। sirf yeh haar pahna va saphalta ka bhi haar pahna? saphalta gale ka haar hai। yeh dridhta hi saphalta ka aadhaar hai। is sthool haar ke saath saphalta ka haar bhi pada hua tha na। baapdaada double drishya dekhte hain। sirf saakaar roop ka drishya nahin dekhte। lekin saakaar drishya ke saath-saath aatmik stage man ke dridh sankalp aur saphalta ki shreshtha maala yeh donon dekh rahe the। double maala double stage dekh rahe the। sabhi ne dridh sankalp kiya। bahut achha। kuchh bhi ho jaae lekin sambandh ko nibhaana hai। parmaatma preeti ki reeti sada nibhaate hue saphalta ko paana hai। nishchit hai saphalta gale ka haar hai। ek baap doosra na koi- yeh hai dridh sankalp। jab ek hai to ekras sthiti svatah aur sahaj hai। sarva sambandhon ki avinaashi taar jodi hai na। agar ek bhi sambandh kam hoga to halchal hogi isliye sarva sambandhon ki dor baandhi। connection joda। sankalp kiya। sarva sambandh hain ya sirf mukhya 3 sambandh hain? sarva sambandh hain to sarva praaptiyaan hain। sarva sambandh nahin to koi na koi praapti ki kami rah jaati hai। sabhi ka samaaroh hua na। dridh sankalp karne se aage purushaartha mein bhi vishesh roop se lift mil jaati hai। yeh vidhi bhi vishesh umang-utsaah badhaati hai। baapdaada bhi sabhi bachchon ko dridh sankalp karne ke samaaroh ki badhaai dete hain। aur vardaan dete sada avinaashi bhav। amar bhav।

aaj eshiya ka group baitha hai। eshiya ki visheshta kya hai? videsh seva ka pahla group jaapaan mein gaya, yeh visheshta hui na। saakaar baap ki prerna pramaan vishesh videsh seva ka nimantran aur seva ka aarambha jaapaan se hua। to eshiya ka number sthaapna mein aage hua na। pahla videsh ka nimantran tha। aur dharma vaale nimantran de bulaaven iska aarambha eshiya se hua। to eshiya kitna lucky hai! aur doosri visheshta - eshiya bhaarat ke sabse sameep hai। jo sameep hota hai unko sikeeldhe kehte hain। sikeeldhe bachche chhipe hue hain, har sthaan par kitne achhe-achhe ratna nikle hain। quantity bhale kam hai lekin quality hai। mehnat ka phal achha hai। is tarah dheere-dheere ab sankhya badh rahi hai। sab snehi hain। sab lovely hain। har ek, ek do se jyaada snehi hain। yahi brahman parivaar ki visheshta hai। har ek yeh anubhav karta hai ki mera sabse jyaada sneh hai aur baap ka bhi mere se jyaada sneh hai। mere ko hi baapdaada aage badhaata hai isliye bhakti maarga vaalon ne bhi bahut achha ek chitra arth se banaaya hai। har ek gopi ke saath vallabh hai। sirf ek raadhe ke saath va sirf 8 patraaniyon ke saath nahin। har ek gopi ke saath gopeevallabh hai। jaise dilvaala mandir mein jaate ho to note karte ho na ki yeh mera chitra hai athva meri kothi hai। to is raas mandal mein bhi aap sabka chitra hai? isko kehte hi hain mahaaraas। is mahaaraas ka bahut bada gaayan hai। baapdaada ka har ek se ek do se jyaada pyaar hai। baapdaada harek bachche ke shreshtha bhaagya ko dekh harshit hote hai। koi bhi hai lekin koton mein koi hai। padmaapdam bhaagyavaan hai। duniya ke hisaab se dekho to itne koton mein se koi ho na। jaapaan to kitna bada hai lekin baap ke bachche kitne hain! to koton mein koi hue na। baapdaada har ek ki visheshta, bhaagya dekhte hain। koton mein koi sikeeldhe hain। baap ke liye sabhi vishesh aatmaayen hain। baap kisko saadhaaran, kisko vishesh nahin dekhte। sab vishesh hain। is taraph aur jyaada vriddhi honi hai kyonki is poore side mein double seva vishesh hai। ek to anek variety dharma ke hain। aur is taraph sindha ki nikli hui aatmaayen bhi bahut hain। unhon ki seva bhi achhi kar sakte ho। unhon ko sameep laaya to unhon ke sahayog se aur dharmon tak bhi sahaj pahunch sakenge। double seva se double vriddhi kar sakte ho। unhon mein kisi na kisi reeti se ulte roop mein chaahe sulte roop mein beej pada hua hai। parichay hone ke kaaran sahaj sambandh mein aa sakte hain। bahut seva kar sakte ho kyonki sarva aatmaon ka parivaar hai। brahman sabhi dharmon mein bikhar gaye hain। aisa koi dharma nahin jismen brahman na pahunche hon। ab sab dharmon se nikal-nikalkar aa rahe hain। aur jo brahman parivaar ke hain unhon se apna-pan lagta hai na। jaise koi hisaab-kitaab se gaye aur phir se apne parivaar mein pahunch gaye। kahaan-kahaan se pahunch apna seva ka bhaagya lene ke nimitta ban gaye। yeh koi kam bhaagya nahin। bahut shreshtha bhaagya hai। bade te bade punya aatmaayen ban jaate। mahaadaaniyon, mahaan sevaadhaariyon ki list mein aa jaate। to nimitta banna bhi ek vishesh gift hai। aur double videshiyon ko yeh gift milti hai। thoda hi anubhav kiya aur nimitta ban jaate centre sthaapan karne ke। to yeh bhi last so fast jaane ki vishesh gift hai। seva karne se majority ko yeh smriti mein rehta hai ki jo ham nimitta karenge athva chalenge, hamko dekh aur karenge। to yeh double attention ho jaata hai। double attention hone ke kaaran double lift ho jaati hai। samjha- double videshiyon ko double lift hai। abhi sab taraph dharni achhi ho gai hai। hal chalne ke baad dharni theek ho jaati hai na। aur phir phal bhi achhe aur sahaj nikalte hain। achha - eshiya ke bade mike ka aavaaj bhaarat mein jaldi pahunchega isliye aise mike taiyaar karo। achha!

badi daadiyon se:- aap logon ki mahima bhi kya karen! jaise baap ke liye kehte hain na - saagar ko syaahi banaayen, dharni ko kaagaj banaayen…aise hi aap sabhi daadiyon ki mahima hai। agar mahima shuru karen to saari raat-din ek saptaah ka course ho jaayega। achhe hain, sabki raas achhi hai। sabhi ki raashi milti hai aur sabhi raas karte bhi achhi hain। haath mein haath milaana arthaat vichaar milaana yahi raas hai। to baapdaada daadiyon ki yahi raas dekhte rehte hain। ashta ratnon ki yahi raas hai।

aap daadiyaan parivaar ka vishesh shrringaar ho। agar shrringaar na ho to shobha nahin hoti hai। to sabhi usi sneh se dekhte hain।

brijaindra daadi se:- bachpan se laukik mein, alaukak mein shrringaar karti rahi to shrringaar karte-karte shrringaar ban gai। aise hain na! baapdaada mahaaveer mahaarthi bachchon ko sada hi yaad to kya karte lekin samaaye hue rehte hain। jo samaaya hua hota hai unko yaad karne ki bhi jaroorat nahin। baapdaada sada hi har vishesh ratna ko vishwa ke aage pratyaksha karte hain। to vishwa ke aage pratyaksha hone vaali vishesh ratna ho। extra sabhi ke khushi ki madad hai। aapki khushi ko dekhkar sabko khushi ki khuraak mil jaati hai isliye aap sabki aayu badh rahi hai kyonki sabhi ke sneh ki aarsheevaad milti rehti hai। abhi to bahut kaarya karna hai, isliye shrringaar ho parivaar ka। sabhi kitne pyaar se dekhte hain। jaise koi ka chhatra utar jaae to maatha kaise lagega। chhatra pahanne vaala agar chhatra na pahne to kya lagega। to aap sabhi bhi parivaar ke chhatra ho।

nirmalshaanta daadi se:- apna yaadgaar sada hi madhuban mein dekhti rehti ho। yaadgaar hote hain yaad karne ke liye। lekin aapki yaad yaadgaar bana deti hai। chalte-phirte sabhi parivaar ko nimitta bane hue aadhaar moorta yaad aate rehte hain। to aadhaar moorta ho। sthaapna ke kaarya ke aadhaar moorta majboot hone ke kaaran yeh vriddhi ki, unnati ki building kitni majboot ho rahi hai। kaaran? aadhaar majboot hai। achha!

double light bano (avyakt murliyon se chune hue anmol ratna)

double light arthaat aatmik swaroop mein sthit hone se halkaapan svatah ho jaata hai। aise double light ko hi pharishta kaha jaata hai। pharishta kabhi kisi bhi bandhan mein nahin bandhata। is puraani duniya ke, puraani deh ke aakarshan mein nahin aata kyonki hai hi double light।

double light arthaat sada udti kala ka anubhav karne vaale kyonki jo halka hota hai woh sada ooncha udta hai, bojh vaala neeche jaata hai। to double light aatmaayen arthaat koi bojh na ho kyonki koi bhi bojh hoga to oonchi sthiti mein udne nahin dega। double jimmevaari hote bhi double light rahne se laukik jimmevaari kabhi thakaayegi nahin kyonki trustee ho। trustee ko kya thakaavat। apni grihasthi, apni pravriti samjhenge to bojh hai। apna hai hi nahin to bojh kis baat ka। bilkul nyaare aur pyaare। baalak so maalik।

sada svayan ko baap ke havaale kar do to sada halke rahenge। apni jimmevaari baap ko de do arthaat apna bojh baap ko de do to svayan halke ho jaayenge। buddhi se surrender ho jaao। agar buddhi se surrender honge to aur koi baat buddhi mein nahin aayegi। bas sab kuchh baap ka hai, sab kuchh baap mein hai to aur kuchh raha hi nahin। double light arthaat sanskaar svabhaav ka bhi bojh nahin, vyartha sankalp ka bhi bojh nahin - isko kaha jaata hai halka। jitne halke honge utna sahaj udti kala ka anubhav karenge। agar yog mein zara bhi mehnat karni padti hai to zaroor koi bojh hai। to baba-baba ka aadhaar le udte raho।

sada yahi lakshya yaad rahe ki humein baap samaan banna hai to jaise baap light hai vaise double light। auron ko dekhte ho to kamjor hote ho, si father, follow father karo। udti kala ka shreshtha saadhan sirf ek shabd hai -‘sab kuchh tera'। ‘mera' shabd badal ‘tera' kar do। tera hoon, to aatma light hai। aur jab sab kuchh tera hai to light (halke) ban gaye। jaise shuru-shuru mein abhyaas karte the - chal rahe hain lekin sthiti aisi jo doosre samajhte ki yeh koi light ja rahi hai। unko shareer dikhaai nahin deta tha, isi abhyaas se har prakaar ke paper mein paas hue। to abhi jabki samay bahut kharaab aa raha hai to double light rahne ka abhyaas badhaao। doosron ko sadaiv aapka light roop dikhaai de - yahi safety hai। andar aaven aur light ka kila dekhen।

jaise light ke connection se badi-badi machinery chalti hai। aap sabhi har karma karte connection ke aadhaar se svayan bhi double light ban chalte raho। jahaan double light ki sthiti hai vahaan mehnat aur mushkil shabd samaapta ho jaata hai। apne pan ko samaapta kar trasteepan ka bhaav aur eeshvareey seva ki bhaavna ho to double light ban jaayenge। koi bhi aapke sameep samparka mein aaye to mahsoos kare ki yeh roohaani hain, alaukik hain। unko aapka pharishta roop hi dikhaai de। pharishte sada oonche rehte hain। pharishton ko chitra roop mein bhi dikhaayenge to pankh dikhaayenge kyonki udte panchhi hain।

sada khushi mein jhoolne vaale sarva ke vighna harta va sarva ki mushkil ko sahaj karne vaale tab banenge jab sankalpon mein dridhta hogi aur sthiti mein double light honge। mera kuchh nahin, sab kuchh baap ka hai। jab bojh apne oopar rakhte ho tab sab prakaar ke vighna aate hain। mera nahin to nirvighna। sada apne ko double light samajhkar seva karte chalo। jitna seva mein halkaapan hoga utna sahaj udenge udaayenge। double light ban seva karna, yaad mein rahkar seva karna - yahi saphalta ka aadhaar hai।

jimmevaari ko nibhaana yeh bhi aavashyak hai lekin jitni badi jimmevaari utna hi double light। jimmevaari nibhaate hue jimmevaari ke bojh se nyaare raho isko kehte hain baap ka pyaara। ghabraao nahin kya karoon, bahut jimmevaari hai। yeh karoon, va nahin ...yeh to bada mushkil hai। yeh mahsoosta arthaat bojh hai! double light arthaat isse bhi nyaara। koi bhi jimmevaari ke karma ke halchal ka bojh na ho। sada double light sthiti mein rahne vaale nishchay buddhi, nishchinta honge। udti kala mein rahenge। udti kala arthaat oonche se oonchi sthiti। unke buddhi roopi paanv dharni par nahin। dharni arthaat deh bhaan se oopar। jo deh bhaan ki dharni se oopar rehte woh sada pharishte hain।

ab double light ban divya buddhi roopi vimaan dvaara sabse oonchi choti ki sthiti mein sthit ho vishwa ki sarva aatmaon ke prati light aur might ki shubh bhaavna aur shreshtha kaamna ke sahayog ki lahar phailaao। is vimaan mein baapdaada ki refine shreshtha mat ka saadhan ho। usmein jara bhi man-mat, parmat ka kichda na ho।

vardaan:- har second har sankalp ke mahatva ko jaan punya ki poonji jama karne vaale padmaapadmapti bhav

aap punya aatmaon ke sankalp mein itni vishesh shakti hai jis shakti dvaara asambhav ko sambhav kar sakte ho। jaise aajkal yatron dvaara registaan ko hara bhara kar dete hain, pahaadiyon par phool uga dete hain aise aap apne shreshtha sankalpon dvaara naaummeendavaar ko ummeendavaar bana sakte ho। sirf har second har sankalp ki value ko jaan, sankalp aur second ko use kar punya ki poonji jama karo। aapke sankalp ki shakti itni shreshtha hai jo ek sankalp bhi padmaapadmapti bana deta hai।

slogan:- har karma adhikaari pan ke nishchay aur nashe se karo to mehnat samaapta ho jaayegi।

soochna:- aaj maas ka teesra ravivaar hai, sabhi raajayogi tapasvi bhaai bahinen saayan 6.30 se 7.30 baje tak, vishesh yog abhyaas ke samay bhakton ki pukaar sunen aur apne eeshta dev merciful, daata swaroop mein sthit ho sabki manokaamnaayen poorn karne ki seva karen।