रविवार 2 अगस्त 2020 की दैनिक मुरली

02-08-20 praatahmurli om shanti ''avyakt-baapdaada'' revise 01-03-86 madhuban

holeehans buddhi, vritti drishti aur mukh

aaj baapdaada sarva holi hanson ki sabha dekh rahe hain। yeh saadhaaran sabha nahin hai। lekin roohaani holi hanson ki sabha hai। baapdaada har ek holi hans ko dekh rahe hain ki sabhi kahaan tak holi hans bane hain। hans ki visheshta achhi tarah se jaante ho? sabse pahle hans buddhi arthaat sada har aatma ke prati shreshtha aur shubh sochne vaale। holi hans arthaat kankar aur ratna ko achhi tarah parakhne vaale aur phir dhaaran karne vaale। pahle har aatma ke bhaav ko parakhne vaale aur phir dhaaran karne vaale। kabhi bhi buddhi mein kisi bhi aatma ke prati ashubh va saadhaaran bhaav dhaaran karne vaale na ho। sada shubh bhaav aur shubh bhaavna dhaaran karna। bhaav jaanne se kabhi bhi kisi ke saadhaaran svabhaav ya vyartha svabhaav ka prabhaav nahin padega। shubh bhaav, shubh bhaavna, jisko bhaav svabhaav kehte ho, jo vyartha hai unko badalne ka hai। baapdaada dekh rahe hain - aise hans buddhi kahaan tak bane hain? aise hi hans vritti arthaat sada har aatma ke prati shreshtha kalyaan ki vritti। har aatma ke akalyaan ki baaten sunte, dekhte bhi akalyaan ko kalyaan ki vritti se badal lena - isko kehte hain holi hans vritti। apne kalyaan ki vritti se auron ko bhi badal sakte ho। unke akalyaan ki vritti ko apne kalyaan ki vritti se badal lena - yahi holi hans ka kartavya hai। isi pramaan drishti mein sada har aatma ke prati shreshtha shuddh sneh ki drishti ho। kaisa bhi ho lekin apni taraph se sabke prati roohaani aatmik sneh ki drishti dhaaran karna। isko kehte hain holi hans drishti। isi prakaar bol mein bhi pahle sunaaya hai bura bol alag cheej hai। woh to braahmanon ka badal gaya hai lekin vyartha bol ko bhi holi hans mukh nahin kahenge। mukh bhi holi hans mukh ho! jiske mukh se kabhi vyartha na nikle, isko kahenge hans mukh sthiti। to holi hans buddhi, vritti, drishti aur mukh। jab yeh pavitra arthaat shreshtha ban jaate hain to svatah hi holi hans ki sthiti ka pratyaksha prabhaav dikhaai deta hai। to sabhi apne aapko dekho ki kahaan tak sada holi hans ban chalte-phirte hain? kyonki sva-unnati ka samay jyaada nahin raha hai, isliye apne aapko check karo aur change karo।

is samay ka parivartan bahut kaal ke parivartan vaali golden duniya ke adhikaari banaayega। yeh eeshaara baapdaada ne pahle bhi diya hai। sva ki taraph double andar line se attention sabhi ka hai? thode samay ka attention hai aur bahut kaal ke attention ke phalasvarup shreshtha praapti ki praalabdha hai isliye yeh thoda samay bahut shreshtha suhaavna hai। mehnat bhi nahin hai sirf jo baap ne kaha aur dhaaran kiya। aur dhaaran karne se practical svatah hi hoga। holi hans ka kaam hi hai dhaaran karna। to aise holi hanson ki yeh sabha hai na। knowledgeful ban gaye। vyartha va saadhaaran ko achhi tarah se samajh gaye ho। to samajhne ke baad karma mein svatah hi aata hai। vaise bhi saadhaaran bhaasha mein yahi kehte ho na ki abhi mere ko samajh mein aaya। phir karne ke bina rah nahin sakte ho। to pahle yeh check karo ki saadhaaran athva vyartha kya hai? kabhi vyartha ya saadhaaran ko hi shreshtha to nahin samajh lete? isliye pahle-pahle mukhya hai holi hans buddhi। usmein svatah hi parakhne ki shakti aa hi jaati hai kyonki vyartha sankalp aur vyartha samay tab jaata jab uski parakh nahin rehti ki yeh right hai ya wrong hai। apne vyartha ko, wrong ko right samajh lete hain tab hi jyaada vyartha samay jaata hai। hai vyartha lekin samajhte hain ki main samartha, right soch rahi hoon। jo mainne kaha vahi right hai। isi mein parakhne ki shakti na hone ke kaaran man ki shakti, samay ki shakti, vaani ki shakti sab chali jaati hai। aur doosre se mehnat lene ka bojh bhi chadhta hai। kaaran? kyonki holi hans buddhi nahin bane hain। to baapdaada sabhi holi hanson ko phir se yahi ishaara de rahe hain ki ulte ko ulta nahin karo। yeh hai hi ulta, yeh nahin socho lekin lekin ulte ko sulta kaise karoon yeh socho। isko kaha jaata hai kalyaan ki bhaavna। shreshtha bhaav, shubh bhaavna se apne vyartha bhaav-svabhaav aur doosre ke bhaav-svabhaav ko parivartan karne ki vijay praapta karenge! samjha। pahle sva par vijayi phir sarva par vijayi, phir prakriti par vijayi banenge। yeh teenon vijay aapko vijay maala ka manka banaayengi। prakriti mein vaayumandal, vibration ya sthool prakriti ki samasyaayen sab aa jaati hain। to teenon par vijay ho? isi aadhaar se vijay maala ka number apna dekh sakte ho, isliye naam hi vaijayanti maala rakha hai। to sabhi vijayi ho? achha!

aaj Australia vaalon ka tarna hai। Australia vaalon ko madhuban se bhi golden chancellor banne ka chance milta hai kyonki sabhi ko aage rakhne ka chance dete ho, yeh visheshta hai। auron ko aage rakhna yeh chance dena arthaat chancellor banna hai। chance lene vaale ko, chance dene vaale ko donon ko chancellor kehte hain। baap-daada sada har bachche ki visheshta dekhte hain aur varnan karte hain। Australia mein paandavon ko seva ka chance vishesh mila hua hai। jyaada centres bhi paandav sambhaalte hain। shaktiyon ne paandavon ko chance diya hai। aage rakhne vaale sadaiv aage rehte hi hain। yeh bhi shaktiyon ki vishaalta hai। lekin paandav apne ko sada nimitta samajh seva mein aage badh rahe ho na। seva mein nimitta bhaav hi seva ki saphalta ka aadhaar hai। baap-daada teen shabd kehte hain na, jo saakaar dvaara bhi last mein uchchaaran kiye। niraakaari, nirvikaari aur nirhankaari। yeh teenon visheshtaayen nimitta bhaav se svatah hi aati hain। nimitta bhaav nahin to in teenon visheshtaaon ka anubhav nahin hota। nimitta bhaav anek prakaar ka main-pan, mera-pan sahaj hi khatma kar deta hai। na main na mera। sthiti mein jo halchal hoti hai woh isi ek kami ke kaaran। seva mein bhi mehnat karni padti aur apni udti kala ki sthiti mein bhi mehnat karni padti। nimitta hain arthaat nimitta banaane vaala sada yaad rahe। to isi visheshta se sada seva ki vriddhi karte hue aage badh rahe ho na। seva ka vistaar hona, yeh bhi seva ki saphalta ki nishaani hai। abhi achal-adol sthiti ke achhe anubhvi ho gaye ho। samjha- Australia arthaat kuchh extra hai, jo auron mein nahin hai। Australia mein aur variety gujraati aadi nahin hain। charity begins at hom ka kaam jyaada kiya hai। hamjinsa ko jagaaya hai। kumaar-kumaariyon ka achha kalyaan ho raha hai। is jeevan mein apne jeevan ka shreshtha phainsala karna hota hai। apni jeevan bana li to sada ke liye shreshtha ban gaye। ulti seedhi chadhne se bach gaye। baapdaada khush hote hain ki ek do se anek deepak jag deepmaala bana rahe hain। umang-utsaah achha hai। seva mein busy rahne se unnati achhi kar rahe hain।

ek to nimitta bhaav ki baat sunaai, doosra jo seva ke nimitta bante unhon ke liye sva unnati va seva ki unnati prati ek vishesh slogan safety ka saadhan hai। ham nimitta bane hue jo karenge humein dekh sab karenge kyonki seva ke nimitta banna arthaat stage par aana। jaise koi paartadhaari jab stage par aata hai to kitna attention rakhta hai। to seva ke nimitta banna arthaat stage par part bajaana। stage taraph sabhi ki nazar hoti hai। aur jo jitna hero actor hota us par jyaada nazar hoti hai। to yeh slogan safety ka saadhan hai, isse svatah hi udti kala ka anubhav karenge। vaise to chaahe centre par rehte va kahaan bhi rah kar seva karte। sevaadhaari to sab hain। kai apne nimitta sthaanon par rahkar seva ka chance lete woh bhi seva ki stage par hain। seva ke sivaae apne samay ko vyartha nahin ganvaana chaahiye। seva ka bhi khaata bahut jama hota hai। sachchi dil se seva karne vaale apna khaata bahut achhi tarah se jama kar rahe hain। baapdaada ke paas har ek bachche ka aadi se ant tak seva ka khaata hai aur automatically usmein jama hota rehta hai। ek-ek ka account nahin rakhna padta hai। account rakhne vaalon ke paas bahut file hoti hain। baap ke paas sthool file koi nahin hai। ek second mein har ek ka aadi se abhi tak ka register second mein emerge hota hai। automatic jama hota rehta hai। aise kabhi nahin samajhna hamko to koi dekhta nahin, samajhta nahin। baapdaada ke paas to jo jaisa hai, jitna karta hai, jis stage se karta hai sab jama hota hai। file nahin hai lekin final hai। Australia mein shaktiyon ne baap ka banne ki, baap ko pahchaan baap se sneh nibhaane mein himmat bahut achhi dikhaai hai। halchal ki bhool hoti hai woh to kai sthaan ke, dharni ke ya total pichhle jeevan ke sanskaar kaaran halchal aati hai। unko bhi paar kar sneh ke bandhan mein aage badhte rehte hain isliye baapdaada shaktiyon ki himmat par mubaarak dete hain। ek bal ek bharosa aage badha raha hai। to shaktiyon ki himmat aur paandavon ka seva ka umang donon pankh pakke ho gaye hain। seva ke kshetra mein paandav bhi mahaaveer ban aage badh rahe hain। halchal ko paar karne mein hoshiyaar hain। sabhi ka chitra vahi hai। paandav mote taaje lambe-chaude dikhaate hain kyonki sthiti aisi oonchi aur majboot hai isliye paandav oonche aur bahaadur dikhaaye hain। Australia vaale merciful bhi jyaada hai bhatakti hui aatmaon ke oopar merciful ban seva mein aage badh rahe hain। ve kabhi seva ke bina rah nahin sakte। baapdaada ko bachchon ke aage badhne ki visheshta par sada khushi hai। vishesh khushanseeb ho। har bachche ke umang-utsaah par baap-daada ko harsha hota hai। kaise har ek shreshtha lakshya se aage badh rahe hain aur badhte rahenge। baapdaada sadaiv visheshta ko hi dekhte hain। har ek, ek do se pyaara lagta hai। aap bhi ek do ko is vidhi se dekhte ho na! jisko bhi dekho ek do se priy lage kyonki 5 hajaar varsha ke baad bichhude hue aapas mein mile hain to kitne pyaare lagte hain। baap se pyaar ki nishaani yeh hai ki sabhi brahman aatmaayen pyaari lagengi। har brahman pyaara lagna maana baap se pyaar hai। maala mein ek do ke sambandh mein to brahman hi aayenge। baap to retired ho dekhenge isliye baap se pyaar ki nishaani ko sada anubhav karo। sabhi baap ke pyaare hain to hamaare bhi pyaare hain। achha।

party se:-

1- sabhi apne ko vishesh aatmaayen samajhte ho? vishesh aatma hain, vishesh kaarya ke nimitta hain aur visheshtaayen dikhaani hain - aise sada smriti mein rahe। vishesh smriti saadhaaran smriti ko bhi shaktishaali bana deti hai। vyartha ko bhi samaapta kar deti hai। to sada yeh vishesh shabd yaad rakhna। bolna bhi vishesh, dekhna bhi vishesh, karna bhi vishesh, sochna bhi vishesh। har baat mein yeh vishesh shabd laane se svatah hi badal jaayenge। aur isi smriti se sva parivartan vishwa parivartan sahaj ho jaayega। har baat mein vishesh shabd aid karte jaana। isi se jo sampoornata ko praapta karne ka lakshya hai, manzil hai usko praapta kar lenge।

2- sada baap aur varse ki smriti mein rehte ho? shreshtha smriti dvaara shreshtha sthiti ka anubhav hota hai? sthiti ka aadhaar hai smriti। smriti kamjor hai to sthiti bhi kamjor ho jaati hai। smriti sada shaktishaali rahe। woh shaktishaali smriti hai “main baap ka aur baap mera।'' isi smriti se sthiti shaktishaali rahegi aur doosron ko bhi shaktishaali banaayenge। to sada smriti ke oopar vishesh attention rahe। samartha smriti, samartha sthiti, samartha seva svatah hoti rahe। smriti, sthiti aur seva teenon hi samartha hon। jaise switch on karo to roshni ho jaati, aaph karo to andhiyaara ho jaata, aise hi yeh smriti bhi ek switch hai। smriti ka switch agar kamjor hai to sthiti bhi kamjor hai। sada smriti roopi switch ka attention। isi se hi svayan ka aur sarva ka kalyaan hai। naya janma hua to nai smriti ho। puraani smritiyaan sab samaapta। to isi vidhi se sada siddhi ko praapta karte chalo।

3- sabhi apne ko bhaagyavaan samajhte ho? vardaan bhoomi par aana yeh mahaan bhaagya hai। ek bhaagya vardaan bhoomi par pahunchne ka mil gaya, isi bhaagya ko jitna chaaho shreshtha bana sakte ho। shreshtha mat hi bhaagya ki rekha kheenchane ki kalam hai। ismen jitna bhi apni shreshtha rekha banaate jaayenge utna shreshtha ban jaayenge। saare kalpa ke andar yahi shreshtha samay bhaagya ki rekha banaane ka hai। aise samay par aur aise sthaan par pahunch gaye। to thode mein khush hone vaale nahin। jab dene vaala daata de raha hai to lene vaala thake kyon। baap ki yaad hi shreshtha banaati hai। baap ko yaad karna arthaat paavan banna। janma-janma ka sambandh hai to yaad kya mushkil hai? sirf sneh se aur sambandh se yaad karo। jahaan sneh hota hai vahaan yaad na aave, yeh ho nahin sakta। bhoolne ki koshish karo to bhi yaad aata hai। achha।

vardaan:- mastak dvaara santushtata ke chamak ki jhalak dikhaane vaale saakshaatkaarmoorta bhav

jo sada santushta rehte hain, unke mastak se santushtata ki jhalak sada chamakti rehti hai, unhein koi bhi udaas aatma yadi dekh leti hai to woh bhi khush ho jaati hai, uski udaasi mit jaati hai। jinke paas santushtata ki khushi ka khajaana hai unke peechhe svatah hi sab aakarshit hote hain। unka khushi ka chehra chaitanya board ban jaata hai jo anek aatmaon ko banaane vaale ka parichay deta hai। to aisi santushta rahne aur sarva ko santushta karne vaali santushta maniyaan bano jisse anekon ko saakshaatkaar ho।

slogan:- chot lagaane vaale ka kaam hai chot lagaana aur aapka kaam hai apne ko bacha lena।