शुक्रवार 4 सितंबर 2020 की दैनिक मुरली

04-09-2020 praatahmurli om shanti "baapdaada"' madhuban

''meethe bachche - jab tum phool banenge, tab yeh bhaarat kaanton ke jangal se sampoorn phoolon ka bageecha banega, baba aaya hai tumhein phool banaane''

prashn:- mandir laayak banne ke liye kin baaton par vishesh dhyaan dena hai?

uttar:- mandir laayak banna hai to chalan par vishesh dhyaan do - chalan bahut meethi aur royal honi chaahiye। itna meethaapan ho jo doosron ko uski mahsoosta aaye। anekon ko baap ka parichay do। apna kalyaan karne ke liye achhi reeti purushaartha kar service par lage raho।

geet:- badal jaae duniya na badlenge ham…

om shanti। roohaani bachche jaante hain ki baap brahma dvaara samjha rahe hain। brahma ke rath dvaara hi samjhaate rehte hain। ham yeh pratigya karte hain ki shreemat par ham is bhaarat ki bhoomi ko patit se paavan banaayenge। bhaarat khaas aur duniya aam, sabko ham patit se paavan banne ka raasta bataate hain। itne khyaalaat har ek ko apni buddhi mein rakhna hai। baap kehte hain drama anusaar jab tum phool ban jaayenge aur jab samay aa jaayega to sampoorn bageecha ban jaayega। baagvaan bhi niraakaar ko kaha jaata hai, maali bhi niraakaar ko kaha jaata hai, saakaar ko nahin। maali bhi aatma hai, na ki shareer। baagvaan bhi aatma hai। baap samjhaayenge to zaroor shareer dvaara na। shareer ke saath hi unko maali baagvaan kaha jaata hai, jo is vishwa ko phoolon ka bageecha banaate hain। bageecha tha jahaan yeh devtaayen rehte the। vahaan koi duhkh nahin tha। yahaan is kaanton ke jangal mein to duhkh hai, raavan ka raajya hai, kaanton ka jangal hai। phat se koi phool nahin bante। devtaaon ke aage jaakar gaate bhi hain ki ham janma-janmaantar ke paapi hain, ajaamil hain। aisi praarthana karte hain, ab aakar hamko punya aatma banaao। samajhte hain abhi ham paap aatma hain। koi samay punya aatma the। abhi is duniya mein punya aatmaon ke sirf chitra hain। raajdhaani ke heads ke chitra hain aur unhon ko aisa banaane vaala niraakaar hai shiv। unka chitra hai, bas। aur koi chitra hain nahin। ismen bhi shiv ka to bada ling bana dete hain। kehte bhi hain ki aatma star misal hai, to zaroor baap bhi aisa hoga na। parantu unki poori pahchaan nahin hai। in lakshmi-naaraayan ka vishwa mein raajya tha। inke liye kahaan bhi koi glaani ki baat nahin likhte। baaki krishna ko kab dvaapar mein, kab kahaan le jaate। lakshmi-naaraayan ke liye sab kahenge svarga ke maalik the। yeh hai tumhaari em object। raadhe-krishna kaun hain - manushya bichaare ekdam moonjhe hue hain, kuchh nahin samajhte। jo baap dvaara samajhte hain, woh samjhaane laayak bhi bante hain। nahin to laayak ban nahin sakte। daiveegun dhaaran kar nahin sakte। bhal kitna bhi samjhaao। parantu drama anusaar aisa hona hi hai। tum abhi khud samajhte ho ham sab bachche baap ki shreemat par bhaarat ki roohaani service karte hain apne hi tan-man-dhan se। pradarshani athva museum aadi mein poochhte hain tum bhaarat ki kya seva karte ho? tum jaante ho ham bhaarat ki bahut achhi service karte hain, jangal se bageecha bana rahe hain। satayug hai garden। yeh hai kaanton ka jangal। ek-do ko duhkh dete rehte hain। yeh tum achhi reeti samjha sakte ho। lakshmi-naaraayan ka chitra bhi bahut achha banaana chaahiye। mandiron mein bahut khoobsoorat chitra banaate hain। kahaan gora, kahaan saanvara chitra banaate, unka kya raaz hai, yeh bhi samajhte nahin। tum bachchon ko abhi yeh saara gyaan hai। baap kehte hain main aakar sabko mandir laayak banaata hoon, parantu sab mandir laayak nahin bante hain। praja ko to mandir laayak nahin kahenge na। praja unhon ki hogi jo purooshaartha kar bahut service karte hain।

tum bachchon ko roohaani social service bhi karni hai, is seva mein apna jeevan saphal karna hai। chalan bhi bahut meethi sundar honi chaahiye, jo auron ko bhi meethe-pan se samjha saken। khud hi kaanta hoga to kisko phool kaise banaayenge, unka teer poora lagega nahin। baap ko yaad nahin karte honge to teer kaise lagega। apne kalyaan ke liye achhi reeti purooshaartha kar service mein lage raho। baap bhi service par hai na। tum bachche bhi din-raat service par raho।

doosri baat, samjhaate hain shivjayanti par bahut bachche taaren bhej dete hain, unmein bhi aisi likhat likhni chaahiye jo woh taaren kisko bhi dikhaayen to samajh jaaen। aage ke liye kya karna hai, uska purooshaartha kiya jaata hai। seminar bhi isliye karte hain ki kya-kya service karen jo bahuton ko baap ka parichay mile। taaren dher rakhi hain, inse bahut kaam le sakte ho। address daalte hain shivbaaba keyraoph brahma। prajaapita brahma bhi hai, woh roohaani pita, woh jismaani। unse jismaani rachna rachi jaati hai। baap hai manushya srishti ka rachta। kaise rachna rachte hain, yeh duniya bhar mein koi nahin jaante। baap brahma dvaara ab nai rachna rach rahe hain। brahman hain choti। pahle-pahle brahman zaroor chaahiye। viraat roop ki hai yeh choti। brahman, devta, kshatriy, vaishya, shoodra। pahle shoodra to nahin ho sakte। baap brahma dvaara brahman rachte hain। shoodra kaise aur kis dvaara rachenge?

tum bachche jaante ho kaise nai rachna rachte hain, yeh adoption hai baap ki। kalpa-kalpa baap aakar shoodra se brahman banaate hain phir brahman se devta banaate hain। braahmanon ki service bahut oonchi hai। woh brahman log khud hi pavitra nahin hain to doosre ko pavitra kaise banaayenge। koi bhi brahman sannyaasi ko kabhi raakhi nahin baandhenge। woh kahenge ham to hain hi pavitra। tum apna munh dekho। tum bachche bhi koi se raakhi nahin bandhava sakte। duniya mein to sab ek-do ko baandhate hain। behen-bhaai ko baandhati hai, yeh rivaaj abhi nikla hai। abhi tum shoodra se brahman banne ke liye purooshaartha karte ho। samjhaana padta hai। mel-female donon pavitrata ki pratigya karte hain, donon bata sakte hain ki ham kaise baap ki shreemat se pavitra rehte hain। ant tak is kaam vikaar par jeet rahe to pavitra jagat ka maalik banenge। pavitra duniya satayug ko kaha jaata hai, so ab sthaapan ho rahi hai। tum sab pavitra ho। vikaar mein girne vaale ko raakhi baandh sakte ho। pratigya kar aur phir patit bane to kahenge tum raakhi bandhavaane aaye the phir kya hua? kahenge maaya se haar kha li, yeh hai yuddha ka maidaan। vikaar bada dushman hai। in par jeet paane se hi jagatjeet arthaat raaja-raani banna hai, praja ko jagatjeet nahin kahenge। mehnat to raaja-raani karte hain na। kehte bhi hain ham to lakshmi-naaraayan banenge। woh phir raam-seeta bhi banenge। lakshmi-naaraayan ke baad unke takhta par jeet, unke bachche ki hoti hai। woh lakshmi-naaraayan phir doosre janma mein neeche chale jaayenge। bhinna naam-roop se bachche ko gaddi milti hai to oonch number gina jaayega। punarjanma to lete hain na। bachcha takhta par baithega to woh second grade ho jaayega। oopar vaala neeche, neeche vaala oopar aa jaayega। to ab bachchon ko aisa oonch banna hai to service mein lag jaana chaahiye। pavitra hona bhi bahut zaroori hai। baap kehte hain main pavitra duniya banaata hoon। achha purooshaartha thode karte hain, pavitra to saari duniya ban jaati hai। tumhaare liye svarga ki sthaapna karte hain। yeh drama anusaar hona hi hai, yeh khel bana hua hai। tum pavitra ban jaate ho phir vinaash shuru ho jaata hai। satayug ki sthaapna ho jaati hai। drama ko to tum samajh sakte ho। satayug mein tha devtaaon ka raajya। abhi nahin hai phir hona hai।

tum ho roohaani military। tum 5 vikaaron par jeet paane se jagat jeet banne vaale ho। janma-janmaantar ke paap katne liye baba yuktiyaan bataate hain। baap ek hi baar aakar yukti bataate hain। jab tak raajdhaani sthaapan na ho jaae tab tak vinaash nahin hoga। tum bahut gupta warriors ho। satayug hona hi hai kaliyug ke baad। phir satayug mein kabhi ladaai hoti nahin। tum bachche jaante ho sab aatmaayen jo bhi part bajaati hain, woh sab noondha hua hai। jaise kathputliyaan hoti hain na, aise naachti rehti hain। yeh bhi drama hai, har ek ka is drama mein part hai। part bajaate-bajaate tum tamopradhaan bane ho। phir ab oopar jaate ho, satopradhaan bante ho। knowledge to second ki hai। satopradhaan bante hain phir girte-girte tamopradhaan bante hain। phir baap oopar le jaate hain। vaastav mein woh machhliyaan taar mein latakti hain, is taar mein manushyon ko daalna chaahiye। aise utarti kala phir chadhti kala hoti hai। tum bhi aise chadhte ho phir utarte-utarte neeche aa jaate ho। 5 hazaar varsha lagte hain oopar jaakar phir utarne mein। yeh 84 ka chakra tumhaari buddhi mein hai। utarti kala aur chadhti kala ka raaz baap ne hi samjhaaya hai। tumhaare mein bhi nambarvaar jaante hain aur phir purooshaartha karte hain, jo baap ko yaad karte hain woh jaldi oopar jaate hain। yeh pravritti maarga hai। jaise jodi ko daudaate hain to jodi ka ek-ek paanv baandhate hain phir daudte hain। yeh bhi tumhaari daudi hai na। koi ki practice nahin hoti hai to gir padte hain, ismen bhi aise hota hai। ek aage badhta hai, to doosra rok leta hai, kahaan donon gir padte hain। baba wonder khaate hain - boodhon ko bhi kaam ki aag lagti hai to woh bhi gir padte hain। aise thode hi usne giraaya। girna, na girna apne haath mein hai। koi dhakka thode hi dete hain, ham giren kyon? kuchh bhi ho jaae ham girenge nahin। gire to khaana kharaab, jor se chamaat lagti hai। phir pachhtaate bhi hain, haddi-haddi toot jaati hai। bahut chot lagti hai। baba bhinna-bhinna prakaar se samjhaate rehte hain।

yeh bhi samjhaaya shiv jayanti par taaren aisi aani chaahiye jo manushya padhne se samajh jaaen। vichaar saagar manthan karne ke liye baba time dete hain। koi dekhen to wonder khaaye। kitni chitthiyaan aati hain, sab likhte hain baap-daada। tum samjha bhi sakte ho shivbaaba ko baap, brahma ko daada kehte hain। ek ko kabhi koi baapdaada kehte hain kya? yeh to wonderful baat hai, ismen sachcha-sachcha gyaan hai। parantu yaad mein rahen tab kisko teer bhi lage। ghadi-ghadi deh-abhimaan mein aa jaate hain। baap kehte hain aatma-abhimaani bano। aatma hi shareer dhaaran kar part bajaati hai। koi marta hai to bhi koi khyaal nahin। aatma mein jo part ki noondh hai usko ham saakshi ho dekhte hain। unko ek shareer chhod doosra le part bajaana hai। ismen ham kar hi kya sakte hain? yeh gyaan bhi tumhaari buddhi mein hai। woh bhi nambarvaar। kaeeyon ki buddhi mein to thaharta hi nahin isliye kisko samjha nahin sakte। aatma bilkul hi garam tava, tamopradhaan patit hai। un par gyaan amrit daala jaata hai to thaharta nahin। jisne bahut bhakti ki hai, unko hi teer lagega, jhat dhaarna hogi। hisaab hi wonderful hai - pahle number mein paavan, vahi phir patit bante hain। yeh bhi kitni samajhne ki baaten hoti hain। koi ki takdeer mein nahin hai to padhaai ko chhod dete hain। agar chhotepan se hi knowledge mein lag jaaen to dhaarna hoti jaayegi। samjhenge isne bahut bhakti ki hui hai, bahut hoshiyaar ho jaae, kyonki organs bade hone se phir samajh bhi jaasti aati hai। jismaani, roohaani donon taraph attention dene se phir woh asar nikal jaata hai। yeh hai eeshvareey padhaai। farka hai na। parantu jab woh lagan bhi lage na। achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) roohaani military ban 5 vikaaron par jeet paani hai, pavitra zaroor banna hai। shreemat par bhaarat ko paavan banaane ki seva karni hai।

2) is behad naatak mein har part aatma-abhimaani hokar bajaana hai, kabhi bhi deh-abhimaan mein nahin aana hai। saakshi hokar har ek actor ka part dekhna hai।

vardaan:- svamaan dvaara abhimaan ko samaapta karne vaale sada nirmaan bhav

jo bachche svamaan mein rehte hain unhein kabhi bhi abhimaan nahin aa sakta, ve sada nirmaap hote hain। jitna bada svamaan utna hi haan ji mein nirmaan। chhote bade, gyaani-agyaani, maayaajeet ya maaya-vash, gunvaan ho ya koi ek do avgunvaan bhi ho arthaat gunvaan banne ka purooshaarthi ho lekin svamaan vaale sabhi ko maan dene vaale daata hote hain arthaat svayan sampanna hone ke kaaran sada merciful hote hain।

slogan:- sneh hi sahaj yaad ka saadhan hai isliye sada snehi rehna aur snehi banaana।