शनिवार 3 अक्टूबर 2020 की दैनिक मुरली

03-10-2020 praatahmurli om shanti "baapdaada"' madhuban

“meethe bachche - aatma roopi battery 84 motor mein jaane ke kaaran dull ho gai hai, ab use yaad ki yaatra se bharpoor karo''

prashn:- baba kin bachchon ko bahut-bahut bhaagyashaali samajhte hain?

uttar:- jinke paas koi jhanjhat nahin hai, jo nirbandhan hain, aise bachchon ko baba kehte tum bahut-bahut bhaagyashaali ho, tum yaad mein rahkar apni battery full charge kar sakte ho। agar yog nahin sirf gyaan sunaate to teer lag nahin sakta। bhal koi kitna bhi bhabhke se apna anubhav sunaaye lekin khud mein dhaarna nahin to dil khaata rahega।

om shanti। meethe-meethe roohaani bachchon prati roohaani baap samjhaate hain। roohaani baap ka naam kya hai? shivbaaba। woh hai hi bhagwan, behad ka baap। manushya ko kabhi behad ka baap athva eeshvar va bhagwan nahin kaha ja sakta। naam bhal bahuton ke shiv hain parantu woh sab dehdhaari hain isliye unko bhagwan nahin kaha ja sakta। yeh baap baith bachchon ko samjhaate hain। mainne jismen pravesh kiya hai, unka yeh bahut janmon ke ant ka janma hai। tum bachchon se kai poochhte hain - tum inko bhagwan kyon kehte ho? baap pahle se hi samjhaate hain - koi bhi sthool va sookshm dehdhaari ko bhagwan nahin kah sakte। sookshm dehdhaari sookshmavtanvaasi hi thahre। unhon ko devta kaha jaata hai। oonch te oonch hai hi bhagwan, parampita। oonch te oonch naam hai, oonch unka gaanv। baap sabhi aatmaon sahit vahaan nivaas karte hain। baithak bhi oonch hai। vaastav mein koi baithne ki jagah nahin hai। jaise star kahaan baithe hain kya? khade hain na। tum aatmaayen bhi apni taakat se vahaan khadi ho। taakat aisi milti hai jo vahaan jaakar khade hote hain। baap ka naam hi hai sarvashaktimaan, unse shakti milti hai। aatma usko yaad karti hai, battery charge ho jaati hai। jaise motor mein battery hoti hai, uske zor se hi motor chalti hai। battery mein current bhari hui hoti hai phir chalte-chalte woh khaali ho jaati hai phir battery men power se charge kar motor mein daalte hain। woh hoti hain had ki baaten। yeh hai behad ki baat। tumhaari battery to 5 hazaar varsha chalti hai। chalte-chalte phir dheeli ho jaati hai। maaloom padta hai - ekdam khatma nahin hoti hai, kuchh na kuchh rehti hai। jaise torch mein dim ho jaati hai na। aatma to hai hi is shareer ki battery। yeh bhi dull ho jaati hai। battery is shareer se nikalti bhi hai phir doosri, teesri motor mein jaakar padti hai। 84 motor mein unko daala jaata hai to ab baap kehte hain tum kitne dullhead pattharbuddhi ban gaye ho। ab phir apni battery ko bharo। sivaae baap ki yaad ke aatma kabhi pavitra ho nahin sakti। ek hi sarvashaktimaan baap hai, jinse yog lagaana hai। baap khud apna parichay dete hain ki main kya hoon, kaisa hoon। kaise tumhaari aatma ki battery dull ho jaati hai। ab tumko raay deta hoon mere ko yaad karo to battery satopradhaan first class ho jaayegi। pavitra banne se aatma 24 carat ban jaati hai। abhi tum mulamme ke ban gaye ho। taakat bilkul khatma ho gai hai। woh shobha nahin rahi hai। ab baap tum bachchon ko samjhaate hain bachche mukhya baat hai yog mein rehna, pavitra banna। nahin to battery bharegi nahin। yog lagega nahin। bhal kukkad gyaani to bahut hain। gyaan bhal dete hain parantu woh avastha nahin hai। yahaan bade bhabhke se anubhav sunaate hain। andar khaata rehta hai। main jo varnan karta hoon aisi avastha to hai nahin। kai phir yogi tu aatma bachche bhi hain। baap to bachchon ki bahut mahima karte hain। baap kehte hain - bachche, tum bahut-bahut bhaagyashaali ho। tumko to itne jhanjhat nahin। jisko bachche jaasti hote hain unko bandhan bhi hota hai। baba ko kitne dher bachche hain। sabki sambhaal dekh-rekh karni padti hai। baba ko bhi yaad karna hai। maashook ki yaad to bilkul pakki honi chaahiye। bhakti maarga mein to tum baap ko kitna yaad karte aaye ho - he bhagwan, pooja bhi pahle-pahle unki karte ho। pahle niraakaar bhagwan ki hi karte hain। aise nahin ki us samay tum aatma-abhimaani bante ho। aatma-abhimaani phir pooja thode hi karenge।

baap samjhaate hain pahle-pahle bhakti shuru hoti hai to pahle ek baap ki pooja karte hain। ek hi shiv ki pooja karte hain। yatha raaja-raani tatha praja। oonch te oonch hai hi bhagwan, unko hi yaad karna hai। doosre jo bhi sab neeche hain - brahma-vishnu-shankar ko bhi yaad karne ki darkaar nahin hai। oonch te oonch baap ko hi yaad karna hai। parantu drama ka part aisa hai jo tum neeche utarne ke liye baandhe hue ho। baap samjhaate hain tum kaise neeche utarte ho। har baat aadi se ant tak oopar se neeche tak baap samjhaate hain। bhakti bhi pahle satopradhaan phir sato-rajo-tamo hoti hai। abhi tum phir satopradhaan ban rahe ho, ismen hi mehnat hai। pavitra banna hai। apne ko dekhna hai, maaya kahaan dhokha to nahin deti hai? meri criminal aai to nahin banti hai? koi paap ka khyaal to nahin aata hai? gaayan hai prajaapita brahma to unki santaan brahman-braahmaniyaan behen-bhaai thahre na। yahaan ke brahman log bhi apne ko brahma ki aulaad kahlaate hain। tum bhi brahman bhaai-behen hue na। phir vikaari drishti kyon rakhte ho। braahmanon ko tum achhi reeti drishti de sakte ho। abhi tum bachche hi jaante ho brahma ki santaan brahman-braahmani bankar phir devta bante hain। kehte bhi hain baap aakar brahman devi-devta dharma ki sthaapna karte hain। yeh samajh ki baat hai na। ham brahma ki santaan bhaai-behen ho gaye to kudrishti kabhi nahin jaani chaahiye। unko rokna hai। yeh bhi hamaari meethi behen hai। woh lav rehna chaahiye। jaise blood connection mein lav rehta hai, woh badalkar roohaani ban jaae। ismen bahut-bahut mehnat hai। hai bhi sahaj yaad। apne ko aatma samajh baap ko yaad karna hai। vikaar ki drishti nahin rakh sakte। baba ne samjhaaya hai - yeh aankhen bahut dhokha dene vaali hain, unko badalna hai। ham aatma hain। abhi to ham shivbaaba ke bachche hain। adopt kiye hue bhaai-behen hain। ham apne ko bi.ke. kahlaate hain। chalan mein farka to rehta hai na। teachers ka kaam hai class mein sabse poochhna - tum samajhte ho hamaari bhaai-behen ki drishti rehti hai ya kuchh chanchalta chalti hai? sachche baap ke aage sach na bataaya, jhooth bola to bahut danda pad jaayega। court mein kasam uthaate hain na। sachche eeshvar baap ke aage sach kahenge। sachche baap ka bachcha bhi sachcha hoga। baap truth hai na। woh satya hi batlaate hain। baaki sab hain gapode। shri shri 108 apne ko kahlaate hain, vaastav mein yeh to maala hai na, jo simarte hain। yeh bhi jaante nahin ki ham kyon simarte hain। bauddhiyon ki bhi maala, Christian ki bhi maala hoti hai। har ek apne dhang se maala pherte hain। tum bachchon ko ab gyaan mila hua hai। bolo, 108 ki jo maala hai usmein oopar mein phool to hai niraakaar। unko hi sab yaad karte hain। unki yaad se hi ham svarga ki patraani arthaat mahaaraani bante hain। nar se naaraayan, naari se lakshmi banna - yeh hai sooryavanshi makhmal ki patraani banna phir khaadi ki ho jaati hai। to aisi-aisi points buddhi mein rakh phir samjhaana chaahiye। phir tumhaara naam bahut baala ho jaayega। baat karne mein sherni bano। tum shiv shakti sena ho na। anek prakaar ki senaayen hain na। vahaan bhi tum jaakar dekho kya sikhlaate hain। laakhon manushya jaate hain। baba ne samjhaaya hai - criminal aai bahut dhokha dene vaali hai। apni avastha ka varnan karna chaahiye। anubhav sunaana chaahiye - ham ghar mein kaise rehte hain? avastha par kya asar padta hai? diary rakho - kitna samay is avastha mein rehta hoon? baap samjhaate hain roostam se maaya bhi roostam hokar ladti hai। yuddha ka maidaan hai na। maaya badi balvaan hai। maaya arthaat 5 vikaar। dhan ko sampatti kaha jaata hai, jiske paas jaasti sampatti hoti hai, ajaamil bhi jaasti woh bante hain।

baap kehte hain - pahle-pahle tum veshyaaon ko to bachaao। to woh phir apni esosieshan banaayengi। hamko to baap se varsa lena hai। baap kehte hain main tumko shivaalay ka maalik banaane aaya hoon। yeh antim janma hai। veshyaaon ko samjhaana chaahiye - tumhaare naam ke kaaran bhaarat ki itni aabru (ijjat) gai hai। ab baap aaye hain shivaalay mein le chalne। ham shreemat par aaye hain tumhaare paas। abhi tum vishwa ki maalik ban jaao। bhaarat ka naam baala karo, hamaare muaaphik। ham bhi baap ko yaad karne se pavitra ban rahe hain। tum bhi yeh ek janma chhi-chhi kaam chhod do। raham to karna hai na। phir tumhaara naam baala bahut ho jaayega। kahenge inmen to aisi taakat hai jo aisa ganda dhandha inse chhuda diya। sabki esosieshan hai। tum apni esosieshan banaakar government se jo madad chaahe le sakti ho। to ab aise chhi-chhi jinhonne bhaarat ka naam badnaam kiya hai, unhon ki seva karo। tumhaari bhi union bahut pakki chaahiye। jo 10-12 aapas mein milkar jaae samjhaayen। maataayen bhi achhi hon। koi naya yugal ho, bole ham pavitra rehte hain। pavitra rahne se hi vishwa ke maalik bante hain। to kyon nahin pavitra banenge। saara jhunda ka jhunda jaaye। badi namrata se jaakar kehna hai, ham aapko parampita paramatma ka paigaam dene aaye hain। ab vinaash saamne khada hai। baap kehte hain main sabka uddhaar karne aaya hoon। tum bhi yeh ek janma vikaar mein mat jaao। tum samjha sakte ho ham brahmaakumaar-kumaariyaan apne hi tan-man-dhan se service karte hain। ham bheekh to maangate nahin। eeshvar ke bachche hain। aise-aise plan banaao। aise nahin ki tum madad nahin kar sakte ho। aisa kaam karo jismen vaah-vaah ho। hazaaron madad dene vaale nikal aayenge। yeh apna sangathan banaao। mukhya-mukhya ko chuno, seminar karo। bachchon ko sambhaalne vaale to bahut nikal sakte hain। tum eeshvareey service mein lag jaao। aisi phraakdil honi chaahiye jo jhat service par nikal pade। ek taraph yeh service aur doosri baat geeta ki, in baaton ko milkar uthaao। tum padhte hi ho yeh lakshmi-naaraayan banne ke liye। to yahaan tum bachchon ka aapas mein matbhed nahin rehna chaahiye। agar koi baat baap se chhipaate ho, sach nahin bataate ho to bhi apna hi nuksaan karte ho aur hi sauguna paap chadh jaata hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) ham meethe baap ke bachche hain, aapas mein meethe behen-bhaai hokar rehna hai। kabhi bhi vikaar ki drishti nahin rakhni hai। drishti mein koi bhi chanchalta ho to roohaani surgeon ko sach bataana hai।

2) kabhi bhi aapas mein matbhed mein nahin aana hai। phraakdil ban service karni hai। apne tan-man dhan se, bahut-bahut namrata se seva kar sabko baap ka parichay (paigaam) dena hai।

vardaan:- apne shreshtha jeevan dvaara parmaatma gyaan ka pratyaksha proof dene vaale maaya proof bhav

svayan ko parmaatma gyaan ka pratyaksha pramaan va proof samajhne se maaya proof ban jaayenge। pratyaksha proof hai - aapki shreshtha pavitra jeevan। sabse badi asambhav se sambhav hone vaali baat pravritti mein rehte par-vritti mein rehna। deh aur deh ki duniya ke sambandhon se par (nyaara) rehna। puraane shareer ki aankhon se puraani duniya ki vastuon ko dekhte hue na dekhna arthaat sampoorn pavitra jeevan mein chalna - yahi paramatma ko pratyaksha karne va maaya proof banne ka sahaj saadhan hai।

slogan:- attention roopi pahredaar theek hain to ateendriy sukh ka khajaana kho nahin sakta।