रविवार 17 जनवरी 2021 की दैनिक मुरली

17-01-21 praatahmurli om shanti ''avyakt-baapdaada'' revise 14-10-87 madhuban

brahman jeevan - baap se sarva sambandh anubhav karne ki jeevan

aaj baapdaada apne anek baar milan manaane vaale, anek kalpon se milne vaale bachchon se phir milan manaane aaye hain। yeh alaukik, avyakti milan bhavishya svarna yug mein bhi nahin ho sakta। sirf is samay is vishesh yug ko vardaan hai - baap aur bachchon ke milne ka isliye is yug ka naam hi hai sangamayug arthaat milan manaane ka yug। aise yug mein aisa shreshtha milan manaane ke vishesh paartadhaari aap aatmaayen ho। baapdaada bhi aise koton mein koi shreshtha bhaagyavaan aatmaon ko dekh harshit hote hain aur smriti dilaate hain। aadi se ant tak kitni smritiyaan dilaai hain? yaad karo to lambi list nikal aayegi। itni smritiyaan dilaai hain jo aap sabhi smriti-swaroop ban gaye ho। bhakti mein aap smriti-swaroop aatmaon ke yaadgaar roop mein bhakta bhi har samay simran karte rehte hain। aap smritisvaroop aatmaon ke har karma ki visheshta ka simran karte rehte hain। bhakti ki visheshta hi simran arthaat keertan karna hai। simran karte-karte masti mein kitna magna ho jaate hain। alpakaal ke liye unhon ko bhi aur koi sudh-budh nahin rehti। simran karte-karte usmein kho jaate hain arthaat lavleen ho jaate hain। yeh alpakaal ka anubhav un aatmaon ke liye kitna pyaara aur nyaara hota hai! yeh kyon hota? kyonki jin aatmaon ka simran karte hain, yeh aatmaayen svayan bhi baap ke sneh mein sada lavleen rahi hain, baap ki sarva praaptiyon mein sada khoi hui rahi hain isliye, aisi aatmaon ka simran karne se bhi un bhakton ko alpakaal ke liye aap vardaani aatmaon dvaara anchali roop mein anubhooti praapta ho jaati hai। to socho, jab simran karne vaali bhakta aatmaon ko bhi itna alaukik anubhav hota hai to aap smriti-swaroop, vardaata, vidhaata aatmaon ko kitna practical jeevan mein anubhav praapta hota hai! isi anubhootiyon mein sada aage badhte chalo।

har kadam mein bhinna-bhinna smriti-swaroop ka anubhav karte chalo। jaisa samay, jaisa karma vaise swaroop ki smriti emerge (pratyaksha) roop mein anubhav karo। jaise, amritvele din ka aarambha hote baap se milan manaate - master vardaata ban vardaata se vardaan lene vaali shreshtha aatma hoon, direct bhaagyavidhaata dvaara bhaagya praapta karne vaali padmaapadma bhaagyavaan aatma hoon - is shreshtha swaroop ko smriti mein laao। vardaani samay hai, vardaata vidhaata saath mein hai। master vardaani ban svayan bhi sampanna ban rahe ho aur anya aatmaon ko bhi vardaan dilaane vaale vardaani aatma ho - is smriti-swaroop ko emerge karo। aise nahin ki yeh to hoon hi। lekin bhinna-bhinna smriti-swaroop ko samay pramaan anubhav karo to bahut vichitra khushi, vichitra praaptiyon ka bhandaar ban jaayenge aur sadaiv dil se praapti ke geet svatah hi anhad shabd ke roop mein nikalta rahega - “paana tha so pa liya…''। isi prakaar bhinna-bhinna samay aur karma pramaan smriti-swaroop ka anubhav karte jaao। murli sunte ho to yeh smriti rahe ki godly student life (eeshvareey vidyaarthi jeevan) arthaat bhagwan ka vidyaarthi hoon, svayan bhagwan mere liye paramdham se padhaane liye aaye hain। yahi vishesh praapti hai jo svayan bhagwan aata hai। isi smriti-swaroop se jab murli sunte hain to kitna nasha hota! agar saadhran reeti se niyam pramaan sunaane vaala suna raha hai aur sunne vaala sun raha hai to itna nasha anubhav nahin hoga। lekin bhagwan ke ham vidyaarthi hain - is smriti ko swaroop mein laakar phir suno, tab alaukik nashe ka anubhav hoga। samjha?

bhinna-bhinna samay ke bhinna-bhinna smriti-swaroop ke anubhav mein kitna nasha hoga! aise saare din ke har karma mein baap ke saath smriti-swaroop bante chalo - kabhi bhagwan ka sakha va saathi roop ka, kabhi jeevan-saathi roop ka, kabhi bhagwan mera murabbi bachcha hai arthaat pahla-pahla hakdaar, pahla vaaris hai। koi aisa bahut sundar aur bahut laayak bachcha hota hai to maa-baap ko kitna nasha rehta hai ki mera bachcha kul deepak hai va kul ka naam baala karne vaala hai! jiska bhagwan bachcha ban jaae, uska naam kitna baala hoga! uske kitne kul ka kalyaan hoga! to jab kabhi duniya ke vaataavran se ya bhinna-bhinna samasyaaon se thoda bhi apne ko akela ya udaas anubhav karo to aise sundar bachche roop se khelo, sakha roop mein khelo। kabhi thak jaate ho to maa ke roop mein godi mein so jaao, sama jaao। kabhi dilshikasta ho jaate ho to sarvashaktivaan swaroop se master sarvashaktivaan ke smriti-swaroop ka anubhav karo to dilshikasta se dilkhush ho jaayenge। bhinna-bhinna samay par bhinna-bhinna sambandh se, bhinna-bhinna apne swaroop ke smriti ko emerge roop mein anubhav karo to baap ka sada saath svatah hi anubhav karenge aur yeh sangamayug ki brahman jeevan sada hi amoolya anubhav hoti rahegi।

aur baat - ki itne sarva sambandh nibhaane mein itne busy rahenge jo maaya ko aane ki bhi phursat nahin milegi। jaise laukik badi pravritti vaale sadaiv yahi kehte ki pravritti ko sambhaalne mein itne busy rehte hain jo aur koi baat yaad hi nahin rehti hai kyonki bahut badi pravritti hai। to aap brahman aatmaon ki prabhu se preet nibhaane ki prabhu-pravritti kitni badi hai! aapki prabhu-preet ki pravritti sote hue bhi chalti hai! agar yognindra mein ho to aapki nindra nahin lekin yognindra hai। neend mein bhi prabhu-milan mana sakte ho। yog ka arth hi hai milan। yognindra arthaat ashareeri-pan ke sthiti ki anubhooti। to yeh bhi prabhu-preet hai na। to aap jaisi bade te badi pravritti kiski bhi nahin hai! ek second bhi aapko phursat nahin hai kyonki bhakti mein bhakta ke roop mein bhi geet gaate rehte the ki bahut dinon ke baad prabhu aap mile ho, to gin-gin ke hisaab poora lenge। to ek-ek second ka hisaab lene vaale ho। saare kalpa ke milne ka hisaab is chhote se ek janma mein poora karte ho। paanch hajaar varsha ke hisaab se yeh chhota-sa janma kuchh dinon ke hisaab mein hua na। to thode se dinon mein itna lambe samay ka hisaab poora karna hai, isliye kehte hain shvaanso-shvaans simro। bhakta simran karte hain, aap smriti-swaroop bante ho। to aapko second bhi phursat hai? kitni badi pravritti hai! isi pravritti ke aage woh chhoti-si pravritti aakarshit nahin karegi aur sahaj, svatah hi deh sahit deh ke sambandh aur deh ke padaartha va praaptiyon se nashtomoha, smriti-swaroop ho jaayenge। yahi last paper maala ke nambarvaar manke banaayega।

jab amritvele se yognindra tak bhinna-bhinna smriti-swaroop ke anubhvi ho jaayenge to bahutkaal ke smriti-swaroop ka anubhav ant mein smriti-swaroop ke question mein paas with honour (jhass wgatpa pdahdalr) bana dega। bahut ramneek jeevan ka anubhav karenge kyonki jeevan mein har ek manushya aatma ki pasandi ‘variety ho'- yahi chaahte hain। to yeh saare din mein bhinna-bhinna sambandh, bhinna-bhinna swaroop ki variety anubhav karo। jaise duniya mein bhi kehte hain na - baap to chaahiye hi lekin baap ke saath agar jeevan-saathi ka anubhav na ho to bhi jeevan adhoori samajhte hain, bachcha na ho to bhi adhoori jeevan samajhte hain। har sambandh ko hi sampanna jeevan samajhte hain। to yeh brahman jeevan bhagwan se sarva sambandh anubhav karne vaali sampanna jeevan hai! ek bhi sambandh ki kami nahin karna। ek sambandh bhi bhagwan se kam hoga, to koi na koi aatma us sambandh se apne taraph kheench legi। jaise kai bachche kabhi-kabhi kehte hain baap ke roop mein to hai hi lekin sakha va sakhi athva mitra ka to chhota-sa roop hai na, uske liye to aatmaayen chaahiye kyonki baap to bada hai na। lekin paramatma ke sambandh ke beech koi bhi chhota ya halka aatma ka sambandh mix ho jaata to ‘sarva' shabd samaapta ho jaata hai aur yathaashakti ki line mein aa jaate hain। braahmanon ki bhaasha mein har baat mein ‘sarva' shabd aata hai। jahaan ‘sarva' hai, vahaan hi sampannata hai। agar do kala bhi kam ho gai to doosri maala ke manke ban jaate isliye, sarva sambandhon ke sarva smriti-swaroop bano। samjha? jab bhagwan khud sarva sambandh ka anubhav karaane ki offer kar raha hai to aaphreen lena chaahiye na। aisi golden offer sivaae bhagwan ke aur is samay ke, na kabhi aur na koi kar sakta। koi baap bhi bane aur bachcha bhi bane - yeh ho sakta hai? yeh ek ki hi mahima hai, ek ki hi mahaanta hai isliye sarva sambandh se smriti-swaroop banna hai। ismen maza hai na? brahman jeevan kislie hai? maze mein va mauj mein rahne ke liye। to yeh alaukik mauj manaao। maze ki jeevan anubhav karo। achha।

aaj dehli darbaar vaale hain। raajya darbaar vaale ho ya darbaar mein sirf dekhne vaale ho? darbaar mein raajya karne vaale aur dekhne vaale - donon hi baithte hain। aap sab kaun ho? dehli ki do visheshtaayen hain। ek - dehli dilaaraam ki dil hai, doosra - gaddi ka sthaan hai। dil hai to dil mein kaun rahega? dilaaraam। to dehli nivaasi arthaat dil mein sada dilaaraam ko rakhne vaale। aise anubhvi aatmaayen aur abhi se svaraajya adhikaari so bhavishya mein vishwa-raajya adhikaari। dil mein jab dilaaraam hai to raajya adhikaari abhi hain aur sada rahenge। to sada apni jeevan mein dekho ki yeh donon visheshtaayen hain? dil mein dilaaraam aur phir adhikaari bhi। aise golden chance, golden se bhi diamond chance lene vaale kitne bhaagyavaan ho! achha।

abhi to behad seva ka bahut achha saadhan mila hai - chaahe desh mein, chaahe videsh mein। jaise naam hai, vaise hi sundar kaarya hai! naam sun karke hi sabhi ko umang aa raha hai - “sarva ke sneh, sahayog se sukhmay sansaar''! yeh to lamba kaarya hai, ek varsha se bhi adhik hai। to jaise kaarya ka naam sunte hi sabhi ko umang aata hai, aise hi kaarya bhi umang se karenge। jaise sundar naam sunkar khush ho rahe hain, vaise kaarya hote sada khush ho jaayenge। yeh bhi sunaaya na pratyakshata ka parda hilne ka athva parda khulne ka aadhaar bana hai aur banta rahega। sarva ke sahayogi - jaise kaarya ka naam hai, vaise hi swaroop ban sahaj kaarya karte rahenge to mehnat nimitta maatra aur saphalta padamguna anubhav karte rahenge। aise anubhav karenge jaise ki karaavanhaar nimitta banaae kara raha hai। main kar raha hoon - nahin। isse sahayogi nahin banenge। karaavanhaar kara raha hai। chalaane vaala kaarya ko chala raha hai। jaise aap sabhi ko jagdamba ka slogan yaad hai - hukmi hukm chala raha hai। yahi slogan sada smriti-swaroop mein laate saphalta ko praapta hote rahenge। baaki chaaron or umang-utsaah achha hai। jahaan umang-utsaah hai vahaan saphalta svayan sameep aakar gale ki maala ban jaati hai। yeh vishaal kaarya anek aatmaon ko sahayogi banaae sameep laayega kyonki pratyakshata ka parda khulne ke baad is vishaal stage par har varga vaala paartadhaari stage par pratyaksha hona chaahiye। har varga ka arth hi hai - vishwa ki sarva aatmaon ke variety vriksha ka sangathan roop। koi bhi varga rah na jaae jo ulhana de ki humein to sandesh nahin mila isliye, neta se lekar jhuggi-jhopdi tak varga hai। padhe hue sabse top saainsadaan aur phir jo anpadh hain, unhon ko bhi yeh gyaan ki knowledge dena, yeh bhi seva hai। to sabhi varga arthaat vishwa ki har aatma ko sandesh pahunchaana hai। kitna bada kaarya hai! yeh koi kah nahin sakta ki hamko to seva ka chance nahin milta। chaahe koi beemaar hai; to beemaar, beemaar ki seva karo; anpadh, anapdhon ki seva karo। jo bhi kar sakte, woh chance hai। achha, bol nahin sakte to mansa vaayumandal se sukh ki vritti, sukhmay sthiti se sukhmay sansaar banaao। koi bhi bahaana nahin de sakta ki main nahin kar sakta, samay nahin hai। uthte-baithte 10-10 minute seva karo। anguli to denge na? kahaan nahin ja sakte ho, tabiyat theek nahin hai to ghar baithe karo lekin sahayogi banna zaroor hai, tab sarva ka sahayog milega। achha।

umang-utsaah dekh baapdaada bhi khush hote hain। sabhi ke man mein lagna hai ki ab pratyakshata ka parda khol ke dikhaayen। aarambha to hua hai na। to phir sahaj hota jaayega। videsh vaale bachchon ke plans bhi baapdaada tak pahunchte rehte hain। svayan bhi umang mein hain aur sarva ka sahayog bhi umang-utsaah se milta rehta hai। umang ko umang, utsaah ko utsaah milta hai। yeh bhi milan ho raha hai। to khoob dhoomdhaam se is kaarya ko aage badhaao। jo bhi umang-utsaah se banaaya hai aur bhi baap ke, sarva braahmanon ke sahayog se, shubh kaamnaaon - shubh bhaavnaaon se aur bhi aage badhta rahega। achha।

chaaron or ke sada yaad aur seva ke umang-utsaah vaale shreshtha bachchon ko, sada har karma mein smriti-swaroop ki anubhooti karne vaale anubhvi aatmaon ko, sada har karma mein baap ke sarva sambandh ka anubhav karne vaale shreshtha aatmaon ko, sada brahman jeevan ke maje ki jeevan bitaane vaale mahaan aatmaon ko baapdaada ka ati sneh-sampanna yaadapyaar sveekaar ho।

vardaan:- sangamayug par ek ka sauguna pratyakshaphal praapta karne vaale padmaapdam bhaagyashaali bhav

sangamayug hi ek ka sauguna pratyakshaphal dene vaala hai, sirf ek baar sankalp kiya ki main baap ka hoon, main master sarvashaktimaan hoon to maayaajeet banne ka, vijayi banne ke nashe ka anubhav hota hai। shreshtha sankalp karna - yahi hai beej aur uska sabse bada phal hai jo svayan paramatma baap bhi saakaar manushya roop mein milne aata, is phal mein sab phal aa jaate hain।

slogan:- sachche brahman woh hain jinki soorat aur seerat se purity ki personality va royalty ka anubhav ho।

soochna:- aaj maas ka teesra ravivaar antarraashtreey yog divas hai, saayan 6.30 se 7.30 baje tak sabhi bhaai bahinen vishesh yog tapasya karte hue, apne shubh bhaavna sampanna sankalpon dvaara prakriti sahit vishwa ki sarva aatmaon ko shanti aur shakti ke vibration dene ki seva karen।