रविवार 25 अप्रैल 2021 की दैनिक मुरली

25-04-21 praatahmurli om shanti ''avyakt-baapdaada'' revise 18-12-87 madhuban

karmaateet sthiti ki guhya paribhaasha

aaj videhi baapdaada apne videhi sthiti mein sthit rahne vaale shreshtha bachchon ko dekh rahe hain। har ek brahman aatma videhi banne ke va karmaateet banne ke shreshtha lakshya ko le sampoorn stage ke sameep aa rahi hai। to aaj baapdaada bachchon ki karmaateet videhi sthiti ki sameepta ko dekh rahe the ki kaun-kaun kitne sameep pahunche hain, ‘follow brahma baap' kahaan tak kiya hai va kar rahe hain? lakshya sabhi ka baap ke sameep aur samaan banne ka hi hai। lekin practical mein nambarvaar ban jaate hain। is deh mein rehte videhi arthaat karmaateet banne ka example (misaal) saakaar mein brahma baap ko dekha। to karmaateet banne ki visheshta kya hai? jab tak yeh deh hai, karmendriyon ke saath is karmakshetra par part baja rahe ho, tab tak karma ke bina second bhi rah nahin sakte ho। karmaateet arthaat karma karte hue karma ke bandhan se pare। ek hai bandhan aur doosra hai sambandh। karmendriyon dvaara karma ke sambandh mein aana alag cheez hai, karma ke bandhan mein bandhana woh alag cheez hai। karmabandhan, karma ke had ke phal ke vasheebhoot bana deta hai। vasheebhoot shabd hi siddha karta hai jo kisi ke bhi vash mein aa jaata। vash mein aane vaale bhoot ke samaan bhatakne vaale ban jaate hain। jaise ashuddha aatma bhoot ban jab pravesh hoti hai to manushya aatma ki kya haalat hoti hai? parvash ho bhatakte rehte hain। aise karma ke vasheebhoot arthaat karma ke vinaashi phal ki ichchha ke vasheebhoot hain to karma bhi bandhan mein baandh buddhi dvaara bhatkaata rehta hai। isko kaha jaata hai karmabandhan, jo svayan ko bhi pareshaan karta hai aur doosron ko bhi pareshaan karta hai। karmaateet arthaat karma ke vash hone vaala nahin lekin maalik ban, authority ban karmendriyon ke sambandh mein aaye, vinaashi kaamna se nyaara ho karmendriyon dvaara karma karaaye। aatma maalik ko karma apne adheen na kare lekin adhikaari ban karma karaata rahe। karmendriyaan apne aakarshan mein aakarshit karti hain arthaat karma ke vasheebhoot bante hain, adheen hote hain, bandhan mein bandhate hain। karmaateet arthaat isse ateet arthaat nyaara। aankh ka kaam hai dekhna lekin dekhne ka karma karaane vaala kaun hai? aankh karma karne vaali hai aur aatma karma karaane vaali hai। to karaane vaali aatma, karne vaali karmendriy ke vash ho jaae - isko kehte hain karmabandhan। karaane vaale ban karma karaao - isko kahenge karma ke sambandh mein aana। karmaateet aatma sambandh mein aati hai lekin bandhan mein nahin rehti। kabhi-kabhi kehte ho na ki bolne nahin chaahte the lekin bol liya, karne nahin chaahte the lekin kar liya। isko kaha jaata hai karma ke bandhan mein vasheebhoot aatma। aisi aatma karmaateet sthiti ke nazdeek kahenge ya door kahenge?

karmaateet arthaat deh, deh ke sambandh, padaartha, laukik chaahe alaukik donon sambandh se, bandhan se ateet arthaat nyaare। bhal sambandh shabd kahne mein aata hai - deh ka sambandh, deh ke sambandhiyon ka sambandh, lekin deh mein va sambandh mein agar adheen hain to sambandh bhi bandhan ban jaata hai। sambandh shabd nyaara aur pyaara anubhav karaane vaala hai। aaj ki sarva aatmaon ka sambandh, bandhan ke roop mein badal gaya hai। jahaan sambandh, bandhan ka roop ban jaata hai to bandhan sada svayan ko kisi na kisi prakaar se pareshaan karta rahega, duhkh ki lahar anubhav karaayega, udaasi ka anubhav karaayega। vinaashi praaptiyaan hote bhi alpakaal ke liye woh praaptiyon ka sukh anubhav karega। sukh ke saath-saath abhi-abhi praapti-swaroop ka anubhav hoga, abhi-abhi praaptiyaan hote bhi apraapta sthiti ka anubhav hoga। bharpoor hote bhi apne ko khaali-khaali anubhav karega। sab kuchh hote hue bhi ‘kuchh aur chaahiye' - aise anubhav karta rahega aur jahaan ‘chaahiye-chaahiye' hai vahaan kabhi bhi santushtata nahin rahegi। man bhi raazi, tan bhi raazi rahe, doosre bhi raazi rahen - yeh sada ho nahin sakta। koi na koi baat par svayan se naaraaz ya doosron se naaraaz na chaahte bhi hota rahega kyonki naaraaz arthaat na raaz arthaat raaz ko nahin samjha। adhikaari ban karmenndriyon se karma karaane ka raaz nahin samjha। to naaraaz hi hoga na। karmaateet kabhi naaraaz nahin hoga kyonki woh karma-sambandh aur karma-bandhan ke raaz ko jaanta hai। karma karo lekin vasheebhoot hokar nahin, adhikaari maalik hokar karo। karmaateet arthaat apne pichhle karmon ke hisaab-kitaab ke bandhan se bhi mukta। chaahe pichhle karmon ke hisaab-kitaab ke phalasvaroop tan ka rog ho, man ke sanskaar anya aatmaon ke sanskaaron se takkar bhi khaate hon lekin karmaateet, karmabhog ke vash na hokar maalik ban chuktu karaayenge। karmayogi ban karmabhog chuktu karna - yeh hai karmaateet banne ki nishaani। yog se karmabhog ko muskaraate hue sooli se kaanta kar bhasma karna arthaat karmabhog ko samaapta karna hai। vyaadhi ka roop na bane। jo vyaadhi ka roop ban jaata hai woh svayan sada vyaadhi ka hi varnan karta rahega। man mein bhi varnan karega to mukh se bhi varnan karega। doosri baat - vyaadhi ka roop hone kaaran svayan bhi pareshaan hoga aur doosron ko bhi pareshaan karega। woh chillaayega aur karmaateet chala lega। koi ko thoda-sa darda hota hai to bhi chillaate bahut hain aur koi ko jyaada darda hote bhi chalaate hain। karmaateet sthiti vaala deh ke maalik hone ke kaaran karmabhog hote hue bhi nyaara banne ka abhyaasi hai। beech-beech mein ashareeri-sthiti ka anubhav beemaari se pare kar deta hai। jaise science ke saadhan dvaara behosh kar dete hain to darda hote bhi bhool jaate hain, darda feel nahin karte hain kyonki davaai ka nasha hota hai। to karmaateet avastha vaale ashareeri banne ke abhyaasi hone kaaran beech-beech mein yeh roohaani injection lag jaata hai। is kaaran sooli se kaanta anubhav hota hai। aur baat - follow father hone ke kaaran vishesh aagyaakaari banne ka pratyaksha phal baap se vishesh dil ki duaayen praapta hoti hain। ek apna ashareeri banne ka abhyaas, doosra aagyaakaari banne ka pratyakshaphal baap ki duaayen, woh beemaari arthaat karmabhog ko sooli se kaanta bana deti hain। karmaateet shreshtha aatma karmabhog ko, karmayog ki sthiti mein parivartan kar degi। to aisa anubhav hai va bahut badi baat samajhte ho? sahaj hai va mushkil hai? chhoti ko badi baat banaana ya badi ko chhoti baat banaana - yeh apni sthiti ke oopar hai। pareshaan hona va apne adhikaareepan ki shaan mein rehna - apne oopar hai। kya ho gaya va jo hua woh achha hua - yeh apne oopar hai। yeh nishchay bure ko bhi achhe mein badal sakta hai kyonki hisaab-kitaab chuktu hone ke kaaran va samay prati samay practical paper drama anusaar hone ke kaaran koi baaten achhe roop mein saamne aayengi aur kai baar achha roop hote hue bhi baahar ka roop nuksaan vaala hoga va jisko aap kehte ho yeh is roop se achha nahin hua। baaten aayengi, abhi tak bhi aise roop ki baaten aati rahi hain aur aati bhi rahengi। lekin nuksaan ke parde ke andar phaayda chhipa hua hota hai। baahar ka parda nuksaan ka dikhaai deta hai, agar thoda-sa samay dhairyavat avastha, sahansheel sthiti se antarmukhi ho dekho to baahar ke parde ke andar jo chhipa hua hai, aapko vahi dikhaai dega, oopar ka dekhte bhi nahin dekhenge। holeehans ho na? jab woh hans kankad aur ratna ko alag kar sakta hai to holeehans apne chhipe hue phaayde ko le lega, nuksaan ke beech phaayde ko dhoondh lega। samjha? jaldi ghabra jaate hain na। isse kya hota? jo achha socha jaata woh bhi ghabraane ke kaaran badal jaata hai। to ghabraao nahin। karma ko dekh karma ke bandhan mein nahin phanso। kya ho gaya, kaise ho gaya, aisa to hona nahin chaahiye, mere se hi kyon hota, mera hi bhaagya shaayad aisa hai - yeh rassiyaan baandhate jaate ho। yeh sankalp hi rassiyaan hain। isliye karma ke bandhan mein aa jaate ho। vyartha sankalp hi karmabandhan ki sookshm rassiyaan hain। karmaateet aatma kahegi - jo hota hai woh achha hai, main bhi achha, baap bhi achha, drama bhi achha। yeh bandhan ko kaatne ki kainchi ka kaam karti hai। bandhan kat gaye to karmaateet ho gaye na। kalyaankaari baap ke bachche hone ke kaaran sangamayug ka har second kalyaankaari hai। har second ka aapka dhandha hi kalyaan karna hai, seva hi kalyaan karna hai। braahmanon ka occupation hi hai vishwa-parivartak, vishwa-kalyaani। aise nishchaybuddhi aatma ke liye har ghadi nishchit kalyaankaari hai। samjha?

abhi to karmaateet ki paribhaasha bahut hai। jaise karmon ki gati gahan hai, karmaateet sthiti ki paribhaasha bhi badi mahaan hai, aur karmaateet banna zaroori hai। bina karmaateet banne ke saath nahin chalenge। saath kaun jaayenge? jo samaan honge। brahma baap ko dekha - karmaateet sthiti ko kaise praapta kiya? karmaateet banne ka follow karna arthaat saath chalne yogya banna। aaj itna hi sunaate hain, itni checking karna, phir aur sunaayenge। achha!

sarva adhikaari sthiti mein sthit rahne vaale, karmabandhan ko karma ke sambandh mein badalne vaale, karmabhog ko karmayog ki sthiti mein sooli se kaanta banaane vaale, har second kalyaan karne vaale, sada brahma baap samaan karmaateet sthiti ke sameep anubhav karne vaale - aise vishesh aatmaon ko baapdaada ka yaadapyaar aur namaste।

avyakt baapdaada ki party se mulaakaat

1. sada apne ko samartha baap ke samartha bachche anubhav karte ho? kabhi samartha, kabhi kamjor - aise to nahin? samartha arthaat sada vijayi। samartha ki kabhi haar nahin ho sakti। svapna mein bhi haar nahin ho sakti। svapna, sankalp aur karma sabmen sada vijayi - isko kehte hain samartha। aise samartha ho? kyonki jo ab ke vijayi hain, bahutkaal se vahi vijay maala mein gaayan-poojan yogya bante hain। agar bahutkaal ke vijayi nahin, samartha nahin to bahutkaal ke gaayan-poojan yogya nahin bante hain। jo sada aur bahutkaal ke vijayi hain, wahin bahut samay vijay maala mein gaayan-poojan mein aate hain aur jo kabhi-kabhi ke vijayi hain, woh kabhi-kabhi ki arthaat 16 hajaar ki maala mein aayenge। to bahut-kaal ka hisaab hai aur sada ka hisaab hai। 16 hajaar ki maala sabhi mandiron mein nahin hoti, kahaan-kahaan hoti hai।

2. sabhi apne ko is vishaal drama ke andar hero paartadhaari aatmaayen anubhav karte ho? aap sabka hero part hai। hero paartadhaari kyon bane? kyonki jo oonche te ooncha baap zero hai - uske saath part bajaane vaale ho। aap bhi zero arthaat bindi ho। lekin aap shareerdhaari bante ho aur baap sada zero hain। to zero ke saath part bajaane vaale hero actor hain - yeh smriti rahe to sada hi yathaartha part bajaayenge, svatah hi attention jaayega। jaise had ke drama ke andar hero paartadhaari ko kitna attention rehta hai! sabse bade te bada hero part aap sabka hai। sada is nashe aur khushi mein raho - vaah, mera hero part jo saare vishwa ki aatmaayen baar-baar hear-hear karti hain? yeh dvaapar se jo keertan karte hain yeh aapke is samay ke hero part ka hi yaadgaar hai। kitna achha yaadgaar bana hua hai! aap svayan hero bane ho tab aapke peechhe ab tak bhi aapka gaayan chalta rehta hai। antim janma mein bhi apna gaayan sun rahe hain। gopeevallabh ka bhi gaayan hai to gvaal-baal ka bhi gaayan hai, gopikaaon ka bhi gaayan hai। baap ka shiv ke roop mein gaayan hai to bachchon ka shaktiyon ke roop mein gaayan hai। to sada hero part bajaane vaali shreshtha aatmaayen hain - isi smriti mein khushi mein aage badhte chalo।

kumaaron se :- 1. sahajyogi kumaar ho na? nirantar yogi kumaar, karmayogi kumaar kyonki kumaar jitna apne ko aage badhaane chaahen utna badha sakte hain। kyon? nirbandhan hain, bojh nahin hain aur jimmevaari nahin hai isliye halke hain। halke hone ke kaaran jitna ooncha jaana chaahe ja sakte hain। nirantar yogi, sahaj yogi - yeh hai oonchi sthiti, yeh hai ooncha jaana। aise oonch sthiti vaale ko kehte - ‘vijayi kumaar'। vijayi ho ya kabhi haar, kabhi jeet - yeh khel to nahin khelte ho? agar kabhi haar kabhi jeet ke sanskaar honge to ekras sthiti ka anubhav nahin hoga। ek ki lagan mein magan rahne ka anubhav nahin karenge।

2. sada har karma mein kamaal karne vaale kumaar ho na? koi bhi karma saadhaaran nahin ho, kamaal ka ho। jaise baap ki mahima karte ho, baap ki kamaal gaate ho। aise kumaar arthaat har karma mein kamaal dikhaane vaale। kabhi kaise, kabhi kaise vaale nahin। aise nahin - jahaan koi kheenche vahaan khinch jaao। ludhakne vaale lote nahin। kabhi kahaan ludhak jaao, kabhi kahaan। aise nahin। kamaal karne vaale bano। avinaashi, avinaashi banaane vaale hain - aise challenge karne vaale bano। aisi kamaal karke dikhaao jo harek kumaar chalta-phirta pharishta ho, door se hi pharishtepan ki jhalak anubhav ho। vaani se seva ke programme to bahut bana liye, woh to karenge hi lekin aajkal pratyaksha proof chaahte hain। pratyaksha pramaan, sabse shreshtha pramaan hai। pratyaksha pramaan itne ho jaayen to sahaj seva ho jaayegi। pharishtepan ki seva karo to mehnat kam saphalta jyaada hogi। sirf vaani se seva nahin karo lekin man vaani aur karma teenon se saath-saath seva ho - isko kehte hain ‘kamaal'। achha!

vidaai ke samay:- chaaron or ke teevra purushaarthi, sada sevaadhaari, sada double light ban auron ko bhi double light banaane vaale, saphalta ko adhikaar se praapta karne vaale, sada baap samaan aage badhne vaale aur auron ko bhi aage badhaane vaale, aise sada umang-utsaah mein rahne vaale shreshtha aatmaon ko, snehi bachchon ko baapdaada ka bahut-bahut sik va prem se yaadapyaar aur good morning।

vardaan:- kadam-kadam par saavdhaani rakhte hue padmon ki kamaai jama karne vaale padmapti bhav

baap bachchon ko bahut oonchi stage par rahne ki saavdhaani de rahe hain isliye abhi jara bhi gaphlat karne ka samay nahin hai, ab to kadam-kadam par saavdhaani rakhte hue, kadam mein padmon ki kamaai karte padmapti bano। jaise naam hai padmaapdam bhaagyashaali, aise karma bhi hon। ek kadam bhi padam ki kamaai ke bigar na jaae। to bahut soch-samajhkar shreemat pramaan har kadam uthaao। shreemat mein manmat mix nahin karo।

slogan:- man ko order pramaan chalaao to manmanaabhav ki sthiti svatah rahegi।