रविवार 9 मई 2021 की दैनिक मुरली

09-05-21 praatahmurli om shanti ''avyakt-baapdaada'' revise 27-12-87 madhuban

nishchay buddhi vijayi ratnon ki nishaaniyaan

aaj baapdaada apne chaaron or ke nishchaybuddhi vijayi bachchon ko dekh rahe hain। har ek bachche ke nishchay ki nishaaniyaan dekh rahe hain। nishchay ki vishesh nishaaniyaan - (1) jaisa nishchay vaisa karma, vaani mein har samay chehre par roohaani nasha dikhaai dega। (2) har karma, sankalp mein vijay sahaj pratyakshaphal ke roop mein anubhav hogi। mehnat ke roop mein nahin, lekin pratyakshaphal va adhikaar ke roop mein vijay anubhav hogi। (3) apne shreshtha bhaagya, shreshtha jeevan va baap aur parivaar ke sambandh-samparka dvaara ek percent bhi sanshay sankalpamaatra bhi nahin hoga। (4) question mark samaapta, har baat mein bindu ban bindu lagaane vaale honge। (5) nishchaybuddhi har samay apne ko bephikar baadshaah sahaj svatah anubhav karenge arthaat baar-baar smriti laane ki mehnat nahin karni padegi। main baadshaah hoon, yeh kahne ki mehnat nahin karni padegi lekin sada sthiti ke shreshtha aasan va sinhaasan par sthit hain hi। jaise laukik jeevan mein koi bhi paristhiti pramaan sthiti banti hai। chaahe duhkh ki, chaahe sukh ki, us sthiti ki anubhooti mein svatah hi rehte hain, baar-baar mehnat nahin karte - main sukhi hoon va main duhkhi hoon। bephikar baadshaah ki sthiti ka anubhav svatah sahaj hota hai। agyaani jeevan mein paristhitiyon pramaan sthiti banti hai lekin shaktishaali alaukik brahman jeevan mein paristhiti pramaan sthiti nahin banti lekin bephikar baadshaah ki sthiti va shreshtha sthiti baapdaada dvaara praapta hui knowledge ki light-might dvaara, yaad ki shakti dvaara jisko kahenge gyaan aur yog ki shaktiyon ka varsa baap dvaara milta hai। to brahman jeevan mein baap ke varse dvaara va satguru ke vardaan dvaara va bhaagyavidhaata dvaara praapta hue shreshtha bhaagya dvaara sthiti praapta hoti hai। agar paristhiti ke aadhaar par sthiti hai to shaktishaali kaun hua? paristhiti powerful ho jaayegi na। aur paristhiti ke aadhaar par sthiti banaane vaala kabhi bhi achal, adol nahin rah sakta। jaise agyaani jeevan mein abhi-abhi dekho bahut khushi mein naach rahe hain aur abhi-abhi ulte soye hue hain। to alaukik jeevan mein aisi halchal vaali sthiti nahin hoti। paristhiti ke aadhaar par nahin lekin apne varse aur vardaan ke aadhaar par va apni shreshtha sthiti ke aadhaar par paristhiti ko parivartan karne vaala hoga। to nishchay buddhi is kaaran sada bephikar baadshaah hai kyonki phikar hota hai koi apraapti va kami hone ke kaaran। agar sarva praaptisvaroop hai, master sarvashaktivaan hai to phikar kis baat ka raha?

(6) nishchaybuddhi arthaat sada baap par balihaar jaane vaale। balihaar arthaat sarvansha samarpit। sarva vansh sahit samarpit। chaahe deh bhaan mein laane vaale vikaaron ka vansh, chaahe deh ke sambandh ka vansh, chaahe deh ke vinaashi padaarthon ki ichchhaaon ka vansh। sarva vansh mein yeh sab aa jaata hai। sarvansha samarpit va sarvansha tyaagi ek hi baat hai। samarpit hona isko nahin kaha jaata ki madhuban mein baith gaye va sevaakendron par baith gaye। yeh bhi ek seedhi hai jo seva arth apne ko arpan karte hain lekin ‘sarvansha arpit' - yeh seedhi ki manzil hai। ek seedhi chadh gaye lekin manzil par pahunchne vaale nishchay buddhi ki nishaani hai - teenon hi vansh sahit arpit। teenon hi baaten spashta jaan gaye na। vansh tab samaapta hota hai jab svapna va sankalp mein bhi ansh maatra nahin। agar ansh hai to vansh paida ho hi jaayega isliye sarvansha tyaagi ki paribhaasha ati guhya hai। yeh bhi kabhi sunaayenge।

(7) nishchaybuddhi sada bephikar, nishchinta hoga। har baat mein vijay praapta hone ke nashe mein nishchit anubhav karega। to nishchay, nishchinta aur nishchit - yeh har samay anubhav karaayega।

(8) woh sada svayan bhi nashe mein rahenge aur unke nashe ko dekh doosron ko bhi yeh roohaani nasha anubhav hoga। auron ko bhi roohaani nashe mein baap ki madad se svayan ki sthiti se anubhav karaayega।

nishchaybuddhi ki va roohaani nashe mein rahne vaale ke jeevan ki visheshtaayen kya hongi? pahli baat - jitna hi shreshtha nasha utna hi nimitta bhaav har jeevan ke charitra mein hoga। nimitta bhaav ki visheshta ke kaaran nirmaan buddhi। buddhi par dhyaan dena - jitni nirmaan buddhi hogi utna nirmaan karte rahenge, nav nirmaan kehte ho na। to nav nirmaan karne vaali buddhi hogi। to nirmaan bhi honge, nav-nirmaan bhi karenge। jahaan yeh visheshtaayen hain usko hi kaha jaata hai - nishchaybuddhi vijayi। nimitta, nirmaan aur nirmaan। nishchaybuddhi ki bhaasha kya hogi? nishchaybuddhi ki bhaasha mein sada madhurta to common baat hai lekin udaarta hogi। udaarta ka arth hai sarva aatmaon ke prati aage badhaane ki udaarta hogi। ‘pahle aap', ‘main-main' nahin। udaarta arthaat doosre ko aage rakhna। jaise brahma baap ne sadaiv pahle jagat amba va bachchon ko rakha - mere se bhi teekhi jagdamba hai, mere se bhi teekhe yeh bachche hain। yeh udaarta ki bhaasha hai। aur jahaan udaarta hai, svayan ke prati aage rahne ki ichchha nahin hai, vahaan drama anusaar svatah hi manaichchhit phal praapta ho hi jaata hai। jitna svayan ichchha maatram avidya ki sthiti mein rehte, utna baap aur parivaar achha, yogya samajh usko hi pahle rakhte hain। to pahle aap man se kahne vaale peechhe rah nahin sakte। woh man se pahle aap kehta to sarva dvaara pahle aap ho hi jaata hai। lekin ichchha vaala nahin। to nishchaybuddhi ki bhaasha sada udaarta vaali bhaasha, santushtata ki bhaasha, sarva ke kalyaan ki bhaasha। aisi bhaasha vaale ko kahenge nishchaybuddhi vijayi। nishchaybuddhi to sabhi ho na? kyonki nishchay hi foundation hai।

lekin jab paristhitiyon ka, maaya ka, sanskaaron ka, bhinna-bhinna svabhaavon ka toofaan aata hai tab maaloom padta hai nishchay ka foundation kitna majboot hai। jaise is puraani duniya mein bhinna-bhinna prakaar ke toofaan aate hain na। kabhi vaayu ka, kabhi samudra ka… aise yahaan bhi bhinna-bhinna prakaar ke toofaan aate hain। toofaan kya karta hai? pahle udaata hai phir phenkata hai। to yeh toofaan bhi pahle to apni taraph mauj mein udaate hain। alpakaal ke nashe mein oonche le jaate hain kyonki maaya bhi jaan gai hai ki bina praapti yeh meri taraph hone vaale nahin hai। to pahle artificial praapti mein oopar udaati hai। phir neeche girti kala mein le aati hai। chatur hai। to nishchaybuddhi ki nazar trinetri hoti hai, teesre netra se teenon kaalon ko dekh lete hen, isliye kabhi dhokha nahin kha sakte। to nishchay ki parakh toofaan ke samay hoti hai। jaise toofaan bade-bade puraane vriksha ke foundation ko ukhaad lete hain। to yeh maaya ke toofaan bhi nishchay ke foundation ko ukhedne ki koshish karte hain। lekin result mein ukhadte kam hain, hilte jyaada hain। hilne se bhi foundation kachcha ho jaata hai। to aise samay par apne nishchay ke foundation ko check karo। vaise koi se bhi poochhenge - nishchay pakka hai? to kya kahenge? bahut achha bhaashan karenge। achha bhi hai nishchay mein rehna। lekin samay par agar nishchay hilta bhi hai to nishchay ka hilna arthaat janma-janma ki praalabdha se hilna isliye toofaanon ke samay check karo - koi had ka maan-shaan na de va vyartha sankalpon ke roop mein maaya ka toofaan aaye, jo chaahna rakhte ho woh chaahna arthaat ichchha poorn na ho, aise time par jo nishchay hai ki main samartha baap ki samartha aatma hoon - woh yaad rehta hai va vyartha samartha ke oopar vijayi ho jaata hai? agar vyartha vijay praapta kar leta hai to nishchay ka foundation hilega na। samartha ke bajaae apne ko kamjor aatma anubhav karega। dilshikasta ho jaayenge isliye kehte hain ki toofaan ke samay check karo। had ka maan-shaan, main-pan roohaani shaan se neeche le aata hai। had ki koi bhi ichchha, ichchha maatram avidya ke nishchay se neeche le aati hai। to nishchay ka arth yeh nahin hai ki main shareer nahin, main aatma hoon। lekin kaunsi aatma hoon! woh nasha, woh svamaan samay par anubhav ho, isko kehte hain nishchaybuddhi vijayi। koi paper hai hi nahin aur kahe - main to paas with honour ho gaya, to koi usko maanega? certificate chaahiye na। kitna bhi koi paas ho jaae, degree le leve lekin jab tak certificate nahin milta hai to value nahin hoti। paper ke samay paper de paas ho certificate le - baap se, parivaar se, tab usko kahenge nishchaybuddhi vijayi। samjha? to foundation ko bhi check karte raho। nishchaybuddhi ki visheshta suni na। jaisa samay vaise roohaani nasha jeevan mein dikhaai de। sirf apna man khush na ho lekin log bhi khush hon। sabhi anubhav karen ki haan yeh nashe mein rahne vaali aatma hai। sirf manapsanda nahin lekin lokapsanda, baap pasanda। isko kehte hain vijayi। achha!

sarva nishchaybuddhi vijayi ratnon ko, sarva nishchinta, bephikar bachchon ko, sarva nishchit vijay ke nashe mein rahne vaale roohaani aatmaon ko, sarva toofaanon ko paar kar topha anubhav karne vaale vishesh aatmaon ko, sada achal, adol, ekras sthiti mein sthit rahne vaale nishchaybuddhi bachchon ko baapdaada ka yaadapyaar aur namaste।

videshi bhaai bahinon se baapdaada ki mulaakaat :- apne ko sameep ratna anubhav karte ho? sameep ratna ki nishaani kya hai? woh sada, sahaj aur svatah gyaani tu aatma, yogi tu aatma, gunmoorta sevaadhaari anubhav karenge। sameep ratna ke har kadam mein yeh chaar hi visheshtaayen sahaj anubhav hongi, ek bhi kam nahin hogi। gyaan mein kam ho, yog mein tej ho ya divyagunon ki dhaarna mein kamjor ho, woh sabmen sada hi sahaj anubhav karega। sameep ratna kisi bhi baat mein mehnat nahin anubhav karenge lekin sahaj saphalta anubhav karenge kyonki baapdaada bachchon ko sangamayug par mehnat se hi chhudaate hain। 63 janma mehnat ki hai na। chaahe shareer ki mehnat ki, chaahe man ki mehnat ki। baap ko praapta karne ke liye bhinna-bhinna saadhan apnaate rahe। to yeh man ki mehnat ki। aur dhan ki bhi dekho, jo service karte ho, jisko baapdaada naukri kehte, usmein bhi dekho kitni mehnat karte ho! usmein bhi to mehnat lagti hai na। aur abhi aadhaakalpa ke liye yeh naukri nahin karenge, isse bhi chhoot jaayenge। na laukik naukri karenge, na bhakti karenge - donon se mukti mil jaayegi। abhi bhi dekho, chaahe laukik kaarya karte bhi ho lekin brahman jeevan mein aane se laukik kaarya karte hue bhi antar lagta hai na। abhi yeh laukik kaarya karte bhi double light rehte ho, kyon? kyonki laukik kaarya karte bhi yeh khushi rehti hai ki yeh kaarya alaukik seva ke nimitta kar rahe hain। apne man ki to ichchhaayen nahin hain na। to jahaan ichchha hoti hai vahaan mehnat lagti hai। abhi nimitta maatra karte ho kyonki maaloom hai ki tan, man, dhan - teenon lagaane se ek ka padmaguna avinaashi bank mein jama ho raha hai। phir jama kiya hua khaate rehna। purooshaartha se - yog lagaane ka, gyaan sunne-sunaane ka, is mehnat se bhi chhoot jaayenge। kabhi-kabhi classes sunkar thak jaate hain na। vahaan to laukik raajneetik padhaai bhi jo hogi na, woh bhi khel-khel mein hogi, itne kitaab nahin yaad karne padenge। sab mehnat se chhoot jaayenge। kaiyon ko padhaai ka bhi bojh hota hai। sangamayug par mehnat se chhootne ke sanskaar bharte ho। chaahe maaya ke toofaan aate bhi hain, lekin yeh maaya se vijay praapta karna bhi ek khel samajhte ho, mehnat nahin। khel mein bhi kya hota hai? jeet praapta karna hota hai na। to maaya se bhi vijay praapta karne ka khel karte ho। khel lagta hai ya badi baat lagti hai? jab master sarvashaktivaan stage par sthit hote ho to khel lagega। aur hi challenge karte ho ki aadhaakalpa ke liye vidaai lekar jaao। to vidaai samaaroh manaane aati hai, ladne nahin aati hai। vijayi ratna har samay, har kaarya mein vijayi hain। vijayi ho na? (haan ji) to vahaan jaakar bhi ‘haan ji karna'। phir bhi achhe bahaadur ho gaye hain। pahle thode jaldi ghabra jaate the, abhi bahaadur ho gaye hain। abhi anubhvi ho gaye hain। to anubhav ki authority vaale ho gaye, parakhne ki bhi shakti aa gai hai, isliye ghabraate nahin hain। anek baar ke vijayi the, hain aur rahenge - yahi smriti sada rakhna। achha!

vidaai ke samay daadiyon se (daadi jaanki bambai se 3-4 din ka chakra lagaakar aai hai) abhi se hi chakravarti ban gai। achha hai, yahaan bhi seva hai, vahaan bhi seva ki। yahaan rehte bhi seva karte aur jahaan jaate vahaan bhi seva ho jaati। seva ka theka bahut bada liya hai। bade thekedaar ho na। chhote-chhote thekedaar to bahut hain lekin bade thekedaar ko bada kaam karna padta hai। (baba aaj murli sunte bahut maja aaya) hai hi maja। achha hai, aap log catch karke auron ko clear kar sakte ho। sabhi to ek jaise catch kar nahin sakte। jaise jagdamba murli sunkar clear karke, sahaj karke sabhi ko dhaaran karaati rahi, aise abhi aap nimitta ho। kai naye-naye to samajh bhi nahin sakte hain। lekin baapdaada sirf saamne vaalon ko nahin dekhte। jo baithe hain sabha mein, unhein hi nahin dekhte, sabhi ko saamne rakhte hain। phir bhi saamne ananya hote hain to unhon ke prati nikalta hai। aap log to padhkar bhi catch kar sakte ho। achha!

vardaan:- vyartha ki leakage ko samaapta kar samartha banne vaale kam kharcha baalaansheen bhav

sangamayug par baapdaada dvaara jo bhi khajaane mile hain un sarva khajaanon ko vyartha jaane se bachaao to kam kharcha baalaansheen ban jaayenge। vyartha se bachaav karna arthaat samartha banna। jahaan samarthi hai vahaan vyartha jaaye - yeh ho nahin sakta। agar vyartha ki leakage hai to kitna bhi purushaartha karo, mehnat karo lekin shaktishaali ban nahin sakte isliye leakage ko check kar samaapta karo to vyartha se samartha ho jaayenge।

slogan:- pravritti mein rehte sampoorn pavitra rehna - yahi yogi va gyaani tu aatma ki challenge hai।