गुरुवार 24 जून 2021 की दैनिक मुरली

24-06-21 praatahmurli om shanti ''maateshvari'' revise 27-06-64 madhuban

(maateshvari ji ke punya smriti divas par class mein sunaane ke liye jagdamba sarasvati ji ke madhur mahaavaakya)

geet:- chhod de jag se naate …

agar ham jag se naate hi chhod den to phir jag kaahe ke liye hai? agar naate hi todne ki baat hai to phir yeh sambandh banaaya hi kyon? pati-patni, baap-beta, raaja-praja aadi aadi anekaanek jo sambandh hain, yeh sab bhagwan ne rache hain, aise kehte hai na! to jab bhagwan ne rache hain to phir kyon kehte hain chhodo! ya phir yeh geet hi wrong hai।

bhagwan ne kaun-sa jag racha? jag kaho, duniya kaho, jo bhagwan ne rachi woh aisi duniya thode hi rachi, jo chhodni pade। abhi ke jo sambandh hain, woh nahin rache। abhi is jag mein dekho tumhaare naate kaise ho gaye hain! karmon ke kaaran tamopradhaanta mein aate-aate kya ho gaye hain! karmon ke bandhan ek do ko kaantate rehte hain। sabhi naate is karma ke hisaab mein tamopradhaanta mein aa karke, ek do ko duhkh dete aur lete rehte hain। bhagwan khud kehte hain mainne to tumhaare yeh duhkh ke sambandh nahin banaaye hain। mainne jo tumhaara sambandh joda tha, woh bandhan nahin tha। mainne tumhaara shreshtha sambandh joda tha, usi sambandh mein tum sada sukhi the। tumhaare sab naate bahut svachchha the isliye yaad karte ho na - raam raaja, raam praja, raam saahookaar hai, base nagri jiye daata dharma ka upkaar hai.... usko kehte the grihastha dharma। dharma-pati, dharma-patni, dharma ke naam se hai na। parantu abhi to woh dharma ka sambandh nahin hai। practical woh jeevan nahin rahi hai, isliye baap kehte hain yeh jo tumne apna jag bana diya hai, us jag ke jo naate hain woh bigad gaye hain। maine jo jag banaaya tha usmein tumhaare naate kitne achhe the, kitne priy the, kitna ek do ko sukh dene vaale the। naate to zaroor the, aise nahin ki bhagwan ne naate nahin rache। naate to the lekin woh naate karma ke bandhan ke bina the, isliye unhon ko kaha jaata tha jeevanmukta। jeevan mein is karma ke bandhan (duhkh) se mukta the, isliye unko kehte the jeevanmukta। abhi tumhaare naate jeevanbandha ke ban gaye hain isliye kehte hain abhi usse chhutkaara kaise ho! baap kehte hain usse naata tod ek mere se jod। yeh ek hi last ki jeevan tum mere havaale karo। mere havaale ka matlab hai jaise stri pati ke havaale, pati stri ke havaale। baap bete ke havaale, beta baap ke havaale.. yeh to practice achhi tarah se hai na। main koi tumhein nai baat nahin kehta hoon। kaise karen, kya karen tum yeh bhi prashn poochh nahin sakte ho। tum apni jeevan ek do ke prati dete aaye ho, kya tum apne bachchon ke prati apni jeevan nahin de baithe ho? apna tan man dhan jo bhi kuchh hai, tum unheen ke prati to banaake baithe ho na। apna apna to karte ho na! saari jeevan unheen ke prati laga dete ho। to main tumhein koi nai baat thode hi kehta hoon, ki yeh sab mere havaale karo। jaise abhi tak ek do mein karte aaye ho, aise abhi kehta hoon, tum mere bano। phir mera ban karke use trustee ban sambhaalo। tum bhakti maarga mein bhi kehte aaye ho bhagwan yeh sab tera, main tera... parantu tera kiya nahin, sirf aise hi kaha ki tera। tera bhi mera, mera bhi mera... aise hi sab karte the। lekin ab woh thagi to nahin chalegi na! tera bhi mera, to mera bhi mera। nahin। ab yeh tera mera khatma karna padega। abhi main tera to usmein sab aa gaya। bas, main tera। baaki aise thode hi hai ki unka bhi mera, apna bhi mera.. aisi thagi karne ka kya phaayda! kyonki ham hi apne ko thagenge, us paramatma ko to koi thag nahin sakta। pahle kaise-kaise thagi karte rahe lekin thagte thagte khud hi duhkhi ashaanta bane ho kyonki dhokha to tum hi kha rahe ho, isliye ab baap kehte hain woh sab chhodo। deh sahit sab sambandhon se buddhi hata karke abhi mere se jodo। phir apna-pan nahin rahega।

abhi tak mera-mera kehte duhkhi hote rehte ho। phir buddhi udhar jaati hai to kehte ho kya karoon, kaise karoon... agar tum kisi mein latkenge to nateeja kya hoga! yeh moh jo hai na, iske kaaran tum duhkhi ban pade ho isliye baap kehte hain tum is jag ke naate tod karke abhi mere bano। to yeh jo tumne apne deh ke bandhan, jeevan ke bandhan banaaye hain, unse nikal karke abhi mere ban jaao। phir main koi tumhaare saath janma-janma thode hi chalta rahoonga। nahin। abhi mera tumhaare se kaam hai, bas। phir to tum aatmaayen aapas mein sadaakaal ke sukh mein chalti chalengi। to tumhaare duhkh ke bandhan kaat karke, sukh ka sambandh bana deta hoon phir tum hi aapas mein sukh bhogenge। abhi dekho tum kitne bigad gaye ho isliye duhkhi hote ho। phir main tumhaara bigda hua sudhaarta hoon, phir tum hi sukhi rahenge। main thode hi janma-janma tumhaare saath chalne vaala hoon। main to sirf tumhaari bigdi ko sanvaarne ke liye kehta hoon, abhi mere bano। so bhi kyon kehta hoon? kyonki mere pharmaan par chalne se tumhaare liye sab sahaj ho jaayega। main tumhein yeh sahaj yukti deta hai। tum practical mein mere ho karke chalo, to yeh yukti kaam mein aave। jaise koi kisi ke god ka bachcha hota hai phir unka hi naam practical chalega na। aise tum bhi practical mere ho karke chalne se tumhaara hi bhaagya banega। baap to badi seedhi, sahaj, ekdam simple baaten batlaate hain, use bhi dekho koton mein koi hi dhaaran karne vaale nikalte hain।

baap kehte hain is chhote se sangamayug mein tumhaare desh, is corporeal duniya mein tumhaare liye hi aaya hoon, to kam se kam jitna time hai utna time to kuchh hamaara khyaal karo। baba ke bane ho to kam se kam itna time to shuddh raho। phir to tumhaari aisi praalabdha ban jaayegi jo tumhein us duniya mein mehnat nahin karni padegi। abhi thodi mehnat ki baat hai, abhi tum kaise bhi karke, mar mit karke bhi pavitra rahne ki pratigya karo। apni dridhta rakho, apni dhaarnaaon mein rahne ka poora prayatna karo। baap tumhein saaph-saaph batlaate hain tum sirf itne thode time ke liye yeh mehnat karo। main tumhein aur koi mehnat nahin karaata hoon, tumhein jitna milta hai uski bhent mein koi mehnat hi nahin hai।

abhi ghi ke ghade mat banaao.. yeh karoonga, woh karoonga, duniya kya kahegi, woh kya kahenge, are duniya kya kahegi... chhod do ise। abhi yeh duniyaan hi jaane vaali hai। lekin un bichaaron ko yeh pata thode hi hai isliye baap kehte hain yeh mat socho। ab to maut saamne khada hai। tum itna lamba-chauda jo banaakar baithe ho yeh sab wastage kar rahe ho। abhi baap kehte hain us wastage ko bachaao। is shareer nirvaah ke liye jitna chaahiye utna bhale karo, jitna tumhaara creation ke saath hisaab-kitaab hai, utna karo, main kahaan sambhaaloonga। ise tumko hi sambhaalna hai। jo zaroori hai woh to tumko free karta hoon, lekin abhi yeh jo extra rach rahe ho uske liye mana karta hoon kyonki abhi woh to girna hi hai kyon apna phaaltu samay ganva rahe ho। in phaaltu ke jhanjhaton se hi tum duhkhi hue ho, un jhanjhaton se tum kaise chhooto, vahi to tumhein batlaata hoon। phir bhi baith karke anek bahaane lagaana, yeh kahaan ki reeti hai? phir baap bhi kehte hain ki dekh lena, abhi agar mujhe seedhi anguli nahin dete ho, haath nahin dete ho, to phir main aise naak pakadke le chaloonga। naak pakdega to phir dam ghutega, phir duhkh hoga, sazaayen khaani padengi na! isliye kehte hain abhi haath mein haath dekar seedha chalne ka time aa gaya hai। agar seedhi tarah se nahin chalenge to phir mere haath mein tumhaara naak bhi to aayega, phir dekh lena। phir us samay kuchh nahin ho sakega, na kuchh kar sakenge isliye baap kehte hain bachche, ab tum mere ho karke, mere paas aa karke, meri baaton ko sun karke, agar phir bhi kuchh nahin kiya to unke liye bahut kadi sazaayen hain, isliye jin bichaaron ko pata nahin uski to baat alag hai। baaki jinhon ko pata hai, jo baithke, sunke phir inheen baaton mein gaphlat ki to unki to khair nahin। jaise 10 guna phaayda, vaise 10 guna nuksaan hoga। tab kehte hain apne nuksaan ko, ghaate ko.. achhi tarah se samjho। achhi tarah se kuchh to apni buddhi kholo। abhi baap se buddhiyog lagaayenge to taakat milegi। to in sabhi baaton ko samjho, bhoolo mat।

abhi yeh jo samay chal raha hai, ise pahchaano, jara aankhe kholo, buddhi kholo aur samay ka poora phaayda lo। apni poori takdeer jagaao। kehte bhi hain jaisa sang vaisa rang hota hai, isliye jismen abhi yeh dhaarna poori nahin hogi to maaya ke sang ka rang lag jaayega, tab to kehte hain hear no evil, si no evil, talk no evil... kai aise evils hain jo yahaan bhi kaeeyon ko chhodte nahin hain, phir ek do ke sangadosh mein aa jaate hain। to kehte hain aise sangadosh se bache raho। aise mat samjho ki sangadosh baahar hai, yahaan nahin hai। nahin, yahaan bhi woh ghoomte rehte hain, kyonki unka raajya hai na, isliye baap kehte hain achhi tarah se kavach pahankar raho। kavach hoga to uski goli lagegi nahin। yog ka hi kavach hai, gyaan ki talvaar hai। in sabhi astra-shastron ko apne paas achhi tarah se sambhaalke rakho।

kehte bhi hain jo karta hai woh paata hai, yeh to bhavishya praalabdha banaane ki baaten hain। yahaan to praalabdha nahin bhogni hai na, yahaan to koi guru ban karke nahin baithna hai। ismen koi misunderstand na kare, isliye yeh sab samjhaaya jaata hai। to yeh sab baaten dhyaan mein rakh karke apne ko safe rakhna hai। yahaan koi kharche aadi ki baat nahin honi chaahiye। abhi yeh sab kharcha doosron ke kalyaanaartha hi use karna hai। ek ek paai bhi sab isi kaarya mein lagaana hai। achha!

doosri murli :-

“chadhti kala mein jaana hai to apne jeevan ki saari javaabdaari unke haath mein samarpan kar do''

bahut manushya aisa prashn poochhte hain, itna gyaan sunte hue bhi hamaari avastha aage kyon nahin badhti? aage badhne mein rookaavat kyon? ab yeh samjhaani unhon ke prati di jaati hai jinhon ne is maarga mein chalne ka kadam rakha hai, parantu jab tak apni jeevan man-vaani-karma sahit surrender kar inka nahin hua hai tab tak woh ateendriy sukh mahsoos ho nahin sakta। yeh ek eeshvareey law hai, jab unka sahaara liya hai to dil se uske aage jeevan arpan kar deni hai arthaat poora vaaris ban varsa lena hai। to is nashe mein rahne se us avastha mein ulhaas bhar jaata hai aur phir gyaan ki dhaarna hone se auron ko aap samaan banaane ki taakat aayegi। baaki aise nahin samajhna ki maansik roop se ham arpan ho chuke hain nahin, yeh to apne ko thagna hai। jab baba practical mein aaya hua hai to bachcha bhi practical mein bano, phir baba unke janma-patri ko jaan kaise bhi direction dekar chalaave। usmein pahle ghutka aayega, parantu ant mein samjhenge ki ismen hi hamaari chadhti kala hai। to apne jeevan ki saari javaabdaari unke haath mein samarpan karni hai। baaki guru pichhaadi guru ban koi unki gaddi par nahin baithna hai। ab in sabhi baaton ko buddhi mein rakho tab hi avastha oonchi ja sakti hai। agar oonch nahin chadhte ho to zaroor apni hi dil athva dhaarna mein koi kaalaapan hai। samjha। achha। meethe meethe bachchon ko yaadapyaar, good morning।

vardaan:- apne shreshtha swaroop va shreshtha nashe mein sthit rah alaukikta ka anubhav karaane vaale antarmukhi bhav

jaise sitaaron ke sangathan mein vishesh sitaaron ki chamak door se hi nyaari pyaari lagti hai, aise aap sitaare saadhaaran aatmaon ke beech mein ek vishesh aatma dikhaai do, saadhaaran roop mein hote asaadhaaran va alaukik sthiti ho to sangathan ke beech mein allaah log dikhaai padenge, iske liye antarmukhi bankar phir baaharmukhta mein aane ka abhyaas ho। sadaiv apne shreshtha swaroop va nashe mein sthit hokar, knowledgeful ke saath powerful bankar knowledge do tab anek aatmaon ko anubhvi bana sakenge।

slogan:- raavan ki jaaydaad saath mein rakh li to dil mein dilaaraam thahar nahin sakta।