शुक्रवार 26 नवंबर 2021 की दैनिक मुरली

26-11-2021 praatahmurli om shanti "baapdaada"' madhuban

meethe bachche - “svayan ko raajayogi samajh vikaari sambandhon se mamatva nikaal do, sirf tod nibhaane ke liye saath raho''

prashn:- tum bachchon ne deh-bhaan ko bhulaaya hai, iska yaadgaar shaastron mein kis roop se dikhaaya hai?

uttar:- dikhaate hain paandav pahaadon par gal gaye। parantu unko kya padi thi jo pahaadon par barpha mein jaakar shareer chhodenge। law kehta hai himaalay ke pahaadon par koi shareer nahin chhodte। baaki tum yogbal se shareer chhod dete ho। deh-bhaan ko bhool ashareeri banne ki practice karte ho।

om shanti। roohaani baap roohaani bachchon ko samjhaate hain। samjhaate to har roz hain phir bhi kai baaten bhool jaati hain। bachchon ko buddhi mein yeh to rakhna hai ki yeh sangamayug hai। ham sangamayug par hain। baap aate bhi hain sangamayug par। kaliyug ant aur satayug aadi ka sangam gaaya hua hai। bulaate bhi is samay hain। patit duniya kaha jaata hai kaliyug ke ant ko isliye aur koi time par bulaate nahin। baap aayenge bhi nahin। jab kaliyug ka ant hota hai tab hi mujhe bulaate hain - baba ham patiton ko paavan banaane aao। kaliyug ke ant aur satayug ke aadi mein aao। bulaate hain parantu unko pata nahin hai ki kalpa ki aayu kitni hai। samajhte hain bhakti karte-karte, dhakka khaate-khaate aakhreen mein mil hi jaayenge। kalpa ka ant kab hoga, yeh kisko pata nahin hai। yaad karte hi tab hain jab kaliyug ka ant hota hai। satayug treta mein to hai hi sukh, dvaapar mein bhi itna duhkh nahin hota hai। kaliyug mein manushya jab bahut duhkhi hote hain tab baap ko pukaarna shuru karte hain। tamopradhaan maana duhkhi, tab hi pukaarenge na। he duhkh harta sukh karta aao। duhkh ke bandhan to bahut hain। duhkh ke time hi bhagwan ko pukaarte hain ki is bandhan se chhudaao। jab koi raasta nahin milta hai to bahut jor se pukaarte hain। parantu phir bhi paate nahin। jaise maze (bhoolbhulaiya) hota hai na। jahaan se bhi jaate hain raasta nahin milta। jab thak jaate hain phir chillaate hain। to yahaan bhi manushya jab bahut duhkhi ho jaate hain tab chillaate hain - he duhkhaharta sukh karta, he andhon ki laathi। is samay hi pukaarte hain he andhon ki laathi।

abhi tum sangam par ho। ek taraph hain paandav aur doosre taraph hain kaurav। andha unko kaha jaata hai jo rachayita aur rachna ke aadi-madhya-ant ko nahin jaante hain। sajje unko kaha jaata hai jo baap dvaara rachta aur rachna ko jaan gaye hain। tum to samjhaate ho hamko raajya-bhaagya mila hai tab to chitra dikhaate hain। satayug hai shivbaaba ka sthaapan kiya hua, isliye unka naam pada shivaalay। phir vikaari bante hain to vaam maarga ki sthaapna hoti hai isliye isko veshyaalay kaha jaata hai। satayug hai shivaalay। kaliyug hai veshyaalay। tum sangamayugi braahmanon ko yeh maaloom hai ki abhi ham na veshyaalay mein hain aur na shivaalay mein hain। ham shivaalay mein ja rahe hain। abhi veshyaalay, vikaari sambandhon se hamaara mamatva nikal gaya hai। abhi hai hamaara bhavishya ke sambandhon se mamatva। ham abhi raajayogi hain, woh hain yogi। unse hamaara kya connection hai। phir bhi tod nibhaane ke liye rehna to apne ghar mein hi hai। phir bhi braahmanon se bahut connection rehta hai kyonki braahmanon jitni oonch seva aur koi nahin kar sakte hain। roohaani seva karne baap hi nimitta bante hain। woh baap bhi hai, teacher bhi hai to guru bhi hai। satya baba, satya teacher, satguru bhi hai। satya ko supreme hi kehte hain। un dvaara hamko varsa mil raha hai। yeh yaad rahne se kitni har vakta khushi rahni chaahiye, phir auron ko samjhaane ke liye purushaartha kiya jaata hai। pahle-pahle to hai woh paarlaukik baap। woh satya shikshak bhi hai, satguru bhi hai। srishti chakra ke aadi madhya ant ka gyaan dete hain, isliye unko gyaan ka saagar kaha jaata hai। pahle-pahle to unki mahima karni hai। woh satya baap, satya teacher, satya satguru hai। satya dharma ki sthaapna karte hain। maangate hain na ki ek raajya ho। woh to satayug mein hota hai। yahaan to ho na sake। manushya kehte hain one world ho jaae, ekta ho jaae। world to ek hi hoti hai। sirf world mein ek raajya ho, yeh ho sakta hai। devtaaon ka raajya tha, vahaan aur koi hangaamen ki baat nahin thi। behad ka baap hi aakar raajdhaani sthaapan karte hain। yeh bhi ab tum samajh gaye ho। baap hi raajayog sikhlaate hain na ki shreekrishna। unhonne krishna ke liye samajh liya hai। raajayog sikhlaaya hi tab jab raajdhaani sthaapan karni thi। baaki shaastron mein to hai mahima। sirf mahima karne se koi raajayog sikhlaate hain kya? vo geeta aadi jo sunaate hain woh koi raajayog sikhlaate hain kya? geeta sunaate hain woh to sirf jo hokar gaye hain unki mahima karte hain। bhagwan ne jinhon ko sunaaya unhonne hi raajya pad paaya। baaki yeh tyohaar aadi sab bhakti maarga ke hain। mukhya hai hi sangamayug ki baat। shivbaaba aate hain, shiv jayanti ke baad krishna jayanti। shivbaaba ke aane ke baad zaroor nai duniya sthaapan hogi। krishna to hai satayug ka maalik। shivbaaba ne aakar krishna ko aisa banaaya। ek krishna ko thode hi gyaan diya hoga। krishnapuri sthaapan ki hogi। aatma ko tamopradhaan se satopradhaan banaane ke liye yog sikhaaya hai। tum hi phir sato rajo tamo mein aate ho na। aise nahin ki satayug mein hi tumko baith jaana hai। 84 janmon ka hisaab bhi hai। satayug ke baad treta… zaroor aana hi hai। din ke baad raat honi hi hai। satayug ki sthaapna kaun karte hain, kaise karte hain? kyonki satayug hai hi nai duniya। baap kehte hain ham puraani duniya badalte hain। yeh vahi mahaabhaari, mahaabhaarat ki ladaai mooslon ki hain। kehte hain paandav bhi the। paandavon ki jeet hui। svaraajya mila hai zaroor। to svaraajya mein aayenge na। shareer bhal kahaan bhi chhoden, raajaai mein to aana hai। law kehta hai himaalay pahaadon par koi shareer chhodte nahin hain। yog to yahaan hi seekhte hain। yogbal se hi shareer chhodna hai। unko kya padi hai jo pahaadon par barpha mein jaakar shareer chhodenge। yeh bhi gapode hain। jaise sarpa puraani khaal chhod nai lete hain। vaise aatma bhi ek shareer chhod doosra leti hai। shantidham mein jaakar phir aayenge satayug mein। baba ne samjhaaya hai satayug mein shareer chhodenge to aapehi apne samay par jab shareer boodha hota hai tab ek shareer chhod doosra lete hain। vahaan to vaapis shantidham mein nahin jaayenge। shantidham mein abhi jaana hai। abhi woh practice ki jaati hai jo tumhaari woh practice avinaashi ho jaati hai। yahaan to practice isliye karaate hain kyonki puraani duniya ko hi chhodna hai। vahaan to nai duniya hai। svargavaasi shareer chhodenge to svarga mein hi aayenge। narkavaasi shareer chhodenge to narka mein hi rahenge। svarga mein ja na saken। satayug mein to tab jaayenge jab baap aakar raajayog sikhlaaye, tab daivi raajdhaani mein arthaat satayug mein ja saken। raaja-mahaaraaja ka lakab yahaan bhi milta hai। pad doosra milta hai, parantu naam woh chalta rehta hai, badal nahin sakta। koi-koi ka title kaayam kar dete hain jo paise se title lete hain। aage laakh do laakh dete the to lakab (title) milta tha। to yeh roohaani baap roohaani bachchon ko baith samjhaate hain। unko kaha jaata hai spiritual father, aatmaon ka baap.. jisko bulaate hain ki he baba aao, aakar hamko patit se paavan banaao। yahaan bada duhkh hai। hamko raamraajya mein le chalo। drama anusaar 5 hajaar varsha pahle bhi aise kaha tha। parampita paramatma ko aana hi hai। yeh chakra phirta rehta hai। baap kehte hain main kalpa-kalpa, kalpa ke sangamayug par aata hoon। yeh akshar zaroor daalne hote hain। drama ke plan anusaar aata hoon। drama akshar bhi likhna pade। to manushyon ko pata pade ki yeh 5 hajaar varsha ka drama hai।

abhi sab manushya-maatra patit hain isliye khud kehte hain ham paapi hain, neech hain। barobar veshyaalay bhi hai, vishay saagar hai na। vishnupuri ksheer saagar thi, jahaan lakshmi-naaraayan donon the। yeh ksheersaagar bhent mein kaha jaata hai। baaki ksheersaagar koi hota nahin hai। saagar to satayug mein bhi yahi hota hai। kaliyug mein bhi hai। satayug mein saare saagar ke tum maalik ho। saari prithvi, aakaash ke tum maalik ho। abhi to tukda-tukda ho gaya hai। ab yeh hai sangamayug। sangamayug jab yaad aaye tab samjhen ki ab satayug mein jaate hain। sangam hai to baba bhi zaroor hoga। woh is duniya ko badalne vaala hai। sthaapna to brahma dvaara yahaan hoti hai। ab tum chitra banaate ho। baba to hai hi bindi, light might ki। tumhaari aatma bhi light hai। ab tumko light kaise deven, to tumhaare sir par bindi de di hai। aatma ko light kaise den! light dene se bada ban jaata hai। woh badi light ko hi poojte hain isliye manushya paramatma ko jyoti swaroop kah dete hain। vaastav mein light hai pavitrata ki nishaani। manushya samajhte hain - jyoti swaroop hai। bindi ko agar light bhi chhoti den to pooja kaise hogi, isliye bada kar dete hain। baap kehte hain main param aatma, supreme soul hoon jisko tum paramatma kehte ho। parantu chhoti bindi ki pooja kaise ho। light kaise den। koi ling ki pooja karte hain, saahookaar hain to heera gol banaakar unki pooja karte hain। naam to shivling hi rakhenge। hai to star। aur koi cheez nahin hai। yeh badi guhya baaten samajhne ki hain। aatma koi badi chhoti nahin hoti। nahin to fit kaise ho। abhi tum jaise apni aatma ko jaante ho vaise baap ko jaante ho। aatma baap ko bulaati hai, tumne apni aatma ko dekha hai? to paramatma ko kaise dekhenge? haan divya drishti se dekh sakte hain। so tum jabki jaante ho phir dekhne se phaayda hi kya। yeh to padhaai padhne ki hai, jisse manushya devta bante hain। yeh hai future nai duniya ke liye padhaai। yeh lakshmi-naaraayan kahaan aise karma seekhe? sangam par। baap kehte hain main sangam par hi aakar tumko nai duniya ke liye padhaai padhaata hoon। baba pradarshani mein taar dete hain, usmein bhi yeh likhna hai yeh sangamayug hai। baap kehte hain tum hamse birth right le sakte ho - bhavishya 21 janmon ke liye। sangamayug akshar zaroor likhna hai। accurate jo taar jaati hai uski kaapi vahaan lagaani hai। bade aksharon mein likh dena chaahiye। din pratidin clear hota jaata hai। neeche likhte hi hain baapdaada। shivbaaba jo aatmaon ka baap hai woh prajaapita brahma dvaara sikhlaate hain। baap kehte hain mujhe shareer ka aadhaar to chaahiye na। shiv to hai niraakaar। unko to apna koi shareer hai nahin। brahma, vishnu, shankar to sookshm aakaari hain baaki to sabko shareer hai। baap kehte hain - mujhe shareer hai kahaan। parantu aise to nahin ki main naam roop se nyaara hoon। bahut clear bachchon ko samjhaate hain। main hoon niraakaar। parantu jab main aata hoon to mujhe shareer zaroor chaahiye। main garbha mein nahin aata hoon। main khud batlaata hoon ki main is saadhaaran tan mein aaya hoon। yeh pahle poojya tha, ab pujaari bana hai। maala mein bhi hai pahle shivbaaba phir do daane hain। pravritti maarga hai na। abhi tumko pata hai pravritti maarga ki hi maala hai, jo pravritti maarga mein patit the, ab shivbaaba ki mat se paavan ban srishti ko paavan bana rahe hain, isliye yaadgaar maala bani hui hai। roodra maala aur vishnu ki vaijayanti maala hai। braahmanon ki maala nahin banti hai। koshish ki thi banaane ki parantu bani nahin isliye maala banaana, avyakt naam dena chhod diya। naam jo yahaan ke the woh naam yahaan hi chhod phir vahi apna puraana naam le bhaag jaate hain। unko us naye naam se koi bulaayenge nahin। to baap hamaara baap teacher guru hai, aise baap ko to bahut lav se yaad karna hai parantu maaya aisi hai jo bhula deti hai isliye avastha dagmag hoti hai। murjhaaye-pane ki feeling aati hai। shivbaaba ki yaad se phir khade ho jaate hain। achha!

meethi-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) vikaari sambandhon se mamatva nikaal dena hai। bhavishya ke naye sambandhon se buddhiyog lagaana hai।

2) auron ko samjhaane ke liye har vakta khushi mein rehna hai। sat baap, sat shikshak aur satguru ki shreemat par chal andhon ki laathi banna hai।

vardaan:- komalta ko kamaal mein parivartan kar maaya jeet banne vaale shakti swaroop bhav

shakti swaroop banne ke liye komalta ko kamaal mein parivartan karo। sirf svayan ke sanskaaron ko parivartan karne mein komal bano, karma mein kabhi komal nahin banna, ismen shakti roop banna hai। jo shakti roop ka kavach dhaaran kar lete hain unhein maaya ka koi bhi teer lag nahin sakta isliye aapke chehre, nayan-chain se komalta ke bajaae shakti roop dikhaai de tab maayaajeet ban paas with honour ka certificate le sakenge।

slogan:- trikaaldarshi ki seat par set hokar har karma karo to maaya door se hi bhaag jaayegi।