सोमवार 13 दिसंबर 2021 की दैनिक मुरली

13-12-2021 praatahmurli om shanti "baapdaada"' madhuban

“meethe bachche - shreshtha banna hai to shreemat par poora-poora chalo, shreemat par na chalna hi sabse badi khaami hai''

prashn:- kin bachchon ka gala ghut jaata hai, buddhi se gyaan nikal jaata hai?

uttar:- jo chalte-chalte apvitra ban jaate hain, padhaai chhod baap ko phaarakti de dete hain unki buddhi se gyaan nikal jaata hai। jab tak nirvikaari na banen tab tak avinaashi gyaan buddhi mein baith nahin sakta। buddhi ka taala khul nahin sakta। patit banne vaalon ka khaan-paan bhi ganda ho jaata hai। woh maayaavi manushyon se jaakar mil jaate hain phir gala hi ghut jaata hai। kisi ko bhi gyaan suna nahin sakte hain।

geet:- tumhein paake hamne…

om shanti। yeh geet kaun ga rahe hain? jisne baap se teenon jahaan ki baadshaahi le li hai। aap se jo kuchh mila hai unko koi hata na sake। hamko koi hata nahin sakta arthaat kaal kha nahin sakta। aur na hi hamaari raajaai ko koi le sakta hai। bachche jaante hain ham us maalik se varsa le rahe hain। baap ko maalik bhi kehte hain lekin us maalik se kya milta hai, kuchh bhi pata nahin। maalik ko kaise ham yaad karen, unka naam roop kya hai? kuchh bhi pata nahin। maalik to srishti ka maalik thahra na। woh hua rachayita। ham hue rachna। baba rachte hain vaarison ko athva bachchon ko phir unko apna maalik bana dete hain। bachche phir baap ke maalik ban jaate hain। bachche kehte hain mere baap ki jo jaaydaad hai unka main maalik hoon। baap to aise nahin kahenge ki bachche ki jaaydaad ka main maalik hoon। yeh badi samajhne ki baaten hain। sensible bachche hi samajh sakte hain। buddhi saaph nahin hai to usmein ratna thahar na saken। jab dehi-abhimaani ho tab ratna thahar saken। dehi-abhimaani hokar rehna hai aur baap se varsa lena hai। us baap ko yaad karna hai। jaise laukik baap bachchon ko paida karte hain to bachche maalik ban jaate hain। bachche kahenge mera baap। baap kahega mere bachche। parantu bachche ke paas to kuchh hai nahin। unko to baap ki milkiyat milti hai। baap kabhi aise nahi kahenge ki bachche ki milkiyat meri hai। baap samajhte hain - bachche meri milkiyat ke maalik hain, yeh badi dhaarnaayukta baaten hain। dhaarna nahin hoti kyonki khaamiyaan hain। samajhna chaahiye mere mein bahut khaamiyaan hain। number one khaami hai - jo shreemat par nahin chalte hain। shreemat se hi shreshtha banna hai। shreemat raajayog sikhlaati hai। shri maana niraakaar bhagvaanuvaach, isliye ham prashn poochhte hain ki gyaan saagar patit-paavan parampita paramatma se tumhaara kya sambandh hai? yeh bahut bade-bade board par likh dena chaahiye। paramatma hai svarga ka rachayita, to jinka paramatma se sambandh hoga woh bhi zaroor svarga ka maalik ban hi jaayega।

baap aakar bachchon ko salaam karte hain। salaam maalekam bachche। bachche kehte hain maalekam salaam। ham to sirf brahmaanda ke maalik hain, tum brahmaanda aur vishwa donon ke maalik bante ho, isliye baba bachchon ko double salaam karte hain। ek hi behad ka baap tumhaari kitni nishkaam seva karte hain। laukik baap nishkaam nahin hote। unko aash rehti hai ham vaanaprastha avastha mein jaayenge to bachche hamaari seva karenge। asul yeh kaayda tha - bachche baap ki seva karte the। aajkal to paise uda dete hain। tum bachche jaante ho hamko aisi baadshaahi milti hai baap se। lakshmi-naaraayan ke liye bhi likho ki inhon ko jaante ho, inhon ko yeh svarga ki baadshaahi kisne di? zaroor svarga sthaapan karne vaala hi dega। puraani duniya ho tab to nai duniya sthaapan karenge। to lakshmi-naaraayan ne yeh varsa paaya shreemat par chalne se। shreemat raajayog aur sahaj gyaan sikhlaati hai। jinko samjhaate hain - woh raaja ban jaate hain। pahle number mein shreekrishna, usne aisa kya karma kiya jo apne maa baap se bhi jaasti martaba paaya। woh mahaaraaja mahaaraani kahaan the jinke paas krishna ka janma hua। jab tak nirvikaari hokar nahin rahenge tab tak avinaashi gyaan buddhi mein baith nahin sakta। buddhi ka taala khulta hi tab hai jab pavitra rehte hain। apvitra banne se sab buddhi se nikal jaayega। bahut bachche phaarakti de dete hain। padhaai ko hi chhod dete hain। woh phir kabhi kisko gyaan suna na saken। patit ban jaate, khaan-paan bhi ganda khaate। maayaavi manushyon se jaakar milte hain। unke gale ghut jaate hain। yeh baat bhi shaastron mein hai। vrindaavan mein raas aadi hoti thi, mana kar dete the - kisko sunaayenge to gala ghut jaayega। hai yeh gyaan ki baat। agar phaarakti di, jaakar ninda karte hain to gala ghut jaata hai। kehte hain na satguru ka nindak thaur na paaye। baap kehte hain srishti jab patit, puraani ho jaati hai tab main aata hoon। manushyon ko tamopradhaan banna hi hai। jo kartavya karenge vo ulta hi karenge kyonki ulti mat mil rahi hai। shreemat hai nahin। ulti mat patit bhrashtaachaari banaati hai। aage bhrashtaachaari akshar hi nahin tha। sannyaasi vikaaron ka sannyaas karte hain paavan banne ke liye।

to pahle-pahle yeh baat samjhaani hai ki parampita paramatma se tumhaara kya sambandh hai? sab bhagwan ko yaad karte hain। bhagwan kehte hain mujhe sab bhagat priy hain kyonki un sabko mujhe hi gati sadgati deni hai। woh samajhte hain bhagwan aakar bhakton ko bhakti ka phal dete hain, isliye bhagat bhagwan ko priy hain। baba samjhaate hain - tumne durgati ko paaya hai, ab main sadgati dene aaya hoon। bhakti ke baad bhagwan ko aana hai zaroor। mujhe tumko hi pahle bhakti ka phal dena padta hai। aur to shuru se lekar mere bhakta hain nahin। woh to anekon ki bhakti karte hain। tum mere pyaare bachche ho, tum maalik the phir maaya raavan ne tum par jeet pa li aur phir bhakti shuru ho gai। yeh bhi drama hai। main to sabki sadgati karta hoon। ab tum meri mat par chalte ho na। mat dene ke liye zaroor mujhe aana padta hai। nahin to kaise sadgati ka raasta bataaoon। main is pahle number ke bhagat ke tan mein aata hoon। yeh hai nandeegan। shiv ke mandir mein saamne nandeegan rakhte hain। ab vichaar karo - parampita paramatma bail ke tan mein to nahin aayega। raajayog bail dvaara kaise sikhaaoonga। gyaan saagar bail mein pravesh karenge kya! abhi tum gyaanvaan bante ho। shreemat par chalkar lakshmi-naaraayan, sooryavanshi raaja-raani ban rahe ho। us raajdhaani ko koi hamse chheen na sake, na koi toofaan lag sake। ham amarpuri ke maalik bante hain। yeh mrityulok hai। amarnaath baba hi kaal par jeet pahnaane vaala hai। unka part alag hai। tum sab paarvatiyaan ho, main amarnaath hoon। ham kabhi janma-maran mein nahin aate। amarpuri svarga ka maalik tumko banaata hoon। bhaaratvaasiyon ko vaikuntha bahut pyaara lagta hai। kehte hain phalaana vaikunthavaasi hua। bahut mukh meetha kar diya। ab vaikuntha sachmuch to satayug mein hoga। jab satayug hai to punarjanma bhi satayug mein lete hain। phir treta mein aate hain to punarjanma bhi treta mein lete hain। phir dvaapar mein aate hain to punarjanma bhi dvaapar mein lete hain। parantu aise thode hi ho sakta hai jo marenge kaliyug mein, punarjanma lenge satayug mein। svarga mein janma lete rahen, iska madaar hai padhaai par। baap kehte hain main tumko srishti ka maalik banaata hoon, main nishkaami hoon। ham vishwa ka maalik nahin bante। tum svarga mein jaate ho to main vishraami ho jaata hoon। main chakra mein nahin aata hoon। is eeshvareey janma ke baad tum daivi god mein janma lenge। abhi tum janma-janmaantar aasuri god mein janma lete ho। bhrashtaachaari ban pade ho। satayug mein sab shreshthaachaari hote hain। ab tum shreemat se shreshthaachaari ban rahe ho। vahaan vish hota nahin। yahaan bhal sannyaasi hain parantu janma to vikaaron se lete hain na। satayug mein vikaaron se janma nahin hota hai। nahin to unhon ko sampoorn nirvikaari kah na saken। vahaan maaya hoti nahin। parantu yeh baaten bhi jab kiski buddhi mein baithen।

ab baba kehte hain bachche tumko ghar jaana hai phir svarga mein aakar raajya karna hai। aatmaayen paramdham se aati hain part bajaane, phir jab tak patit-paavan aakar liberate na kare tab tak ek bhi ja nahin sakta। gapoda maarte rehte hain - phalaana paar nirvaan gaya। baap aakar sab baaten achhi reeti samjhaate hain। pahle-pahle samjhaao parampita paramatma se tumhaara kya sambandh hai! doosre kisko yeh bhi prashn poochhne aayega nahi। tum kalpa-kalpa pattharbuddhi se paarasbuddhi aur paarasbuddhi se pattharbuddhi bante aaye ho। yeh to achhi reeti samjhaaya jaata hai parantu jabki nishchay baithe। barobar shivbaaba ke ham bachche hain। baba kehte hain main ab aaya hoon tumko sukhdhaam le chalne, chalenge? vahaan yeh vish nahin milega। mool baat hi pavitrata ki hai। jo kalpa pahle rahe the, vahi ab bhi rah sakte hain। bahut bachchiyaan likhti hain baba pata nahin kab bandhan tootega। yukti bataao। baba kehte hain bachche bandhan tootega apne time par। baba kya karenge? ek bandhan bhal chhoot jaaye phir bachchon aadi mein moh pad jaata hai। in sabse buddhi nikaalne mein badi mehnat lagti hai। kai to aur hi jaasti moh mein aa jaate hain। bahut hain jo moh mein latak padte hain। baba kehte hain tum moh ek baap mein rakho tab dhaarna hogi। koi gyaan utha nahin sakte hain to bhaaganti ho jaate hain। phir naam badnaam hota hai। drama mein kalpa pahle bhi yeh hua tha। jo second paas hua woh drama। amma mare to bhi halua khaana, beebi mare to bhi halua khaana.. kachche ko thoda jhatka aata hai। bahut sannyaasi bhi aise hote hain, nahin thahar sakte hain to grihastha mein chale jaate hain। chalan hi aisi hoti hai। yahaan to ek hi mukhya baat hai। ham bhi us baap se varsa le rahe hain, tum bhi unko pita samajhte ho, aakar svarga ka varsa le lo। ek hi baat hai - second mein jeevanmukti, pichhaadi me thoda hi samjhaane se manushya jhat samajh jaayenge। anek mat hain, jisse bhaarat bhrashta ban gaya hai। phir ek ki mat se aadhaakalpa ke liye bhaarat shreshthaachaari banta hai। shreshtha zaroor baap hi banaayenge। sabko paar le jaane vaala ek hi baap hai to zaroor koi dubone vaale bhi honge। baap to sabko kehte hain vikaaron ka sannyaas karna hi padega tab hi tum pavitra duniya ke maalik ban sakenge। baba varsa de rahe hain। dher brahmaakumaariyaan hain। tum bhi bi.ke. ho, varsa roohaani baap se milta hai। kitna sahaj hai। parantu koi ki sirf kathni hai, karni nahin to koi ko teer nahin lagta hai। kathni se bhal aur kiska bhala ho jaayega parantu khud ki karni nahin hai to gir padega। jinko gyaan denge woh chadh jaayega, khud gir padega। aise bhi bahut hain, baba bachchon ko poora varsa will kar dete hain, ab tum laayak ban svarga ke maalik bano। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) shreshthaachaari banne ke liye apni sab khaamiyaan nikaal sada shreemat par chalna hai। buddhi mein gyaan ratnon ki dhaarna dehi-abhimaani bankar karni hai।

2) apni kathni aur karni ek karni hai। gyaan ki dhaarna ke liye sabse moh nikaal ek baap mein hi moh rakhna hai।

vardaan:- baap-daada ke saath dvaara maaya ko door se hi moorchhit karne vaale maayaajeet, jagatjeet bhav

jaise baap ke snehi bane ho aise baap ko saathi banaao to maaya door se hi moorchhit ho jaayegi। shuru-shuru ka jo vaayda hai tumheen se khaaoon, tumheen se baithoon, tumheen se rooh ko rijhaaoon...isi vaayde pramaan saari dincharya mein har kaarya baap ke saath karo to maaya disturb kar nahin sakti, uska destruction ho jaayega। to saathi ko sada saath rakho, saath ki shakti se va milan mein magan rahne se maayaajeet, jagatjeet ban jaayenge।

slogan:- apni oonchi vritti se pravritti ki paristhitiyon ko change karo।