शनिवार 15 जनवरी 2022 की दैनिक मुरली

15-01-2022 praatahmurli om shanti "baapdaada"' madhuban

“meethe bachche - yeh daada hai wonderful post office, inke dvaara hi tumhein shivbaaba ke direction milte hain''

prashn:- baba bachchon ko kis baat mein khabardaar karte hain aur kyon?

uttar:- baba kehte bachche khabardaar raho - maaya ki jaasti chot nahin khaao, agar maaya ki chot khaate rahenge to praan nikal jaayenge aur pad mil nahin sakega। eeshvar ke paas janma lekar phir koi maaya ki chot se agar mar jaae to yeh maut sabse kharaab hai। jab maaya bachchon se ulte kaam karaati hai to baba ko bahut taras padta hai isliye khabardaar karte rehte hain।

geet:- tumhaare bulaane ko…

om shanti। baap ko bulaane ka samay hota hi tab hai jabki manushyamaatra duhkhi hote hain kyonki vikaari ban jaate hain। duhkhi kisse hote hain? yeh bhi tamopradhaan manushya nahin jaante hain। duhkhi karta hai 5 vikaaron roopi raavan। achha uska raajya kab tak chalta hai? zaroor duniya ke ant tak raajya chalega। ab kahenge raavan raajya hai। raam raajya, raavan raajya naam to mashhoor hai। raavan raajya ko bhaarat mein hi jaante hain। dekhne mein aata hai dushman bhi bhaarat ka hi hai। bhaarat ko raavan ne hi giraaya hai, jab se devta vaam maarga mein gaye arthaat vikaari bane hain। duniya yeh nahin jaanti - bhaarat jo nirvikaari tha, woh vikaari kaise bana? bhaarat ki hi mahima hai। bhaarat shreshthaachaari tha, ab patit hai। jabse patit banna shuru kiya, tab se bhagat pujaari bane hain। tab se hi bhagwan ko yaad karte aaye hain। yeh to samjhaaya gaya hai ki kalpa ke sangam yuge-yuge baap aate hain। kalpa ke 4 yug to hain, baaki paanchave sangamayug ka kisko bhi pata nahin hai। woh to sangamayug bahut kah dete hain। kehte hain yuge-yuge to kitne sangam ho gaye। satayug se treta, treta se dvaapar, dvaapar se kaliyug। parantu baap kehte hain kalpa ke sangamayuge baap ko aana hi hai। inko kalyaankaari purushottam yug kehte hain jabki manushya patit se paavan hote hain। kaliyug ke baad phir satayug aata hai। satayug ke baad phir kya hota hai? treta aata hai। sooryavanshi lakshmi-naaraayan ka jo raajya tha woh phir chandravanshi bante hain। treta mein hai raamraajya, satayug mein hai lakshmi-naaraayan ka raajya। lakshmi-naaraayan ke baad raam-seeta ka raajya aata hai। satayug-treta zaroor beech mein sangam hoga। phir unke baad ibraahim aata hai, woh hai us taraph, unka yahaan tailuk nahin। dvaapar mein phir bahut hi hote hain। islaami, bauddhi phir Christian aadi। Christian dharma sthaapan hue do hajaar varsha hua। koi-koi thoda bahut hisaab nikaalte hain। ab sangam ke baad satayug mein jaana hota hai। yeh history-geography buddhi mein honi chaahiye। gaaya bhi jaata hai oonche te ooncha bhagwan। unko hi tvamev maataashcha pita kaha jaata hai। yeh hai oonche te oonche bhagwan ki mahima। tum maat pita kisko kehte? yeh koi nahin jaante। aajkal to koi bhi moorti ke aage jaakar kehte hain - tum maat-pita.... ab maat-pita kisko kahen? kya lakshmi-naaraayan ko? brahma sarasvati ko? shankar paarvati ko? yeh bhi joda dikhaate hain। to maat-pita kisko kehna chaahiye? yadi paramatma father hai to zaroor mother bhi chaahiye। yeh jaante nahin ki maata kisko kaha jaaye? isko guhya baaten kaha jaata hai। creator hai to phir female bhi chaahiye। mahima to ek ki karenge na। aise nahin kabhi brahma ki karenge, kabhi vishnu ki karenge, kabhi shankar ki। nahin, mahima ek ki hi karte hain। gaate bhi hain ki patit-paavan aao jo zaroor ant mein aayenge। yuge-yuge kyon aayenge? patit hote hi hain ant mein। patiton ko paavan banaane vaala baap, unko zaroor patit duniya mein aana pade tab to aakar paavan banaayenge। vahaan baith thode hi banaayenge। satayug hai paavan duniya, kaliyug hai patit duniya। puraani duniya ko naya banaana, baap ka hi kaam hai। nai duniya ki sthaapna aur puraani duniya ka vinaash। brahma dvaara sthaapna kiski karaate hain? vishnupuri ki। brahma aur braahmanon dvaara sthaapna hoti hai। braahmanon dvaara yagya racha jaata hai to braahmanon ko hi zaroor padhaate honge। tum likhte ho baba brahma aur brahma mukh vanshaavli braahmanon ko raajayog ki padhaai padhaate hain। usmein sarasvati bhi aa gai। yeh braahmanon ka kul wonderful hai। bhaai-behen kabhi shaadi kar na saken। jab koi aate hain to ham unko parichay dete hain ki parampita paramatma se tumhaara kya sambandh hai? pita to kehte hi hain to woh hua baap, woh daada, varsa milta hai unse, jo gyaan ka saagar behad ka baap hai। dete hain brahma dvaara। yeh eeshvareey god hai। phir milti hai daivi god। yeh bhi samjhaana sahaj hai। chaar yugon ka hisaab bhi barobar hai। paavan se patit bhi banna hai। 16 kala se 14 kala phir 12 kala mein aana hai।

tumhein pahle-pahle sabko baap ka parichay dena hai। baba se naya koi mile to kuchh samajh na sake kyonki yeh wonder hai, baapdaada combined hai। bachchon ko bhi ghadi-ghadi bhool jaata hai - ham kisse baat karte hain! buddhi mein shivbaaba hi yaad aana chaahiye। ham shivbaaba ke paas jaate hain। tum is baba ko kyon yaad karte ho? shivbaaba ko yaad karne se tumhaare vikarma vinaash honge। samjho photo nikaalte hain to bhi buddhi shivbaaba ki taraph rahe ki yeh baapdaada donon hain। shivbaaba hai tab to yeh daada bhi hai। baapdaada ke saath photo nikaalte hain। shivbaaba ke paas is daada dvaara milne aaye hain। yeh ho gai post office। in dvaara shivbaaba ke direction lene hain। yeh badi wonderful baat hai। bhagwan ko aana hai tab jab duniya puraani hoti hai। dvaapar se lekar duniya patit hona shuru hoti hai। ant mein saari duniya patit ho jaati hai। chitron par samjhaana hai। satayug treta ko svarga, paradise kaha jaata hai। nai duniya sadaiv to nahin hogi। duniya jab aadhi poori hoti hai to unko puraani kaha jaata hai। har ek cheez ki life aadhi puraani, aadhi nai hoti hai। parantu is samay to shareer par bharosa nahin hai। yeh to aadhaakalpa ka poora hisaab hai, ismen badli ho na sake। samay ke pahle kuchh bhi badal nahin sakta aur vastuen to beech mein toot phoot sakti hain। parantu yeh puraani duniya ka vinaash aur nai duniya ki sthaapna aage peechhe ho nahin sakti। makaan to koi samay toot sakta hai, thikaana nahin hai। yeh chakra to anaadi avinaashi hai। apne time par chalta hai। puraani duniya ki poori accurate life hai। aadhaakalpa raamraajya, aadhaakalpa raavan raajya, jaasti ho nahin sakta। tum bachchon ki buddhi mein ab saari triloki aa gai hai। tum triloki ke maalik dvaara knowledge le rahe ho। tumhaara martaba is samay bahut ooncha hai। is samay tum triloki ke naath ho kyonki tum teenon lokon ke gyaan ko jaante ho। saakshaatkaar karte ho mool vatan, sookshm vatan, sthoolavtan, bachchon ki buddhi mein poori pahchaan hai। baba triloki ka naath, teenon lokon ko jaanne vaala hai। tumko knowledge dete hain to ham bhi master trilokeenaath thahre। jo gyaan baba mein hai woh ab tumhaare mein bhi hai, nambarvaar purooshaartha anusaar। phir satayug mein tum vishwa ke maalik banenge। vahaan tumko triloki ke naath nahin kahenge। lakshmi-naaraayan ko triloki ka gyaan nahin rehta hai। srishti chakra ka gyaan nahin rehta hai। tum knowledgeful god ke bachche ho। usne padhaakar tumko aap samaan banaaya hai। tum jaante ho ham phir vishnupuri ke maalik banenge। is samay jo kuchh past ho gaya hai woh knowledge bhi tumhaare paas hai। manushyon ko had ki history-geography ka maaloom hai, tumko behad ki history-geography buddhi mein hai। unhon ko baahubal ki ladaai ka maaloom hai। yog bal ki ladaai ka kisko pata bhi nahin hai। tum jaante ho yog bal se ham vishwa ke maalik bante hain। sikhlaane vaala hai baap, jo triloki ka naath hai। is samay tumhaara martaba bahut oonch hai। tum knowledgeful baap ke bachche master knowledgeful ho। yeh bhi tum jaante ho ki woh gyaan ka saagar, aanand ka saagar kis prakaar hai। usko kehte hain sat-chit-aanand swaroop। is samay aanand ko tum feel karte ho kyonki tum bahut duhkhi the। tum bhent kar sakte ho sukh aur duhkh ki। woh lakshmi-naaraayan to in baaton ko nahin jaante। woh to sirf baadshaahi karte hain। woh hai unki praalabdha। tum bhi jaakar svarga mein raajya karenge। vahaan bahut achhe mahal banaayenge। vahaan chinta ki koi baat nahin rehti। yeh bhi buddhi mein sthaai rehna chaahiye to khushi ka paara bhi chadhe। toofaan to anek prakaar ke aayenge, sampoorn to koi bana nahin hai। baap samjhaate hain tumko bahut stheriyam banna hoga। vo log amarnaath par jaate hain phir bhi unko utarna to zaroor hai। tum jaayenge baap ke paas phir nai duniya satayug mein aayenge tab phir utarna shuru hoga। hamaari yeh behad ki yaatra hai। pahle baba ke paas aaraam se rahenge phir raajdhaani mein raajya karenge phir janma by janma utarte hi aate hain। isko chakra kaho ya utraai chadhaai kaho, baat ek hi hai। neeche se oopar chale jaayenge phir utarna shuru hoga। yeh sab baaten jo shrewd buddhi vaale hain, woh achhi tarah se samajhte hain aur samjha bhi sakte hain। yeh baba bhi nahin jaanta tha। agar inka koi guru hota to us guru ke aur bhi followers hote। aise thode hi sirf ek hi follower hoga। shaastron mein to hai bhagvaanuvaach he arjun, ek ka hi naam likh diya hai। arjun ke rath mein baithe hain to jaise vahi sunta hai, aur bhi to honge na, sanjay bhi hoga। yeh behad ka school ek hi baar khulta hai। woh school to chalte hi aate hain, jaisa raaja vaisi language। vahaan satayug mein bhi to school mein jaate hain na। bhaasha, dhandha-dhori aadi sab seekhenge। vahaan bhi sab kuchh banta hoga। sabse achhe te achhi cheez jo honi chaahiye woh svarga mein hoti hai। phir woh sab kuchh puraana ho jaata hai। achhe te achhi vastu milti hai devtaaon ko। yahaan kya milega? mahsoos karte ho ki nai duniya mein sab kuchh naya milega। yeh sab baaten samajhkar phir manushyon ko samjhaani hain। abhi ham sangam par hain, hamaare liye ab duniya badal rahi hai। drama-anusaar main phir aaya hoon - tumko patit se paavan devi-devta banaane। yeh chakra phirta hai। prajaapita brahma dvaara zaroor brahman hi rache honge। braahmanon dvaara yagya racha hai। brahman so devta banenge isliye viraat roop ka chitra bhi zaroori hai, jisse siddha hota hai brahma mukh vanshaavli brahman hi so devta banenge। vriddhi hoti jaayegi। devta so kshatriy, vaishya, shoodra banenge। yeh sangamayug naameegraami hai। aatma paramatma alag rahe bahukaal... chadhti kala phir utarti kala... yeh bhi samjhaana hai। pahle eeshvareey aulaad phir devtaai aulaad phir thoda-thoda kam hota jaata hai। tum poochh sakte ho ki duhkh harta sukh karta kisko kehte ho? zaroor kahenge parampita paramatma ko। jab duniya ka duhkh mit jaayega to vishnupuri ban jaayegi। braahmanon ke duhkh mit jaate hain, sukh mil jaate hain। yeh hai second ki baat। laukik baap ki god se nikal paarlaukik baap ki god mein aa gaye, yeh hai khushi ki baat।

yeh sabse bada imtahaan hai। raajaaon ka raaja bante hain। raajayog parampita paramatma ke sivaae koi sikhla na sake। yeh chitra bahut achhe hain। aise kaun kahenge ki mera parampita paramatma se koi naata nahin hai। aise naastik se baat nahin karni chaahiye। maaya chalte-chalte bachchon se bhi kabhi-kabhi ulta kaam kara deti hai। baba ko to taras padta hai। phir samjhaate hain - khabardaar raho। jaasti chot nahin khaao, nahin to pad nahin paayenge। maaya to bahut jor se thappad lagaati hai, jo praan hi nikal jaate hain। mar gaya phir janma din mana nahin sakenge। kahenge bachcha mar gaya। eeshvar ke paas janma le phir mar jaae - yeh maut sabse kharaab hai। koi baat right nahin lagti to chhod do। sanshay padta hai to nahin dekho। baba kehte hain manamnaabhav, mujhe yaad karo aur svadarshan chakra phiraao। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap samaan master knowledgeful banna hai। gyaan ka simran kar apaar khushi mein rehna hai। aanand ka anubhav karna hai।

2) anek prakaar ke toofaanon mein rehte svayan ko stheriyam banaana hai। maaya ki chot se bachne ke liye bahut-bahut khabardaar rehna hai।

vardaan:- divya gunon roopi prabhu prasaad khaane aur khilaane vaale sangamayugi pharishta so devta bhav

divya gun sabse shreshtha prabhu prasaad hai। is prasaad ko khoob baanton, jaise ek do mein sneh ki nishaani sthool toli khilaate ho, aise ye gunon ki toli khilaao। jis aatma ko jis shakti ki aavashyakta hai use apni mansa arthaat shuddh vritti, vibration dvaara shaktiyon ka daan do aur karma dvaara gun moorta ban, gun dhaaran karne mein sahayog do। to isi vidhi se sangamayug ka jo lakshya hai “pharishta so devta'' yeh sahaj sarva mein pratyaksha dikhaai dega।

slogan:- sada umang-utsaah mein rehna - yahi brahman jeevan ka saans hai।

lavleen sthiti ka anubhav karo

parmaatma-pyaar ke anubhav mein sahajyogi ban udte raho। parmaatma-pyaar udaane ka saadhan hai। udne vaale kabhi dharni ki aakarshan mein aa nahin sakte। maaya ka kitna bhi aakarshit roop ho lekin woh aakarshan udti kala vaalon ke paas pahunch nahin sakti।