शुक्रवार 29 अप्रैल 2022 की दैनिक मुरली

29-04-2022 praatahmurli om shanti "baapdaada"' madhuban

“meethe bachche - kuchh bhi sahan karna pade lekin is antim janma mein pavitra zaroor banna hai, baap ko pavitrata ki hi madad chaahiye''

prashn:- antim drishya kaun sa hoga? jise samajhne ke liye achhi vishaal buddhi chaahiye?

uttar:- antim drishya sabke vaapis jaane ka hai… kaha jaata hai raam gayo raavan gayo... baaki srishti ki saphaai karne vaale, nai duniya ki taiyaari karne vaale thode bachenge। ham bhi jaayenge phir jahaan jeet vahaan janma hoga। bhaarat mein hi jeet hogi, baaki sab khalaas ho jaayenge। raajaayen aadi jo dhanvaan honge - woh bachenge, jinke paas hamaara janma hoga। phir ham srishti ke maalik banenge। yeh samajhne ke liye vishaal buddhi chaahiye।

geet:- nayan heen ko raah....

om shanti। bachchon ne geet suna। kehte hain he prabhu ham andhe hain। dar dar pag-pag thokren khaate rehte hain। apne ko aapehi kehte hain ki ham andhe ki aulaad andhe hain। he prabhu aao। gurooon ke dar, mandiron ke dar par, nadiyon ke dar par dhakke khaate rehte hain। arth to nahin jaante ki hamaara woh baap hai। prabhu ko bhi anek naam de diye hain। kehte hain niraakaar naam roop se nyaara hai। ab naam roop se nyaari to koi cheez hoti nahin। tum kehte ho parampita paramatma kab naam roop se nyaara ho sakta hai kya? manushya yeh to aapehi gaate rehte hain ki ham andhe hain। baap aakar jab raasta bataate hain to sajje ho jaate hain। baap jo gyaan ka saagar hai, woh tum bachchon ko padhaate hain, mukti jeevanmukti ka raasta bataate hain। aur koi bhi saadhu-santa, sannyaasi mukti jeevanmukti ka raasta nahin bata sakte। to unko guru kaise kah sakte। drama mein unka part hai। bhaarat ko pavitrata par thamaana hai। bhal pavitra to rehte hain parantu gyaan-yog se nahin pavitra bante। davaai khaakar indriyon ko murda bana dete hain, ismen koi taakat nahin। taakat to tab mile jab grihastha vyavhaar mein rehte va stri purush donon svayanvar rach shaadi kar phir pavitra rahen। usko kaha jaata hai baal brahmachaari yugal। yahaan bhi baap se bal milta hai। parampita paramatma hi aakar pavitra maarga sthaapan karte hain। satayug mein devi devta pavitra pravritti maarga vaale the। unko pavitra rehte bhi bachche the। manushya yeh nahin jaante ki parampita paramatma kaise baith unhon ko taakat dete hain, jo ghar grihastha mein rehte bhi nangan nahin hote। dropdi ne pukaara tha ki yeh duhshaasan hamko nangan karte hain, aise yahaan bhi bahut bachchiyaan pukaarti hain। ab paramatma aakar 21 janmon ke liye nangan hone se bachaate hain। dropdi koi ek nahin thi, tum sab dropdiyaan ho। tum bachchon ko shiksha milti hai - bhal pati tumhein maare peete parantu tumko sahan karna hai kyonki pavitra hone bigar tum pavitra duniya ke maalik to ban nahin sakti। kalpa-kalpa tum maataayen hi shiv shaktiyaan bani ho। jagat amba sarasvati ki sher par savaari dikhaate hain, yeh bhi mahima tumhaari hai। yeh hai hi patit duniya athva aasuri duniya। paavan duniya maana eeshvareey duniya। to raam aakar raamraajya sthaapan karte hain। pavitrata first। kaam vikaar kitna balvaan hai। achhe-achhe manushya bhi kah dete hain - impossible hai jo koi pavitra rah sake। are satayug mein devi devtaayen sampoorn nirvikaari the। tum mahima gaate ho aap sarva-gun sampanna ho, ham neench paapi hain। to unko banaane vaala koi to hoga na। baap ne sangamayug par aakarke satayug ki sthaapna ki hai। baap hi aakar aasuri duniya ko daivi duniya banaate hain। log to patit ka arth bhi nahin samajhte hain। are tum pukaarte ho ki ham sab patit hain, he patit-paavan aao। bhaarat pavitra tha to double sirtaaj tha। ab tum har ek ki biography ko bhi jaante ho। ab tum baap ke bane ho। tumko god father hi buddhi mein yaad aata hai। woh baap niraakaar hai, paramdham mein rahne vaale hain। aise baap ko bilkul nahin jaante। manushya is samay bahut duhkhi hain। maut ka dekho kitna dar lagta hai। ab baap kehte hain maut saamne khada hai। pahle khoon ki nadiyaan bahengi phir doodh ki nadiyaan bahengi।

ab baap tumko vishay saagar se nikaal ksheer saagar mein le jaate hain। lakshmi-naaraayan, ksheer saagar satayug mein hain। yahaan to doodh peene ke liye bhi nahin milta, powder milta hai। satayug mein koi cheez ki kami nahin rehti। barobar bhaarat pahle svarga tha, abhi narka hai। ek do ko daste rehte hain। shakla bhi manushya ki hai parantu chalan gandi hai। ek do mein ladte-jhagadte rehte hain। hai hi paap aatmaon ki duniya, to sadaachaari kahaan se aaye। koi ne daan-punya kiya to sadaachaari ho gaya kya? abhi to sab raavan ki mat par hain। devtaayen kitne pavitra sukhi the। raamraajya aur raavan raajya kisko kaha jaata hai, yeh bhi bhaaratvaasi nahin jaante hain। raamraajya chaahte hain, parantu woh kaun sthaapan karte hain - yeh nahin jaante। is samay manushya ko jo paisa do to usse paap hi karte hain kyonki hai hi paap aatmaon ki duniya। ab tumko chalna hai baap ki mat par। tum samajhte ho ham to baap se varsa lenge hi। lekin yeh antim janma pavitra bano, 63 janma tum vikaar mein gaye ho। ab ek janma pavitrata ki madad karo to pavitra rehna padega। krishna gora tha phir kaam chita par baithne se ab shyaam bane hain। phir gyaan chita par baithne se gora svarga ka maalik bante hain। tum hi devta the, ab asur ban gaye ho। yeh chakra hai poojya so phir pujaari... sannyaasi kah dete aatma so paramatma। raat din ka farka ho gaya। drama anusaar sabko girna hi hai। ab tumko gurooon ka guru, patiyon ka pati behad ka baap mila hai, to unki shreemat par chalna hai। parampita paramatma ko to maante ho na। shiv jayanti bhi manaate hain parantu samajhte nahin to shivbaaba ne kya aakar kiya! kaise kiya? somnaath ka itna bada mandir banaaya hai। zaroor bhaarat mein hi aaye hain। kaise aaya, kya kiya, kuchh bhi bata nahin sakte। yeh bhi parampara se chala aata hai। ganga ka mela, kumbha ka mela kehte hain parampara se chala aata hai। yeh sab ulta bataate hain। kya satayug se hi duniya patit thi? jo kuchh bataate hain, arth kuchh bhi nahin samajhte। isko bhakti maarga kaha jaata hai। Christ aaya phir kab aayega? koi ko pata hi nahin hai। pradarshani mein tum hajaaron ko samjhaate ho phir bhi koto mein koi nikalta hai।

abhi tum behad ke baap se behad ka varsa paate ho। tum jaante ho abhi duniya badal rahi hai। tum kehte ho ki ham sannyaasiyon ko bhi pavitra rahkar dikhaayenge। aage chalkar ve log bhi maanenge ki inhon ko shiksha dene vaala parampita paramatma hai। tum sirf yeh siddha kar bataao ki baap sarvavyaapi nahin hai, geeta shreekrishna ne nahin gaai hai, to unki ekdam aabru chat ho jaae। yeh sab pichhaadi mein hoga। tum bachche abhi samajhte ho parampita paramatma hamaara baap hai। pahle sookshm vatan mein brahma vishnu shankar yeh rachna rachte hain। brahma hai prajaapita। brahma hi brahman paida karte hain। brahman varna hai sabse ooncha। shivbaaba ke mukh vanshaavli brahman। woh hain kukh vanshaavli। baap ki shreemat par chalne se tum paavan banne vaale ho। dehdhaariyon ko bhool jaana hai। mehnat hai na। abhi naatak poora hota hai, jo bhi actors hain sab chale jaayenge, baaki thode rahenge। raam gayo raavan gayo... baaki bachenge kaun? donon taraph ke thode-thode hi bachenge, baaki sab vaapis chale jaayenge। phir makaan aadi banaane vaale, saphaai karne vaale bhi bachte hain। samay chaahiye na। ham bhi chale jaayenge। tumko raajaai mein janma milega। vo phir saphaai karte hain। baba ne kaha hai jahaan jeet vahaan janma। bhaarat mein hi jeet hogi। baaki woh sab khalaas ho jaayenge। raajaayen aadi jo dhanvaan honge, woh bachenge, jinke paas tum janma lenge। saari srishti ka phir tumko maalik banna hai। aise bhi nahin yahaan ka dhan daulat koi tumko vahaan kaam mein aayega। yahaan ki milkiyat to worth not a penny hai। vahaan sab kuchh naya ban jaayega। heere javaahron ki khaaniyaan bharpoor ho jaayengi। nahin to mahal kahaan se banenge। kitni buddhi chaahiye samajhne ki।

tum bachche abhi double ahinsak bante ho, tum jaante ho ki ham koi bhi hinsa kar nahin sakte। yahaan to double hinsa hai। satayug mein hinsa hoti hi nahin। unko hi svarga kaha jaata hai। baap kehte hain tum samajhte ho na - yeh gyaan saahookaaron ke liye mushkil hai। baba hai gareeb nivaaz, shivbaaba to daata hai। yeh makaan aadi bhi sab tumhaare liye hi hain। vishwa ka maalik tumko hi banaata hoon। to phir main naye makaan mein kyon baithoon! yeh baba kahe ham to nahin baithenge। baba kehte hain main nahin baithta to tum kaise baithenge। shivbaaba kehte hain - main abhokta, asochta hoon, abhokta, asochta ka arth kya hai - yeh bhi tum jaante ho। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) ab naatak poora ho raha hai, vaapis ghar chalna hai isliye paavan zaroor banna hai। koi bhi dehdhaari ko yaad nahin karna hai।

2) baap se bal lekar is antim janma mein stri purush saath rehte bhi pavitra bankar dikhaana hai। behad ka baap mila hai to uski shreemat par zaroor chalna hai।

vardaan:- apne devtaai sanskaaron ko emerge kar divyata ka anubhav karne vaale vyartha se innocent, avidya swaroop bhav

jab aap bachche apne satayugi raajya mein the to vyartha va maaya se innocent the isliye devtaaon ko saint va mahaan aatma kehte hain। to apne vahi sanskaar emerge kar, vyartha ke avidya swaroop bano। samay, shvaas, bol, karma, sabmen vyartha ki avidya arthaat innocent। jab vyartha ki avidya hogi tab divyata svatah aur sahaj anubhav hogi isliye yeh nahin socho ki purooshaartha to kar rahe hain - lekin puroosh ban is rath dvaara kaarya karaao। ek baar ki galti dubaara repeat na ho।

slogan:- roohaani gulaab woh hai jo kaanton ke beech mein rehte bhi nyaare aur pyaare rehte hain।

maateshvari ji ke anmol mahaavaakya

kai manushya prashn poochhte hain ki kya saboot hai ki ham aatma hain! ab is par samjhaaya jaata hai, jab ham kehte hain aham aatma us paramatma ki santaan hain, ab yeh hai apne aapse poochhne ki baat। ham jo saara din main main kehta rehta hoon, vo kaunsi power hai aur phir jisko ham yaad karte hain vo hamaara kaun hai? jab koi ko yaad kiya jaata hai to jarur ham aatmaon ko unhon dvaara kuchh chaahiye, har samay unki yaad rahne se hi hamko us dvaara praapti hogi। dekho, manushya jo kuchh karta hai jarur man mein koi na koi shubh ichchha avashya rehti hai, koi ko sukh ki, koi ko shanti ki ichchha hai to jarur jab ichchha utpanna hoti hai to avashya koi lene vaala hai aur jis dvaara vo ichchha poorn hoti hai vo avashya koi dene vaala hai, tabhi to unko yaad kiya jaata hai। ab is raaz ko poorn reeti se samajhna hai, woh kaun hai? yeh bolne vaali shakti main svayan aatma hoon, jiska aakaar jyoti bindu misal hai, jab manushya sthool shareer chhodta hai to vo nikal jaati hai। bhal in okhon se nahin dikhaai padti hai, ab isse siddha hai ki uska sthool aakaar nahin hai parantu manushya mahsoos avashya karte hain ki aatma nikal gai। to ham usko aatma hi kahenge jo aatma jyoti swaroop hai, to avashya us aatma ko paida karne vaala paramatma bhi uske hi roop muaaphik hoga, jo jaisa hoga unki paidaais bhi vaisi hogi। phir ham aatmaayen us paramatma ko kyon kehte hain ki vo ham sarva aatmaon se param hain? kyonki unke oopar koi bhi maaya ka lep-chhep nahin hai। baaki ham aatmaon ke oopar maaya ka lep-chhep avashya lagta hai kyonki ham janma maran ke chakra mein aati hain। ab yeh hai aatma aur paramatma mein pharka। achha - om shanti।