शनिवार 19 नवंबर 2022 की दैनिक मुरली

19-11-2022 praatahmurli om shanti "baapdaada"' madhuban

“meethe bachche - patit-paavan baap aaye hain paavan banaakar paavan duniya ka varsa dene, paavan banne vaalon ko hi sadgati praapta hogi''

prashn:- bhogi jeevan, yogi jeevan mein parivartan hone ka mukhya aadhaar kya hai?

uttar:- nishchay। jab tak nishchay nahin ki hamko padhaane vaala svayan behad ka baap hai tab tak na yog lagega, na padhaai hi padh sakenge। bhogi ke bhogi hi rah jaayenge। kai bachche class mein aate hain lekin padhaane vaale mein nishchay nahin। samajhte hain haan koi shakti hai lekin niraakaar shivbaaba padhaate hain - yeh kaise ho sakta? yeh to nai baat hai। aise pattharbuddhi bachche parivartan nahin ho sakte।

geet:- om namo shivaae…

om shanti। bachche yeh to samajh gaye hain ki shivbaaba hamko samjhaate hain। ghadi-ghadi to nahin kahenge bhagvaanuvaach। yeh to kaayda nahin ki ghadi-ghadi apni mahima karni hai। shivbaaba jo sabka baap hai, woh ham bachchon ko baith samjhaate hain। bhavishya 21 janmon ke liye atal akhanda daivi svaraajya praapta karaate hain। jaise school athva college mein bachche jaante hain ki teacher humein aap samaan barrister bana rahe hain, em object hai। baaki satsangon mein jo jaate hain ved shaastra aadi sunne ke liye, usse to kuchh milta nahin hai isliye teacher phir bhi achhe hote hain jo shareer nirvaah arth koi jismaani vidya sikhlaate hain, jisse aajeevika hoti hai। baaki sab durgati hi karte hain, bachche shaadi na karna chaahen to baap kahega ki varsa bhi nahin milega। jahaan chaahe vahaan chale jaao। yahaan to baap amrit bhi pilaate hain aur varsa bhi dete hain kehte hain ki pavitra bano to pavitra duniya ke maalik banenge। kitna farka hai - had ke baap mein aur behad ke baap mein। woh raat mein le jaate hain, yeh din mein le jaate hain। yeh hai hi patit-paavan। kehte bhi hain ki sadgati daata ek hai - jo aakar sabki sadgati karte hain, phir durgati kisne ki? yeh nahin jaante। baap samjhaate hain - sab aasuri mat vaale hain। yahaan aate hain asuron se devta banne। yeh indraprastha hai। kai asur bhi chhipkar aae baithte hain। sab centres par aise chhipe asur (vikaari) bahut aate hain, phir ghar mein jaakar vish peete hain। do kaam to chal na saken। woh pattharbuddhi ban padte hain। baap ko pahchaante hi nahin। nishchay bilkul hi nahin ki hamko behad ka baap padhaate hain। aise hi aakar baith jaate hain। to na yog lagega, na padhaai hi padh sakte। bhogi ke bhogi hi honge। bahut samajhte hain ki koi shakti hai bas। niraakaar shiv-baba kaise aa sakta! koi shaastra mein bhi likha hua nahin hai। yeh hain nai baaten। gaate bhi hain shiv jayanti.. parantu pattharbuddhi hone ke kaaran samajhte nahin hain। shiv hai tab to sab bhakta yaad karte hain। kehte bhi hain shivaae namah, samajhte hain woh paramdham mein rehte hain। hamaara baap bhi hai parampita, to woh sabka father ho gaya na। bhaarat mein aise bhi hain jo father ko nahi maante। manushyon ko samjhaana bahut mushkil hai। manushya to yeh bhi nahin samajhte ki abhi durgati ka samay chal raha hai। bhakti maarga mein pahle avyabhichaari bhakti thi ab vyabhichaari ban gai hai। vyabhichaari aur avyabhichaari mein kitna antar hai। woh paap aatma, woh punya aatma। avyabhichaari bhakti hai hi sachchi bhakti। us samay yaani dvaapar mein manushya sukhi bhi rehte hain। dhan-daulat aadi sab rehta hai। kaliyug mein jaasti durgati ko paate hain। jab vyabhichaari bhakti mein aate hain tab vikaari bhi bahut bante jaate hain। din-pratidin vikaar bhi jor bharte jaate hain। pahle satopradhaan vikaar the, abhi tamopradhaan vikaar hain। sab bilkul hi tamopradhaan hain। ghar-ghar mein kitne jhagde hain। shivbaaba baith bachchon ko samjhaate hain। shreekrishna to baap nahin thahra। koi ki bhi biography nahin jaante hain। yeh hai patit-paavan। parampita paramatma ko maante hain ki woh gyaan ka saagar hai, paani ka saagar thode hi patit-paavan, knowledgeful hai। manushya to paani ke saagar se nikli hui paani ki nadiyon ko patit-paavni samajh lete hain। unse poochhna chaahiye ki jaise geeta ke bhagwan ka occupation poochha jaata hai - niraakaar parampita paramatma hai rachayita aur shreekrishna hai rachna, ab bataao geeta ka bhagwan kaun? bhagwan to ek ko hi kahenge। phir vyaas ko bhagwan kaise kah sakte। to aise-aise prashn poochhna chaahiye - patit-paavan, parampita paramatma gyaan ka saagar hai, unse yeh gyaan gangaayen kaise nikalti hain? parampita paramatma brahma mukh kamal dvaara brahman mukh vanshaavli rachte hain। unhon ko brahma mukh se gyaan mil raha hai, jisse sadgati ko paate hain। ab paani ke saagar se paavan bante hain va gyaan saagar se। paani se manushya to paavan ho na saken। to yeh paheli bhi poochhni pade, inko poochhne se paavan duniya ka maalik ban sakte hain। bulaate to unko hi hain ki he patit-paavan seetaaraam। phir ganga mein snaan aadi karte hain, to yeh paheli bhi add karni chaahiye। samay par har ek cheez shobhti hai। jaise vo geeta ke bhagwan vaali paheli hai, vaise yeh bhi paheli hai। khyaal chalte to hain na - kya aisi cheezen banaayen jo manushya sadaiv apne paas yaad-gaar rakhen। achhi cheez hogi to apne paas rakhenge। kaagaj aadi to phenk dete hain। devtaaon ki achhi cheez hogi to woh phaadenge nahin। service ki practice vaalon ka saara din vichaar saagar manthan chalta rahega aur kaam karke dikhaayenge। sirf kehna nahin hai ki aisa karna chaahiye। yeh kisko kehte ho? baba karega va bachche karenge? bolo kaun? baap to direction dete hain। aise achhe chitra, calendar chhapaao, trimoorti shiv ke calendars nikalne chaahiye। trimoorti shiv jayanti kehna right hai। sirf shiv jayanti kehna wrong hai। ek bachche ki dil hai trimoorti shiv jayanti ka calendar banaaven so bhi rangeen। trimoorti se samjhaani achhi milti hai। baba locket bhi isliye banvaate hain ki unse achha samjha sakte hain। brahma dvaara shivbaaba sadgati karte hain। to jo mehnat karta hai vahi vishnupuri ka maalik banta hai। baaki jo gyaan nahin lete unka vinaash ho jaata hai। woh sazaayen bhi khaate hain, pad bhi nahin paate। bhagat bhagwan ko yaad karte hain parantu jab bhagwan aate hain tab kitne thode unhein pahchaankar unka bante hain। koton mein koi। jo mukti ke liye purushaartha karte hain woh pad achha pa nahin sakenge। vikarma vinaash nahin honge isliye saakshaatkaar karaaya tha - dharma sthaapak bhi aate hain drishti lene। yaad karte-karte vikarma vinaash karte jaayen to pad ooncha pa sakte hain, aur dharma vaale bhi aayenge so bhi pichhaadi mein, jo bade honge। aise nahin ki abhi ka pope aayega, na na .... pahle number ka pope, jo abhi antim janma mein hai, woh aayega। hisaab hai bada bhaari। ab yeh kumbha ka mela hai। yeh sab bhakti maarga ki saamagri hai। jab durgati ko paane ka poora grahan lag jaata hai, tab baap aakar 16 kala sampoorn banaate hain। grahan ko svadarshan chakra se nikaala jaata hai। yeh jo apna gola hai, usmein neeche likhna chaahiye yeh hai svadarshan chakra। yeh bahut achhi cheez hai। yeh eeshvareey kot aaph arms hai। yeh to eeshvareey baaten hain। slides jo bana rahe hain unke liye bhi baba samjhaani dete rehte hain। agar samjho vo murli na sunen to direction amal mein la na saken। murli to roz padhni chaahiye। service mein jo hain unko act mein aana chaahiye। trimoorti ka bhi slides banaate hain, unmein akshar bahut achhe hain। sthaapna aur vinaash - do gole bhi chaahiye। yeh narka, yeh svarga। yeh aaj ka bhaarat aur kal ka bhaarat। baap second mein jeevanmukti dene vaala baitha hai। baba ko pahchaana, nishchay hua bas। jeevanmukti paane ka purushaartha chal padta hai। janma to liya na। baap se poora varsa lena hai। phir vikaar ki maang nahin kar sakte। baap kehte hain bhrashtaachaari ko varsa mil na sake। practical mein inka (brahma ka) hi misaal dekha na। aise bahut mushkil nikalte hain। apni ijzat aadi bhi bahut dekhte hain na। creator baap hai, sabko unki aagya par chalna hai। tum bhi shreemat par nahin chalte ho to pad bhrashta ho jaata hai।

baap kehte hain - is gyaan maarga mein nashtomoha achha chaahiye। baba ki aagya mili hui hai, jo bachche aagyaakaari nahin, woh kapoot thahre। woh bachcha, bachcha nahin। pavitrata ki aagya to achhi hai na। raajayog to baap abhi sikhlaate hain। manushya to bichaare samajhte nahin। bachchon mein bhi nambarvaar purushaartha anusaar samajhte hain। baap itna direction dete hain, koi bachche mushkil karke dikhaate hain। baap kehte hain - trimoorti ka calendar banaana hai। saara madaar hai trimoorti shiv ke chitra par। likha hua hai brahma dvaara sthaapna। zaroor shivbaaba svarga ki sthaapna karenge na। kaliyug aasuri raajya ka vinaash hoga। aasuri raajya mein kitne dher hain। daivi raajya mein kitne thode hain। likha hua bhi hai ki anek dharmon ka vinaash, ek sat dharma ki sthaapna। baap kehte hain - main kitna shrringaarta hoon phir bhi sudharte nahin hain, ulta sulta bolte rehte hain। yahaan baba kehte hain deh sahit jo kuchh hai sab kuchh bhool maamekam yaad karo। apni deh mein bhi na phanso। kiski deh mein phansane se gir padte hain। jaise mama ki deh se pyaar tha to mama ke jaane ke baad kitne mar gaye kyonki naam roop mein phanse hue the। baap kitna kehte hain ki deh-abhimaani mat bano, maamekam yaad karo। tum is brahma ke shareer ko bhi yaad nahin karo। shareer ko yaad karne se poora gyaan utha nahin sakte। dehi-abhimaani banne mein bahut mehnat hai। baap ki yaad mein rehna - yeh bahut difficult hai। gyaan to bahut achha-achha sunaate hain। yog mein mushkil rehte hain। jitna roostam, utna maaya ke toofaan aayenge। kisi na kisi ke naamroop mein phans dhokha kha lete hain, ismen badi khabardaari chaahiye। yog mein hi badi mehnat hai। knowledge to sahaj hai। yog mein hi ghadi-ghadi bhool jaate hain isliye baap kehte hain vikarmaajeet kaise banenge। yog mein raho to paap bhi nahin honge। nahin to sauguna ho jaata hai। yahaan to khud dharmaraaj aur baap donon saath hain isliye khud kehte hain ki baap ke aage koi paap nahin karna, nahin to sauguna danda pad jaayega। yog se hi vikarma-jeet banna hai। svadarshan chakra ko to jaanna sahaj hai। is gole ke neeche likhna hai chakra, na ki charkha। baba yuktiyaan to bahut batlaate hain। bachchon ko act mein aana hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) kisi bhi dehdhaari ke naam roop mein atakna nahin hai। apni deh mein bhi nahin phansana hai, ismen bahut khabardaari rakhni hai।

2) gyaan maarga mein nashtomoha zaroor banna hai। pavitrata ki aagya maanni hai aur doosron ko bhi pavitra banaane ki yukti rachni hai।

vardaan:- sarva vikaaron ke ansh ka bhi tyaag kar sampoorn pavitra banne vaale number one vijayi bhav

sampoorn pavitra woh hai jismen apvitrata ka ansh-maatra bhi na ho। pavitrata hi brahman jeevan ki personality hai। yeh personality hi seva mein sahaj saphalta dilaati hai। lekin yadi ek bhi vikaar ka ansh hai to doosre saathi bhi uske saath zaroor honge। jaise pavitrata ke saath sukh-shanti hai, aise apvitrata ke saath paanchon vikaaron ka gahra sambandh hai, isliye ek bhi vikaar ka ansh na rahe tab number one vijayi banenge।

slogan:- himmat ka ek kadam rakho to hajaar guna madad mil jaayegi।