रविवार 8 जनवरी 2023 की दैनिक मुरली

08-01-23 praatahmurli om shanti ''avyakt-baapdaada'' revise 23-04-93 madhuban

nishchaybuddhi bhav, amar bhav

aaj baapdaada sarva ati snehi, aadi se yagya ki sthaapna ke sahayogi, anek prakaar ke aaye hue bhinna-bhinna samasyaaon ke paper mein nishchaybuddhi vijayi ban paar karne vaali aadi snehi, sahayogi, atal, achal aatmaon se milan manaane aaye hain। nishchay ki subject mein paas ho chalne vaale bachchon ke paas aaye hain। yeh nishchay chaahe is puraani jeevan mein, chaahe agle jeevan mein bhi sada vijay ka anubhav karaati rahegi। ‘nishchay' ka, ‘amar bhav' ka vardaan sada saath rahe। vishesh aaj jo bahutkaal ki anubhvi bujurga aatmaayen hain, unhon ke yaad aur sneh ke bandhan mein bandhakar baap aaye hain। nishchay ki mubaarak!

ek taraph yagya arthaat paandavon ke kile ki jo neenv arthaat foundation aatmaayen hain woh bhi sabhi saamne hain aur doosre taraph aap anubhvi aadi aatmaayen is paandavon ke kile ki deevaar ki pahli eeten ho। foundation bhi saamne hai aur aadi eete, jinke aadhaar par yeh kila majboot ban vishwa ki chhatrachhaaya bana, woh bhi saamne hain। to jaise baap ne bachchon ke sneh mein “ji hazoor, haazir'' karke dikhaaya, aise hi sada baapdaada aur nimitta aatmaon ki shreemat va direction ko sada ‘ji haazir' karte rehna। kabhi bhi vyartha man-mat va parmat nahin milaana। haazir hazoor ko jaan shreemat par udte chalo। samjha? achha!

madhuban nivaasiyon ko seva ki mubaarak dete hue baapdaada bole :-

achha, vishesh madhuban nivaasiyon ko bahut-bahut mubaarak ho। saara season apni madhurta aur athak seva se sarva ki seva ke nimitta bane। to sabse pahle saari season mein nimitta sevaadhaari vishesh madhuban nivaasiyon ko bahut-bahut mubaarak। madhuban hai hi madhu arthaat madhurta। to madhurta sarva ko baap ke sneh mein laati hai isliye chaahe hall mein ho, chaahe chale gaye ho lekin sabhi ko vishesh ek-ek department ko baapdaada vishesh mubaarak seva ki de rahe hain aur “sada athak bhav, madhur bhav'' ke vardaanon se badhte, udte chalo।

avyakt baapdaada ki personal mulaakaat

1) albelaapan kamjori laata hai, isliye alert raho

sabhi sangamayugi shreshtha aatmaayen ho na! sangamayug ki visheshta kya hai jo kisi bhi yug mein nahin hai? sangamayug ki visheshta hai ek to pratyaksha phal milta hai aur ek ka padma guna praapti ka anubhav isi janma mein hi hota hai। pratyaksha phal milta hai na। agar ek second bhi himmat rakhte ho to madad kitne samay tak milti rehti hai! kisi ek ki bhi seva karte ho to khushi kitni milti hai! to ek ki padma guna praapti arthaat pratyakshaphal is sangam par milta hai। to taaja fruit khaana achha lagta hai na। to aap sabhi pratyaksha phal arthaat taaja phal khaane vaale ho, iseelie shaktishaali ho। kamjor to nahin hain na। sab powerful hain। kamjori ko aane nahin dena। jab tandarusta hote hain tab kamjori svatah khatma ho jaati hai। sarvashaktivaan baap dvaara sada shakti milti rehti hai, to kamjor kaise honge। kamjori aa sakti hai? kabhi galti se aa jaati hai? jab kumbhakran ki neend mein albele hokar so jaate ho tab aa sakti hai, nahin to nahin aa sakti hai। aap to alert ho na। albele ho kya? sabhi alert hain? sada alert hain? sangamayug mein baap mila sab-kuchh mila। to alert hi rahenge na। jisko bahut praaptiyaan hoti rehti hain vo kitna alert rehte hain! rivaaji businessman ko business mein praaptiyaan hoti rehti hain to albela hoga ya alert hoga? to aapko ek second mein kitna milta hai! to albele kaise honge? baap ne sarva shaktiyaan de deen। jab sarva shaktiyaan saath hain to albelaapan nahin aa sakta hai। sada hoshiyaar, sada khabardaar raho!

yu.ke. ko to baapdaada kehte hi hain O.ke.। to jo O.ke. (bilkul theek) hoga woh jab alert hoga tab to O.ke. hoga na। foundation powerful hai, isliye jo bhi taal-taaliyaan nikli hain woh bhi shaktishaali hain। vishesh baapdaada ne brahma baap ne apne dil se london ka pahla foundation daala hai। brahma baap ka vishesh laadla hai। to aap pratyaksha phal ke sada adhikaari aatmaayen ho। karma karne ke pahle phal taiyaar hai hi। aise hi lagta hai na। ya mehnat lagti hai? naachte-gaate phal khaate rehte ho। vaise bhi double videshiyon ko phal achha lagta hai na। baapdaada bhi yu.ke. arthaat sada O.ke. rahne vaale bachchon ko dekh harshit hote hain। apna yeh title sada yaad rakhna, O.ke.। yeh kitna badhiya title hai! sabhi sada O.ke. rahne vaale aur auron ko bhi apne chehre se, vaani se, vritti se O.ke. banaane vaale। yahi seva karni hai na! achha hai। seva ka shauk bhi achha hai। jo bhi jahaan se bhi aaye ho lekin sabhi teevra purushaarthi aur udti kala vaale ho। sabse jyaada khush kaun rehta hai? nashe se kaho main! sivaae khushi ke aur hai hi kya! ‘khushi' brahman jeevan ki khuraak hai। khuraak ke bina kaise chalenge। chal rahe ho, to khuraak hai tabhi to chal rahe ho na। sthaan bhi badh rahe hain। dekho, pahle teen pair prithvi lena badi baat lagti thi aur abhi kya lagta hai? sahaj lagta hai na। to london ne kamaal ki hai na। (abhi 50 acre jameen mili hai) himmat dilaane vaale bhi achhe hain aur himmat rakhne vaale bhi achhe hain। dekho, aap sabki anguli nahin hoti to kaise hota। to sabhi yu.ke. vaale lucky hain aur anguli dene mein bahaadur hain।

2) apni sarva jimmevaariyaan baap ko dekar bephikra baadshaah bano

sada apne ko bephikra baadshaah anubhav karte ho? ya thoda-thoda phikra hai? kyonki jab baap ne aapki jimmevaari le li, to jimmevaari ka phikra kyon? abhi sirf responsibility hai baap ke saath-saath chalte rahne ki। woh bhi baap ke saath-saath hai, akele nahin। to kya phikra hai? kal kya hoga ye phikra hai? job ka phikra hai? duniya mein kya hoga ye phikra hai? kyonki jaante ho ki hamaare liye jo bhi hoga achha hoga। nishchay hai na। pakka nishchay hai ya hilta hai kabhi? jahaan nishchay pakka hai, vahaan nishchay ke saath vijay bhi nishchit hai। ye bhi nishchay hai na ki vijay hui padi hai। ya kabhi sochte ho ki pata nahin hogi ya nahin? kyonki kalpa-kalpa ke vijayi hain aur sada rahenge ye apna yaadgaar kalpa pahle vaala abhi phir se dekh rahe ho। itna nishchay hai na ki kalpa-kalpa ke vijayi hain। itna nishchay hai? kalpa pahle bhi aap hi the ya doosre the? to sada yahi yaad rakhna ki ham nishchaybuddhi vijayi ratna hain। aise ratna ho jin ratnon ko baapdaada bhi yaad karte hain। ye khushi hai na? bahut mauj mein rehte ho na। is alaukik divya shreshtha janma ki aur apne madhuban ghar mein pahunchne ki mubaarak।

3) baap aur aap - aise combined raho jo kabhi koi alag na kar sake

sabhi apne ko sada baap aur aap combined hain - aisa anubhav karte ho? jo combined hota hai use kabhi bhi, koi bhi alag nahin kar sakta। aap anek baar combined rahe ho, abhi bhi ho aur aage bhi sada rahenge। ye pakka hai? to itna pakka combined rehna। to sadaiv smriti rakho ki combined the, combined hain aur combined rahenge। koi ki taakat nahin jo anek baar ke combined swaroop ko alag kar sake। to pyaar ki nishaani kya hoti hai? (combined rehna) kyonki shareer se to majboori mein bhi kahaan-kahaan alag rehna padta hai। pyaar bhi ho lekin majboori se kahaan alag rehna bhi padta hai। lekin yahaan to shareer ki baat hi nahin। ek second mein kahaan se kahaan pahunch sakte ho! aatma aur paramatma ka saath hai। paramatma to kahaan bhi saath nibhaata hai aur har ek se combined roop se preet ki reeti nibhaane vaale hain। harek kya kahenge mera baba hai। ya kahenge tera baba hai? harek kahega mera baba hai! to mera kyon kehte ho? adhikaar hai tab hi to kehte ho। pyaar bhi hai aur adhikaar bhi hai। jahaan pyaar hota hai vahaan adhikaar bhi hota hai। adhikaar ka nasha hai na। kitna bada adhikaar mila hai! itna bada adhikaar satayug mein bhi nahin milega! kisi janma mein parmaatma-adhikaar nahin milta। praapti yahaan hai। praalabdha satayug mein hai lekin praapti ka samay abhi hai। to jis samay praapti hoti hai us samay kitni khushi hoti hai! praapta ho gaya phir to common baat ho jaati hai। lekin jab praapta ho raha hai, us samay ka nasha aur khushi alaukik hoti hai! to kitni khushi aur nasha hai! kyonki dene vaala bhi behad ka hai। to daata bhi behad ka hai aur milta bhi behad ka hai। to maalik kiske ho had ke ya behad ke? teenon lok apne bana diye hain। mool vatan, sookshm vatan hamaara ghar hai aur sthoolavtan mein to hamaara raajya aane vaala hi hai। teenon lokon ke adhikaari ban gaye! to kya kahenge - adhikaari aatmaayen। koi apraapti hai? to kya geet gaate ho? (paana tha woh pa liya) paana tha woh pa liya, abhi kuchh paane ko nahin raha। to ye geet gaate ho? ya koi apraapti hai paisa chaahiye, makaan chaahiye! neta ki kursi chaahiye? kuchh nahin chaahiye kyonki kursi hogi to bhi ek janma ka bhi bharosa nahin aur aapko kitni guarantee hai? 21 janma ki guarantee hai। guarantee-card maaya to chori nahin kar leti hai? jaise yahaan passport kho lete hain to kitni mushkil ho jaati hai! to guarantee-card maaya to nahin le leti hai? chhupa-chhupi karti hai। phir aap kya karte ho? lekin aise shaktishaali bano jo maaya ki himmat nahin।

4) har karma trikaaldarshi bankar karo

sabhi apne ko takhtansheen aatmaayen anubhav karte ho? abhi takhta mila hai ya bhavishya mein milna hai, kya kahenge? sabhi takhta par baithenge? (diltakhta bahut bada hai) diltakhta to bada hai lekin satayug ke takhta par ek samay mein kitne baithenge? takhta par bhale koi baithe lekin takhta adhikaari royal family mein to aayenge na। takhta par ikatthe to nahin baith sakenge! is samay sabhi takhtansheen hain isliye is janma ka mahatva hai। jitne chaahen, jo chaahen diltakhta-nasheen ban sakte hain। is samay aur koi takhta hai? kaunsa hai? (akaal-takhta) aap avinaashi aatma ka takhta ye bhrikuti hai। to bhrikuti ke takhta-nasheen bhi ho aur diltakhta-nasheen bhi ho। double takhta hai na! nasha hai ki main aatma bhrikuti ke akaaltakhta-nasheen hoon! takhta-nasheen aatma ka sva par raajya hai, iseelie svaraajya adhikaari hain। svaraajya adhikaari hoon yeh smriti sahaj hi baap dvaara sarva praapti ka anubhav karaayegi। to teenon hi takhta ki knowledge hai। knowledgeful ho na! powerful bhi ho ya sirf knowledgeful ho? jitne knowledgeful ho, utne hi powerful ho ya knowledgeful adhik, power-full kam? knowledge mein jyaada hoshiyaar ho! knowledgeful aur powerful donon hi saath-saath। to teenon takhta ki smriti sada rahe।

gyaan mein teen ka mahatva hai। trikaaldarshi bhi bante hain। teenon kaal ko jaante ho। ya sirf vartamaan ko jaante ho? koi bhi karma karte ho to trikaaldarshi bankar karma karte ho ya sirf ekdarshi bankar karma karte ho? kya ho ek darshi ya trikaaldarshi? to kal kya hone vaala hai woh jaante ho? kaho ham yeh jaante hain ki kal jo hoga woh bahut achha hoga। ye to jaante ho na! to trikaaldarshi hue na। jo ho gaya vo bhi achha, jo ho raha hai woh aur achha aur jo hone vaala hai woh aur bahut achha! yeh nishchay hai na ki achhe se achha hona hai, bura nahin ho sakta। kyon? achhe se achha baap mila, achhe se achhe aap bane, achhe se achhe karma kar rahe ho। to sab achha hai na। ki thoda bura, thoda achha hai? jab maaloom pad gaya ki main shreshtha aatma hoon, to shreshtha aatma ka sankalp, bol, karma achha hoga na! to yeh sada smriti rakho ki kalyaankaari baap mila to sada kalyaan hi kalyaan hai। baap ko kehte hi hain vishwa-kalyaankaari aur aap master vishwa-kalyaankaari ho! to jo vishwa ka kalyaan karne vaala hai uska akalyaan ho hi nahin sakta isliye yeh nishchay rakho ki har samay, har kaarya, har sankalp kalyaankaari hai। sangamayug ko bhi naam dete hain kalyaankaari yug। to akalyaan nahin ho sakta। to kya yaad rakhenge? jo ho raha hai woh achha aur jo hone vaala woh bahut-bahut achha। to yeh smriti sada aage badhaati rahegi। achha, sabhi kone-kone mein baap ka jhanda lahra rahe ho। sabhi bahut himmat aur teevra purushaartha se aage badh rahe ho aur sada badhte rahenge। future dikhaai deta hai na। koi bhi poochhe aapka bhavishya kya hai? to bolo hamko pata hai, bahut achha hai। achha।

vardaan:- apne mastak par shreshtha bhaagya ki lakeer dekhte hue sarva chintaaon se mukta bephikra baadshaah bhav

bephikra rahne ki baadshaahi sab baadshaahiyon se shreshtha hai। agar koi taaj pahankar takhta par baith jaae aur phikar karta rahe to yeh takhta hua ya chinta? bhaagya vidhaata bhagwan ne aapke mastak par shreshtha bhaagya ki lakeer kheench di, bephikra baadshaah ho gaye। to sada apne mastak par shreshtha bhaagya ki lakeer dekhte raho - vaah mera shreshtha eeshvareey bhaagya, isi fakhur mein raho to sab phikraaten (chintaayen) samaapta ho jaayengi।

slogan:- ekaagrata ki shakti dvaara roohon ka aavaahna kar roohaani seva karna hi sachchi seva hai।