सोमवार 13 फ़रवरी 2023 की दैनिक मुरली

13-02-2023 praatahmurli om shanti "baapdaada"' madhuban

“meethe bachche - yeh god fatherly world university hai - manushya se devta, nar se naaraayan banne ki, jab yeh nishchay pakka ho tab tum yeh padhaai padh sako''

prashn:- manushya se devta banne ke liye tum bachche is samay kaun si mehnat karte ho?

uttar:- aankhon ko criminal se civil banaane ki, saath-saath meetha banne ki। satayug mein to hain hi sabki aankhen civil। vahaan yeh mehnat nahin hoti। yahaan patit shareer, patit duniya mein tum bachche aatma bhaai-bhaai ho - yeh nishchay kar aankhon ko civil banaane ka purushaartha kar rahe ho।

prashn:- bhakton ki kis ek baat se sarvavyaapi ki baat galat ho jaati hai?

uttar:- kehte hain he baba jab aap aayenge to ham aap par vaari jaayenge… to aana siddha karta hai woh yahaan nahin hai।

om shanti। baap roohaani bachchon se poochhte hain ki apne aatma ke svadharma mein baithe ho? yeh to jaante ho ki ek hi behad ka baap hai jisko supreme rooh ya param aatma kehte hain। paramatma hai bhi zaroor। parampita hai na। parampita maana paramatma। yeh baaten tum bachche hi samajh sakte ho। 5 hajaar varsha pahle bhi yeh gyaan tum sabne hi suna tha। tum jaante ho aatma bahut chhoti sookshm hai, unko in aankhon se dekha nahin jaata hai। aisa koi manushya nahin hoga jisne aatma ko dekha hoga। haan dekhne mein aa sakti hai - parantu divya drishti se aur woh bhi drama ke plan anusaar। bhakti maarga mein bhi in aankhon se koi saakshaatkaar nahin hota। divya drishti milti hai, jisse chaitanya mein dekhte hain। divya drishti arthaat chaitanya mein dekhna। aatma ko gyaan ke chakshu milte hain। baap ne samjhaaya hai bahut bhakti karte hain, jisko naudha bhakti kehte hain। jaise meera ko saakshaatkaar hua to dance karti thi। vaikuntha to us samay nahin tha na। meera ko 5-6 sau varsha hua hoga। jo past ho gaya hai woh divya drishti se dekha jaata hai। hanoomaan, ganesh aadi ke chitron ki bahut bhakti karte-karte usmein jaise lay ho jaate hain। bhal deedaar hoga parantu usse koi mukti nahin mil sakti। mukti jeevanmukti ka raasta bilkul nyaara hai। bhaarat mein bhakti maarga mein dher mandir hote hain। vahaan shivling bhi rakhte hain। koi chhota banaate hain, koi bada banaate hain। abhi tum samajhte ho jaise tum aatma ho vaise woh supreme aatma hai। size ek hi hai। kehte bhi hain ham sab brothers hain, aatmaayen sab bhaai-bhaai hain। behad ka baap ek hai। baaki sab bhaai-bhaai hain, part bajaate hain। yeh samajhne ki baaten hain। yeh hain gyaan ki baaten jo ek hi baap samjhaate hain। jinhon ko samjhaate hain woh phir auron ko samjha sakte hain। pahle-pahle ek hi niraakaar baap samjhaate hain। unke liye hi phir kah dete sarvavyaapi hai, thikkar-bhittar mein hai। yeh to right nahin hai na। ek taraph kehte baba jab aap aayenge to ham vaari jaayenge। aise thode hi kehte aap sarvavyaapi ho। kehte hain aap aayenge to vaari jaayenge। to iska matlab yahaan nahin hai na। mere to aap doosra na koi। to zaroor unko yaad karna pade na। yeh baap hi baith bachchon ko samjhaate hain, isko roohaani knowledge kaha jaata hai। yeh jo gaaya jaata hai aatmaayen paramatma alag rahe bahukaal.... uska hisaab bhi samjhaaya hai। bahukaal se alag tum aatmaayen rehti ho। ab baap ke paas aaye ho - raajayog seekhne। baap to servant hai। bade aadmi jab sahi karte hain to neeche likhte hain - obedient servant.... baap sab bachchon ka servant hai। kehte hain bachche main tumhaara servant hoon। tum kitni hujjat se bulaate ho ki bhagwan aao, aakar ham patiton ko paavan banaao। paavan hote hi hain paavan duniya mein। yeh samajhne ki baaten hain। baaki to sab hai kanras। yeh hai god fatherly world university। em object kya hai? manushya se devta banaana। bachchon ko yeh nishchay hai ki hamko yeh banna hai। jisko nishchay nahin hoga woh school mein baithega kya? nishchay hoga to barrister se, surgeon se seekhega। em-object ka hi pata nahin to aayega nahin। tum bachche samajhte ho ham manushya se devta, nar se naaraayan bante hain। yeh hai sachchi-sachchi satya nar se naaraayan banne ki katha। katha kyon kaha jaata hai? kyonki 5 hajaar varsha pahle bhi yeh knowledge seekhi thi। to past ko katha kah dete hain, yeh hai sachchi-sachchi shiksha nar se naaraayan banne ki। nai duniya mein devtaayen, puraani duniya mein manushya rehte hain। devtaaon mein jo daiveegun hain, woh manushyon mein nahin hain। manushya unko devta kehte hain aur gaate hain aap sarvagun sampanna, 16 kala sampoorn, sampoorn nirvikaari ho। apne ko kehte hain ham paapi, neench vikaari hain। devtaayen kab the? zaroor kahenge satayug mein the। aise nahin kahenge kaliyug mein the। aajkal manushyon ki tamopradhaan buddhi hone ke kaaran baap ke title bhi apne oopar rakh dete hain। vaastav mein shreshtha banaane vaala shri-shri to ek hi baap hai। shreshtha devtaaon ki mahima alag hai। abhi hai kaliyug। sannyaasiyon ke liye bhi baba ne samjhaaya hai ek hai had ka sannyaas, doosra hai behad ka sannyaas। vo log kehte hain hamne gharbaar aadi sab chhoda hai। parantu aajkal to dekho lakhapti ban baithe hain। sannyaas maana sukh ka tyaag karna। tum bachche behad ka sannyaas karte ho kyonki samajhte ho ki yeh puraani duniya khatma hone vaali hai, isliye inse vairaagya hai। vo log to gharbaar chhod phir andar ghus aaye hain। abhi pahaadiyon aadi par guphaaon mein nahin rehte। kutiyaayen banaate hain, to bhi kitna kharcha karte hain। vaastav mein kutiya par koi kharcha thode hi lagta hai। bade-bade mahal banaakar rehte hain। aajkal to sab tamopradhaan hain। abhi hai hi kaliyug। satayugi devtaaon ke chitra nahin hote to svarga ka naamnishaan gum ho jaata। tumko samjhaaya jaata hai ab manushya se devta banna hai। aadhaakalpa bhakti maarga ki kathaayen hain। sunkar seedhi neeche utarte aaye ho phir 5 hajaar varsha baad accurate vahi drama repeat hoga। baba ne samjhaaya bhi hai, kisko aise kehna nahin hai ki bhakti ko chhodo। gyaan aa jaata hai to phir aapehi bhakti chhoot jaayegi। samajhte hain ham aatma hain। ab behad ke baap se hamko varsa lena hai। pahle behad ke baap ki pahchaan chaahiye। woh nishchay ho gaya to phir had ke baap se buddhi nikal jaati hai। grihastha vyavhaar mein rehte buddhi ka yog baap ke saath lag jaayega। baap khud kehte hain shareer nirvaah arth karma karte buddhi mein yaad rahe ek baap ki। dehdhaariyon ki yaad na rahe। woh hoti hai jismaani yaatra। yeh tumhaari hai roohaani yaatra, ismen dhakka nahin khaana hai। bhakti maarga hai hi raat। dhakka khaana padta hai। yahaan dhakke ki baat hi nahin। yaad karne liye koi baithta nahin hai। bhakti maarga mein krishna ke bhagat chalte phirte krishna ko yaad nahin kar sakte hain kya? dil mein to unki yaad rah jaati hai na। ek baar jo cheez dekhi jaati hai to woh cheez yaad rehti hai। to tum ghar baithe shivbaaba ko yaad nahin kar sakte ho? yeh hai nai baat। krishna ko yaad karna, woh puraani baat ho gai। shivbaaba ko to koi jaante hi nahin ki unka naam roop kya hai? sarvavyaapi bhi kya hai! koi bataaye na। tum bachche jaante ho ham aatma ka baap parampita paramatma hai। aatma ko paramatma kah nahin sakte। angreji mein aatma ko soul kaha jaata hai। ek bhi manushya nahin jo paarlaukik baap ko jaanta ho। woh baap hi gyaan ka saagar hai, unmein knowledge hai manushya ko devta banaane ki। baap kehte hain roz-roz, guhya-guhya baaten sunaata hoon। mukhya baat hai yaad ki। yaad hi bhool jaati hai। baba roz kehte hain apne ko aatma samajh baap ko yaad karo। main aatma bindi hoon। kehte bhi hain chamakta hai ajab sitaara। aatma shareer se nikalti hai to in aankhon se dekhne mein nahin aati hai। kaha jaata hai aatma nikal gai। jaakar doosre shareer mein pravesh kiya। tum jaante ho ham aatma kaise punarjanma lete abhi apvitra bani hain। pahle tum aatma pavitra thi, tumhaara grihastha dharma pavitra tha। ab donon hi apvitra bane hain। jab donon pavitra hain, to unhon ki pooja karte hain। aap pavitra ho, ham apvitra hain। woh donon pavitra, yahaan donon apvitra। to kya pahle pavitra the phir apvitra bane ya apvitra hi janma liya? baap baith samjhaate hain pahle tum aatmaayen aapehi pavitra poojya thi। phir aapehi pujaari apvitra bani ho। 84 janma liye hain। saare world ki history-geography tum jaante ho। kaun-kaun raajya karte the, kaise raajya mila। yeh history bhi tum jaante ho aur koi nahin jaanta। tum bhi abhi jaante ho, aage nahin jaante the, pattharbuddhi the। rachta aur rachna ke aadi madhya ant ki knowledge nahin thi, naastik the। abhi aastik banne se tum kitne sukhi ban jaate ho। tum yahaan aaye hi ho yeh devta banne ke liye। is samay bahut meetha banna hai। tum ek baap ki santaan bhaai-behen thahre na। criminal drishti ja na sake। is samay mehnat karni padti hai। aankhen hi sabse jaasti criminal hoti hain। aadhaakalpa criminal rehti hain, aadhaakalpa civil rehti hain। satayug mein devtaaon ki aankhen civil rehti hain, yahaan criminal rehti hain। is par soordaas ki katha baith sunaate hain। baap kehte hain mujhe aana hi padta hai patit duniya, patit shareer mein। jo patit bane hain unhon ko hi paavan banaana hai।

tum jaante ho krishna aur raadhe donon alag-alag raajaai ke the। prince-princess the। peechhe svayanvar baad lakshmi-naaraayan bante hain to phir unhon ki dynasty gaai jaati hai। sanvat bhi unse kaha jaayega। satayug ki aayu hi laakhon varsha kah dete hain। baap kehte hain 1250 varsha। raat-din ka pharka ho gaya। raat brahma ki aadhaakalpa phir din brahma ka aadhaakalpa। gyaan se hai sukh, bhakti se hai duhkh। yeh sab baaten baap baith samjhaate hain। phir bhi kehte hain meethe bachchon apne ko aatma samjho। svadharma mein tiko, baap ko yaad karo। vahi patit-paavan hai। yaad karte-karte tum paavan ban jaayenge। ant mati so gati। baap svarga ka rachayita hai na। to yaad dilaate hain tum svarga ke maalik the। abhi patit ho isliye vahaan jaane laayak nahin ho, isliye paavan bano। mujhe ek hi baar aana padta hai। ek god hai। ek hi duniya hai। manushyon ki to anek maten, anek baaten hain, jitni jabaan utni baaten। yahaan hai hi ek mat, advet mat। jhaad mein dekho kitne mat-mataantar hain। jhaad kitna bada ho gaya hai। vahaan ek mat ek raajya tha। tum jaante ho ham hi vishwa ke maalik the। bhaarat kitna saahookaar tha। vahaan akaale mrityu kabhi hota nahin। yahaan to dekho baithe-baithe yeh gaya। chaaron taraph se maut hai। vahaan tumhaari aayu badi thi। abhi tum eeshvar se yog lagaae manushya se devta ban rahe ho। to tum thahre yogeshvar, yogeshvari phir banenge raaj raajeshvari, abhi ho gyaan gyaaneshvari। phir raaj raajeshvari kaise banen? eeshvar ne banaaya। abhi tum jaante ho inhon ko raajayog kisne sikhaaya? eeshvar ne। vahaan unhon ki 21 peedhi raajaai chalti hai। woh to ek janma mein daan-punya karne se raaja bante hain। mar gaya to khalaas। akaale mrityu to sabki aati rehti hai। satayug mein yeh law nahin। vahaan aise nahin kahenge ki kaal kha gaya। ek khaal chhod doosri le lete hain। jaise sarpa khaal badalte hain। vahaan sadaiv khushi hi khushi rehti hai। jara bhi duhkh ki baat nahin। tum sukhdhaam ka maalik banne ke liye abhi purushaartha kar rahe ho। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) is puraani duniya se behad ka sannyaas karna hai। shareer nirvaah arth karma karte roohaani yaatra par rehna hai।

2) purushaartha kar aankhon ko civil zaroor banaana hai। em object buddhi mein rakh bahut-bahut meetha banna hai।

vardaan:- har kadam mein padmon ki kamaai jama karne vaale samajhdaar gyaani tu aatma bhav

samajhdaar gyaani tu aatma woh hai jo pahle sochta hai phir karta hai। jaise bade aadmi pahle bhojan ko check karaate hain phir khaate hain। to yeh sankalp buddhi ka bhojan hai ise pahle check karo phir karma mein laao। sankalp ko check kar lene se vaani aur karma svatah samartha ho jaayenge। aur jahaan samartha hai vahaan kamaai hai। to samartha ban har kadam arthaat sankalp, bol aur karma mein padmon ki kamaai jama karo, yahi gyaani tu aatma ka lakshan hai।

slogan:- baap aur sarva ki duaaon ke vimaan mein udne vaale hi udta yogi hain।