मंगलवार 28 फ़रवरी 2023 की दैनिक मुरली

28-02-2023 praatahmurli om shanti "baapdaada"' madhuban

“meethe bachche - baap ke gyaan ki kamaal hai jo tum is gyaan aur yogbal se bilkul pavitra ban jaate ho, baap aaye hain tumhein gyaan se gyaan pari banaane''

prashn:- baap ki kamaal par bachche baap ko in advance kaun sa inaam dete hain?

uttar:- baap par bali chadhna hi unhein in-advance inaam dena hai। aise nahin baba pahle beautiful banaaye phir balihaar jaayenge। abhi poora bali chadhna hai। shareer nirvaah karte, baal-bachchon ko sambhaalte shreemat par chalna hi balihaar jaana hai। is puraani duniya mein to thikkar-thobar hain inse buddhiyog nikaal baap aur nai duniya ko yaad karna hai।

geet:- tu pyaar ka saagar hai…

om shanti। bachche jaante hain ki baap sammukh baithe hain aur jo door baithe hain, sabhi ke prati kehte hain, sunna to unhon ko bhi hai। bachche jaante hain ki baap gyaan ka saagar hai, to zaroor unmein gyaan hoga na। jaise sannyaasi vidvaan hain to woh samajhte hain ham vidvaan hain। bachche jaante hain parampita paramatma, maat-pita ke sammukh baithe hain। woh gyaan saagar hai। gyaan se sadgati hoti hai। us gyaan saagar se jaise ki lota bhar lete hain। saagar to sadaiv bharpoor hai na। saagar se kitna paani saari duniya ko milta rehta hai। kabhi khutta nahin, athaah paani hai। to baap bhi hai gyaan ka saagar, jab tak jeete hain unse gyaan sunte hi rehte hain। woh sada bharpoor hai। thode se gyaan ratna de dete hain, jisse saari srishti sadgati ko paati hai। woh hai gyaan ka saagar, shanti ka saagar, sukh ka saagar, unke sang se patit se paavan bante hain। tum ho gyaan gangaayen, maanasrovar hota hai na। sarovar ek bada taalaab hai। woh bhi kailaash parvat par dikhaate hain। samajhte hain bada saagar hai, jismen dubka maarne se manushya pari ban jaate hain। pariyon ka arth to samajh nahin sakte। pariyaan bahut shobhnik hoti hain। ab tum bachche jaante ho baap hamko yeh gyaan snaan karaae aisa sundar shobhnik gyaan pari banaate hain। vahaan to natural beauty hoti hai। yahaan kaajal cream aadi lagaae shrringaar karte hain। yeh hai artificial beauty। tatva hi tamopradhaan hain। vahaan tatva bhi satopradhaan hote hain। devtaaon jaise shobhnik koi ho nahin sakte। yahaan ki beauty mein health to nahin rehti। vahaan tumhaari health bhi achhi aur beauty bhi rehti hai। bachche samajhte hain baba to kamaal kar dete hain। manushya bade-bade marble ki moortiyaan banaate hain athva achhe art se chitra banaate hain to unko bahut inaam milta hai। ab vichaar karo baap gyaan aur yogbal se hamko kya se kya bana dete hain। yeh to baap kamaal karte hain। gyaan aur yog ki kitni badi balihaari hai। kamaal hai baba ke gyaan bal se aatma bilkul hi pavitra ho jaati hai। 5 tatva bhi pure ho jaate hain, jisse natural beauty rehti hai। nai duniya aur puraani duniya mein farka to rehta hai na। har ek cheez satopradhaan, sato rajo tamo hoti hai। duniya bhi aise hoti hai। jaise-jaise manushya aise phir unke liye vaibhav rehte hain। saahookaar ke liye vaibhav bhi achhe hote hain na। gareeb ke paas thikkar-thobar hote hain। to is puraani duniya mein bhi thikkar thobar hain। nai duniya mein sab kuchh naya hoga। to kitna most beloved baba hai, unki ham mahima karenge। baba khud to nahin kahenge - main kitna most beloved hoon। bachche baba ki mahima karte hain। baap kehte hain main tumko gyaan yog se kya banaata hoon। baba ko phir kya inaam milta hai। in advance hi baba ko inaam dete hain arthaat un par bali chadhte hain। gaate bhi hain tum par balihaar jaaoon, to zaroor in advance balihaar jaayenge na। aise thode hi pahle baba beautiful banaave phir baad mein tum balihaar jaayenge। balihaari bhi poori chaahiye। woh bhi raaz samjhaaya hai। aise nahin ki sabhi baba ke paas le aakar baith jaana hai। tumko shreemat par chalna hai। woh hai sarva aatmaon ka baap। unko aatmaon ka rachayita nahin kahenge। srishti ka rachayita va svarga ka rachayita kahenge। baaki aatma aur yeh khel to anaadi hai। parantu is samay puraani duniya ko naya banaate hain। change karte hain। shareer to vinaashi hai। baba ab hamaari kitni aayu badhaate hain। behad ki aayu ban jaati hai। vahaan average 150 varsha aayu rehti hai। yahaan to koi ki ek varsha bhi aayu rehti hai। koi ki ek maas bhi nahin chalti। janma aur mara। vahaan aise nahin hota। sabki aayu badi rehti hai। kaayde-anusaar jaldi se bartan toot nahin sakta। to baap samjhaate hain ab bahut mehnat karni hai। tum shiv shakti sena baap ke madadgaar ho। tum samajhte ho is samay raavan raajya hai, sab vikaari hain। un vikaariyon se sannyaasi alag ho jaate hain phir srishti rachi nahin jaati। sannyaasi sannyaas srishti hi rachenge arthaat mukh se aap samaan sannyaasi banaayenge। unko vanshaavli nahin kahenge। vanshaavli grihastha aashram mein rehte hain। satayug mein vanshaavli phool jaisi hoti hai। sannyaasiyon ki vanshaavli nahin ho sakti। limited hain। yeh to unlimited hain na। grihastha aashram kehte hain। vaastav mein aashram to bahut ooncha thahra। aashram pavitra hota hai। vikaari grihastha ko aashram nahin kah sakte। baap pavitra grihastha aashram dharmi banaate hain, maaya raavan adharmi bana deti hai। manushya adharmi ban pade hain। dharmi, adharmi manushya ko hi kahenge। jaanvar ko thode hi kahenge। to baap aakar dharmi banaate hain, maaya adharmi bana deti hai। parantu unko jaante nahin hain। jaise eeshvar ko nahin jaante vaise maaya ko bhi nahin jaante। paramatma ke liye kah dete sarvavyaapi hai। parantu sarvavyaapi to 5 vikaar hain। is samay bhakta sab baap ko yaad karte hain arthaat sab mein bhagwan ki yaad hai। aise nahin ki woh sarvavyaapi hai। 5 vikaar hi duhkh dete hain। to bhakta bhagwan ko yaad karte hain, bahut duhkhi hain। phir kah dete hain duhkh sukh bhagwan hi dete hain। raavan ka naam hi bhool jaate hain aur maaya phir sampatti ko samajh lete hain। sampatti to dhan ko kaha jaata hai। is samay sabhi manushya maaya raavan ke mureed hain। tum aakar eeshvar ke mureed bane ho। woh raavan ke duhkh ka varsa lete hain। tum baap se sukh ka varsa lete ho। baap aakarke maataaon ko guru pad dete hain। yahaan kehte hain pati stri ka guru hai, parantu woh to aur hi patit bana dete hain। dropdi ne bhi kaha na hamaari laaj rakho। ab baap kehte hain in kanyaaon dvaara hi uddhaar karoonga। kanya ka gaayan hai, kumaari woh jo piyar aur sasurghar ka 21 janmon ke liye uddhaar kare। is samay tum kanyaayen banti ho na। maataayen bhi kumaari ban jaati hain। brahmaakumaariyaan ho na। to is samay ki tumhaari mahima chali aati hai। kumaariyon ne kamaal ki hai। baap ne hi kumaariyon ko apna banaaya hai। to naam baala karna hai। maataayen bhi eeshvareey god le kumaari ban jaati hain। to kanyaaon ki mahima vaise to sirf gaayan-maatra hai। ab phir practical mein tumko baap jagaate hain। baap ne kumaariyon ko apna banaaya hai। seedhi chadh phir utarna mushkilaat ho jaati hai। abhi bhi dekhte hain to kehte hain na - naahek shaadi ki। phir bachche paida hone se moh ki rag jut jaati hai। to baap samjhaate hain aadhaakalpa kanya ko shaadi karaae vikaari banaaya hai। abhi baap aaya hua hai kehte hain pavitra bano। dekhte ho pavitrata mein sukh bhi hai to maan bhi hai। sannyaasiyon ka kitna maan hai। bandhanmukta ho jaate hain। woh hai pavitrata ka bal, woh koi yog ka bal nahin hai। yogbal sirf tumhaare paas hai। unhon ka to hai tatva se yog, jahaan rehte hain। jaise 5 tatva hain vaise woh phir chhatha tatva hai, unko brahm eeshvar kah dete hain isliye unka yog artificial hai। us yog se vikarma vinaash nahin hote, isliye ganga snaan karne jaate hain। agar nishchay hota ki yog se paavan bante hain to phir ganga snaan nahin karte। isse siddha hota hai ki unhon ka yog kaayde ke viruddha hai। jaise hindu koi dharma nahin vaise brahm bhi eeshvar nahin। rahne ke sthaan ko eeshvar samajh lete hain। yeh baap aakar samjhaate hain। to kumaariyaan samjha sakti hain। ham bi.ke. is bhaarat ko svarga banaate hain, world almighty authority raajya banaate hain। baap kehte hain maataaon ka naam bahut baala karna hai। purushon ko ismen madad karni chaahiye। yeh pavitra rehna chaahti hain to pavitra rahne do। to baap aakar pahle maataaon aur kumaariyon ko gyaan dekar apna banaate hain। shiv vanshi to sab hain hi, phir brahmaakumaar aur kumaariyaan bante hain। kumaar bhi hain parantu thode। kumaariyaan jaasti hain। tumhaare yaadgaar ka mandir bhi yahaan accurate hai। manushya samajhte hain vikaar bigar srishti kaise paida hogi। baap kehte hain abhi yeh duhkhadaai patit srishti nahin chaahiye। to zaroor pavitra rehna pade। government bhi kehti hai paidaais kam ho kyonki woh samajhte hain itna anna kahaan se aayega। woh pavitrata ki baat nahin samajhte। tum jaante ho abhi shivaalay sthaapan hota hai। behad ki duniya shivaalay ban jaati hai। unhonne to ek mandir ka naam rakh diya hai shivaalay। woh ho gaya had ka shivaalay। yeh banta hai behad ka shivaalay। saara svarga shivaalay kahenge। shiv ne devi-devtaaon ki rachna ki hai। unke mandir bane hue hain। woh hai chaitanya shivaalay। phir yeh veshyaalay banta hai। chaitanya devtaaon ke jad mandir banaakar unhon ko phir vikaari log poojte hain। shivaalay shivbaaba banaate hain। madadgaar hain shiv shakti paandav sena। majority shaktiyon ki hone kaaran unhon ka naam baala hua hai। kanyaayen jaasti hain। shivbaaba tumhein apna banaate hain। shreekrishna to chhota prince tha woh kaise apna banaayega। woh to khud hi svayanvar kar mahaaraaja bante hain। to yahaan shivbaaba kansapuri se nikaal tumko shreekrishnapuri satayug mein le chalte hain। yeh hai kansapuri। ab saari duniya hai ek taraph aur tum thodi bachchiyaan ho doosre taraph। aadhaakalpa manushyon ne ulta samjhaaya hai। baap ne aakar sulta samjhaaya hai। aage contrast ka bahut achha kitaab tha। abhi to point bhi aur-aur achhi nikal rahi hain। baap kehte hain din-pratidin tumko bahut guhya baaten sunaata hoon। sab gyaan ikattha to nahin denge। pahle halka sunaate the। din-pratidin guhya hota jaata hai। sab guhya baaten ek samay kaise sunaaoonga। jo kuchh samjhaate vahi kalpa pahle bhi samjhaaya tha, ismen koi sanshay ki baat nahin। aise nahin ki aage to baba aise kehte the। abhi phir aise kehte hain। are pahle to pahla class tha। ajun bahut points hain jo aur nikalti rahengi। jab tak jiyenge, baba sunaate rahenge। baba ne kuchh guhya raaz sunaaya to phir bataayenge। abhi ham padh rahe hain। un shaastravaadiyon ko bhi shaastra kantha rehte hain। ab 18 adhyaay to hain nahin। yeh to gyaan saagar hai। sunaate hi rehte hain। woh baap hi gyaan ka saagar, aananda ka saagar, shanti ka saagar hai। is duniya mein to kuchh bhi nahin hai। na pyaar hai, na saar hai। woh to sab baaton ka saagar hi saagar hai।

manushya kehte hain woh sarvavyaapi hai। ham bhi vahi hain lekin unki to mahima badi jabardasta hai। sabhi bhakta saadhu aadi unko yaad karte hain। duhkhi hain tab to kehte hain vaapis nirvaandhaam mein jaayen। so to jab nirvaandhaam ka maalik aaye tab hi le jaaye। svarga ki saugaat bachchon ke liye baap le aate hain। khud svarga ka maalik nahin bante hain। baap dete hain svarga ki saugaat। phir raavan aakar duhkh dete hain। duhkh ko saugaat nahin kahenge। svarga ke saugaat ki chaabi di hai kanyaaon ko। kanyaayen bhaarat ko svarga banaati hain। kanyaayen apne mitra-sambandhiyon ko bhi samjha sakti hain - hamne paarlaukik maat-pita ki god li hai। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) grihastha ko aashram arthaat pavitra banaana hai। pavitrata mein hi bal hai, pavitrata ka hi maan hai isliye yogbal aur pavitrata ka bal jama karna hai।

2) most beloved ek baba hai, us par poora-poora bali chadh puraani duniya se buddhi nikaal deni hai।

vardaan:- roohaani aakarshan dvaara seva aur sevaakendra ko chadhti kala mein le jaane vaale yogi tu aatma bhav

jo yogi tu aatmaayen roohaaniyat mein rehti hain, unki roohaani aakarshan seva aur sevaakendra ko svatah chadhti kala mein le jaati hai। yogayukta ho roohaaniyat se aatmaon ka aahvaan karne se jigyaasu svatah badhte hain। iske liye man sada halka rakho, kisi bhi prakaar ka bojh nahin rahe। dil saaph muraad haansil karte raho, to praaptiyaan aapke saamne svatah aayengi। adhikaar hi aap logon ka hai।

slogan:- parmaatma gyaani woh hai jo sarva bandhanon evan aakarshanon se mukta hai।