गुरुवार 2 मार्च 2023 की दैनिक मुरली

02-03-2023 praatahmurli om shanti "baapdaada"' madhuban

“meethe bachche - baap ke bane ho to first number lene ka purushaartha karo, mama-baba ko follow karne se, padhaai par dhyaan dene se number first aa jaayenge''

prashn:- manmat par kiye hue karmon ki result aur shreemat par kiye hue karmon ki result mein antar kya hai?

uttar:- jo apni mat par karma karte hain, unhein aage chalkar karma kootne padte, duhkhi hote rehte hain। manmat arthaat maaya ki mat se koi devaala maar dete, koi beemaar pad jaate, koi ki akaale mrityu ho jaati… yeh sab hai karma kootna। shreemat par tum bachche aise shreshtha karma karte ho jo aadhaakalpa koi bhi karma kootna nahin padega।

geet:- tumhein paake hamne jahaan pa liya hai.....

om shanti। bachchon ne geet ki do line suni। jabki hamne behad ke baap ko pa liya hai to behad ke baap se saare vishwa ki baadshaahi ham le rahe hain। yeh to bilkul saadhaaran buddhi se bhi samajh sakte hain ki bhaarat mein jab devi-devtaaon ka raajya tha to aur koi dharma nahin tha। lakshmi-naaraayan ka hi gharaana tha। jaise Edward di first, second raajaai chalti hai na। woh hai united kingdom mein। bhaarat mein jab lakshmi-naaraayan ka raajya tha to saare vishwa par hi unhon ka raajya tha। yeh manushya bhool gaye hain। ab tum bachchon ne baap ko pa liya to goya vishwa ki raajaai pa li। baap khud kehte hain - bachche, tum bhool gaye ho। is bhaarat mein jab devi-devtaaon ka raajya tha, satayug tha to tum saare vishwa ke maalik the। partition aadi kuchh bhi nahin tha। lakshmi-naaraayan double sirtaaj the। bade-bade raaje log bhi pooja karne ke liye apne mahlon mein mandir banaate hain - lakshmi-naaraayan ka va raam seeta ka। the ve bhi bhaarat ke raaze aur woh bhi bhaarat ke raaze। parantu ve satayug treta ke the, ve dvaapar kaliyug ke the। satayug treta mein lakshmi-naaraayan, raam-seeta ka raajya tha phir baad mein hote hain vikaari raajaayen। vikaari raajaayen bhi kaise bante hain? yeh baaten shivbaaba in dvaara baith samjhaate hain। gaaya bhi jaata hai poojya pujaari। satopradhaan se tamopradhaan zaroor banna hai। kehte hain - he bachche, tum pahle satayug mein satoguni mahaaraaja mahaaraani the aur sampoorn pavitra the। yeh tum bachchon ko yaad rehta hai। barobar ham so poojya the, ab nahin hain, phir purushaartha se ham woh pad pa rahe hain। maaya ne pujaari bana diya hai। yeh shiksha jo milti hai woh dhaaran karni hai। college mein jo shiksha milti hai woh bhi students ki buddhi mein rehti hai na। bachchon ki buddhi mein rehta hai ham bhaaratvaasi so devta the, kalpa pahle bhi baap ne aakar raajayog sikhaaya tha। mukhya hai hi geeta ki baat। jab koi mile to bolo geeta kab suni va padhi hai? usmein likha hua hai bhagvaanuvaach। to kaise sunaate hain? kab suna hai bhagwan padhaate hain? ek geeta mein hi bhagvaanuvaach hai। tum bachche jaante ho bhagwan ne raajayog sikhaaya tha aur kaha tha main tumko raajaaon ka raaja banaaoonga। unhonne phir shreekrishna ka naam de diya hai। ab shreekrishna to satayug ka prince tha। shreekrishna ne yeh pad paaya hai apne baap se। krishna koi akela nahin tha। lakshmi-naaraayan ki raajdhaani thi jo ab phir se sthaapan ho rahi hai। to tum bachchon ki buddhi mein yeh aana chaahiye। paanch hajaar varsha pahle bhi bhagwan ne aise padhaaya tha। bhagwan knowledgeful, blissful hai। shreekrishna ko knowledgeful, blissful aadi yeh title nahin denge। baap saari srishti par tatvon sahit sab par bliss karte hain। so to sivaae parampita paramatma ke aur koi kar na sake। bliss arthaat mehar। yahaan to dekho tatva aadi sab tamopradhaan hain। barsaat padti hai to nuksaan kar deti। toofaan lagte rehte hain। yeh sab bekaayde hua na। satayug mein koi bhi bekaayde baat hoti nahin jo nuksaan aadi ho। kheti time par taiyaar hogi। time par paani milega। vahaan koi upadrav hote nahin। yeh maaya ke upadrav hain jo duhkhi karte hain। maaya ka bhi arth manushya nahin jaante। ab tum samajhte ho baap ko kaha hi jaata hai parampita paramatma yaani param aatma। bolna bhi aise chaahiye accurate।

baap kehte hain main tumko aise karma sikhlaata hoon jo tumko kabhi karma kootne nahin padenge। manmat par chalne se har ek manushya karma kootte hain na। bukhaar, khaansi hui yeh bhi karmabhog hai। devaala maara, yeh bhi karmon ko kootna hua। tumko baap shreshtha karma sikhlaate hain। jo bhi jitna seekhenge utna oonch pad svarga mein paayenge। jaise naatak mein koi to special reserve seat lete hain। phir nambarvaar second class, third class hoti hain। achhe-achhe aadmi najdeek mein seat lete hain। to padhaai mein bhi nambarvaar hote hain। baap kehte hain main tumko maalik banaane aaya hoon, jitna jo padhega, padhaai bahut simple hai। padhaane vaala hai niraakaar। unka naam vyaas va shreekrishna aadi nahin hai। un sabke to chitra hain। brahma ka bhi chitra hai, shreekrishna ka bhi chitra hai। sookshm va sthool chitra hain to unko bhagwan nahin kah sakte। bhagwan ek hi hai jisko shiv kehte hain। bhal mandir kitne bhi hain parantu naam asul ek hi hai, woh kab badal nahin sakta। woh hai niraakaar parampita paramatma। yeh kisne kaha? niraakaar aatma kehti hai ki parampita param aatma paramdham mein rehte hain। ham aatma unki santaan hain। ham bhi vahaan se aaye hain part bajaane। ab ek-ek actor ki biography to nahin bataayenge। mukhya ki hi bataai jaati hai। yahaan bhi bade-bade aadmiyon ki biography bataate hain na। ab saari behad srishti mein oonch te oonch manushya kaun hai? drama mein oonch te oonch part kiska hai? yeh bhi samajhna chaahiye। ham actors ko baap baith samjhaate hain। creator, director baap hi hai। shivbaaba direction dete hain brahma ko ki tumko devi-devta dharma ki sthaapna karni hai। sthaapna kar phir tumko jaakar paalna karni hai। ham nahin karenge। tumko sikhlaate hain, direction dete hain na। karnakraavanhaar hai na। khud karte bhi hain। knowledge sunaate hain aur tum se karaate bhi hain na। shreemat milti hai yeh karo। drama anusaar brahma yeh sthaapna kar phir raajya karenge। brahman, braahmaniyaan bhi raajya karenge।

to baap samjhaate hain main niraakaar ek hoon aur sab saakaari hain। ab woh niraakaar parampita paramatma aatmaon ko mat dete hain। aatma in kaanon se sunti hai, mukh se bolti hai। to sabse mukhya hua parampita paramatma phir brahma vishnu shankar sookshm vatan vaasi phir sangamayug par hai jagdamba sarasvati aur jagatpita brahma। yeh bade te bade hue na। in dvaara rachna hoti hai। tum sab milkar bhaarat ko svarga banaate ho, baap ki madad se tum manushya ko devta banaate ho। satayug mein hote hain daivi sampradaay। baap kehte hain ham tumko aise karma sikhlaate hain jo kabhi duhkhi nahin honge। ab saara madaar hai tumhaare purushaartha par। chaahe baap ka ban first class ticket lo, sooryavanshi bano, chaahe chandravanshi bano। yeh to jaante ho tumhaare mama baba sabse jaasti purushaartha karte hain। service karte hain। woh to mahaaraani mahaaraaja banenge। tum unhon ki gaddi pakdenge na ya naapaas ho jaayenge! jagat amba ka kitna naam hai! sarasvati hai brahma ki beti। to donon ka mandir alag-alag kar diya hai। brahma ka bhi ajmer mein bada mandir hai। woh hai jagat pita, woh jagat maata। jagat ko rachne vaale।

mukhya dharma hain chaar phir to bahut chhote-chhote math aadi nikalte rehte hain। aapas mein ladte-jhagadte rehte hain kyonki partition hai bahut। jahaan tahaan jhagda laga pada hai। satayug mein to aise nahin hota। to baap samjhaate hain - meethe laadle bachche, is drama ko samajhna hai। yeh to jaante hain ham aatma paramdham se aati hain, garbha mein chola dhaaran kar ham part bajaate hain। abhi part poora hua hai phir yeh shareer chhod ashareeri hokar jaana hai। baap aaya hua hai, shiv jayanti bhi hai। zaroor shivbaaba ne aakar avtaar liya hai। unki jayanti kab, kaise hui, shivbaaba kaise, kismen aaye, kya aakarke kiya - yeh koi nahin jaante। zaroor bhaarat ko svarga banaaya hoga। baap na aaye to bachchon ko kaun sikhlaaye! aur sabki mat hai - kaliyugi, aasuri mat। unse shreshtha ban nahin sakte। ab main tumko sumat deta hoon। aur koi ki bhi mat par na chalo। main shreshtha te shreshtha hoon, zaroor ooncha banaaoonga। to woh shreemat pakadni chaahiye aur koi ki mat li to dhokha khaayenge। kadam-kadam par shreemat lenge to in lakshmi-naaraayan jaisa banenge। unki mahima hi hai - tvamev maataashcha pita tvamev। main baap, teacher, satguru ke roop mein tumko mat deta hoon, jisse tum aise lakshmi-naaraayan samaan bante ho। yeh gyaan tumko hai tab samjha sakte ho। nambarvaar to hote hi hain। tum jaante ho mama bada refresh karti thi। baba bhi refresh karte hain। to tum bachchon ko bhi follow karna hai। baba ham aapse sunkar auron ko sunaayenge। hai bahut sahaj। bolo - bhagvaanuvaach likha hua hai। bhagwan to hai niraakaar। tum jaante ho drama mein yeh ved-shaastra aadi sab pahle se hi bane hue hain। shaastron mein jo kuchh hai, jaise bane hue hain phir bhi vahi banenge। kitni guhya baaten hain। guhya te guhya baaten sunaate rahenge। jo bachche samajhkar phir samjha saken। vyaas to likhne vaala manushya hoga na। bhagwan kisko kaha jaata hai! woh to sabhi ka baap hai। shreekrishna nahin। shreekrishna ki history-geography ko bhi tum bachche jaante ho। bhagwan to srishti ka rachta thahra। raajayog bhagwan ne sikhlaaya, na ki shreekrishna ne। tumko yeh nasha rehna chaahiye ki ham yeh raajayog seekh bhavishya prince princess banenge। bairistari padhte hain to nasha rehta hai। imtihaan paas kar jaakar kursi par baith barrister banenge। tum jaante ho marna to sabhi ko hai। abhi baap kehte hain marne se pahle purushaartha karo। is samay sirf tumhaari preet hai mere saath। kaurvon ki vipreet buddhi thi aur paandavon ki preet buddhi thi। to preet buddhi vaalon ki sthaapna aur vipreet buddhi vaalon ka vinaash hua। yeh hai padhaai। pahle to nishchay chaahiye ki baap hamko raajaaon ka raaja banaane padhaate hain। paanch-paanch hajaar varsha ke baad tumko padhaane aata hoon। drama mein koi bhi change nahin ho sakti।

tum jaante ho ki satya bolne vaala ek hi baap hai। baaki jo sabhi manushya maatra eeshvar ke liye raasta bataate hain aur unki rachna ke liye jo bolte hain so to sabhi jhooth hai। manushya samajhte bhi hain parantu abhi tak prabhaav nikalne ka samay nahin hai to deri lagegi। train to apne time par pahunchegi na। 8 ke badle 2 baje to nahin pahunchegi। ham yeh purushaartha karte-karte samajhte hain - abhi jaldi svarga mein chale jaayen। parantu baba station master kehte hain ki flag down va signal nahin hai, ajun deri hai। raajaai sthaapan ho jaae tab to chalenge na। bahut bachche kehte hain - baba, yahaan rahkar ham tang ho gaye hain। baba kehte hain yeh to tumhaara number one janma hai, ismen tumhein kabhi tang nahin hona hai। vande maatram gaaya hua hai। tumko yogbal se saare vishwa ko paavan banaana hai। achha!

meethe-meethe sikeeldhe roohaani bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) is vinaash kaal mein ek baap se sachchi preet rakhni hai। sada isi nashe mein rehna hai ki ham raajayog seekh bhavishya prince princess banenge।

2) yogbal se saare vishwa ko paavan banaane ki seva karni hai। is number one janma se kabhi bhi tang nahin hona hai।

vardaan:- sneh aur bhaavna ke bandhan mein bhagwan ko bhi baandhane vaale gaayan yogya bhav

bhakti maarga mein gaayan hain ki gopiyon ne bhagwan ko bhi bandhan mein baandh diya। yeh hai sneh aur bhaavna ka bandhan, jo charitra roop mein gaaya jaata hai। aap bachche is samay behad ke kalpa vriksha mein sneh aur bhaavna ki rassi se baap ko bhi baandh dete ho, iska hi gaayan bhakti maarga mein chalta hai। baap phir iske return mein sneh aur bhaavna ki donon rassiyon ko diltakhta ka aasan de jhoola banaae bachchon ko de dete hain, isi jhoole mein sada jhoolte raho।

slogan:- svayan ko har paristhiti mein mould karne vaale hi sachche gold hain।