शुक्रवार 10 मार्च 2023 की दैनिक मुरली

10-03-2023 praatahmurli om shanti "baapdaada"' madhuban

“meethe laadle bachche - tumhaari hai roohaani yaad ki yaatra, tumhein shareer ko koi takleeph nahin deni hai, chalte-phirte, uthte-baithte buddhi se baap ko yaad karo''

prashn:- sada khushi kin bachchon ko rehti hai? sthaai khushi na rahne ka kaaran kya hai?

uttar:- jo puraani duniya, puraane shareer se mamatva tod baap aur varse ko yaad karte hain unhein hi sthaai khushi rehti hai। jinki yaad ki yaatra mein maaya ke toofaan aate, avastha thandi ho jaati unki khushi sthaai nahin rehti। 2- jab tak bhavishya raajaai in aankhon se nahin dekhte hain, tab tak khushi kaayam nahin rah sakti।

geet:- humein un raahon par chalna hai…

om shanti। yeh baap kehte hain bachchon prati, yeh to samajhne ki baat hai। itne bachche sivaae prajaapita brahma ke aur kiske hote nahin। shreekrishna ko kabhi prajaapita nahin kaha jaata। naam gaaya hua hai na prajaapita brahma, jo hokar gaye hain woh is samay present hai। to prajaapita brahma ki santaan brahmaakumaar kumaariyaan dher hain। yeh hai prajaapita brahma ki aulaad। to zaroor prajaapita brahma ka bhi koi baap hoga na। bachche jaante hain hamaara daada parampita paramatma shiv hai। woh ab nai duniya rach rahe hain arthaat puraani duniya ko nai bana rahe hain। is puraani duniya mein yeh tan bhi puraane hain। nai duniya mein satopradhaan naye tan hote hain। woh kaise hote hain, dekho, in lakshmi-naaraayan ko। yeh hai nai duniya ke naye tan। inhon ki mahima bhaaratvaasi jaante hain। yeh svarga nai duniya, naye vishwa ke maalik hain। nai duniya jo thi woh ab puraani hai। 84 janma lene padte hain na। inka bhi poora hisaab hai। kaun poore 84 janma lete hain? sab to nahin lete। 84 janma sirf vahi lete hain jinka aadi se ant tak part hai। jo pahle is srishti par the। har ek baat laadle bachchon ko dhaaran karni hai। yahaan koi manushya, manushya ko nahin samjhaate yeh to niraakaar parampita paramatma manushya tan mein baith samjhaate hain। balihaari unki hai। woh nahin samjhaate to ham kuchh bhi nahin jaante। ham to bilkul tuchchha buddhi the। abhi rachayita aur rachna ke aadi madhya ant ko jaana hai। hu is hu...is behad drama mein sabse mukhya paartadhaari kaun-kaun hain। yeh avinaashi bana banaaya drama hai। gaate bhi hain bani banaai ban rahi.. gaayan bhakti maarga mein karte hain। parantu yeh abhi samjhaaya jaata hai ki yeh drama ka khel kaise bana hua hai।

baap baith samjhaate hain laadle bachche yeh to tum jaan gaye ho ki tumko yaatra par chalna hai। manushya yaatra par bahut kashta sahan karke jaate hain। abhi to aeroplane train aadi bahut sahaj nikli hain। aage to manushya paidal yaatra par jaate the। chalte-chalte toofaan lagte the। manushya behaal ho jaate the। phir koi vaapis laut aate the। to aadhaakalpa, dvaapar se lekar jismaani yaatra chalti hai। bhakti maarga mein manushya yaatra par kyon jaate hain? bhagwan ko dhoodhanne। bhagwan kahin baitha to nahin hai। bhagwan ke jad chitra pooje jaate hain। jo hokar jaate hain unke jad chitra banaate hain। chaitanya mein to bhagwan mil na sake। shivling aadi yeh sab jad chitra hain। jad chitron ko dekhne ke liye yaatra karte hain। yeh ek bhakti maarga ki rasam hai। jaante hain parantu koi ki bhi biography ko nahin jaante ki yeh kaun hain, kab aaye the? shiv jayanti manaai jaati hai, parantu unko bhi jaante nahin। aajkal to is utsav ko bhi uda diya hai kyonki inka naam roop aadi praayahlop hona hi hai। abhi tum jaante ho oonche te oonch gyaan ka saagar, sukh ka saagar hai। saagar se abhi hamko gyaan mil raha hai। vahi behad ka baap abhi practical mein hai। amarnaath bhi shivbaaba hai na। dikhaate hain barpha ka ling ban jaata hai। manushyon ko thagne ke liye gapode to bahut lagaaye hain। to us jismaani yaatra par takleeph bahut hoti hai। yeh hai roohaani yaatra, ismen shareer ki koi takleeph nahin hai। tum bachche samajhte ho ham behad ke baap ke bachche hain। bhakti maarga mein janma-janmaantar yaad karte aaye hain। ab smriti aai hai। baap kehte hain tum 63 janma dhoodhante-dhoondhate utarte gaye। pahle ekdam kadi naudha bhakti karte hain। phir bhi duniya ko tamopradhaan to zaroor hona hai। jhaad vriddhi ko paata hai zaroor। ek bhi manushya vaapis mere paas aa nahin sakte। naatak mein sabko apna part bajaana hai। sato rajo tamo mein aana hai। number one ka hi misaal lo। number-one lakshmi-naaraayan satopradhaan the, ab tamopradhaan hain। jismen hi phir shivbaaba ne pravesh kiya hai kyonki inko hi phir number one banna hai। phir plus mein mo ko rakhte hain। maataaon ko lift deni hoti hai। pahle lakshmi phir naaraayan, maataaon ka naam ooncha kiya jaata hai। maata sadaiv pativrata hoti hai। purush kabhi patneevrata nahin hote hain। vande maatram kaha jaata hai। is samay tum baap ke bane ho। to tum ho jaate ho brahmaakumaar kumaari। maata guru bigar kabhi kiska uddhaar hota nahin। guru to bahut dher ke dher hain। phir bhi kaliyug ghor andhiyaara ho gaya hai। kitne guru gosaai hain। kahaan-kahaan haridvaar aadi mein unhon ke mandir bane hue hain। nahin to vaastav mein mandir unko kaha jaata hai jismen devtaayen hote hain। sannyaasi logon ka kabhi mandir nahin hota hai। mandiron mein to devtaayen hi rehte hain kyonki unhon ki aatma aur shareer donon pavitra hain। in mahaatmaaon ki bhal aatma pavitra hai, parantu shareer pavitra mil nahin sakta kyonki tatva bhi tamopradhaan hain। abhi tum devta ban rahe ho। banaane vaala hai parampita paramatma। yeh hai satopradhaan sannyaas। woh hai rajopradhaan sannyaas। yeh baap ke sivaae koi sikhla na sake। to baba ne samjhaaya hai ki woh hai jismaani yaatra, yeh hai roohaani yaatra। ismen karmendriyon ka koi kaam nahin, kuchh bhi takleeph ki baat nahin hai। bahut sahaj hai। woh jismaani yaatra anek prakaar ki hai। yeh roohaani yaatra ek hi hai। yeh hai raajaai ke liye yaatra। yeh lakshmi-naaraayan ka chitra saamne khada hai, duniya thode hi jaanti hai ki inhon ne yeh raajayog ki yaatra kar yeh pad paaya hai। tum bachche jaante ho inhon ne yeh praalabdha kaise paai। koi oopar se nai aatmaayen to nahin aai, jinko bhagwan ne raajaai de di। nahin। inhon ko puraane se naya banaaya hua hai jisko rejuvenate va kaaya kalpatru kaha jaata hai। to baap baith samjhaate hain inhonne roohaani yaatra ki thi। raajayog bal ki yaatra se yeh bane। baap raajayog aur gyaan sikhaane aate hain to ab tumhaari yaatra chal rahi hai। tum baithe hue athva chalte phirte uthte baithte yaatra par ho। tum sirf buddhi se baap ko yaad karte ho। yaad se hi daudi pahante ho aur tumhaare vikarma vinaash hote hain। jitna jaldi vikarma vinaash honge utna jaldi baap ke gale ka haar banenge। tum ab woh 4 dhaam aadi nahin karte ho। woh sab bhaktimaarga ke jismaani teerthon par jaae vahaan se phir laut aakar ghar mein vikarmi bante hain। jitna samay yaatra par rehte hain, utna samay nirvikaari rehte hain। aajkal to haridvaar mein jaakar dekho pande log bade gande rehte hain। log yaatra par jaate hain to pavitra rehte hain aur vahaan ke rahvaasi pande log apvitra rehte hain। tumhaari yaatra kitni svachchha hai। kuchh bhi dhakka aadi nahin khaana hai। baba kehte hain laadle bachche uthte baithte chalte phirte sirf mujhe yaad karo। yeh aatmaon se baat kar rahe hain। aatma in organs dvaara sunti hai। aatma mukh se bolti hai, aankhon se dekhti hai। aatmaayen in aankhon se dikhaai nahin padti, na paramatma dikhaai padta। donon ko divya drishti bigar dekha nahin ja sakta hai। samjha jaata hai tab kehte hain hamaare mein aatma hai। hamaari aatma duhkhi hai। hamaari aatma ek shareer chhod doosra jaakar leti hai। aatma bolti hai na। paramatma bhi aatma se baat karte hain - he laadle bachche, aatmaayen ab tumko mere paas aana hai। main tumko yaatra sikhlaata hoon। tum pavitra banne sivaae mere paas aa nahin sakte ho। aatma pavitra hai। pahle-pahle aatma satopradhaan hai phir sato rajo tamo guni hoti hai। shareer bhi sato rajo tamo hota hai। satopradhaan ko gora, tamopradhaan ko saanvara kaha jaata hai। kitni samajh ki baat hai। tum jaante ho aatma aur paramatma alag rahe bahukaal....ab aakar phir mile hain। manushya, manushya ke saath milenge। aatma, aatmaon ke saath milegi। paramatma bhi vahaan milenge। aatma aur paramatma donon ka saakshaatkaar divya drishti se hota hai kyonki woh ati sookshm hai, star hai। ab koi bhi science ghamandi nahin jo kah sake aatma ki praveshta kaise hoti hai। in baaton ka unko bilkul pata nahin hai। most beloved baap hai। bhakti maarga mein aadhaakalpa bhakta bhagwan ko yaad karte hain। aise nahin ki sab bhagwan hain। sab bhagwan hon to bhakta aaraadhna, vandana, saadhna kyon karte, kislie karte? sabhi mukti jeevanmukti chaahte hain kyonki yahaan duhkhi hain, chaahte hain shanti ho। parantu bichaaron ko yeh pata nahin hai ki shantidham kisko kaha jaata hai, mukti kahaan hoti hai। yeh bhi nahin jaante। kahne maatra sirf kah dete hain ki paar nirvaan gaya। jaante koi bhi nahin hain।

ab tum bachche yaatra par ho। baap kehte hain bachche sambhal-sambhal kar chalna hai। toofaan to bahut aayenge। tum yaad karne ki koshish karenge, maaya buddhiyog tod degi। phir woh avastha thandi ho jaati hai। khushi ka paara hat jaata hai। nahin to khushi ka paara sthaai rehna chaahiye। in aankhon se woh raajaai dekhte hain to khushi kaayam rehti hai। yahaan tum buddhiyog se jaante ho ki raajaai milti hai। raajaai ke liye ham padh rahe hain। in aankhon se nahin dekhte ho isliye maaya ghadi-ghadi bhula deti hai। baba kehte hain grihastha vyavhaar mein rehte hue kamal phool samaan raho। puraani duniya, puraane shareer sabse mamatva todte jaao। ek baap ko yaad karo। pahle tumko baap ke paas jaana hai phir nai duniya mein aana hai। baap aur varse ko yaad karo phir jab ham yahaan aayenge to woh hogi praalabdha। usko yaad nahin karenge। abhi ham purushaartha karte hain bhavishya praalabdha paane ke liye। yahaan manushya purushaartha karte hain yahaan ki aajeevika ke liye। ham bhavishya ki aajeevika ke liye purushaartha karte hain। grihastha vyavhaar mein rehte phir yeh course bhi uthaana hai। knowledge ko dhaaran karna hai, phir tumko purushaartha nahin karna hoga। vahaan tum purushaartha nahin karte praalabdha bhogte ho। tum jaante ho ham bhavishya banaate hain vahaan praalabdha bhogenge। vahaan yaad nahin rehti ki ham praalabdha bhogte hain। phir to purushaartha bhi yaad pade। purushaartha aur praalabdha donon hi bhool jaate hain। praalabdha bhogte rehte hain, past ka pata nahin rehta। abhi tum past, present, future ko jaante ho aur koi manushya nahin jo past, present future ko jaante ho। isko kaha jaata hai trikaaldarshi।

baba ne roohaani yaatra aur jismaani yaatra ka contrast bhi achhi reeti samjhaaya hai। jismaani yaatra janma-janmaantar karte aaye, yeh roohaani yaatra hai ek janma ki। svarga mein jaayenge phir lautkar is mrityulok mein aana nahin hai। achha!

meethe-meethe sikeeldhe svadarshan chakradhaari bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) satopradhaan sannyaas se aatma aur shareer donon ko pavitra banaana hai। puraani duniya aur puraane shareer se mamatva tod dena hai।

2) trikaaldarshi ban past, present, future ko buddhi mein rakh purushaartha karna hai। knowledge ko dhaaran kar sthaai khushi mein rehna hai।

vardaan:- puraane hisaab-kitaab ko samaapta kar sampoornata ka samaaroh manaane vaale bandhanmukta bhav

is paraaye desh mein jab sabhi bandhan-yukta aatma ban jaate hain tab baap aakar swaroop aur svadesh ki smriti dilaakar bandhan-mukta banaae svadesh mein le jaate hain aur svaraajya adhikaari banaate hain। to apne svadesh mein chalne ke liye sab hisaab-kitaab ke samaapti ka samaapti samaaroh manaao। jab abhi yeh samaaroh manaayenge tab ant mein sampoornata samaaroh mana sakenge। bahutkaal ke bandhanmukta hi bahutkaal ke jeevanmukta pad ko praapta karte hain।

slogan:- apne umang-utsaah ke sahayog aur meethe bol se kamjor ko shaktishaali bana dena hi shubhchintak banna hai।