सोमवार 13 मार्च 2023 की दैनिक मुरली

13-03-2023 praatahmurli om shanti "baapdaada"' madhuban

“meethe bachche - yaad mein rehte-rehte yeh kaliyugi raat poori ho jaayegi, tum baap ke paas chale jaayenge phir aayenge din mein, yeh bhi wonderful yaatra hai''

prashn:- tum bachchon ko svarga mein jaane ki ichchha kyon hai?

uttar:- kyonki tum jaante ho jab ham svarga mein jaayen tab baaki sab aatmaon ka kalyaan ho, sab apne shantidham ghar mein ja saken। tumhein koi svarga mein jaane ka lobh nahin hai। lekin tum svarga ki sthaapna kar rahe ho, itni mehnat karte ho to zaroor us svarga ke maalik bhi banenge। baaki tumhein koi doosri ichchha nahin hai। manushyon ko to ichchha rehti hai - humein bhagwan ka saakshaatkaar ho lekin woh to tumhein svayan padha rahe hain।

geet:- raat ke raahi…

om shanti। raat ke raahi ka arth to bachche nambarvaar purushaartha anusaar jaante honge। agar bachchon ka svadarshan chakra phirta rehta hai, smriti mein rehte hain to woh samajh sakenge ki barobar ham din arthaat svarga ke kitna najdeek pahunche hain। bachchon ko samjhaaya hai - yeh behad ka din aur raat hai। brahma ki behad ki raat kaha jaata hai। shaastron mein kitna achha naam likha hua hai। aise nahin kaha jaayega ki lakshmi-naaraayan ki bhi raat hogi। nahin। brahma ka din, brahma ki raat kaha jaata hai। lakshmi-naaraayan to vahaan raajya karte the। phir zaroor srishti chakra ko phirna hai। lakshmi-naaraayan ka raajya phir satayug mein aana hai। satayug ke baad treta, dvaapar, kaliyug zaroor aana hai। to zaroor satayug mein phir vahi raaja hona chaahiye। yeh gyaan sirf shivbaaba hi brahma dvaara tum bachchon ko dete hain, isliye tumko hi yeh srishti chakra ka gyaan hai। devtaaon ko nahin hai। tum braahmanon ki buddhi mein yeh chakra phirta hai isliye naam rakha hai brahma aur brahmaakumaar kumaariyon ki raat। abhi tum chal rahe ho din taraph। satayug ko din, kaliyug ko raat kaha jaata hai। tum bachche jaante ho hamaari yeh yaatra kaliyug ke ant aur satayug aadi ke sangam par hi hoti hai। tum baithe kaliyug mein ho tumhaari buddhi vahaan hai। aatma ko samajhna hai hamko yeh shareer chhodkar baap ke paas jaana hai। shareer to ant mein chhodenge jab manzil poori hogi arthaat baap yog sikhaana banda karenge। padhaai ka ant hoga tab tak baap sikhaate, padhaate rehte hain। bachche baap ki yaad mein rehte hain। aise yaad mein rehte-rehte raat poori ho jaayegi aur tum baap ke paas chale jaayenge। phir tum aayenge din mein। yeh hai tumhaari wonderful yaatra। baap din sthaapan karte hain tum brahmaakumaar kumaariyon ke liye। ab din arthaat satayug aa raha hai। abhi tum kaliyug raat mein baithe ho। nirantar baap ko yaad karte raho।

baap ne samjhaaya hai sabhi ko marna hai zaroor। manushya poochhte hain kab marna hai? kab vinaash hoga? ab divya drishti se vinaash ka saakshaatkaar kiya hua hai। phir in aankhon se dekhna zaroor hai aur sthaapna, jiska saakshaatkaar karte hain woh bhi in aankhon se dekhna hai। mukhya jis brahma ka din aur raat gaaya hua hai unko hi sthaapna aur vinaash ka saakshaatkaar hua hai। to jo divya drishti se dekha hai woh practical zaroor hoga। bhakti maarga mein jo kuchh saakshaatkaar hota hai woh divya drishti se dekhte hain। tum bhi divya drishti se dekhte ho। tumko kisi cheez ki ichchha nahin rehti hai। sannyaasi logon ko ichchha rehti hai - parampita paramatma ko dekhne ki। yahaan tum bachchon ko to parampita paramatma khud baith padhaate hain। tumko ichchha hai svarga mein jaane ki। bachche jaante hain ki ham svarga mein jaayenge to sabhi ka kalyaan ho jaayega। abhi tum bachche jaante ho behad ka baap jo manushya srishti ka rachayita, beejroop hai vo jhaad ke aadi, madhya, ant ko jaante hain। ham us baap ko aur unke varse ko jaante hain। jaise woh jhaad hote hain, jaante hain yeh aamb ka jhaad hai। beej bone se pahle do chaar patte nikalte hain phir jhaad bada hota jaata hai to woh hai jad beej। yeh baap hai manushya srishti ka chaitanya beejroop, use hi knowledgeful kaha jaata hai।

bachche jaante hain yeh paathshaala hai, jismen yeh vidya (padhaai) mil rahi hai aur tum yog bhi seekh rahe ho। is vidya se tum bhavishya prince-princess bante ho। aatma pavitra zaroor chaahiye। abhi to sab apvitra hain। parantu koi ko patit kaho to maanenge nahin। kehte hain krishnapuri mein bhi ek do ko duhkh dene vaale kans, jaraasandhi aadi the। ek do ko sukh dene vaale ko paavan kaha jaata hai। svarga mein koi duhkh deta nahin। vahaan to sher bakri ikatthe jal peete hain। kisko duhkh nahin dete। parantu yeh baaten koi samajhte thode hi hain। jo shaastra padhe hain vahi baaten buddhi mein aa jaati hain। devtaaon ke pujaari apne ko khud hi chamaat maarte hain। hinduon ne aapehi apne ko chamaat maari hai। apne devtaaon ki baith ninda ki hai। Christ, buddha aadi ki kitni mahima karte hain। devtaaon ki baith ninda karte hain। yeh dharma ki glaani hui na। geeta mein bhi kehte hain yada yadaahi dharmasya.....naam bhi bhaarat ka hai। bhaarat hi bhrashta aur shreshtha banta hai। shreshtha the lakshmi-naaraayan। bhrashta manushya, shreshtha ko maatha tekte hain। sannyaasi bhi pavitra rehte hain, parantu bhagwan ko jaante nahin। apne ko hi bhagwan kah dete hain। baaki doosre jo bhi guru aadi hain patit hain, vikaar mein bhi jaate hain। patit kaha jaata hai vikaari ko। woh paavan ko namaskaar karte hain। sannyaasiyon ko guru karte hain to bhi isliye ki hamko aap samaan paavan banaayen। aajkal sannyaasi to koi mushkil bante hain, phir grihasthi ko guru karne se kya praapti hogi? jabki ve khud hi patit hain। parantu nai aatmaayen aati hain to unhon ki kuchh mahima nikalti hai। kisko putra mila, kisko dhan mila to khush ho jaate hain। phir ek do ko dekh sab guru karte rahenge। vaastav mein guru kiya jaata hai sadgati ke liye। woh zaroor 5 vikaaron ka sannyaas kiya hua pavitra chaahiye। baaki grihasthi guru karne se kya phaayda? bade-bade grihasthi guru hain jinke hajaaron followers hain। koi ek ne guru kiya to woh gaddi chali aati hai। shishya log unke paanv dhokar peete hain, isko andhashradha kaha jaata hai। manushya bhal gaate hain ki he bhagwan andhon ki laathi tu.. parantu iska arth bhi nahin samajhte। andha (buddhiheen) banaati hai maaya raavan। sab pattharbuddhi ban jaate hain isliye baap kehte hain yeh jo bhi shaastra aadi hain in sabka saar main aakar sunaata hoon। naarad ka misaal dete hain, unko kaha tum apni shakla to dekho - lakshmi ko varne laayak ho? lakshmi to svarga mein hogi। abhi tum jaante ho humein purushaartha kar bhavishya lakshmi ko va naaraayan ko varna hai। to yeh bhi yahaan ki baat hai। shakla manushya ki hai, seerat bandar ki hai। baap kehte hain apni shakla to dekho। manushya tumko kahenge tum svarga ka maalik banne ka bhi lobh rakhte ho na। unko samjhaana hai are ham to saari srishti ko svarga banaate hain। itni mehnat karte hain to zaroor maalik bhi hamko banna padega na। koi to raajya karenge na।

baba ne samjhaaya hai number one hai kaam mahaashatru, jo manushya ko aadi, madhya, ant duhkh deta hai। yeh aadhaakalpa ka kada dushman hai। bhal drama mein sukh aur duhkh hai parantu duhkh mein le jaane vaala bhi to hai। woh hai raavan। aadhaakalpa raavanraajya chalta hai। yeh baaten tum bachche hi jaante ho। tumhaare mein bhi nambarvaar hain। ab dekho kehte hain kailaash parvat par shankar paarvati rehte hain। president aadi bhi amarnaath, kailaash parvat par jaate hain। parantu itna bhi samajhte nahin ki vahaan shankar paarvati kahaan se aaye? kya paarvati durgati mein thi jo unko baith katha sunaai? sookshm vatan mein to durgati ka prashn hi nahin। kitna door-door jaakar manushya dhakke khaate hain। yeh hai bhakti maarga। duhkh to manushyon ko paana hi hai। praapti hai alpakaal ki। woh kaun si praapti hai? teerthon par jitna samay rehte hain utna samay pavitra rehte hain। koi to sharaab bigar rah nahin sakte, to chhipaakar bhi sharaab ki bottle le jaate hain। phir woh koi teertha thode hi hua। vahaan bhi kitna gand laga pada hai, baat mat poochho। vikaari manushyon ko vikaar bhi vahaan milta hai। manushyon ko gyaan nahin hai to samajhte hain bhakti achhi hai, unse hi bhagwan milega। aadha-kalpa bhakti ke dhakke khaane padte hain। aadhaakalpa ke baad jab bhakti poori hoti hai to phir bhagwan aate hain। baba ko taras padta hai। aise nahin ki bhakti se bhagwan ko paate hain। aisa hota to phir bhagwan ko pukaarte kyon? yaad kyon karte? bhagwan kab milta hai, yeh samajhte nahin hain। bhakti se shreekrishna ka saakshaatkaar hua to bas, samajhte unko bhagwan mil gaya। vaikunthavaasi hua। shreekrishna ka darshan hua bas chala gaya shreekrishnapuri। parantu jaata koi nahin। to bhakti maarga mein andhashradha bahut hai। tum bachche abhi samajh gaye ho। baap saadhaaran tan mein aate hain tab to gaali khaate hain। nahin to bhala kis tan mein aaye? shreekrishna ke tan mein to gaali kha na sake। parantu shreekrishna patit duniya mein paavan banaane aaye, yeh ho nahin sakta। shreekrishna ko patit-paavan kehte bhi nahin hain। manushya yeh bhi samajhte nahin ki patit-paavan kaun hai, kaise aate hain isliye koi ko bhi vishvaas nahin baithta hai। shaastron mein to hai nahin ki kaise brahma tan mein aate hain। kehte bhi hain brahma mukh dvaara sooryavanshi, chandravanshi dharma ki sthaapna hoti hai। phir bhool jaate hain ki kab hoti, kaise hoti? prajaapita brahma to zaroor yahaan kalpa ke sangam par hona chaahiye tab to braahmanon ki nai srishti rachi jaae। manushya bahut moonjhe hue hain, unko raasta bataana hai। baap kitni bhaari service aakar karte hain। tum samajhte ho ham 5 vikaaron se ekdam bandar se bhi badtar hote gaye hain। ham so devta the phir ekdam kya ban gaye! aison ko phir baap kitna oonch aakar banaate hain। to baap ko kitna lav karna chaahiye। yeh baap sunaate hain ya daada sunaate hain? yeh bhi kitne bachchon ko pata nahin lagta। baap kehte hain vichaar karo main sadaiv rath par haajir rah sakta hoon? yeh to ho nahin sakta। main to aata hi hoon service par।

baba ke paas samaachaar aaya tha - koi ne poochha kya manushya kisko sukh de sakte hain? yeh manushya ke haath mein hai? to ek ne kaha ki nahin, eeshvar hi hai jo manushya ko sukh de sakta hai। manushya ke haath mein kuchh bhi nahin hai। to koi bachche ne phir samjhaaya hai ki manushya hi sukh deta hai, manushya hi sab kuchh karta hai। eeshvar ke haath mein kuchh nahin hain। are, tum thode hi kuchh dete ho। eeshvar ke haath mein hi to hai na। samjhaana chaahiye - shreemat par chalna hai। parampita ki shreemat bigar koi sukh de na sake। apni badaai nahin karni chaahiye। ham shreemat par saare srishti ko svarga banaate hain। to dekho kitni bhaari bhool bachchon ki hoti hai। woh kehte eeshvar ke haath mein hai। bi.ke. kehte ki manushya ke haath mein hai। vaastav mein hai to baap ke hi haath mein। shreemat bigar kuchh kar nahin sakte। manushya bilkul birth not A penny ban jaate hain। baap kehte hain raavan manushya ko pattharbuddhi bana dete hain। main aakar tumko paaras buddhi banaata hoon। mahima saari baap ki karni hai। ham shreemat par chal rahe hain। eeshvar bigar manushya ko koi shreshtha bana nahin sakta। achha!

brahma mukh vanshaavli brahman kul bhooshan svadarshan chakradhaari meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap jo itni service karte hain, humein itna oonch devta banaate hain, aise baap se dil ka sachcha lav rakhna hai। devtaaon samaan sabko sukh dena hai।

2) ek baap ki sada mahima karni hai। apni badaai nahin dikhaani hai।

vardaan:- seva ka part bajaate part se nyaare aur baap ke pyaare rahne vaale sahaj yogi bhav

kai bachche kehte hain yog kabhi lagta hai kabhi nahin lagta, iska kaaran hai - nyaare pan ki kami। nyaare na hone ke kaaran pyaar ka anubhav nahin hota aur jahaan pyaar nahin vahaan yaad nahin। jitna jyaada pyaar utni sahaj yaad isliye sambandh ke aadhaar par part nahin bajaao, seva ke sambandh se part bajaao to nyaare rahenge। kamal pushpa samaan puraani duniya ke vaataavran se nyaare aur baap ke pyaare bano to sahajyogi ban jaayenge।

slogan:- gyaani woh hai jo kaaran shabd ko merge kar har baat ka nivaaran kar de।