शनिवार 15 अप्रैल 2023 की दैनिक मुरली

15-04-2023 praatahmurli om shanti "baapdaada"' madhuban

meethe bachche - “ek do ko khushi ki khuraak khilaate raho, sada khushmauz mein rehna aur khushi baantana, yahi hai jab-radasta khaatiri karna''

prashn:- apni oonchi avastha banaane ki vidhi kya hai? kin mukhya baaton ka dhyaan rakhna hai?

uttar:- oonchi avastha banaani hai to 1- nashtomoha banne ki himmat rakhni hai। 2- apna chart rakhna hai ki baba ko yaad karte samay unse kya-kya baaten ki? kitna samay yaad kiya? 3- neend ko jeetne vaala banna hai। 4- puraane shareer ki sambhaal bhi karni hai phir ise bhoolna bhi hai। 5- daivi svabhaav banaana hai। svabhaav ke vasheebhoot hokar kisi ko bhi sataana nahin hai। 6- sab defect nikaal pure diamond banna hai। 7- sabko sukh dene vaala khushboodaar phool banna hai।

om shanti। gyaan ka teesra netra dene vaala roohaani baap baith roohaani bachchon ko samjhaate hain। gyaan ka teesra netra sivaae baap ke aur koi de nahin sakta। abhi tum bachchon ko gyaan ka teesra netra mila hai। abhi tum bachche jaante ho abhi yeh puraani duniya badalne vaali hai। bichaare manushya nahin jaante ki kaun badlaane vaala hai aur kaise badlaate hain kyonki unhon ko gyaan ka teesra netra hi nahin hai। tum bachchon ko abhi gyaan ka teesra netra mila hai jisse tum srishti ke aadi madhya ant ko jaan gaye ho। yeh hai gyaan ki saccharin। saccharin ki ek boond bhi kitni meethi hoti hai। gyaan ka bhi ek hi akshar hai manmanaabhav। sabhi se kitna meetha hai। apne ko aatma samajh aur baap ko yaad karo। baap shantidham aur sukhdhaam ka raasta bata rahe hain। baap aaye hain bachchon ko svarga ka varsa dene। to bachchon ko kitni khushi rahni chaahiye। kehte bhi hain khushi jaisi khuraak nahin। jo sadaiv khushi mauj mein rehte hain unke liye woh jaise khuraak hoti hai। 21 janma mauj mein rahne ki yeh jabardasta khuraak hai। yeh khuraak sadaiv ek do ko khilaate raho। ek do ki jabardasta khaatiri yeh karni hai। aisi khaatiri aur koi manushya, manushya ki kar na sake।

tum shreemat par sabhi ki roohaani khaatiri karte ho। sachchi-sachchi khush-khairaaphat bhi yeh hai kisko baap ka parichay dena। meethe bachche jaante hain behad ke baap dvaara hamko jeevanmukti ki khuraak milti hai। satayug mein bhaarat jeevanmukta tha, paavan tha। baap bahut badi oonch khuraak dete hain, tab to gaayan hai ateendriy sukh poochhna ho to gop-gopiyon se poochho। yeh gyaan aur yog ki kitni first class wonderful khuraak hai। aur yeh khuraak ek hi roohaani surgeon ke paas hai। aur kisko is khuraak ka maaloom hi nahin hai। baap kehte hain meethe bachchon tumhaare liye tiri (hatheli) par saugaat le aaya hoon। mukti, jeevanmukti ki yeh saugaat mere paas hi rehti hai, kalpa-kalpa main hi aakar tumko deta hoon phir raavan chheen leta hai। to abhi tum bachchon ko kitna khushi ka paara chadha rehna chaahiye। tum jaante ho hamaara ek hi baap, teacher aur sachcha-sachcha sadguru hai jo hamko saath le jaate hain। most beloved baap se vishwa ki baadshaahi milti hai। yeh kam baat hai kya! sadaiv harshit rehna chaahiye। godly student life is di best। yeh abhi ka hi gaayan hai na। phir nai duniya mein bhi tum sadaiv khushiyaan manaate rahenge। duniya nahin jaanti ki sachchi-sachchi khushiyaan kab manaai jaayengi। manushyon ko to satayug ka gyaan hi nahin hai to yahaan hi manaate rehte hain। parantu is puraani tamopradhaan duniya mein khushi kahaan se aai। yahaan to traahi-traahi karte rehte hain। kitna duhkh ki duniya hai।

baap tum bachchon ko kitna sahaj raasta bataate hain। grihastha vyavhaar mein rehte kamal phool samaan raho। dhandha-dhori aadi karte bhi mujhe yaad karte raho। jaise aashuk aur maashuk hote hain। woh to ek do ko yaad karte rehte hain। woh unka aashik, woh unka maashuk hota hai। yahaan yeh baat nahin hai yahaan to tum sabhi ek maashuk ke janma-janmaantar se aashik ho rehte ho। baap kab tumhaara aashik nahin banta। tum us maashuk ko aane liye yaad karte aaye ho। jab duhkh jaasti hota hai to jaasti sumiran karte hain। tab to gaayan bhi hai duhkh mein sumiran sab karain, sukh mein kare na koy। is samay baap bhi sarvashaktivaan hai। din-pratidin maaya bhi sarvashaktivaan tamopradhaan hoti jaati hai isliye ab baap kehte hain meethe bachche dehi-abhimaani bano। apne ko aatma samajh mujh baap ko yaad karo aur saath-saath daiveegun bhi dhaaran karo tum aise (lakshmi-naaraayan) ban jaayenge। is padhaai mein mukhya baat hai hi yaad ki। oonch te oonch baap ko bahut pyaar, sneh se yaad karna chaahiye। woh oonch te oonch baap hi nai duniya sthaapan karne vaala hai। baap kehte hain main aaya hoon tum bachchon ko vishwa ka maalik banaane isliye ab mujhe yaad karo to tumhaare anek janmon ke paap kat jaayen। patit paavan baap kehte hain tum bahut patit ban gaye ho isliye ab tum mujhe yaad karo to tum paavan ban aur paavan duniya ka maalik ban jaayenge। patit-paavan baap ko hi bulaate hain na। ab baap aaye hain to zaroor paavan banna pade। baap duhkhaharta, sukhkarta hai। barobar satayug mein paavan duniya thi to sabhi sukhi hi the। ab baap phir se kehte hain bachche shantidham aur sukhdhaam ko yaad karte raho। abhi hai sangamayug। khivaiya tumko is paar se us paar le jaate hain। naeeya koi ek nahin, saari duniya jaise ek bada jahaaj hai, unko paar le jaate hain।

baap meethe-meethe bachchon ko samjhaate hain apne ko aatma samajh baap ko yaad karo। tum bhi baap ki service mein lag jaao। on god fatherly service। baap hi tumko vishwa ka maalik banaane aaye hain। jo achha purushaartha karte hain unko mahaaveer kaha jaata hai। dekha jaata hai kaun mahaaveer hain jo baba ke direction par chalte hain। baap ka pharmaan hai apne ko aatma samajh bhaai-bhaai dekho। is shareer ko bhool jaao। baba bhi is shareer ko nahin dekhte hain। baap kehte hain main aatmaon ko dekhta hoon। baaki yeh to gyaan hai ki aatma shareer bigar bol nahin sakti। main bhi is shareer mein aaya hoon। loan liya hua hai। shareer ke saath hi aatma padh sakti hai। baba ki baithak yahaan hai। yeh hai akaal takhta। aatma akaalmoorta hai। aatma kab chhoti badi nahin hoti hai, shareer chhota bada hota hai। jo bhi aatmaayen hain un sabhi ka takhta yeh bhrakuti ka beech hai। shareer to sabhi ke bhinna-bhinna hote hain। kisko akaal takhta purush ka hai, kiska akaal takhta stri ka hai। kiska akaal takhta bachche ka hai। baap baith bachchon ko roohaani drill sikhlaate hain। jab koi se baat karo to pahle apne ko aatma samjho। ham aatma phalaane bhaai se baat karte hain। baap ka paigaam dete hain ki shivbaaba ko yaad karo। yaad se hi junk utarni hai। sone mein jab alloy padti hai to sone ki value kam ho jaati hai। tum aatmaon mein bhi junk padne se tum valueless ho gaye ho। ab phir paavan banna hai। tum aatmaon ko ab gyaan ka teesra netra mila hai। us netra se apne bhaaeeyon ko dekho। bhaai-bhaai ko dekhne se karmendriyaan kab chanchal nahin hongi। raaj-bhaag lena hai, vishwa ka maalik banna hai to yeh mehnat karo। bhaai-bhaai samajh sabhi ko gyaan do। to phir yeh tev (aadat) pakki ho jaayegi। sachche-sachche brothers tum sabhi ho। baap bhi oopar se aaye hain, tum bhi aaye ho। baap bachchon sahit service kar rahe hain। service karne ki baap himmat dete hain। himmate marda… to yeh practice karni hai। main aatma bhaai ko padhaata hoon। aatma padhti hai na। isko spiritual knowledge kaha jaata hai। jo roohaani baap se hi milti hai। sangam par hi baap aakar yeh knowledge dete hain ki apne ko aatma samjho। tum nange aaye the phir yahaan shareer dhaaran kar tumne 84 janma part bajaaya hai। ab phir vaapis chalna hai isliye apne ko aatma samajh bhaai-bhaai ki drishti se dekhna hai। yeh mehnat karni hai। apni mehnat karni hai, doosre mein hamaara kya jaata। charity begins at hom arthaat pahle khud ko aatma samajh phir bhaaeeyon ko samjhaao। to achhi reeti teer lagega। yeh jauhar bharna hai। mehnat karenge tab hi oonch pad paayenge। kuchh sahan bhi karna padta hai।

koi ulti-sulti baat bole to tum chup raho। tum chup rahenge to phir doosra kya karega। taali do haath se bajti hai। ek ne mukh ki taali bajaai, doosra chup kar de to woh aapehi chup ho jaayenge। taali se taali bajne se aavaaj ho jaata hai। bachchon ko ek do ka kalyaan karna hai। baap samjhaate hain bachche sadaiv khushi mein rahne chaahte ho to manmanaabhav। apne ko aatma samajh baap ko yaad karo। bhaaeeyon (aatmaon) taraph dekho। bhaaeeyon ko bhi yeh knowledge do। yeh tev (aadat) pad jaane se phir kab criminal aai dhokha nahin dengi। gyaan ke teesre netra se teesre netra ko dekho। baba bhi tumhaari aatma ko hi dekhte hain। koshish yeh karni hai sadaiv aatma ko hi dekhen। shareer ko dekhen hi nahin। yog karaate ho to bhi apne ko aatma samajh bhaaeeyon ko dekhte rahenge to service achhi hogi। baba ne kaha hai bhaaeeyon ko samjhaao। bhaai sabhi baap se varsa lete hain। yeh roohaani knowledge ek hi baar tum brahman bachchon ko milti hai। tum brahman ho phir devta banne vaale ho। is sangamayug ko thode hi chhodenge, nahin to paar kaise jaayenge। koodenge thode hi। yeh wonderful sangamayug hai। to bachchon ko roohaani yaatra par rahne ki tev (aadat) daalni hai। tumhaare hi phaayde ki baat hai। baap ki shiksha bhaaeeyon ko deni hai। baap kehte hain main tum aatmaon ko gyaan de raha hoon। aatma ko hi dekhta hoon। manushya-manushya se baat karega to unke munh ko dekhega na। tum aatma se baat karte ho to aatma ko hi dekhna hai। bhal shareer dvaara gyaan dete ho parantu ismen shareer ka bhaan todna hota hai। tumhaari aatma samajhti hai paramatma baap hamko gyaan de rahe hain। baap bhi kehte hain aatmaon ko dekhta hoon, aatmaayen bhi kehti ham paramatma baap ko dekh rahe hain। unse knowledge le rahe hain, isko kaha jaata hai spiritual gyaan ki len-den, aatma ki aatma ke saath। aatma mein hi gyaan hai। aatma ko hi gyaan dena hai। yeh jaise jauhar hai। tumhaare gyaan mein yeh jauhar bhar jaayega, to kisko bhi samjhaane se jhat teer lag jaayega। baap kehte hain practice karke dekho teer lagta hai na। yeh nai tev daalni hai to phir shareer ka bhaan nikal jaayega। maaya ke toofaan kam aayenge, bure sankalp nahin aayenge। criminal aai bhi nahin rahegi। ham aatma ne 84 ka chakra lagaaya। ab naatak poora hota hai। ab baba ki yaad mein rehna hai। yaad se hi tamopradhaan se satopradhaan ban, satopradhaan duniya ke maalik ban jaayenge। kitna sahaj hai। baap jaante hain bachchon ko yeh shiksha dena bhi mera part hi hai। koi nai baat nahin। har 5000 varsha baad hamko aana hota hai। main bandhaaymaan hoon। bachchon ko baith samjhaata hoon meethe bachche roohaani yaad ki yaatra mein raho to ant mate so gati ho jaayegi। yeh antakaal hai na। maamekam yaad karo to tumhaari sadgati ho jaayegi। yaad ki yaatra se paaya majboot ho jaayega। yeh dehi-abhimaani banne ki shiksha ek hi baar tum bachchon ko milti hai। kitna wonderful gyaan hai। baba wonderful hai to baba ka gyaan bhi wonderful hai, jo aur koi bata na sake।

yeh hai tum braahmanon ka sarvottam oonch te oonch kul। is samay tumhaara jeevan amoolya hai isliye is shareer ki bhi sambhaal karni hai। tamopradhaan hone kaaran shareer ki aayu bhi kam hoti gai hai। ab tum jitna yog mein rahenge, utna aayu badhegi। tumhaari aayu badhte-badhte 150 varsha ho jaayegi satayug mein, isliye shareer ki bhi sambhaal karni hai। aise nahin yeh to mitti ka putla hai, kahaan yeh khalaas ho jaaye, nahin। inko jeete rakhna hai। yeh amoolya jeevan hai na। koi beemaar hote hain to unse tang nahin hona chaahiye। unko bhi bolo shivbaaba ko yaad karo। jitna yaad karenge utna unke paap katte jaayenge। unki service karni chaahiye। jeeta rahe, shivbaaba ko yaad karta rahe।

bachchon mein nashtomoha banne ki bhi himmat chaahiye। phat se nashtomoha ho jaana chaahiye। behad ka baap mila hai to unse poora varsa lena hai। baba ne bachchon ko samjhaaya hai chart rakho। baba ko yaad karne samay baba se kya baaten ki? kitna baba ki mahima ki, bhojan par kitna samay yaad kiya, phir bhool gaya। apni avastha ko oonch banaana bahut zaroori hai, neend ko jeetne vaala banna hai। yaad ko badhaate jaao। auron ko sikhlaate jaao, ismen nashtomoha zaroor banna pade। puraane shareer ko bhoolna pade, baap ke bane ho to unko hi yaad karna pade। jo baap hamko heere jaisa banaate hain unko kitna lav se yaad karna chaahiye। apni jaanch karni hai mera daivi svabhaav hai? manushya ko svabhaav bahut sataata hai। harek ko apna teesra netra mila hai, to usse jaanch karni hai। meri yaad baba tak pahunchti hai? jo defect hai unko nikaal pure diamond banna hai। thoda bhi defect hoga to value kam ho jaayegi, isliye mehnat kar apne ko valuable heera banaana hai। baba jaante hain karmaateet avastha to pichhaadi mein nambarvaar purushaartha anusaar aani hai। phir bhi purushaartha karaane liye to baba kahenge na। nambarvaar purushaartha anusaar hi baba ko bhi pyaare lagenge jo auron ko sukh dene vaala khushboodaar phool hai, woh chhipa nahin rah sakta। baap phir bhi bachchon ko kehte hain meethe bachche maamekam yaad karo to mail nikal jaaye। baap ko yaad karte dil ekdam thar jaani chaahiye। (sheetal ho jaani chaahiye)। baap ki yaad sataani chaahiye। baba, meethe baba, aap hamko kya se kya bana rahe ho! aur to koi jaante hi nahin tum kya ban rahe ho। to aise meethe baba ko bahut lav se yaad karna hai। kai baandheliyaan bahut yaad karti hain। pata nahin kaise apne ko chhudaakar aati hain। unhon ka jitna lav rehta hai utna aur bachchon mein nahin। ekdam baba ko yaad kar sneh mein osu bahaati hain। baba aapse kab milengi! vishwa ka maalik banaane vaala baba, O baba kab aakar sammukh milengi! aise bahut prem se baba ko yaad karti hain। sabhi duhkh mitaane vaale baba aap ne kitna hamaara saubhaagya banaaya hai, aap hamko vishwa ka maalik banaate hain। yaad ka bhi bal unko bahut milta hai। achha!

meethe-meethe sikeeldhe bachchon prati maat pita baapdaada ka yaadapyaar aur good morning roohaani baap ki roohaani bachchon ko namaste।

dhaarna ke liye mukhya saar

1) koi bhi ulti baaten bole to chup rehna hai। mukh ki taali nahin bajaani hai। sahan karna hai। ek do ka kalyaan karna hai।

2) gyaan ke teesre netra se aatma bhaai ko dekhna hai। apne ko bhaai samajh bhaai ko gyaan dena hai। roohaani drill karni aur karaani hai। apni mehnat karni hai, doosron ko nahin dekhna hai।

vardaan:- apni will power dvaara har ek ko will karaane vaale shreshtha sevaadhaari bhav

vartamaan samay kai aatmaayen aapke sahayog ke liye chaatrak hain lekin apni shakti nahin hai। unhein aapko apne shaktiyon ki madad vishesh deni padegi isliye nimitta bane hue sevaadhaariyon mein sarva shaktiyon ki power chaahiye। jaise brahma baap ne last mein bachchon ko shaktiyon ki will ki, us will se yeh kaarya chal raha hai, aise follow father। apne shaktiyon ki will aatmaon ke prati karo to samay ke pramaan seva sampanna ho jaayegi।

slogan:- jahaan ekta aur ekaagrata ki shakti hai vahaan saphalta sahaj praapta hoti hai।