मंगलवार 28 नवंबर 2023 की दैनिक मुरली

28-11-2023 praatahmurli om shanti "baapdaada"' madhuban

“meethe bachche - gyaan hai makkhan, bhakti hai chhaanchh, baap tumhein gyaan roopi makkhan dekar vishwa ka maalik bana dete hain, isliye shreekrishna ke mukh mein makkhan dikhaate hain''

prashn:- nishchaybuddhi ki parakh kya hai? nishchay ke aadhaar par kya praapti hoti hai?

uttar:- 1. nishchaybuddhi bachche shama par phida hone vaale sachche parvaane honge, pheri lagaane vaale nahin। jo shama par phida ho jaate hain vahi raajaai mein aate hain, pheri lagaane vaale praja mein chale jaate। 2. dharat pariye dharma na chhodiye - yeh pratigya nishchay-buddhi bachchon ki hai। ve sachche preet buddhi ban deh sahit deh ke sab dharmon ko bhool baap ki yaad mein rehte hain।

geet:- chhod bhi de aakaash sinhaasan…

om shanti। bhagvaanuvaach। bhagwan kaha jaata hai niraakaar parampita ko। bhagvaanuvaach kisne kaha? us niraakaar parampita paramatma ne। niraakaar baap niraakaar aatmaon ko baith samjhaate hain। niraakaar aatma is shareer roopi karmendriyon se sunti hai। aatma ko na mel, na female kaha jaata hai। unko aatma hi kaha jaata hai। aatma svayan in organs dvaara kehti hai - main ek shareer chhod doosra leti hoon। jo bhi manushya maatra hain woh sab brothers hain। jab niraakaar parampita paramatma ki santaan hain to aapas mein sab bhaai-bhaai hain, jab prajaapita brahma ki santaan hain to bhaai-behen hain। yeh hamesha sabko samjhaate raho। bhagwan rakshak hai, bhakton ko bhakti ka phal dene vaala hai।

baap samjhaate hain sarva ka sadgati daata ek main hoon। sarva ka shikshak ban shreemat deta hoon aur phir sarva ka satguru bhi hoon। unko koi baap, teacher, guru nahin। vahi baap praacheen bhaarat ka raajayog sikhlaane vaala hai, shreekrishna nahin। shreekrishna ko baap nahin kah sakte। unko daiveegundhaari svarga ka prince kaha jaata hai। patit-paavan sadgati daata ek ko kaha jaata hai। abhi sab duhkhi, paap aatma, bhrashtaachaari hain। bhaarat hi satayug mein daivi shreshthaachaari tha। phir woh bhrashtaachaari aasuri raajya hota hai। sab kehte hain patit-paavan aao, aakar raamraajya sthaapan karo। to ab raavan raajya hai। raavan ko jalaate bhi hain lekin raavan ko koi bhi vidvaan, aachaarya, pandit nahin jaante। satayug se treta tak raamraajya, dvaapar se kaliyug tak raavanraajya। brahma ka din so brahmaakumaar-kumaariyon ka din। brahma ki raat so bi.ke. ki raat। abhi raat poori ho din aana hai। gaaya hua hai vinaash kaale vipreet buddhi। teen senaayen bhi hain। parampita ko kaha jaata hai beloved most god father, ocean oph knowledge। to zaroor knowledge dete honge na। srishti ka chaitanya beejroop hai। supreme soul hai arthaat oonch se oonch bhagwan hai। aise nahin ki sarvavyaapi hai। sarvavyaapi kehna yeh to baap ko defame karna hai। baap kehte hain glaani karte-karte dharma glaani ho gai hai, bhaarat kangaal, bhrashtaachaari ban gaya hai। aise samay par hi mujhe aana padta hai। bhaarat hi mera birthplace hai। somnaath ka mandir, shiv ka mandir bhi yahaan hai। main apne birth place ko hi svarga banaata hoon, phir raavan narka banaata hai arthaat raavan ki mat par chal narkavaasi, aasuri sampradaay ban padte hain। phir unhon ko badalkar main daivi sampradaay, shreshthaachaari banaata hoon। yeh vishay saagar hai। woh hai ksheer saagar। vahaan ghi ki nadiyaan bahti hain। satayug-treta mein bhaarat sada sukhi solvent tha, heere javaahron ke mahal the। abhi to bhaarat 100 percent insolvent hai। main hi aakar 100 percent solvent, shreshthaachaari banaata hoon। ab to aise bhrashtaachaari ban gaye hain jo apne daivi dharma ko bhool gaye hain।

baap baith samjhaate hain ki bhakti maarga hai chhaanchh, gyaan maarga hai makkhan। shreekrishna ke mukh mein makkhan dikhlaate hain yaani vishwa ka raajya tha, lakshmi-naaraayan vishwa ke maalik the। baap hi aakar behad ka varsa dete hain arthaat vishwa ka maalik banaate hain। kehte hain main vishwa ka maalik nahin banta hoon। agar maalik banoon to phir maaya se haar bhi khaani pade। maaya se haar tum khaate ho। phir jeet bhi tumko paani hai। yeh 5 vikaaron mein phanse hue hain। abhi main tumko mandir mein rahne laayak banaata hoon। satayug bada mandir hai, usko shivaalay kaha jaata hai, shiv ka sthaapan kiya hua। kaliyug ko veshyaalay kaha jaata hai, sab vikaari hain। ab baap kehte hain deh ke dharma chhod apne ko aatma samajh mujh baap ko yaad karo। tum bachchon ki ab baap se preet hai। tum aur koi ko yaad nahin karte ho। tum ho vinaash kaale preet buddhi। tum jaante ho ki shri shri 108 parampita paramatma ko hi kaha jaata hai। 108 ki maala pherte hain। oopar mein hai shivbaaba phir maat-pita brahma-sarasvati, phir unke bachche jo bhaarat ko paavan banaate hain। rudraaksha ki maala gaai hui hai, usko roodra yagya bhi kaha jaata hai। kitna bada raajasva ashvamedh avinaashi gyaan yagya hai। kitne varshon se chala aata hai। jo bhi anek dharma aadi hain, sab is yagya mein khatma ho jaane hain tab yeh yagya poora hoga। yeh hai avinaashi baba ka avinaashi yagya। sab saamagri ismen svaaha ho jaani hai। poochhte hain vinaash kab hoga? are, jo sthaapna karte hain, unko hi phir paalna karni hoti hai। yeh hai shivbaaba ka rath। shivbaaba ismen rathi hai। baaki koi ghode-gaadi aadi nahin hain। woh to bhaktimaarga ki saamagri baith banaai hai। baba kehte hain main is prakriti ka aadhaar leta hoon।

baap samjhaate hain - pahle avyabhichaari bhakti hai phir kaliyug ant mein poori vyabhichaari ban jaati hai। phir baap aakar bhaarat ko makkhan dete hain। tum vishwa ke maalik banne liye padh rahe ho। baap aakar makkhan khilaate hain। raavan raajya mein chhaanchh shuru ho jaati hai। ye sab samajhne ki baaten hain। naye bachche to in baaton ko samajh na saken। parampita paramatma ko hi gyaan ka saagar kaha jaata hai। baap kehte hain main is bhakti maarga se kisi ko bhi nahin milta hoon। main jab aata hoon tab hi aakar bhakton ko bhakti ka phal deta hoon। main liberator banta hoon, duhkh se chhudaakar sabko shantidham, sukhdhaam le jaata hoon। nishchay buddhi vijayanti, sanshay buddhi vinshanti।

baap shama hai। us par parvaane koi to ekdam phida ho jaate hain, koi pheri pahankar chale jaate hain। samajhte kuchh nahin hain। phida hone vaale bachche jaante hain barobar behad ke baap se hamko behad ka varsa milta hai। jo sirf pheri pahankar chale jaate hain woh to phir praja mein hi nambarvaar aa jaayenge। jo phida hote hain woh varsa lete hain nambarvaar purushaartha anusaar। purushaartha se hi praalabdha milti hai। gyaan ka saagar ek hi baap hai। phir gyaan praayah lop ho jaata hai। tum sadgati ko pa lete ho। satayug-treta mein koi guru-gosaai aadi nahin hote। abhi sab us baap ko yaad karte hain kyonki woh hai ocean oph knowledge। sabki sadgati kar dete hain। phir haahaakaar banda ho jayjaykaar ho jaati hai, tum srishti ke aadi-madhya-ant ko jaante ho। tum ab trikaaldarshi, trinetri bane ho। tumko rachta aur rachna ke aadi-madhya-ant ki saari knowledge mil rahi hai। yeh koi danta katha nahin hai। geeta hai bhagwan ki gaai hui parantu shreekrishna ka naam daal khandan kar diya hai। tum bachchon ko ab sabka kalyaan karna hai। tum ho shiv shakti sena। vande maatram gaaya hua hai। vandana pavitra ki hi ki jaati hai। kanya pavitra hai to sab unki vandana karte hain। sasur ghar gai aur vikaari bani to sabko maatha tekti rehti hai। saara madaar pavitrata par hai। bhaarat pavitra grihastha dharma tha। abhi apvitra grihastha dharma hai। duhkh hi duhkh hai। satayug mein aise nahin hota। baap bachchon ke liye tiri (hatheli) par bahishta le aate hain। grihastha vyavhaar mein rehte baap se jeevanmukti ka varsa le sakte ho। gharbaar chhodne ki koi baat nahin। sannyaasiyon ka nivritti maarga alag hai। ab baap se pratigya karte hain - baba, ham pavitra ban, pavitra duniya ke maalik zaroor banenge। phir dharat pariye dharma na chhodiye। 5 vikaaron ka daan do to maaya ka grahan chhoote, tab 16 kala sampoorn banenge। satayug mein hain 16 kala sampoorn, sampoorn nirvikaari…, ab shreemat par chalkar phir se aisa banna hai।

bhagwan hai hi gareeb nivaaz। saahookaar is gyaan ko utha nahin sakte kyonki woh to samajhte hain hamko dhan aadi bahut hai, ham to svarga mein baithe hain isliye ablaayen, ahilyaayen hi gyaan leti hain। bhaarat to gareeb hai। unmein bhi jo gareeb saadhaaran hain, unhon ko hi baap apna banaate hain। unhon ki hi takdeer mein hai। sudaama ka misaal gaaya hua hai na। saahookaaron ko samajhne ki phursat nahin। raajendra prasaad (bhaarat ke pratham raashtrapti) ke paas bachchiyaan jaati thi, kehti thi behad ke baap ko jaano to tum heere tulya ban jaayenge। 7 roz ka course karo। kehta tha - haan, baat to bahut achhi hai, retired hone ke baad course uthaaoonga। retired hua to bole, beemaar hoon। bade-bade aadmiyon ko phursat nahin hai। pahle jab 7 roz ka course poora kare tab naaraayni nasha chadhe। aise thode hi rang chadhega। 7 roj ke baad pata chalta hai - yeh laayak hai va nahin hai? laayak hoga to phir padhne ke liye purushaartha mein lag jaayega। jab tak bhatthi mein pakka rang nahin laga hai tab tak baahar jaane se rang hi ud jaata hai, isliye pahle pakka rang chadhaana hai। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) shiv shakti ban vishwa kalyaan karna hai। pavitrata ke aadhaar par kaudi tulya manushyon ko heere tulya banaana hai।

2) shreemat par vikaaron ka daan de sampoorn nirvikaari 16 kala sampoorn banna hai। shama par phida hone vaala parvaana banna hai।

vardaan:- paristhitiyon ko sidescene samajh paar karne vaale smriti swaroop samartha aatma bhav

smriti swaroop aatma samartha hone ke kaaran paristhitiyon ko khel samajhti hai। bhal kitni bhi badi paristhiti ho lekin samartha aatma ke liye manzil par pahunchne ke liye yeh sab raaste ke side scenes hain। log to kharcha karke bhi side scenes dekhne jaate hain। to smriti swaroop samartha aatma ke liye paristhiti kaho, paper kaho, vighna kaho sab side scenes hain aur smriti mein hai ki yeh manzil ke side scenes anginat baar paar ki hain, nothing new।

slogan:- doosron ki correction karne ke bajaae baap se connection jod lo to vardaanon ki anubhooti hoti rahegi।

maateshvari ji ke madhur mahaavaakya

“sirf om ke shabd ke uchchaaran se koi phaayda nahin''

om rato maana om japo, jis samay ham om shabd kehte hain to om kahne ka matlab yeh nahin ki om shabd ka uchchaaran karna hai sirf om kahne se koi jeevan mein phaayda nahin। parantu om ke arth swaroop mein sthit hona, us om ke arth ko jaanne se manushya ko vo shanti praapta hoti hai। ab manushya chaahte to avashya hain ki humein shanti praapta hove। us shanti sthaapan ke liye bahut sammelan karte hain parantu result aise hi dikhaai de rahi hai jo aur ashaanti duhkh ka kaaran banta rehta hai kyonki mukhya kaaran hai ki manushyaatma ne jab tak 5 vikaaron ko nashta nahin kiya hai tab tak duniya par shanti kadaachit ho nahin sakti। to pahle harek manushya ko apne 5 vikaaron ko vash karna hai aur apni aatma ki dor paramatma ke saath jodni hai tab hi shanti sthaapan hogi। to manushya apne aapse poochhen mainne apne 5 vikaaron ko nashta kiya hai? unhon ko jeetne ka prayatna kiya hai? agar koi poochhe to ham apne 5 vikaaron ko vash kaise karen, to unhon ko yeh tareeka bataaya jaata hai ki pahle unhon ko gyaan aur yog ka vaas dhoop lagaao aur saath mein parampita paramatma ke mahaavaakya hain - mere saath buddhiyog lagaae mere bal ko lekar mujh sarvashaktivaan prabhu ko yaad karne se vikaar hatte rahenge। ab itni chaahiye saadhna, jo khud paramatma aakar humein sikhaata hai। achha - om shanti।