शनिवार 6 अप्रैल 2024 की दैनिक मुरली

06-04-2024 praatahmurli om shanti "baapdaada"' madhuban

“meethe bachche - shreemat par achhi service karne vaalon ko hi raajaai ki prize milti hai, tum bachche abhi baap ke madadgaar bane ho isliye tumhein bahut badi prize milti hai''

prashn:- baap ki gyaan dance kin bachchon ke sammukh bahut achhi hoti hai?

uttar:- jo gyaan ke shaukeen hain, jinhen yog ka nasha hai, unke saamne baap ki gyaan dance bahut achhi hoti hai। nambarvaar student hain। parantu yeh wonderful school hai। kaiyon mein jara bhi gyaan nahin hai, sirf bhaavna baithi hui hai, us bhaavna ke aadhaar par bhi varse ke adhikaari ban jaate hain।

om shanti। roohaani bachchon ko roohaani baap samjhaate hain, isko kaha jaata hai roohaani gyaan va spiritual knowledge। spiritual knowledge sirf ek baap mein hi hoti hai aur koi bhi manushya maatra mein roohaani knowledge hoti nahin। roohaani knowledge dene vaala hi ek hai, jisko gyaan ka saagar kaha jaata hai। har ek manushya mein apni-apni khoobi hoti hai na। barrister, barrister hai। doctor, doctor hai। har ek ki duty, part alag-alag hai। har ek ki aatma ko apna-apna part mila hua hai aur avinaashi part hai। kitni chhoti aatma hai। wonder hai na। gaate bhi hain chamakta hai bhrakuti ke beech… yeh bhi gaaya jaata hai niraakaar aatma ka yeh shareer hai takhta। hai bahut chhoti-si bindi। aur sab aatmaayen actors hain। ek janma ke features na mile doosre se, ek janma ka part na mile doosre se। kisko bhi pata nahin hai ki ham past mein kya the phir future mein kya honge। yeh baap hi sangam par baith samjhaate hain। subah ko tum bachche yaad ki yaatra mein baithte ho to ujhaai hui aatma prajjavlit hoti rehti hai kyonki aatma mein bahut junk lagi hui hai। baap sonaar ka bhi kaam karte hain। patit aatmaayen, jinmen khaad padti hai, unko pure banaate hain। khaad padti to hai na। chaandi, taamba, loha aadi naam bhi aise hain। golden ej, silver ej… satopradhaan, sato, rajo, tamo... yeh baaten aur koi bhi manushya, guru nahin samjhaayenge। ek satguru hi samjhaayenge। satguru ka akaal takhta kehte hain na। us satguru ko bhi takhta chaahiye na। jaise tum aatmaon ko apna-apna takhta hai, unko bhi takhta lena padta hai। kehte hain main kaun-sa takhta leta hoon-yeh duniya mein koi ko pata nahin hai। woh to neti-neti kehte aaye hain। ham nahin jaante hain। tum bachche bhi samajhte ho pahle ham kuchh bhi nahin jaante the। jo kuchh bhi nahin samajhte hain, unko besmajh kaha jaata hai। bhaaratvaasi samajhte hain ham bahut samajhdaar the। vishwa ka raajya-bhaagya hamaara tha। ab besmajh ban pade hain। baap kehte hain tum shaastra aadi bhal kuchh bhi padhe ho, yeh sab ab bhool jaao। sirf ek baap ko yaad karo। grihastha vyavhaar mein bhi bhal raho। sannyaasiyon ke followers bhi apne-apne ghar mein rehte hain। koi-koi sachche followers hote hain to unke saath rehte hain। baaki koi kahaan, koi kahaan rehte hain। to yeh sab baaten baap baith samjhaate hain। isko kaha jaata hai gyaan ki dance। yog to hai silence। gyaan ki hoti hai dance। yog mein to bilkul shant rehna hota hai। dead silence kehte hain na। teen minute dead silence। parantu uska bhi arth koi jaante nahin। sannyaasi shanti ke liye jangal mein jaate hain parantu vahaan thode hi shanti mil sakti hai। ek kahaani bhi hai raani ka haar gale mein... yeh misaal hai shanti ke liye। baap is samay jo baaten samjhaate hain woh drishtaanta phir bhakti maarga mein chale aate hain। baap is samay puraani duniya ko badal nai duniya banaate hain। tamopradhaan se satopradhaan banaate hain। yeh to tum samajh sakte ho। baaki yeh duniya hi tamopradhaan patit hai kyonki sab vikaaron se paida hote hain। devtaayen to vikaar se paida nahin hote। unko kaha jaata hai sampoorn nirvikaari duniya। viceless world akshar kehte hain parantu unka arth nahin samajhte। tum hi poojya so pujaari bane ho। baba ke liye kabhi aise nahin kaha jaata। baap kabhi pujaari bante nahin। manushya to kan-kan mein paramatma kah dete hain। tab baap kehte hain bhaarat mein jab-jab aisi dharma glaani hoti hai...। vo log to sirf aise hi shlok padh lete hain, arth kuchh bhi nahin jaante। woh samajhte hain shareer hi patit banta hai, aatma nahin banti hai।

baap kehte hain pahle aatma patit bani hai tab shareer bhi patit bana hai। sone mein hi khaad padti hai to phir jevar bhi aisa banta hai। parantu woh sab hai bhakti maarga mein। baap samjhaate hain har ek mein aatma viraajmaan hai, kaha bhi jaata hai jeev aatma। jeev paramatma nahin kaha jaata। mahaan aatma kaha jaata hai, mahaan paramatma nahin kaha jaata। aatma hi bhinna-bhinna shareer lete part bajaati hai। to yog hai bilkul silence। yeh phir hai gyaan dance। baap ki gyaan dance bhi unhon ke aage hogi jo shaukeen honge। baap jaante hain kismen kitna gyaan hai, kitna unmein yog ka bhi nasha hai। teacher to jaante honge na। baap bhi jaante hain kaun-kaun achhe gunvaan bachche hain। achhe-achhe bachchon ka hi jahaan-tahaan bulaava hota hai। bachchon mein bhi nambarvaar hain। praja bhi nambarvaar purooshaartha anusaar banti hai। yeh school athva paathshaala hai na। paathshaala mein hamesha nambarvaar baithte hain। samajh sakte hain phalaana hoshiyaar hai, yeh medium hai। yahaan to yeh behad ka class hai, ismen kisko nambarvaar bitha nahin sakte। baba jaante hain hamaare saamne yeh jo baithe hue hain inmen kuchh bhi gyaan nahin hai। sirf bhaavna hai। baaki to na gyaan hai, na yaad hai। itna nishchay hai - yeh baba hai, inse hamko varsa lena hai। varsa to sabko milna hai। parantu raajaai mein to nambarvaar pad hain। jo bahut achhi service karte hain unko to bahut achhi prize milti hai। yahaan sabhi ko prize dete rehte hain, jo raay dete hain, maatha maarte hain, unko prize mil jaati hai। abhi tum jaante ho vishwa mein sachchi shanti kaise ho? baap ne kaha hai unse poochho to sahi ki vishwa mein shanti kab thi? kabhi suni va dekhi hai? kis prakaar ki shanti maangate ho? kab thi? tum prashn poochh sakte ho kyonki tum jaante ho jo prashn poochhe aur khud na jaanta ho to unko kya kahenge? tum akhbaaron dvaara poochho ki kis prakaar ki shanti maangate ho? shantidham to hai, jahaan ham sab aatmaayen rehti hain। baap kehte hain ek to shantidham ko yaad karo, doosra sukhdhaam ko yaad karo। srishti ke chakra ka poora gyaan na hone kaaran kitne gapode aadi laga diye hain।

tum bachche jaante ho ham double sirtaaj bante hain। ham devta the, ab phir manushya bane hain। devtaaon ko devta kaha jaata hai, manushya nahin kyonki daivi gunon vaale hain na। jinmen avgun hain woh kehte hain mujh nirgun haare mein koi gun naahi। shaastron mein jo baaten suni hain woh sirf gaate rehte hain - achtam keshvam...। jaise tote ko sikhlaaya jaata hai। kehte hain baba aakar ham sabko paavan banaao। brahmalok ko vaastav mein duniya nahin kahenge। vahaan tum aatmaayen rehti ho। vaastav mein part bajaane ki duniya yahi hai। woh hai shantidham। baap samjhaate hain main baith tum bachchon ko apna parichay deta hoon। main aata hi usmein hoon jo apne janmon ko nahin jaante। yeh bhi abhi sunte hain। main inmen pravesh karta hoon। puraani patit duniya, raavan ki duniya hai। jo number one paavan tha vahi phir number last patit bana hai। unko apna rath banaata hoon। first so last mein aaya hai। phir first mein jaana hai। chitra mein bhi samjhaaya hai - brahma dvaara main aadi sanaatan devi-devta dharma ki sthaapna karta hoon। aise to nahin kehte hain devi-devta dharma mein aata hoon। jis shareer mein aakar baithte hain vahi phir jaakar naaraayan bante hain। vishnu koi aur nahin hai। lakshmi-naaraayan athva raadhe-krishna ki jodi kaho। vishnu kaun hai - yeh bhi koi nahin jaante hain। baap kehte hain main tumko vedon-shaastron, sab chitron aadi ka raaz samjhaata hoon। main jismen pravesh karta hoon woh phir yeh bante hain। pravritti maarga hai na। yeh brahma, sarasvati, phir woh (lakshmi-naaraayan) bante hain। inmen (brahma mein) main pravesh kar braahmanon ko gyaan deta hoon। to yeh brahma bhi sunte hain। yeh first number mein sunte hain। yeh hai badi nadi brahmaputra। mela bhi saagar aur brahmaputra nadi par lagta hai। bada mela lagta hai, jahaan saagar aur nadi ka sangam hota hai। main ismen pravesh karta hoon। yeh woh bante hain। inko woh (brahma so vishnu) banne mein ek second lagta hai। saakshaatkaar ho jaata hai aur jhat nishchay ho jaata hai - main yeh banne vaala hoon। vishwa ka maalik banne vaala hoon। to yeh gadaai kya karenge? sab chhod diya। tumko bhi pahle maaloom hua - baba aaya hua hai, yeh duniya khatma hone vaali hai to jhat bhaage। baba ne nahin bhagaaya। haan, bhatthi banni thi। kehte hain krishna ne bhagaaya। achha, krishna ne bhagaaya to patraani banaaya na। to is gyaan se vishwa ke mahaaraaja-mahaaraani bante ho। yeh to achha hi hai। ismen gaali khaane ki darkaar nahin। phir kehte hain kalank jab lagte hain tab hi kalangeedhar bante hain। kalank lagte hain shiv-baba par। kitni glaani karte hain। kehte hain ham aatma so paramatma, paramatma so ham aatma। ab baap samjhaate hain - aise hai nahin। ham aatma abhi so brahman hain। brahman hai sabse oonch kul। inko dynasty nahin kahenge। dynasty arthaat jismen raajaai hoti hai। yeh tumhaara kul hai। hai bahut sahaj, ham brahman so devta banne vaale hain isliye daiveegun zaroor dhaaran karne hain। cigarette, beedi aadi ka devtaaon ko bhog lagaate ho kya? shreenaath dvaare mein bahut ghi ke maal thaal bante hain। bhog itna lagaate hain jo phir dukaan lag jaati hai। yaatri jaakar lete hain। manushyon ki bahut bhaavna rehti hai। satayug mein to aisi baaten hoti nahin। aisi makkhiyaan aadi hongi nahin, jo kisi cheez ko kharaab karen। aisi beemaari aadi vahaan hoti nahin। bade aadmiyon ke paas saphaai bhi bahut hoti hai। vahaan to aisi baaten hi nahin hoti। rog aadi hote nahin। yeh sab beemaariyaan dvaapar se nikalti hain। baap aakar tumko ever healthy banaate hain। tum purooshaartha karte ho baap ko yaad karne ka, jisse tum ever healthy bante ho। aayu bhi badi hoti hai। kal ki baat hai। 150 varsha aayu thi na। abhi to 40-45 varsha average hai kyonki woh yogi the, yeh bhogi hain।

tum raajayogi, raajarishi ho isliye tum pavitra ho। parantu yeh hai purushottam sangamayug। maas ya varsha nahin। baap kehte hain main kalpa-kalpa purooshottam sangam yuge-yuge aata hoon। baap roz-roz samjhaate rehte hain। phir bhi kehte hain ek baat kabhi nahin bhoolna - paavan banna hai to mujhe yaad karo। apne ko aatma samjho। deh ke sabhi dharma tyaag karo। ab tumko vaapis jaana hai। mai aaya hoon tumhaari aatma ko saaph karne, jisse phir shareer bhi pavitra milega। yahaan to vikaar se paida hote hain। aatma jab sampoorn pavitra banti hai tab tum puraani jutti ko chhodte ho। phir nai milegi। tumhaara gaayan hai - vande maatram। tum dharti ko bhi pavitra banaati ho। tum maataayen svarga ka dvaar kholti ho। parantu yeh koi nahin jaanta। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) aatma roopi jyoti ko prajjavlit karne ke liye savere-savere yaad ki yaatra mein baithna hai। yaad se hi junk niklegi। aatma mein jo khaad padi hai woh yaad se nikaal sachcha sona banna hai।

2) baap se oonch pad ki prize lene ke liye bhaavna ke saath-saath gyaanvaan aur gunvaan bhi banna hai। service karke dikhaana hai।

vardaan:- chalan aur chehre se pavitrata ke shrringaar ki jhalak dikhaane vaale shrangaari moorta bhav

pavitrata brahman jeevan ka shrangaar hai। har samay pavitrata ke shrangaar ki anubhooti chehre va chalan se auron ko ho। drishti mein, mukh mein, haathon mein, paanvon mein sada pavitrata ka shrangaar pratyaksha ho। har ek varnan kare ki inke features se pavitrata dikhaai deti hai। naynon mein pavitrata ki jhalak hai, mukh par pavitrata ki muskaraahat hai। aur koi baat unhein nazar na aaye - isko hi kehte hain - pavitrata ke shrangaar se shrangaari hui moorta।

slogan:- vyartha sambandh-samparka bhi account ko khaali kar deta hai isliye vyartha ko samaapta karo।