बुधवार 18 सितंबर 2024 की दैनिक मुरली

18-09-2024 praatahmurli om shanti "baapdaada"' madhuban

“meethe bachche - tum ho dharti ke chaitanya sitaare, tumhein saare vishwa ko roshni dena hai''

prashn:- shivbaaba tum bachchon ki kaaya ko kanchan kaise banaate hain?

uttar:- brahma maa ke dvaara tumhein gyaan doodh pilaakar tumhaari kaaya kanchan kar dete hain, isliye unki mahima mein gaate hain, tvamev maataashcha pita… abhi tum brahma maa dvaara gyaan doodh pi rahe ho, jisse tumhaare sab paap kat jaayenge। kanchan ban jaayenge।

om shanti। roohaani baap baith samjhaate hain jaise aasmaan mein sitaare hain vaise tum bachchon ke liye bhi gaaya jaata hai - yeh dharti ke sitaare hain। unko bhi nakshatra devta kaha jaata hai। abhi woh koi devta to hain nahin। to tum unse mahaan balvaan ho kyonki tum sitaare saare vishwa ko roshan karte ho। tum hi devta banne vaale ho। tumhaara hi utthaan aur patan hota hai। woh to karke maandave ke liye roshni dete hain, unko koi devta nahin kahenge। tum devta ban rahe ho। tum saare vishwa ko roshan karne vaale ho। abhi saare vishwa par ghor andhiyaara hai। patit ban pade hain। abhi baap tum meethe-meethe bachchon ko devta banaane aate hain। manushya log to sabko devta samajh lete hain। soorya ko bhi devta kah dete hain। kahaan-kahaan soorya ka jhanda bhi lagaate hain। apne ko sooryavanshi bhi kahlaate hain। vaastav mein tum soorya-vanshi ho na। to baap baith tum bachchon ko samjhaate hain। bhaarat mein hi ghor andhiyaara hua hai। ab bhaarat mein hi sojhra chaahiye। baap tum bachchon ko gyaan anjan de rahe hain। tum agyaan neend mein soye pade the, baap aakar phir se jagaate hain। kehte hain drama ke plan anusaar kalpa-kalpa ke purooshottam sangamayuge main phir se aata hoon। yeh purooshottam sangamayug koi bhi shaastra mein hai nahin। is yug ko abhi tum bachche hi jaante ho, jabki tum sitaare phir devta bante ho। tumko hi kahenge nakshatra devtaae namah। abhi tum pujaari se poojya bante ho। vahaan tum poojya ban jaate ho, yeh bhi samajhne ka hai na। isko roohaani padhaai kaha jaata hai, ismen kabhi kiski ladaai nahin hoti। teacher saadhaaran reeti padhaate hain aur bachche bhi saadhaaran reeti padhte hain। ismen kabhi koi ladaai ki baat hi nahin। yeh aise thode hi kehte hain ki main bhagwan hoon। tum bachche bhi jaante ho padhaane vaala incorporeal shivbaaba hai। unko apna shareer nahin hai। kehte hain main is rath ka loan leta hoon। bhaageerath bhi kyon kehte hain? kyonki bahut-bahut bhaagyashaali rath hai। yahi phir vishwa ka maalik bante hain to bhaageerath thahra na। to sabka arth samajhna chaahiye na। yeh hai sabse badi padhaai। duniya mein to jhooth hi jhooth hai na। kahaavat bhi hai na - sach ki naeeya dole......aajkal to anek prakaar ke bhagwan nikal pade hain। apne ko to chhodo parantu thikkar bhittar ko bhi bhagwan kah dete hain। bhagwan ko kitna bhatka diya hai। baap baith samjhaate hain, jaise laukik baap bhi bachchon ko samjhaate hain, parantu woh aise nahin hote jo baap bhi ho, teacher bhi ho aur vahi guru bhi ho। pahle baap paas janma lete hain, phir thode bade ho to teacher chaahiye padhaane ke liye। phir 60 varsha ke baad guru chaahiye। yeh to ek hi baap, teacher, satguru hai। kehte hain main tum aatmaon ka baap hoon। padhti bhi aatma hai। aatma ko aatma kaha jaata hai। baaki shareeron ke anek naam hain। khyaal karo - yeh hai behad ka naatak। bani banaai ban rahi...... koi nai baat nahin। yeh anaadi bana banaaya drama hai jo phirta rehta hai। paartadhaari aatmaayen hain। aatma kahaan rehti hai? kahenge ham apne ghar paramdham mein rahne vaale hain phir ham yahaan aate hain behad ka part bajaane। baap to sadaiv vahaan hi rehte hain। woh punarjanma mein nahin aate hain। abhi tumko rachta baap, apna aur rachna ka saar sunaate hain। tumko kehte hain svadarshan chakradhaari bachche। iska arth bhi koi aur samajh na sake kyonki woh to samajhte hain svadarshan chakradhaari vishnu hain, yeh phir manushyon ko kyon kehte। yeh tum jaante ho। shoodra the to bhi manushya hi the, abhi brahman bane hain to bhi manushya hi hain phir devta banenge to bhi manushya hi rahenge, parantu character badalte hain। raavan aata hai to tumhaare character kitne bigad jaate hain। satayug mein yeh vikaar hote hi nahin।

abhi baap tum bachchon ko amraktha suna rahe hain। bhakti maarga mein tumne kitni kathaayen suni hongi। kehte hain amarnaath ne paarvati ko katha sunaai। ab unko to shankar sunaayenge na। shiv kaise sunaayenge। kitne dher manushya jaate hain sunne ke liye। yeh bhakti maarga ki baaten baap baith samjhaate hain। baap aise nahin kehte - bhakti koi kharaab hai। nahin, yeh to drama jo anaadi hai, woh samjhaaya jaata hai। ab baap kehte hain ek to apne ko aatma samjho। mool baat hi yeh hai। bhagvaanuvaach - manamnaabhav। iska arth kya hai? yeh baap baith mukh se sunaate hain to yeh gaoomukh hai। yeh bhi samjhaaya hai tvamev maataashcha pita...... unko hi kehte hain। to is maata dvaara tum sabko adopt kiya hai। shivbaaba kehte hain is mukh dvaara tum bachchon ko gyaan doodh pilaata hoon to tumhaare jo paap hain woh sab bhasma hokar tumhaari aatma kanchan banti hai। to kaaya bhi kanchan milti hai। aatmaayen bilkul pure kanchan ban jaati hain phir aahiste-aahiste seedhi utarte hain। abhi tum samajh gaye ho ham aatmaayen bhi kanchan thi, shareer bhi kanchan tha phir drama anusaar ham 84 ke chakra mein aaye hain। abhi kanchan nahin hai। abhi to 9 carat kahenge, baaki thoda percent jaakar rahe hain। ekdam praayahlop nahin kahenge। kuchh na kuchh shanti rehti hai। baap ne yeh nishaani bhi bataai hai। lakshmi-naaraayan ka chitra hai number one। abhi tumhaari buddhi mein saara chakra aa gaya hai। baap ka parichay bhi aa gaya hai। bhal ab tumhaari aatma poori kanchan nahin bani hai parantu baap ka parichay to buddhi mein hai na। kanchan hone ki yukti bataate hain। aatma mein jo khaad padi hai woh nikle kaise? uske liye yaad ki yaatra hai। isko kaha jaata hai yuddha ka maidaan। tum harek independent yuddha ke maidaan mein sipaahi ho। ab harek jitna chaahe utna purooshaartha kare। purooshaartha karna to student ka kaam hai। kahaan bhi jaao, ek-do ko saavdhaan karte raho - manamnaabhav। shivbaaba yaad hai? ek-do ko yahi ishaara dena hai। baap ki padhaai ishaara hai tab to baap kehte hain ek second mein kaaya kanchan ho jaati hai। vishwa ka maalik bana deta hoon। baap ke bachche bane to vishwa ke maalik ban gaye। phir vishwa mein hai baadshaahi। unmein oonch pad paana - yeh hai purooshaartha karna। baaki second mein jeevanmukti। right to hai na। purooshaartha karna harek ke oopar hai। tum baap ko yaad karte raho to aatma ekdam pavitra ho jaayegi। satopradhaan ban satopradhaan duniya ke maalik ban jaayenge। kitna baar tum tamopradhaan se phir satopradhaan bane ho! yeh chakra phirta rehta hai। iska kab ant nahin aata। baap kitna achhi reeti baith samjhaate hain। kehte hain main kalpa-kalpa aata hoon। tum bachche mujhe chhi-chhi duniya mein nimantran dete ho। kya nimantran dete ho? kehte ho ham jo patit ban gaye hain, aap aakar paavan banaao। vaah tumhaara nimantran! kehte ho hamko shantidham-sukhdhaam mein le chalo to tumhaara obedient servant hoon। yeh bhi drama ka khel hai। tum samajhte ho - ham kalpa-kalpa vahi padhte hain, part bajaate hain। aatma hi part bajaati hai। yahaan baithe bhi baap aatmaon ko dekhte hain। sitaaron ko dekhte hain। kitni chhoti aatma hai। jaise sitaaron ki jhilmil rehti hai। koi sitaara bahut teekha hota hai, koi halka। koi chandrama ke nazdeek hote hain। tum bhi yogbal se achhi reeti pavitra bante ho to chamakte ho। baba bhi kehte hain bachchon mein jo bahut achha nakshatra hai, unko phool do। bachche bhi ek-do ko jaante to hain na। barobar koi bahut teekhe hote hain, koi bahut dheele hote hain। un sitaaron ko devta nahin kah sakte। tum bhi ho manushya parantu tumhaari aatma ko baap pavitra banaae vishwa ka maalik banaate hain। kitni taakat baap varse mein dete hain। almighty baap hai na। baap kehte hain main tum bachchon ko itni might deta hoon। gaate bhi hain na - shivbaaba aap to hamko baithkar padhaai se manushya se devta banaate ho। vaah! aisa to koi nahin banaate। padhaai source oph income hai na। saara aasmaan, dharti aadi sab hamaare ho jaate hain। koi chheen na sake। usko kaha jaata hai adol raajya। koi bhi khandan kar na sake। koi jala na sake। to aise baap ki shreemat par chalna chaahiye na। harek ko apna purooshaartha karna hai।

bachche museum aadi banaate hain - in chitron aadi dvaara hamjinsa ko samjhaaven। baap direction dete rehte hain - jo chitra chaahiye bhal banaao। buddhi to sabki kaam karti hai। manushyon ke kalyaan liye hi yeh banaaye jaate hain। tum jaante ho centre mein kabhi koi aate hain, ab aisi kya yukti rachen jo aapehi log aayen mithaai lene। kiski achhi mithaai hoti hai to advertise ho jaati hai। sab ek-do ko kahenge phalaani dukaan par jaao। yeh to badi achhe te achhi number one mithaai hai। aisi mithaai koi de na sake। ek dekhkar jaate hain to doosron ko bhi sunaate hain। khyaal to chalta hai saara bhaarat kaise golden ej mein aa jaaye, uske liye kitna samjhaate hain parantu pattharbuddhi hain, mehnat to lagegi na। shikaar karna bhi seekhna padta hai na। pahle-pahle chhota shikaar seekha jaata hai। bade shikaar ke liye to taakat chaahiye na। kitne bade-bade vidvaan-pandit hain। ved-shaastra aadi padhe hue hain। apne ko kitni badi authority samajhte hain। banaaras mein kitne unhon ko bade-bade title milte hain। tab baba ne samjhaaya tha pahle-pahle to banaaras mein seva ka gheraav daalo। badon ka aavaaz nikle tab koi sune। chhote ki baat to koi sunte nahin। sheron ko samjhaana hai jo apne ko shaastron ki authority samajhte hain। kitne bade-bade title dete hain। shivbaaba ke bhi itne title nahin hain। bhakti maarga ka raajya hai na phir hota hai gyaan maarga ka raajya। gyaan maarga mein bhakti hoti nahin। bhakti mein phir gyaan bilkul hota nahin। to yeh baap samjhaate hain, baap dekhte bhi aise hain, samajhte hain yeh sitaare baithe hain। deh ka bhaan chhod dena hai। jaise oopar mein sitaaron ki jhilmil lagi hui hai vaise yahaan bhi jhilmil lagi hui hai। koi-koi bahut teekhi roshni vaale ban gaye hain। yeh hain dharti ke sitaare jisko hi devta kaha jaata hai। yeh kitna bada behad ka maandava hai। baap samjhaate hain woh hai had ki raat aur din। yeh hai phir aadhaakalpa ki raat, aadha-kalpa ka din, behad ka। din mein sukh hi sukh hai। kahaan bhi dhakke khaane ki darkaar nahin। gyaan mein hai sukh, bhakti mein hai duhkh। satayug mein duhkh ka naam nahin। vahaan kaal hota nahin। tum kaal par jeet paate ho। mrityu ka naam nahin hota। woh hai amarlok। tum jaante ho baap hamko amraktha suna rahe hain amarlok ke liye। ab tum meethe-meethe bachchon ko oopar se lekar saara chakra buddhi mein hai। jaante ho ham aatmaon ka ghar hai brahm lok। vahaan se yahaan aate hain nambarvaar part bajaane। dher aatmaayen hain, ek-ek ka thode hi baith bataayenge। nutshell mein bataate hain। kitni taal-taaliyaan hain। nikalte-nikalte jhaad vriddhi ko pa leta hai। bahut hain jinko apne dharma ka bhi pata nahin hai। baap aakar samjhaate hain tum asal devi-devta dharma ke ho parantu ab dharma bhrashta, karma bhrashta ban gaye ho।

ab tum bachchon ki buddhi mein hai ki ham asal shantidham ke rahne vaale hain phir aate hain part bajaane। in lakshmi-naaraayan ka raajya tha, inki dynasty thi। phir abhi sangamayug par khade hain। baap ne bataaya hai tum sooryavanshi the phir chandravanshi bane। baaki beech mein to hain by-plots। yeh khel hai behad ka। yeh kitna chhota jhaad hai। braahmanon ka kul hai। phir kitna bada ho jaayega, sabko dekh mil bhi nahin sakenge। jahaan-tahaan gheraav daalte jaate hain। baap kehte hain dehli ko, banaaras ko gheraav daalo। phir kehte hain saari duniya ko tum gheraav daalne vaale ho। tum yogbal se saari duniya par ek raajya ki sthaapna karte ho, kitni khushi hoti hai। koi kahaan, koi kahaan jaate rehte hain। abhi tumhaari koi baat nahin sunte। jab bade-bade aayenge, akhbaaron mein padega tab samjhenge। abhi chhota-chhota shikaar hota hai। bade-bade saahookaar log to samajhte hain svarga hamaare liye yahaan hi hai। gareeb hi aakar varsa lete hain। kehte hain - baba mere to aap doosra na koi parantu jab moh mamatva saari duniya se bhi toote na। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) aatma ko kanchan banaane ke liye ek-do ko saavdhaan karna hai। manamnaabhav ka ishaara dena hai। yogbal se pavitra ban chamakdaar sitaara banna hai।

2) is behad ke bane banaaye naatak ko achhi reeti samajhkar svadarshan chakradhaari banna hai। gyaan anjan dekar manushyon ko agyaan ke ghor andhakaar se nikaalna hai।

vardaan:- baalak so maalikpan ki smriti se sarva khajaanon ko apna banaane vaale svaraajya adhikaari bhav

is samay aap bachche sirf baalak nahin ho lekin baalak so maalik ho, ek svaraajya adhikaari maalik aur doosra baap ke varse ke maalik। jab svaraajya adhikaari ho to sva ki sarva karmendriyaan order pramaan hon। lekin samay prati samay maalikpan ki smriti ko bhulaakar vash mein karne vaala yeh man hai isliye baap ka mantra hai manamnaabhav। manamnaabhav rahne se kisi bhi vyartha baat ka prabhaav nahin padega aur sarva khajaane apne anubhav honge।

slogan:- parmaatma muhabbat ke jhoole mein udti kala ki mauj manaana yahi sabse shreshtha bhaagya hai।