रविवार 29 दिसंबर 2024 की दैनिक मुरली

29-12-24 praatahmurli om shanti ''avyakt-baapdaada'' revise 31-12-02 madhuban

is naye varsha mein sarva khajaane saphal kar saphaltaamoorta banne ki visheshta dikhaao

aaj nav yug rachta, nav jeevan daata baapdaada nav varsha manaane aaye hain। aap sabhi bhi nav varsha manaane aaye ho va nav yug manaane ke liye aaye ho? nav varsha to sabhi manaate hain lekin aap sabhi nav jeevan, nav yug aur nav varsha teenon hi mana rahe ho। baapdaada bhi trimoorti mubaarak de rahe hain। nav varsha ki ek do ko mubaarak dete hain aur saath mein koi na koi gift bhi dete hain। gift dete ho na! lekin baapdaada ne aap sabko kaun si gift di hai? golden duniya ki gift di hai। sabhi ko golden duniya ki gift mil gai hai na! jis golden duniya mein, nav yug mein sarva praaptiyaan hain। yaad hai apna raajya? koi apraapti ka naam-nishaan nahin hai। aisi gift sivaae baapdaada ke aur koi de nahin sakta। saare vishwa mein agar koi bade te badi saugaat denge bhi to kya denge? bade te bada taaj va takhta de denge। jab sthaapna hui thi, (aage-aage baithe hain sthaapna vaale) tab aadi mein hi brahma baap bachchon se poochhte the ki agar aapko aajkal ki koi bhi raani taaj aur takhta deve to aap jaayenge? yaad hai na! to bachche kehte the is taaj aur takhta ko kya karenge, jab baap mil gaya to yeh kya hai! to is golden world ki gift ke aage koi bhi gift badi nahin ho sakti। kai bachche poochhte hain vahaan kya-kya praapti hogi? to baapdaada kehte hain praaptiyon ki list to lambi hai lekin saar roop mein kya kahenge! apraapta koi nahin vastu, jo jeevan mein chaahiye woh sab praaptiyaan hongi। to aisi golden gift ki adhikaari aatmaayen ho। adhikaari hain na! double videshi adhikaari hain? (haath hilaate hain) sabhi raaja banenge? to itne takhta taiyaar karne padenge। baapdaada kehte hain woh takhta to takhta hai, sarva praapti hain lekin is sangamayug ka svaraajya usse kam nahin hai। abhi bhi raaja ho na! praja ho ya royal family ho? kya ho? ek hi baap hai jo phalak se kehte hain ki mera ek-ek bachcha raaja bachcha hai। raaja ho na! raajayogi ho ki praja yogi ho? is samay sab diltakhtansheen, svaraajya adhikaari raaja bachche hain, itna roohaani nasha rehta hai na? kyonki is samay ke svaraajya se hi bhavishya raajya praapta hota hai। yeh sangamayug bahut-bahut-bahut amoolya shreshtha hai। sangamayug ko baapdaada aur sabhi bachche jaante hain, khushi-khushi mein sangamayug ko naam kya dete hain? mauzon ka yug। kyon? yahaan sangam jaisi mauz saare kalpa mein nahin hai। kaaran? parmaatma milan ki mauz saare kalpa mein ab milti hai। sangamayug ka ek ek din kya hai? mauz hi mauz hai। mauz hai na? mauz hai, moonjhate to nahin ho na! har din utsav hai kyonki utsaah hai। umang hai, utsaah hai ki apne sarva bhaai bahinon ko paramatma pita ka banaayen। seva ka umang-utsaah rehta hai na! yeh karen, yeh karen, yeh karen… plan banaate ho na! kyonki jo shreshtha praapti hoti hai to doosre ko sunaane ke bina rah nahin sakte hain। isi sangamayug ki praapti golden world mein bhi hogi। abhi ke purushaartha ki praalabdha bhavishya golden world hai। to sangamayug achha lagta hai ya satayug achha lagta hai? kya achha lagta hai? sangam achha hai na? sirf beech-beech mein maaya aati hai। thoda-thoda kabhi-kabhi moonjh jaate hain। kai bachche sahaj yog ko mushkil yog bana dete hain, hai nahin lekin bana dete hain। vaastav mein hai bahut sahaj, mushkil lagta hai? jisko mushkil lagta hai woh haath uthaao। sada nahin, kabhi kabhi mushkil hai? ya sahaj hai? jo mushkil yogi hain woh haath uthaao। maataayen mushkil yogi ho ya sahaj yogi? koi mushkil yogi hai? (koi haath nahin utha raha hai) saari sabha mein haath kaise uthaayenge!

sabhi bachche phalak se kehte hain mera baba। mera baba hai ki daadiyon ka baba hai? mera baba hai na! har ek kahega pahle mera। aise hai? yeh sindhi log sabhi baithe hain na! mera baba hai ya daadi jaanki ka hai? daadi prakaashamni ka hai? kiska hai? mera hai? saara din kya yaad rehta hai? mera na! baap kehte hain bahut sahaj yukti hai jitne baar mera-mera kehte hain, saare din mein kitne baar mera shabd kehte ho? agar ginti karo to bahut baar mera shabd bolte ho। jab mera shabd bolte ho to bas mera kaun? mera baba। mushkil hai? kabhi-kabhi bhool to jaate ho? baapdaada koi naya shabd nahin deta hai, jo sadaiv kaarya mein laate ho main aur mera, to main kaun aur mera kaun! kai bachche mushkil purushaartha kyon karte? sirf sochte hain bindu saamne aa jaae, bindu bindu bindu... aur bindu khisak jaati hai। bindu to hai lekin kaun si bindu? main kaun hoon, yeh apne svamaan smriti mein laao to ramneek purushaartha ho jaayega sirf jyoti bindu kehte ho na to mushkil ho jaata hai। sahaj purushaartha, mauj ka purushaartha karo।

is naye varsha mein purushaartha bhi shreshtha ho lekin shreshtha ke saath pahle sahaj ho। sahaj bhi ho aur shreshtha bhi ho yeh ho sakta hai? donon saath ho sakta hai? double foreigners bolo, ho sakta hai? to baapdaada dekhenge। baapdaada to check karte rehte hain na! to mushkil yogi kaun-kaun banta hai! sahaj yogi ka yeh matlab nahin hai ki albelepan ka purushaartha ho। shreshtha bhi ho aur sahaj bhi ho। to paandav sahaj yogi hain? sahajyogi jo hain woh haath uthaao। dekhna T.vi. mein aa raha hai। mubaarak ho। to yeh varsha koi ke aage koi mushkilaat nahin aayegi kyonki sahaj yogi ho। albele nahin banna।

samay pramaan is naye varsha mein sabhi ko vishesh yeh lakshya rakhna hai ki jo bhi khajaane praapta hain - samay hai, sankalp hain, gun hain, gyaan hai, shaktiyaan hain... sabse bada khajaana sankalp hai - shreshtha sankalp, shuddh sankalp। in sabhi khajaanon ko har roz saphal karna hai। khoob baanto। daata ke bachche master daata bano। khoob baanton। kyon? saphal karna arthaat saphalta ko praapta karna। to yahi is varsha ki visheshta sada kaayam rakhna। saphal karna hai aur saphalta hai hi hai। sabhi kehte bhi ho na ki saphalta hamaara janma siddha adhikaar hai। hai adhikaar? to saphal karo aur saphalta praapta karo। koi bhi kaarya karo, koi na koi khajaana saphal karte jaao aur saphalta ka anubhav karte chalo। socho - saphalta ka adhikaar aap brahman aatmaon ke sivaae aur kiska adhikaar ho sakta hai! kyon? kyonki baap ne aapko saphalta bhav ka vardaan diya hai। baapdaada sada kehte hain ki ek-ek brahman aatma saphalta ka sitaara hai, saphalta swaroop hai। saphalta ke sitaare ho na ya mehnat ke sitaare ho? baapdaada sabhi bachchon ko saphalta ka sitaara, isi swaroop mein dekhte hain। yaad hai brahma baap ne aadi mein kitne samay mein sab saphal kiya? ant tak apna samay saphal kiya, chaahe karmaateet bhi ban gaye phir bhi kitne patra likhe! samay saphal kiya na! last din bhi mukh se mahaavaakya uchchaaran kiye। last din tak sab saphal kiya iseelie saphalta ko praapta ho gaye। to follow father। vaastav mein sangamayug ka ek-ek sankalp, ek-ek second saphal karna hi saphalta moorta banna hai। sabhi nishchay se kehte hain na ki brahma baap se to hamaara bahut pyaar hai। to pyaar ki nishaani hai jo baap ko priy tha woh bachchon ko priy ho। samay, sankalp aur sarva khajaane saphal ho। vyartha nahin ho। pyaar ki nishaani follow father। brahma baap ne visheshta kya dikhaai? jo socha woh second mein kiya। sirf socha nahin, sirf plan nahin banaaya, practical mein karke dikhaaya। to aise hai? follow karne vaale hain na? achha hai।

aaj bahut hi aa gaye hain - new year manaane ke liye। achha hai। agar hall chhota pad gaya to dil to badi hai। dekho dil badi hai to sama gaye hain na? (aaj sabha mein 18-19 hajaar bhaai bahinen baithe hain) sabhi baahar baithe hue bhi sun rahe hain na? baahar baithne vaale sun rahe hain, woh to dikhaai nahin denge। baapdaada ne suna ki foreign mein sabse jyaada Australia vaale raat ke 12 baje baithte hain aur 4 baje amritvela karke uthte hain। to baapdaada ne bhi aaj Australia ko yaad kiya। sun rahe hain। yahaan Australia vaale hain haath uthaao। trimoorti mubaarak pahle Australia ko phir sabhi ko।

is varsha ka lakshya to bataaya - saphal karo, saphalta hai hi। yeh sabhi ne pakka kiya? saphal karna hai। vyartha nahin। sangamayug samartha yug hai, saphalta ka yug hai, vyartha ka nahin hai। vyartha ke 63 janma samaapta hue। ab yeh chhota sa yug saphal karne ka yug hai। agar samay saphal karenge to bhavishya mein bhi aadhaakalpa ka poora samay raajya adhikaari banenge। agar kabhi-kabhi saphal karenge to raajya adhikaari bhi kabhi-kabhi banenge। samay saphal ki praalabdha yeh hai। shvaans saphal kar rahe ho to 21 janma hi svastha rahenge। chalte-chalte heartfail nahin hogi। kiski heart rook jaati, kiski naliyaan banda ho jaati, woh nahin hogi।

gyaan ke khajaane ko bhi saphal karo to gyaan ka arth hai samajh, vahaan itne samajhdaar ban jaayenge jo koi matriyon ki jaroorat nahin hai। aajkal to dekho shapath lete hi pahle matreemandal banaate hain। vahaan saathi honge lekin matri nahin hoge। royal family har ek darbaar mein baithne vaale taajdhaari honge। royal family kam nahin hogi, chaahe takhta par nahin bhi baithe lekin martaba ek hi jaisa hoga isliye yeh nahin socho ki takhtansheen bahut thode banenge lekin aap log bhi raaj darbaar mein raajya adhikaari ke roop mein honge। aapke sir par bhi taaj hoga aur aapka poora adhikaar hoga। to kya banenge? number one ya nambarvaar, kya banenge? nambarvaar banenge ya number one banenge? to kya karna padega, pata hai? himmat dikhaai, yeh bahut achha hai। lekin one number banne ke liye pahle win karna padega। kar rahe hain na! karenge, yeh nahin kehna, kar rahe hain। doosre bhi sun rahe hain। aaj suna ki puraane sindha ke brahma ke saathi bahut aaye hain। haath uthaao। chhote bachche utho, parivaar ke parivaar aaye hain। achha। koi kamaal dikhaayenge na! kya dikhaayenge? (message denge) woh to kar hi rahe ho। achha 38 aaye hain, to kya kamaal karenge? chalo jyaada nahin kehte hain, chhoti si baat kehte hain, karne ke liye taiyaar ho? bachche bhi kamaal karenge na? (38 laakh banaayenge) padamguna mubaarak ho। aapne to badi baat bata di lekin baapdaada chhoti baat kehte hain woh ek ek, ek ko laao। laana hai? ek, ek ko laao। bachche hain to bachchon ko laao। maataayen hain to bhaai ya behen ko laayen, lekin ek-ek ko ek laana hai। yeh group dekh lo, aap isko guide karna, agle saal lekar hi aana, double group lekar aana। baapdaada yahi chaahte hain ki jahaan se aadi hui, vahaan hi pratyakshata honi hai। raham aata hai na! brahma baap ke desh ke vaasi ho to desh vaasiyon se pyaar hota hai।

aapke paas khajaane bahut hain, gunon ka khajaana kitna bada hai, shaktiyon ka khajaana kitna bada hai। to gun daan, shaktiyon ka daan karne vaale master daata bano। jo bhi aaye chaahe sambandh mein aaye, chaahe samparka mein aaye lekin unko koi na koi gun ya shakti ki gift de dena। koi khaali haath nahin jaaye। aur kuchh nahin to baap ke sandesh ke meethe bol, woh meethe bol bhi gift dena। duniya vaale to koi bhi utsav hota hai na to ek do ko mukh meetha karaate hain। lekin baapdaada kehte hain mukh meetha to karaana hi hai lekin apna meetha mukhda bhi dikhaana hai। sirf mukh meetha nahin, mukhda bhi meetha। itni madhurta jama hai na! jo baanto to bhi bharpoor raho aur is khajaane ko to jitna baantenge utna badhega, kam nahin hoga। to is varsha note karna, jo bhi aatma aai usko kuchh diya? agar sunne vaala nahin hai to meethi shaktishaali drishti dena। lekin dena zaroor। khaali nahin jaaye। yeh to sahaj hai na! ya mushkil hai?

achha - ek second mein man ki drill yaad hai? har ek saare din mein kitne baar yeh drill karte ho? yeh note karo। yeh man ki drill jitna baar karenge utna hi sahaj yogi, saral yogi banenge। ek taraph mansa seva doosre taraph mansa exercise। abhi-abhi niraakaari, abhi-abhi pharishta। brahma baap aap pharishton ka aahvaan kar rahe hain। pharishta banke brahma baap ke saath apne ghar niraakaar roop mein chalna phir devta ban jaana। achha।

chaaron taraph se bahut-bahut yaadapyaar chaahe card ke roop mein, chaahe patron ke roop mein baapdaada ke paas pahunch gaye hain। baapdaada jaante hain ki har bachcha yahi samajhte hain meri yaad baba ko dena, lekin mil gai hai। yaadapyaar dene vaale bahut laadle bachche baapdaada ke saamne hain isliye baapdaada kehte hain ki har ek bachcha apne-apne naam se mubaarak aur dil ki duaayen sveekaar kare।

aap sabhi ko bhi nav jeevan, nav yug aur naye varsha ki bahut-bahut padam-padam-padam-padamguna mubaarak aur dil ki duaayen hain, yaadapyaar aur namaste।

baapdaada ne sabhi bachchon ko naye varsha ki badhaai di:-

chaaron or ke bahut meethe, bahut pyaare bachchon ko padam-padam guna new year ki mubaarak ho। yeh jo ghadi beet gai, yeh hai vidaai aur badhaai ki ghadi। ek taraph vidaai deni hai, jo apne mein sampanna banne mein kami anubhav karte ho, usko vidaai, sada ke liye vidaai dena aur aage udne ke liye badhaai। badhaai ho, badhaai ho, badhaai ho। achha - om shanti।

vardaan:- smriti ko anubhav ki sthiti mein sthit karne vaale number one vishesh aatma bhav

sabhi brahman aatmaon ke andar sankalp rehta hai ki ham vishesh aatma number one banen lekin sankalp aur karma ke antar ko samaapta karne ke liye smriti ko anubhav mein laana hai। jaise sunna, jaanna yaad rehta hai aise svayan ko us anubhav ki sthiti mein laana hai iske liye svayan ke aur samay ke mahatva ko jaan man aur buddhi ko kisi bhi anubhav ki seat par set kar lo to number one vishesh aatma ban jaayenge।

slogan:- buraai ki rees ko chhod achchhaai ki race karo।