शुक्रवार 31 जनवरी 2025 की दैनिक मुरली

31-01-2025 praatahmurli om shanti "baapdaada"' madhuban

“meethe bachche - punya aatma banna hai to apna potaamel dekho ki koi paap to nahin hota hai, sach ka khaata jama hai?''

prashn:- sabse bada paap kaun-sa hai?

uttar:- kisi par bhi buri drishti rakhna - yeh sabse bada paap hai। tum punya aatma banne vaale bachche kisi par bhi buri drishti (vikaari drishti) nahin rakh sakte। jaanch karni hai ham kahaan tak yog mein rehte hain? koi paap to nahin karte hain? oonch pad paana hai to khabardaari rakho ki zara bhi kudrishti na ho। baap jo shreemat dete hain us par poora chalte raho।

geet:- mukhda dekh le praani…

om shanti। behad ka baap apne bachchon ko kehte hain bachche, apne bheetar zara jaanch karo। yeh to manushyon ko maaloom rehta hai ki hamne saare jeevan mein kitne paap, kitne punya kiye hain? rozaana apna potaamel dekho - kitne paap aur kitne punya kiye hain? kisko ranj (naaraaz) to nahin kiya? har ek manushya samajh sakte hain - hamne life mein kya-kya kiya hai? kitna paap kiya hai, kitna daan-punya aadi kiya hai? manushya yaatra par jaate hain to daan-punya karte hain। koshish karke paap nahin karte hain। to baap bachchon se hi poochhte hain - kitne paap, kitne punya kiye hain? abhi tum bachchon ko punya aatma banna hai। koi bhi paap nahin karna hai। paap bhi anek prakaar ke hote hain। koi par buri drishti jaati hai to yeh bhi paap hai। buri drishti hoti hi hai vikaar ki। woh hai sabse kharaab। kabhi bhi vikaar ki drishti nahin jaani chaahiye। aksar karke stri-puroosh ki to vikaar ki hi drishti hoti hai। kumaar-kumaari ki bhi kahaan na kahaan vikaar ki drishti uthti hai। ab baap kehte hain yeh vikaar ki drishti nahin honi chaahiye। nahin to tumko bandar kehna pade। naarad ka misaal hai na। bola ham lakshmi ko var sakte hain! tum bhi kehte ho na ham to lakshmi ko varenge। naari se lakshmi, nar se naaraayan banenge। baap kehte hain apne dil se poochho - kitne tak ham punya aatma bane hain? koi paap to nahin karte hain? kahaan tak yog mein rehte hain?

tum bachche to baap ko pahchaante ho tab to yahaan baithe ho na। duniya ke manushya thode hi baba ko pahchaanenge ki yeh baapdaada hai। tum brahman bachche to jaante ho parampita paramatma brahma mein pravesh hokar hamko avinaashi gyaan ratnon ka khajaana dete hain। manushyon ke paas hota hai vinaashi dhan। vahi daan karte hain, woh to hain patthar। yeh hain gyaan ke ratna। gyaan saagar baap ke paas hi ratna hain। yeh ek-ek ratna laakhon roopayon ka hai। ratnaagar baap se gyaan ratna dhaaran kar aur phir in ratnon ka daan karna hai। jitna jo leve aur deve, utna oonch pad paaye। to baap samjhaate hain apne andar dekho hamne kitne paap kiye hain? abhi koi paap to nahin hota hai? zara bhi kudrishti na ho। baap jo shreemat dete hain us par poora chalte rahen, yeh khabardaari chaahiye। maaya ke toofaan to bhal aayen parantu karmendriyon se koi vikarma nahin karna hai। koi taraph kudrishti jaaye to uske aage khada bhi nahin hona chaahiye। ekdam chala jaana chaahiye। maaloom pad jaata hai - inki kudrishti hai। agar oonch pad paana hai to bahut khabardaar rehna hai। kudrishti hogi to phir loole-langade ban padenge। baap jo shreemat dete hain, us par chalna hai। baap ko bachche hi pahchaan sakte hain। samjho baba kahaan jaata hai, bachche hi samjhenge ki baapdaada aaya hai। aur manushya dekhte to bahut hain parantu unko thode hi pata hai। koi poochhe bhi yeh kaun hai? bolo, baapdaada hain। badge to sabke paas hone hi chaahiye। bolo, shivbaaba hamko is daada dvaara avinaashi gyaan ratnon ka daan dete hain। yeh hai spiritual knowledge। spiritual father sabhi roohon ka baap baith yeh knowledge dete hain। shiv bhagvaanuvaach, geeta mein shreekrishna bhagvaanuvaach wrong hai। gyaan saagar patit-paavan shiv ko hi kaha jaata hai। gyaan se hi sadgati hoti hai। yeh hai avinaashi gyaan ratna। sadgati daata ek hi baap hai। yeh sab akshar poori reeti yaad rakhne chaahiye। abhi bachche samajhte hain ki ham baap ko jaante hain aur baap bhi samajhte hain ki ham bachchon ko jaante hain। baap to kahega na - yeh sab hamaare bachche hain, parantu jaan nahin sakte hain। takdeer mein hoga to aage chalkar jaanenge। samjho yeh baba kahaan jaata hai, koi poochhte hain ki yeh kaun hai? zaroor shuddh bhaav se hi poochhenge। akshar hi yeh bolo ki baapdaada hain। behad ka baap hai niraakaar। woh jab tak saakaar mein na aaye tab tak baap se varsa kaise mile? to shivbaaba prajaapita brahma dvaara adopt kar varsa dete hain। yeh prajaapita brahma aur yeh bi.ke. hain। padhaane vaala gyaan ka saagar hai। unse hi varsa milta hai। yeh brahma bhi padhta hai। yeh brahman se phir devta banne vaala hai। kitna sahaj hai samjhaana। koi ko bhi badge par samjhaana achha hai। bolo, baba kehte hain mujhe yaad karo to tumhaare vikarma vinaash ho jaayenge। paavan ban aur paavan duniya mein chale jaayenge। yeh patit-paavan baap hai na। ham purooshaartha kar rahe hain paavan banne ka। jab vinaash ka samay hoga to phir hamaari padhaai poori ho jaayegi। kitna sahaj hai samjhaana। koi bhi kahaan aate-jaate hain to bhi badge saath mein hona chaahiye। is badge ke saath phir ek chhota parcha bhi hona chaahiye। usmein likha ho ki bhaarat mein baap aakarke phir se aadi sanaatan devi-devta dharma sthaapan karte hain। aur sabhi anek dharma is mahaabhaarat ladaai dvaara kalpa pahle misal drama plan anusaar khalaas ho jaayenge। aise parche 2-4 laakh chhape hon, jo koi ko bhi parcha de sakte hain। oopar mein trimoorti ho, doosre taraph centres ki address ho। bachchon ko saara din service ka khyaal chalna chaahiye।

bachchon ne geet suna - roz apna potaamel baith nikaalna chaahiye ki aaj saare din mein hamaari avastha kaisi rahi? baba ne aise bahut manushya dekhe hain jo roz raat ko saare din ka potaamel baith likhte hain। jaanch karte hain - koi kharaab kaam to nahin kiya? saara likhte hain। samajhte hain achhi jeevan kahaani likhi hui hogi to pichhaadi vaale bhi padhkar aise seekhenge। aisa likhne vaale achhe aadmi hi hote hain। vikaari to sab hote hi hain। yahaan to woh baat nahin hai। tum apna potaamel roz dekho। phir baba ke paas bhej dena chaahiye to unnati achhi hogi aur dar bhi rahega। sab clear likhna chaahiye - aaj hamaari buri drishti gai, yeh hua.......। jo ek-do ko duhkh dete hain baba unhein gaazi kehte hain। janma-janmaantar ke paap tumhaare sir par hain। abhi tumko yaad ke bal se paapon ka bojh utaarna hai isliye roz dekhna chaahiye hamne saare din mein kisi ko duhkh to nahin diya? isse paap ban jaata hai। baap kehte hain, bachche kisi ko duhkh mat do। apni poori jaanch karo - hamne kitna paap, kitna punya kiya hai? jo bhi mile sabko yeh raasta bataana hi hai। sabko bahut pyaar se bolo, baap ko yaad karna hai aur pavitra banna hai। grihastha vyavhaar mein rehte kamal phool samaan pavitra banna hai। bhal tum sangam par ho parantu yeh to raavan raajya hai na। is maayaavi vishay vaitarni nadi mein rehte kamal phool samaan pavitra banna hai। kamal phool bahut baal bachchon vaala hota hai। phir bhi paani se oopar rehta hai। grihasthi hai, bahut cheejen paida karta hai। yeh drishtaanta tumhaare liye bhi hai, vikaaron se nyaara hokar raho। yeh ek janma pavitra raho to phir yeh avinaashi ho jaayega। tumko baap avinaashi gyaan ratna dete hain। baaki to sab hain patthar। vo log to bhakti ki hi baaten sunaate hain। gyaan saagar patit-paavan to ek hi hai to aise baap se bachchon ka kitna lav rehna chaahiye। baap ka bachchon se, bachchon ka baap se lav rehta hai। baaki aur koi se connection nahin। sautele woh hain jo baap ki mat par poora nahin chalte hain। raavan ki mat par chalte hain to raam ki mat thode hi thahri। aadhaakalpa hai raavan sampradaay isliye inko bhrashtaachaari duniya kaha jaata hai। ab tumhein aur sabko chhod ek baap ki mat par chalna hai। bi.ke. ki mat milti hai so bhi jaanch karni hoti hai ki yeh mat right hai va wrong hai? tum bachchon ko right aur wrong samajh bhi abhi mili hai। jab righteous aaye tab hi right aur wrong bataaye। baap kehte hain tumne aadhaakalpa yeh bhakti maarga ke shaastra sune hain, ab main tumko jo sunaata hoon - yeh right hai ya woh right hai? woh kehte hain eeshvar sarvavyaapi hai, main kehta hoon main to tumhaara baap hoon। ab judge karo kaun right hai? yeh bhi bachchon ko hi samjhaaya jaata hai na, jab brahman banen tab samjhen। raavan sampradaay to bahut hain, tum to bahut thode ho। unmein bhi nambarvaar hain। agar koi kudrishti hai, to bhi unko raavan sampradaay kaha jaayega। raam sampradaay ka tab samjha jaae jab saari drishti badal kar daivi ban jaae। apni avastha se har ek samajh to sakte hain na। pahle to gyaan tha nahin, abhi baap ne raasta bataaya hai। to dekhna hai avinaashi gyaan ratnon ka daan karta rehta hoon? bhakta log daan karte hain vinaashi dhan ka। abhi tumko daan karna hai avinaashi dhan ka, na ki vinaashi। agar vinaashi dhan hai to alaukik seva mein lagaate jaao। patit ko daan karne se patit hi ban jaate ho। abhi tum apna dhan daan karte ho to iska evja phir 21 janmon ke liye nai duniya mein milta hai। yeh sab baaten samajhne ki hain। baba service ki yuktiyaan bhi bataalte rehte hain। sab par raham karo। gaaya hua bhi hai parampita paramatma brahma dvaara sthaapna karte hain। parantu arth nahin samajhte। paramatma ko hi sarvavyaapi kah diya hai। to bachchon ko service ka shauk bahut achha rakhna hai। auron ka kalyaan karenge to apna bhi kalyaan hoga। din-pratidin baba bahut sahaj karte jaate hain। yeh trimoorti ka chitra to bahut achhi cheez hai। ismen shivbaaba bhi hai, phir prajaapita brahma bhi hai। prajaapita brahmaakumaar-kumaariyon dvaara phir se bhaarat mein 100 percent pavitrata-sukh-shanti ka daivi svaraajya sthaapan kar rahe hain। baaki anek dharma is mahaabhaarat ladaai se kalpa pahle muaaphik vinaash ho jaayenge। aise-aise parche chhapvaakar baantane chaahiye। baba kitna sahaj raasta bataate hain। pradarshani mein bhi parche do। parche dvaara samjhaana sahaj hai। puraani duniya ka vinaash to hona hi hai। nai duniya ki sthaapna ho rahi hai। ek aadi sanaatan devi-devta dharma ki sthaapna ho rahi hai। baaki yeh sab vinaash ho jaayenge kalpa pahle muaaphik। kahaan bhi jaao, pocket mein bhi parche aur badges sadaiv pade rahen। second mein jeevanmukti gaai hui hai। bolo, yeh hai baap, yeh daada। us baap ko yaad karne se yeh satayugi devta pad paayenge। puraani duniya ka vinaash, nai duniya ki sthaapna, vishnupuri nai duniya mein phir inhon ka raajya hoga। kitna sahaj hai। teerthon aadi par manushya jaate hain, kitne dhakke khaate hain। aarya samaaji aadi bhi train bharkar jaate hain। isko kaha jaata hai dharma ke dhakke, vaastav mein hain adharma ke dhakke। dharma mein to dhakke khaane ki darkaar nahin hai। tum to padhaai padh rahe ho। bhakti maarga mein manushya kya-kya karte rehte hain!

bachchon ne geet mein bhi suna ki mukhda dekh.... . yeh mukhda tumhaare sivaae to koi dekh nahin sakte hain। bhagwan ko bhi tum dikhla sakte ho। yeh hain gyaan ki baaten। tum manushya se devta, paap aatma se punya aatma bante ho। duniya in baaton ko bilkul nahin jaanti। yeh lakshmi-naaraayan svarga ke maalik kaise banen - yeh kisi ko pata nahin hai। tum bachche to sab jaante ho। kisko buddhi mein teer lag jaae to beda paar ho jaae। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) agar vinaashi dhan hai to usko saphal karne ke liye alaukik seva mein lagaana hai। avinaashi dhan ka daan bhi zaroor karna hai।

2) apne potaamel mein dekhna hai ki hamaari avastha kaisi hai? saare din mein koi kharaab kaam to nahin hote hain? ek-do ko duhkh to nahin dete hain? kisi par kudrishti to nahin jaati hai?

vardaan:- double light ban sarva samasyaaon ko high jump de paar karne vaale teevra purooshaarthi bhav

sada svayan ko amoolya ratna samajh baapdaada ke dil ki dibbi mein raho arthaat sada baap ki yaad mein samaaye raho to kisi bhi baat mein mushkil ka anubhav nahin karenge, sab bojh samaapta ho jaayenge। isi sahjayog se double light ban, purooshaartha mein high jump dekar teevra purooshaarthi ban jaayenge। jab bhi koi mushkil ka anubhav ho to baap ke saamne baith jaao aur baapdaada ke vardaanon ka haath svayan par anubhav karo isse second mein sarva samasyaaon ka hal mil jaayega।

slogan:- sahayog ki shakti asambhav ko bhi sambhav bana deti hai। yahi safety ka kila hai।

apni shaktishaali mansa dvaara sakaash dene ki seva karo

samay pramaan chaaron or sakaash dene ka, vibrations dene ka, mansa dvaara vaayumandal banaane ka kaarya karna hai। abhi isi seva ki aavashyakta hai। jaise saakaar roop mein dekha - koi bhi aisi lahar ka samay jab aata tha to din-raat sakaash dene, nirbal mein bal bharne ka attention rehta tha। samay nikaal aatmaon ko sakaash dene ki seva chalti thi। aise follow father karo।