रविवार 13 अप्रैल 2025 की दैनिक मुरली

13-04-25 praatahmurli om shanti ''avyakt-baapdaada'' revise 31-12-2004 madhuban

“is varsha ke aarambha se behad ki vairaagya vritti emerge karo, yahi muktidhaam ke get ki chaabi hai''

aaj navayug rachta baapdaada apne bachchon se nav varsha manaane ke liye, parmaatma milan manaane ke liye bachchon ke sneh mein apne doordesh se saakaar vatan mein milan manaane aaye hain। duniya mein to nav varsha ki mubaarak ek do ko dete hain। lekin baapdaada aap bachchon ko nav yug aur naye varsha ki, donon ki mubaarak de rahe hain। naya varsha to ek din manaane ka hai। navayug to aap sangam par sada manaate rehte। aap sabhi bhi parmaatma pyaar ki aakarshan mein kheenchate hue yahaan pahunch gaye ho। lekin sabse doordesh se aane vaala kaun? double videshi? woh to phir bhi is saakaar desh mein hi hain lekin baapdaada doordeshi kitna door se aaye hain? hisaab nikaal sakte hain, kitne mile se aaye hain? to doordeshi baapdaada chaaron or ke bachchon ko chaahe saamne diamond hall mein baithe hain, chaahe madhuban mein baithe hain, chaahe gyaan sarovar mein baithe hain, gallery mein baithe hain, aap sabke saath jo door baithe desh videsh mein baapdaada se milan mana rahe hain, baapdaada dekh rahe hain sabhi kitne pyaar se, door se dekh bhi rahe hain, sun bhi rahe hain। to chaaron or ke bachchon ko navayug aur naye varsha ki padamguna mubaarak ho, mubaarak ho, mubaarak ho। bachchon ko to navayug naynon ke saamne hai na! bas aaj sangam par hain, kal apne navayug mein raajya adhikaari ban raajya karenge। itna najdeek anubhav ho raha hai? aaj aur kal ki hi to baat hai। kal tha, kal phir se hona hai। apne nav yug ki, golden yug ki golden dress saamne dikhaai de rahi hai? kitni sundar hai! spashta dikhaai de rahi hai na! aaj saadhaaran dress mein hain aur kal nav yug ki sundar dress mein chamakte hue dikhaai denge। nav varsha mein to ek din ke liye ek do ko gift dete hain। lekin nav yug rachta baapdaada ne aap sabko golden world ki saugaat di hai, jo anek janma chalne vaali hai। vinaashi saugaat nahin hai। avinaashi saugaat baap ne aap bachchon ko de di hai। yaad hai na! bhool to nahin gaye ho na! second mein aa ja sakte ho। abhi-abhi sangam par, abhi-abhi apni golden duniya mein pahunch jaate ho ki deri lagti hai? apna raajya smriti mein aa jaata hai na!

aaj ke din ko vidaai ka din kaha jaata hai aur 12 baje ke baad badhaai ka din kaha jaayega। to vidaai ke din, varsha ki vidaai ke saath-saath aap sabne varsha ke saath aur kisko vidaai di? check kiya sada ke liye vidaai di va thode samay ke liye vidaai di? baapdaada ne pahle bhi kaha hai ki samay ki raphtaar teevragti se ja rahi hai, to saare varsha ki result mein check kiya ki kya mere purushaartha ki raphtaar teevra rahi? ya kab kaise, kab kaise rahi? duniya ki haalton ko dekhte hue ab apne vishesh do svaroopon ko emerge karo, woh do swaroop hain - ek sarva prati merciful aur kalyaankaari aur doosra har aatma ke prati sada daata ke bachche master daata। vishwa ki aatmaayen bilkul shaktiheen, duhkhi, ashaanta chilla rahi hain। baap ke aage, aap poojya aatmaon ke aage pukaar rahi hain - kuchh ghadiyon ke liye bhi sukh de do, shanti de do। khushi de do, himmat de do। baap to bachchon ke duhkh, pareshaani ko dekh nahin sakte, sun nahin sakte। kya aap sabhi poojya aatmaon ko raham nahin aata! maang rahe hain - do, do, do…। to daata ke bachche kuchh anchali to de do। baap bhi aap bachchon ko saathi bana ke, master daata banaake, apne right hand banaake yahi ishaara dete hain - itni vishwa ki aatmaayen sabhi ko mukti dilaani hai। muktidhaam mein jaana hai। to he daata ke bachche apne shreshtha sankalp dvaara, mansa shakti dvaara, chaahe vaani dvaara, chaahe sambandh-samparka dvaara, chaahe shubh bhaavna shubh kaamna dvaara, chaahe vibration vaayumandal dvaara kisi bhi yukti se mukti dilaao। chilla rahe hain mukti do, baapdaada apne right hands ko kehte hain raham karo।

abhi tak hisaab nikaalo। chaahe mega programme kiya hai, chaahe conference ki hai, chaahe bhaarat mein ya videsh mein centres bhi khole hain lekin total vishwa ke aatmaon ki sankhya ke hisaab se kitni percent mein aatmaon ko mukti ka raasta bataaya hai? sirf bhaarat kalyaankaari ho ya videsh mein jo bhi 5 khanda hain, to jahaan-jahaan sevaakendra khole hain vahaan ke kalyaankaari ho va vishwa kalyaankaari ho? vishwa ka kalyaan karne ke liye har ek bachche ko baap ka hand, right hand banna hai। kisko bhi kuchh diya jaata hai to kisse diya jaata hai? haathon se diya jaata hai na। to baapdaada ke aap hands ho na, haath ho na। to baapdaada right hands se poochhte hain, kitni percent ka kalyaan kiya hai? kitni percent ka kiya hai? sunaao, hisaab nikaalo। paandav hisaab karne mein hoshiyaar hain na? iseelie baapdaada kehte hain ab sva-purushaartha aur seva ke bhinna-bhinna vidhiyon dvaara purushaartha teevra karo। sva ki sthiti mein bhi chaar baaten vishesh check karo - isko kahenge teevra purushaartha।

ek baat - pahle yeh check karo ki nimitta bhaav hai? koi bhi royal roop ka main pan to nahin hai? meraapan to nahin hai? saadhaaran logon ka main aur mera bhi saadhaaran hai, mota hai lekin brahman jeevan ka mera aur main pan sookshm aur royal hai। uski bhaasha maaloom hai kya hai? yeh to hota hi hai, yeh to chalta hi hai। yeh to hona hi hai। chal rahe hain, dekh rahe hain...। to ek nimitta bhaav, har baat mein nimitta hain। chaahe seva mein, chaahe sthiti mein, chaahe sambandh-samparka mein chehra aur chalan nimitta bhaav ka ho। aur uski doosri visheshta hogi - nirmaan bhaavna। nimitta aur nirmaan bhaav se nirmaan karna। to teen baaten suni - nimitta, nirmaan aur nirmaan aur chauthi baat hai - nirvaan। jab chaahe nirvaandhaam mein pahunch jaayen। nirvaan sthiti mein sthit ho jaaen kyonki svayan nirvaan sthiti mein honge tab doosron ko nirvaandhaam mein pahuncha sakenge। abhi sabhi mukti chaahte hain, chhudaao, chhudaao chilla rahe hain। to yeh chaar baaten achhi percent mein practical jeevan mein hona arthaat teevra purushaarthi। tab baapdaada kahenge vaah! vaah! bachche vaah! aap bhi kahenge vaah! baba vaah! vaah! drama vaah! vaah! purushaartha vaah! lekin pata hai abhi kya karte ho? pata hai? kabhi vaah! kehte ho kabhi why (kyon) kehte ho। vaah! ke bajaae why, aur why ho jaata hai haay। to why nahin, vaah! aapko bhi kya achha lagta hai, vaah! achha lagta hai ya why? kya achha lagta hai? vaah! kabhi why nahin karte ho? galti se aa jaata hai।

double foreigners why-why kehte hain? kabhi-kabhi kah dete ho? jo double foreigners kabhi bhi why nahin kehte woh haath uthaao। bahut thode hain। achha - bhaaratvaasi jo vaah! vaah! ke bajaae kyon-kya kehte hain woh haath uthaao। kyon-kya kehte ho? kisne chhutti di hai aapko? sanskaaron ne? puraane sanskaaron ne aapko why ki chhutti de di hai aur baap kehte hain vaah! vaah! kaho। why-why nahin। to abhi naye varsha mein kya karenge? vaah! vaah! karenge? ya kabhi-kabhi why kahne ki chhutti de den? why achha nahin hai। jaise vaai (pet mein gas) ho jaati hai na, to kharaab ho jaata hai na। to why vaai hai, yeh nahin karo। vaah! vaah! kitna achha lagta hai। haan bolo, vaah! vaah! vaah!

achha - to doordesh mein sun rahe hain, dekh rahe hain - bhaarat mein bhi videsh mein bhi, un bachchon se bhi poochhte hain vaah! vaah! karte ho ya why, why karte ho? abhi vidaai ka din hai na! aaj varsha ke vidaai ka last de hai। to sabhi sankalp karo - why nahin kahenge। sochenge bhi nahin। question mark nahin, aashcharya ki maatra nahin, bindi। question mark likho, kitna tedha hai aur bindi kitni sahaj hai। bas naynon mein baap bindu ko sama do। jaise naynon mein dekhne ki bindi samaai hui hai na! aise hi sada naynon mein bindu baap ko sama lo। samaane aata hai? aata hai ya fit nahin hoti hai? neeche oopar ho jaati hai? to kya karenge? vidaai kisko denge? why ko? kabhi bhi aashcharya ki nishaani bhi nahin aave, yeh kaise! yeh bhi hota hai kya! hona to nahin chaahiye, kyon hota hai! question mark nahin, aashcharya ki maatra bhi nahin। bas baap aur main। kai bachche kehte hain yeh to chalta hi hai na! baapdaada ko bahut ramneek baaten roohrihaan mein kehte hain, saamne to kah nahin sakte hain na। to roohrihaan mein sab kuchh kah dete hain। achha kuchh bhi chalta hai lekin aapko chalna nahin hai, aapko udna hai to chalne ki baaten kyon dekhte ho, udo aur udaao। shubh bhaavna, shubh kaamna aisi shaktishaali hai jo beech mein sirf why nahin aave, sivaae shubh bhaavna shubh kaamna ke, to itni powerful hai jo kisi ashubh bhaavna vaale ko bhi shubh bhaavna mein badal sakte ho। second number - agar badal nahin sakte ho to bhi aapki shubh bhaavna, shubh kaamna avinaashi hai, kabhi-kabhi vaali nahin, avinaashi hai to aapke oopar ashubh bhaavna ka prabhaav nahin pad sakta hai। question mein chale jaate ho, yeh kyon ho raha hai? yeh kab tak chalega? kaise chalega? isse shubh bhaavna ki shakti kam ho jaati hai। nahin to shubh bhaavna, shubh kaamna is sankalp shakti mein bahut shakti hai। dekho, aap sabhi aaye baapdaada ke paas। pahla din yaad karo, baapdaada ne kya kiya? chaahe patit aaye, chaahe paapi aaye, chaahe saadhaaran aaye, bhinna-bhinna vritti vaale, bhinna-bhinna bhaavna vaale aaye, baapdaada ne kya kiya? shubh bhaavna rakhi na! mere ho, master sarvashaktivaan ho, diltakhta nasheen ho, yeh shubh bhaavna rakhi na, shubh kaamna rakhi na, usse hi to baap ke ban gaye na। baap ne kaha kya ki he paapi kyon aaye ho? shubh bhaavna rakhi, mere bachche, master sarva shaktivaan bachche, jab baap ne aap sabke oopar shubh bhaavna rakhi, shubh kaamna rakhi to aapke dil ne kya kaha? mera baba। baap ne kya kaha? mere bachche। aise hi agar shubh bhaavna, shubh kaamna rakhenge to kya dikhaai dega? mera kalpa pahle vaala meetha bhaai, meri sikeeldhi behen। parivartan ho jaayega।

to is varsha mein kuchh karke dikhaana। sirf haath nahin uthaana। haath uthaana bahut sahaj hai। man ka haath uthaana kyonki bahut kaam raha hua hai। baapdaada to nazar karte hain, vishwa ki aatmaon ke oopar to bahut taras padta hai। ab prakriti bhi tang ho gai hai। prakriti khud tang ho gai hai, to kya kare? aatmaon ko tang kar rahi hai। aur baap bachchon ko dekhke taras mein aa jaate hain। aap sabko taras nahin aata? sirf khabar sunkar chup ho jaate ho, bas, itni aatmaayen chali gai। vo aatmaayen sandesh se to vanchit rah gai। abhi to daata bano, merciful bano। yeh tab hoga, raham tab aayega jab is varsha ke aarambha se apne mein behad ki vairaagya vritti emerge karo। behad ki vairaagya vritti। yeh deh ki, dehbhaan ki smriti, yeh bhi behad ke vairaagya ki kami hai। chhoti-chhoti had ki baaten sthiti ko dagmag karti hain, kaaran? behad ki vairaagya vritti kam hai, lagaav hai। vairaagya nahin hai lagaav hai। jab bilkul behad ke vairaagi ban jaayenge, vritti mein bhi vairaagi, drishti mein bhi behad ke vairaagi, sambandh-samparka mein, seva mein sabmen behad ke vairaagi... tabhi muktidhaam ka darvaaja khulega। abhi to jo aatmaayen shareer chhodkar ja rahi hain phir janma lengi, phir duhkhi hongi। ab muktidhaam ka get kholne ke nimitta to aap ho na? brahma baap ke saathi ho na! to behad ki vairaagya vritti hai get kholne ki chaabi। abhi chaabi nahin lagi hai, chaabi taiyaar hi nahin ki hai। brahma baap bhi intajaar kar raha hai, advance party bhi intajaar kar rahi hai, prakriti bhi intajaar kar rahi hai, tang ho gai hai bahut। maaya bhi apne din ginti kar rahi hai। abhi bolo, he master sarvashaktivaan, bolo kya karna hai?

is varsha mein koi naveenta to karenge na! naya varsha kehte hain to naveenta to karenge na! abhi behad ke vairaagya ki, muktidhaam jaane ki chaabi taiyaar karo। aap sabhi ko bhi to pahle muktidhaam mein jaana hai na। brahma baap se vaayda kiya hai - saath chalenge, saath aayenge, saath mein raajya karenge, saath mein bhakti karenge...। to abhi taiyaari karo, is varsha mein karenge ki doosra varsha chaahiye? jo samajhte hain is varsha mein attention please, baar-baar karenge woh haath uthaao। karenge? phir to advance party aapko bahut mubaarak degi। woh bhi thak gaye hain। achha - teachers kya kehti hain? pahli line kya kehti hai? pahle to pahli line ke paandav aur pahli line ki shaktiyaan jo karenge woh haath uthaao। aadha haath nahin, aadha uthaayenge to kahenge aadha karenge। lamba haath uthaao। achha। mubaarak ho, mubaarak ho। achha - double videshi haath uthaao। ek do mein dekho kisne nahin uthaaya hai। achha, yeh sindhi group bhi haath utha raha hai, kamaal hai। aap bhi karenge? sindhi group karenge? tab to double mubaarak ho। bahut achha। ek do ko saath dekar, shubh bhaavna ka ishaara dete, haath mein haath milaate karna hi hai। achha। (sabha mein koi ne aavaaj ki) sab baith jaao, nothing new।

abhi-abhi ek second mein bindu ban bindu baap ko yaad karo aur jo bhi koi baaten hon usko bindu lagaao। laga sakte ho? bas ek second mein “main baba ka, baba mera।'' achha।

abhi chaaron or ke sarva naye yug ke maalik bachchon ko, chaaron or ke naye varsha manaane ke umang-utsaah vaale bachchon ko sada udte rehna aur udaate rehna, aise udti kala vaale bachchon ko, sada teevra purushaartha dvaara vijay maala ke manke banne vaale vijayi ratnon ko baapdaada ka naye varsha aur naye yug ki duaaon ke saath-saath padamguna thaaliyaan bhar-bhar ke mubaarak ho, mubaarak ho। ek haath ki taali bajaao। achha!

vardaan:- ekaagrata ke abhyaas dvaara ekras sthiti banaane vaale sarva siddhi swaroop bhav

jahaan ekaagrata hai vahaan svatah ekras sthiti hai। ekaagrata se sankalp, bol aur karma ka vyartha pan samaapta ho jaata hai aur samartha pan aa jaata hai। ekaagrata arthaat ek hi shreshtha sankalp mein sthit rehna। jis ek beej roopi sankalp mein saara vriksha roopi vistaar samaaya hua hai। ekaagrata ko badhaao to sarva prakaar ki halchal samaapta ho jaayegi। sab sankalp, bol aur karma sahaj sidva ho jaayenge iske liye ekaantavaasi bano।

slogan:- ek baar ki hui galti ko baar-baar sochna arthaat daag par daag lagaana isliye beeti ko bindi lagaao।

avyakt ishaare - “combined roop ki smriti se sada vijayi bano''

jaise is samay aatma aur shareer combined hai, aise baap aur aap combined raho। sirpha yeh yaad rakho ki ‘mera baba'। apne mastak par sada saath ka tilak lagaao। jo suhaag hota hai, saath hota hai woh kabhi bhoolta nahin। to saathi ko sada saath rakho। agar saath rahenge to saath chalenge। saath rehna hai, saath chalna hai, har second, har sankalp mein saath hai hi।