रविवार 22 जून 2025 की दैनिक मुरली

22-06-25 praatahmurli om shanti ''avyakt-baapdaada'' revise 15-12-05 madhuban

ab sneh aur sahayog ki rooprekha stage par laao, har ek ko gun aur shaktiyon ki gift do

aaj parmaatma baap apne chaaron or ke parmaatma pyaar ke adhikaari bachchon ko dekh rahe hain। yeh parmaatma pyaar vishwa mein koton mein se koi ko praapta hota hai। yeh parmaatma pyaar nihsvaartha pyaar hai kyonki ek paramatma pita hi niraakaar, nirhankaari hai। manushya aatma shareerdhaari hone ke kaaran koi na koi svaartha mein aa hi jaati hai। parmaatma baap hi apne bachchon ko aisa nihsvaartha pyaar dete hain। parmaatma pyaar brahman jeevan ka vishesh aadhaar hai। brahman jeevan ka jeeydaan hai। agar brahman jeevan mein parmaatma pyaar ka anubhav kam hai, to pyaar ke bina jeevan ramneek nahin, sookha jeevan ho jaata hai। parmaatma pyaar hi jeevan mein sada saath bhi deta aur saathi ban sada sahayogi rehta। jahaan pyaar hai, saath hai vahaan sab kuchh bahut sahaj aur saral ho jaata hai। mehnat ka anubhav nahin hota hai। aisa anubhav hai na! parmaatma pyaare koi bhi vyakti va saadhnon ki aakarshan mein nahin aa sakte kyonki parmaatma aakarshan, parmaatma pyaar aisa anubhav karaata jo sada pyaar ke kaaran lavleen rehte hain, jisko logon ne paramatma mein leen hona samajh liya hai। paramatma mein leen nahin hota lekin parmaatma pyaar mein lavleen ho jaata hai।

baapdaada chaaron or ke bachchon ko dekhte hain - parmaatma pyaare to sabhi bane hain lekin ek hain lovely bachche, doosre hain lavleen bachche। to apne aapse poochho lovely to sabhi hain, lekin lavleen kahaan tak rehte hain? lavleen bachchon ki nishaani hai woh sada parmaatma pharmaan mein sahaj chalte hain। pharmaan mein bhi rehte aur dehbhaan se kurbaan bhi rehte hain kyonki pyaar mein kurbaan hona mushkil nahin hai। sabse pahla pharmaan hai - yogi bhav, pavitra bhav। baap ka bachchon se pyaar hone ke kaaran baap bachchon ko mehnat karte dekh nahin sakte kyonki baap jaante hain 63 janma bahut mehnat ki, abhi yeh alaukik janma mehnat se mukta ho ateendriy sukh ki mauj manaane ka hai। to mauj mana rahe ho ki mehnat karni padti hai? pyaar mein pharmaan par chalna mehnat nahin lagti। agar mehnat karni padti hai to pyaar ki percentage kam hai। kahaan na kahaan pyaar mein kuchh na kuchh leakage hai। do baaton ki leakage mehnat karaati hai - ek puraane sansaar ki aakarshan, sansaar mein sambandh, padaartha sab aa jaata hai। aur doosra - puraane sanskaar ki aakarshan। yeh puraana sansaar aur puraane sanskaar apne taraph aakarshit kar dete hain to parmaatma pyaar mein percentage ho jaati hai। check karo - in donon leakage se mukta hain? yaad karo aap aatma ke anaadi sanskaar aur aadi sanskaar kya the aur abhi ant ke brahman jeevan ke sanskaar kya hain? anaadi bhi hain, aadi bhi hain aur ant mein bhi shreshtha sanskaar hain। yeh puraane sanskaar madhya ke hain, na anaadi hain, na aadi hain, na ant ke hain। lekin sabhi ka lakshya kya hai? kisi bhi bachche se poochho to ek hi uttar dete hain - lakshya hai baap samaan banne ka। yahi hai na! hai to haath uthaao। yahi lakshya hai pakka? ya beech-beech mein badli ho jaata hai?

to baap bachchon se poochhte hain ki baap aur daada donon ke samaan sanskaar kaun se hain? sada baap har aatma ke prati udaarchit rahe hain। har aatma ke prati sneh aur sammaan swaroop mein sahayogi rahe hain। aise svayan bhi apne ko har aatma ke prati sahayogi anubhav karte ho? sahayog de to sahayogi banen, nahin। sneh de to snehi banen, nahin। jaise brahma baap har bachche ke prati sahayogi banen, snehi banen, aise sarva ke sada snehi aur sahayogi, isko kaha jaata hai samaan banna। agar koi bhi bachche ko sanskaar parivartan karne mein mehnat karni padti hai to uska kaaran kya hai? brahma baap ne apne oopar attention rakha lekin mehnat nahin ki। sanskaar parivartan mein mehnat ka kaaran hai - lovely bane hain, lavleen nahin bane hain।

baapdaada to har bachche ko lovely bachche samajhte hain, jaante bhi hain, janmapatri har ek ki jaante hain phir bhi kya kahenge? lovely hain। baapdaada har bachche ko ek hi padhaai, ek hi paalna, ek hi vardaan sada dete hain। chaahe jaante bhi hain ki yeh last number hai phir bhi baapdaada kisi bhi bachche ka avgun, kamjori sankalp mein bhi nahin rakhte। laadla hai, sikeeldha hai, meetha-meetha hai… isi drishti aur vritti se dekhte kyonki baapdaada jaante hain isi vritti aur shreshtha drishti se kamjor mahaaveer ban jaayega। aise hi apne shreshtha vritti aur shubh bhaavna, shubh kaamna dvaara kisi ka bhi parivartan kar sakte ho। jab aapne challenge kiya hai ki prakriti ko bhi parivartan karke dikhaayenge to kya aatmaon ka parivartan nahin kar sakte! prakritijeet bante ho to aatma, aatma ki shreshtha bhaavna se, kalyaan ki kaamna se parivartan nahin kar sakte ho!

abhi naya varsha shuru hone vaala hai na - to naye varsha mein sarva behad ke brahman parivaar ke beech ek do ke prati apne shubh bhaavna, shreshtha kaamna dvaara harek ek do ke parivartan karne mein sahayogi bano, chaahe kamjor hai, jaante ho iske sanskaar mein yeh kamjori hai lekin aap sneh aur sahayog ki shakti dvaara sahayogi bano। ek do ko sahayog ka haath milaao। is sahayog ke haath milaane ka drishya aisa ban jaayega jaise haath mein haath sneh ka milaana, sahayog ka milaana, maala ban jaaye। shiksha nahin do, sneh bhara sahayog do। nyaara nahin bano, kinaara nahin karo, sahaara bano kyonki aapka yaadgaar vijaymaala hai। har ek manka, manke ke saathi sahayogi hai tab maala ka chitra bana hai।

to sabhi baapdaada se poochhte hain naye saal mein kya karna hai? sandesh dene ka kaarya to bahut kiya, kar rahe hain, karte rahenge। ab sandesh-vaahkon ke sahayog aur sneh ki rooprekha stage par laao। mahaadaani bano, apne gunon ka sahayogi bano, banaao। aise apne gunon ka, hain to parmaatma gun lekin jo gun aapne apne mein banaaye hai, us gun ki shakti se unhon ki kamjori door karo। yeh kar sakte hain? kar sakte hain ya mushkil hai? teachers bataao, kar sakte hain? kar sakte hain ya karna hi hai? karna hi hai। koi kamjor nahin rahe, kyonki koton mein koi hai na! chaahe last daana bhi hai, hai to koton mein koi। aapka title hi hai - master sarvashaktivaan। to sarvashaktivaan ka kartavya kya hai? shakti ki len-den karna। baap dvaara mila hua gun aapas mein len-den karo। yahi sahayog ki gift ek do mein do। naye varsha mein ek do ko gift dete hain na! to is varsha mein ek do mein gunon ki gift do। agar kalyaan ki bhaavna rakhenge to jaise bhaashan karke vaani dvaara sandesh dete ho na, vaise apne kalyaan ki bhaavna dvaara, kalyaan ki vritti dvaara, kalyaan ke vaayumandal dvaara yeh gunon ki gift do, shaktiyon ki gift do। kamjor ko sahayog dena, yeh samay par gift dena hai, gire hue ko giraao nahin, chadhaao, ooncha chadhaao। yeh aisa hai, yeh aisa hai..., nahin। yeh prabhu pyaar ke paatra hai, koton mein koi aatma hai, vishesh aatma hai, vijayi banne vaali aatma hai, yeh drishti rakho। abhi vritti, drishti, vaayumandal change karo। kuchh naveenta karni chaahiye na! kamjori dekhte, dekho nahin, umang do, sahayog do। aisa brahman sangathan taiyaar karo to baapdaada vijay ki taali bajaayega। aap bhi baar-baar taaliya bajaate ho na, baapdaada bhi mubaarak ho, badhaai ho, greetings ho, uski taaliyaan bajaayega। aap bhi saath mein taali bajaayenge na। abhi taali bajaai to achha kiya lekin vishwa ke aage taali baje। sabke mukh se yeh aavaaj nikle, hamaare eeshta aa gaye। hamaare poojya aa gaye। lakshya pakka hai na! pakka hai lakshya, karna hi hai? ya dekhenge, plan banaayenge! karna hi hai, plan kya, karna hi hai। abhi sabhi intajaar kar rahe hain, abhi inhon ka intajaar samaapta karo। pratyaksha hone ka intajaam karo। dekho prakriti bhi abhi kitni tang ho rahi hai। to prakriti ko bhi shant bana do। aap pratyaksha ho jaayenge to vishwa shanti svatah ho jaayegi। achha।

aajkal vishwa mein do baaten vishesh chalti hain - ek exercise aur doosra bhojan ke oopar attention। to aap bhi yeh donon baaten karte ho? aapki exercise kaun si hai? shaareerik exercise to sab karte hain lekin man ki exercise abhi-abhi brahman, brahman so pharishta aur pharishta so devta। yeh mansa drill ka abhyaas sada karte raho। aur shuddh bhojan, man ka shuddh sankalp। agar vyartha sankalp, negative sankalp chalta hai to yeh man ka ashuddha bhojan hai। to man mein sada shuddh sankalp rahe, donon karna aata hai na! jitna samay chaaho utna samay shuddh sankalp swaroop ban jaao। achha।

chaaron or ke parmaatma pyaar ke adhikaari vishesh aatmaon ko, sada ek do ke sahayogi banne vaale baap ke snehi aur sahayogi aatmaon ko, sada vijayi hai aur vijay ka jhanda vishwa mein phailaana hai, is lakshya ko practical mein laane vaale vijayi bachchon ko, sada is puraane sansaar aur sanskaar ke aakarshan se pare rahne vaale baap samaan bachchon ko dilaaraam baap ka dil se yaadapyaar aur namaste।

daadi ji se- bahut achha part baja rahi ho। aapko dekhkar sabhi ko pharishta life yaad aati hai। nyaara aur pyaara।

gujraat ki mukhya 13 bahinon se:- achhe-achhe mahaaveer hain। mahaaveeron ka kaam hai vijayi ban vijayi banaana। to sabhi achhi seva kar rahe hain aur aage bhi seva hoti rahegi। baapdaada bachchon ke umang-utsaah ko dekh khush hote hain। achha gujraat mein phaila rahe ho aur bhi aage phailaate rahenge। baapdaada ko sabhi bachche aashaaon ke deepak lag rahe hain। achha hai। sangathan bhi achha hai। ek-ek ki visheshta hai। achha। khush, khushi baantane vaale। (sarla deedi poochh rahi hain, daadi ne maala mein kisko rakha hai) aap kya samajhti ho? ham to honge hi na, aise samajhti ho? thoda bahut ek do ko sahayog de aur jo kuchh bhi raha hua hai, woh khatma ho jaayega। sab baap samaan banne vaale hi hain। (naveenta kya karen) sunaaya na - ek ek centre kam se kam ek vaaris to taiyaar kare। to is varsha woh lekar aana, 21 vaaris to leke aana। yeh shuru karo। pahla number aao। sabhi haan kar rahe hain। vaaris ki qualification jaante hain na। yeh sab baba ke hi banaayenge na, apna to banaayengi nahin। achha। om shanti।

gujraat ki hi seva hai, gujraat vaale hi milan manaane aaye hain:- gujraat vaale jo bhi hain, chaahe aaye hain, chaahe seva mein aaye hain, woh haath uthaao। bahut hain, bahut achha। achha chance liya hai। gujraat ko baapdaada kehte hain, sindhi mein kahaavat hai jo chul par woh dil par। to sabse najdeek mein najdeek gujraat hai। jo najdeek hota hai na, usko kaha jaata hai shadpand par (bilkul kareeb) hai, bulaao aur pahunch jaaye। to gujraat vaale aise ever ready hai na - kabhi bhi bulaayen aa jaao, to aa jaayenge? aise hai? parivaar ko nahin dekhenge kya karenge, aa jaayenge? ever ready hain। achha hai, gujraat saakaar brahma ki prerna se sthaapan hua hai। gujraat ne gujraat ko nimantran nahin diya, brahma baap ne gujraat ko khola hai। to gujraat ke oopar vishesh brahma baap ki nazar padi hui hai। aur gujraat ne purushaartha bhi kiya hai, centre achhe khule hain। kitne centre hain? (300 sevaakendra, upsevaakendra hain aur 3 hajaar geeta paathshaalaaye hain) achha, sabse jyaada centre kis zone ke hain? (bambai-mahaaraashtra ke) achha - mahaaraashtra vaale aaye hain? (aaj nahin aaye hain) gujraat vaale seva to achhi kar rahe hain, gujraat ka vistaar bhi achha hai। abhi kya karna hai? vistaar to hai, vistaar to achha kiya hai, abhi gujraat vaale number one vaaris taiyaar karen। kam se kam jo bade sevaakendra hain, jo puraane vaaris hain, woh to hain hi lekin naya koi vaaris nikaalo। chalo ek ek to nikaalo, kyonki maala mein manke vahi banenge jo vaaris quality honge। to maala to taiyaar karna hai na! 16108 ki bhi maala bani hui hai। abhi agar baapdaada bole 108 ki maala banaao, to bana sakte ho? ban sakti hai? daadiyaan bataaven, 108 ki maala ban sakti hai? (daadi ji ne kaha ban sakti hai) taiyaar hain? 108 ki maala taiyaar ho gai hai? (haan baba taiyaar hai) achha likhkar dikhaana। taiyaar hai to bahut achha, mubaarak hai। achha 16 hajaar ki maala, aadhe tak bani hai? (aadha to kya unse bhi jyaada bani hai) achha hai na। dekho gupta roop mein bani hai aur aapki daadi ne dekh li hai। achha hai। abhi aapse sabhi poochhenge ki mera maala mein naam hai? achha hai। aisi shubh bhaavna, shubh ummeeden taiyaar hi kar leti hain। abhi sabhi ne suna na, apne ko check karna main us maala mein ever ready hoon? achha। aur kya karna hai?

CAD group (heart patient ka) aaya hai:- achha hai, yeh bhi aavaaj phailaane ka saadhan bahut achha hai kyonki practical saboot dekhte hain na aur bina kharche ke meditation dvaara theek ho jaana, to sabko bahut achha lagta hai। abhi dheere-dheere iski vriddhi karte jaao। suna hai kar rahe hain aur saphalta bhi mil rahi hai aur bhi milti rahegi baaki baapdaada is kaarya ke liye nimitta banne vaalon ko mubaarak de rahe hain। official government tak result pahunch rahi hai aur bhi phailaate rahenge to meditation ka mahatva badhta jaayega। baaki baapdaada ko yeh vidhi pasanda hai। achha।

vardaan:- man ke maun se seva ki nai invention nikaalne vaale siddhi swaroop bhav

jaise pahle-pahle maun vrat rakha tha to sab free ho gaye the, time bach gaya tha aise ab man ka maun rakho jisse vyartha sankalp aave hi nahin। jaise mukh se aavaaj na nikle vaise vyartha sankalp na aaye - yeh hai man ka maun। to samay bach jaayega। is man ke maun se seva ki aisi nai invention niklegi jo saadhna kam aur siddhi jyaada hogi। jaise science ke saadhan second mein vidhi ko praapta karaate hain vaise is silence ke saadhan dvaara second mein vidhi praapta hogi।

slogan:- jo svayan samarpit sthiti mein rehte hain-sarva ka sahayog bhi unke aage samarpit hota hai।

avyakt ishaare-aatmik sthiti mein rahne ka abhyaas karo, antarmukhi bano

anek prakaar ke vyakti, vaibhav athva anek prakaar ki vastuon ke samparka mein aate aatmik bhaav aur anaasakta bhaav dhaaran karo। yeh vaibhav aur vastuyen anaasakta ke aage daasi ke roop mein hongi aur aasakta bhaav vaale ke aage chumbak ki tarah phansaane vaali hongi।