शनिवार 21 फ़रवरी 2026 की दैनिक मुरली

21-02-2026 praatahmurli om shanti "baapdaada"' madhuban

“meethe bachche - tum baap ke paas aaye ho apni soi hui takdeer jagaane, takdeer jagna maana vishwa ka maalik banna''

prashn:- kaun si khuraak tum bachchon ko baap samaan buddhivaan bana deti hai?

uttar:- yeh padhaai hai tum bachchon ke buddhi ki khuraak। jo roz padhaai padhte hain arthaat is khuraak ko lete hain unki buddhi paaras ban jaati hai। paarasnaath baap jo buddhivaanon ki buddhi hai woh tumhein aapasmaan paarasbuddhi banaate hain।

geet:- takdeer jagaakar aai hoon…

om shanti। geet ki line sunkar ke bhi meethe-meethe bachchon ke romaanch khade ho jaane chaahiye। hai to common geet parantu inka saar aur koi nahin jaante। baap hi aakar geet, shaastra aadi ka arth samjhaate hain। meethe-meethe bachche yeh bhi jaante hain ki kaliyug mein sabki takdeer soi hui hai। satayug mein sabki takdeer jagi hui hai। soi hui takdeer ko jagaane vaala aur shreemat dene vaala athva tadbeer banaane vaala ek hi baap hai। vahi baith bachchon ki takdeer jagaate hain। jaise bachche paida hote hain aur takdeer jag jaati hai। bachcha janma aur unko yeh pata pad jaata hai ki ham vaaris hain। hoobhu yeh phir behad ki baat hai। bachche jaante hain - kalpa-kalpa hamaari takdeer jagti hai phir so jaati hai। paavan bante hain to takdeer jagti hai। paavan grihastha aashram kaha jaata hai। aashram akshar pavitra hota hai। pavitra grihastha aashram, unke against phir hai apvitra patit grihastha dharma। aashram nahin kahenge। grihastha dharma to sabka hai hi। jaanavron mein bhi hai। bachche to sab paida karte hi hain। jaanavron ko bhi kahenge grihastha dharma mein hain। ab bachche jaante hain - ham svarga mein pavitra grihastha aashram mein the, devi-devta the। unhon ki mahima bhi gaate hain sarvagun sampanna, 16 kala sampoorn...... tum khud bhi gaate the। ab samajhte ho ham manushya se devta phir se ban rahe hain। gaayan bhi hai manushya se devta.....। brahma-vishnu-shankar ko bhi devta kehte hain। brahma devtaae namah phir kehte hain shiv parmaatmaae namah। abhi unka arth bhi tum jaante ho। woh to andhashraddha se sirf kah dete hain। ab shankar devtaae namah kahenge। shiv ke liye kahenge shiv parmaatmaae namah to farka hua na। woh devta ho gaya, woh paramatma ho gaya। shiv aur shankar ko ek kah nahin sakte। tum jaante ho ham barobar pattharbuddhi the, ab paarasbuddhi ban rahe hain। devtaaon ko to pattharbuddhi nahin kahenge। phir drama anusaar raavan raajya mein seedhi utarni hai। paarasbuddhi se pattharbuddhi banna hai। sabse buddhivaan to ek hi baap hai। abhi tumhaari buddhi mein dam nahin raha hai। baap unko baith paarasbuddhi banaate hain। tum yahaan aate ho paarasbuddhi banne। paarasnaath ke bhi mandir hain। vahaan mele lagte hain। parantu yeh kisko pata nahin ki paarasnaath kaun hai। vaastav mein paaras banaane vaala to baap hi hai। woh hai buddhivaanon ki buddhi। yeh gyaan hai tum bachchon ki buddhi ke liye khuraak, isse buddhi kitna palatti hai। yeh duniya hai kaanton ka jangal। kitna ek-do ko duhkh dete hain। abhi hai hi tamo-pradhaan raurav narka। garud puraan mein to bahut rochak baaten likh di hain।

abhi tum bachchon ki buddhi ko khuraak mil rahi hai। behad ka baap khuraak de rahe hain। yeh hai padhaai। isko gyaan amrit bhi kah dete hain। koi jal aadi hai nahin। aajkal sab cheezon ko amrit kah dete hain। gangaajal ko bhi amrit kehte hain। devtaaon ke pair dhokar paani rakhte hain, usko amrit kah dete hain। ab yeh bhi buddhi se samajhne ki baat hai na। yeh anchali amrit hai va patit-paavni ganga ka jal amrit hai? anchali jo dete hain woh aise nahin kehte ki yeh patiton ko paavan banaane vaala hai, gangaajal ke liye kehte hain patit-paavni hai। kehte bhi hain manushya mare to gangaajal mukh mein ho। dikhaate hain arjun ne baan maara phir amrit jal pilaaya। tum bachchon ne koi baan aadi nahin chalaaye hain। ek gaanv hain jahaan baanon se ladte hain। vahaan ke raaja ko eeshvar ka avtaar kehte hain। ab eeshvar ka avtaar to koi ho nahin sakta। vaastav mein sachcha-sachcha satguru to ek hi hai, jo sarva ka sadgati daata hai। jo sabhi aatmaon ko saath le jaate hain। baap ke sivaae vaapis koi bhi le ja nahin sakta। brahm mein leen ho jaane ki bhi baat nahin hai। yeh naatak bana hua hai। srishti ka chakra anaadi phirta hi rehta hai। world ki history-geography kaise repeat hoti hai, yeh abhi tum jaante ho aur koi nahin jaanta। manushya arthaat aatmaayen apne baap rachayita ko bhi nahin jaanti hain, jisko yaad bhi karte hain O god father। had ke baap ko kabhi god father nahin kahenge। god father akshar bahut respect se kehte hain। unke liye hi gaate hain patit-paavan, duhkh harta sukh karta hai। ek taraph kehte hain woh duhkh harta sukh karta hai aur jab koi duhkh hota hai va bachcha aadi mar jaata hai to kah dete eeshvar hi duhkh-sukh deta hai। eeshvar ne hamaara bachcha le liya। yeh kya kiya? ab mahima ek gaate hain aur phir kuchh hota hai to eeshvar ko gaaliyaan dete hain। kehte bhi hain eeshvar ne bachcha diya hai, phir agar usne vaapis le liya to tum rote kyon ho? eeshvar ke paas gaya na। satayug mein kabhi koi rote nahin। baap samjhaate hain rone ki to koi darkaar nahin। aatma ko apne hisaab-kitaab anusaar jaae doosra part bajaana hai। gyaan na hone kaaran manushya kitna rote hain, jaise paagal ho jaate hain। yahaan to baap samjhaate hain - amma mare to bhi halua khaana..... nashtomoha hona hai। hamaara to ek hi behad ka baap hai, doosra na koi। aisi avastha bachchon ki honi chaahiye। mohjeet raaja ki katha bhi suni hai na। yeh hain sab danta kathaayen। satayug mein kabhi duhkh ki baat nahin hoti। na kabhi akaale mrityu hoti hai।

tum bachche jaante hain ham abhi kaal par jeet paate hain, baap ko mahaakaal bhi kehte hain। kaalon ka kaal tumko kaal par jeet pahnaate hain arthaat kaal kabhi khaata nahin। kaal aatma ko to nahin kha sakta। aatma ek shareer chhod doosra leti hai, usko kehte hain kaal kha gaya। baaki kaal koi cheez nahin hai। manushya mahima gaate rehte, samajhte kuchh bhi nahin। gaate hain achtam keshvam...... arth kuchh nahin samajhte। bilkul hi manushya samajh se baahar ho gaye hain। baap samjhaate hain yeh 5 vikaar tumhaari buddhi ko kitna kharaab kar dete hain। kitne manushya badreenaath aadi par jaate hain। aaj do laakh gaye, 4 laakh gaye..... bade-bade officers bhi jaate hain teertha karne। tum to jaate nahin to woh kahenge yeh bi.ke. to naastik hain kyonki bhakti nahin karte। tum phir kehte ho jo bhagwan ko nahin jaante vo naastik hain। baap ko to koi nahin jaante isliye inko orphan ki duniya kaha jaata hai। kitna aapas mein ladte-jhagadte rehte hain। yeh saari duniya baba ka ghar hai na। baap saari duniya ke bachchon ko patit se paavan banaane aate hain। aadhaakalpa barobar paavan duniya thi na। gaate bhi hain raam raaja, raam praja, raam saahookaar hai..... vahaan phir adharma ki baat kaise ho sakti। kehte bhi hain vahaan sher-bakri ikatthe jal peete hain phir vahaan raavan aadi kahaan se aaye? samajhte nahin। baahar vaale to aisi baaten sunkar hansate hain।

tum bachche jaante ho - abhi gyaan ka saagar baap aakar humein gyaan dete hain। yeh patit duniya hai na। ab prerna se patiton ko paavan banaayenge kya? bulaate hain he patit-paavan aao, aakar hamko paavan banaao to zaroor bhaarat mein hi aaya tha। ab bhi kehte hain main gyaan ka saagar aaya hoon। tum bachche jaante ho shivbaaba mein hi saara gyaan hai, vahi baap baith bachchon ko yeh sab baaten samjhaate hain। shaastron mein sab hai dant kathaayen। naam rakh diya hai - vyaas bhagwan ne shaastra banaaye। ab woh vyaas tha bhakti maarga ka। yeh hai vyaas dev, unke bachche tum sukh dev ho। ab tum sukh ke devta bante ho। sukh ka varsa le rahe ho vyaas se, shivaachaarya se। vyaas ke bachche tum ho। parantu manushya moonjh na jaaen isliye kaha jaata hai shiv ke bachche। unka asul naam hai hi shiv। to ab baap kehte hain - kisi dehdhaari ko mat dekho। jabki shivbaaba sammukh baithe hain। aatma ko jaana jaata hai, paramatma ko bhi jaana jaata hai। woh parampita paramatma shiv। vahi aakar patit se paavan banne ka raasta bataate hain। kehte hain main tum aatmaon ka baap hoon। aatma ko realise kiya jaata hai, dekha nahin jaata hai। baap poochhte hain ab tumne apni aatma ko realise kiya? itni chhoti si aatma mein avinaashi part noondha hua hai। jaise ek record hai।

tum jaante ho ham aatma hi shareer dhaaran karti hain। pahle tum deh-abhimaani the, ab dehi-abhimaani ho। tum jaante ho ham aatma 84 janma leti hain। unka end (ant) nahin hota। koi-koi poochhte hain yeh drama kab se shuru hua? parantu yeh to anaadi hai, kabhi vinaash nahin hota। inko kaha jaata hai bana-banaaya avinaashi world drama। to baap baith bachchon ko samjhaate hain। jaise anpadh bachchon ko padhaai di jaati hai। aatma hi shareer mein rehti hai। yeh hai pattharbuddhi ke liye food (bhojan), buddhi ko samajh milti hai। tum bachchon ke liye baba ne chitra banvaaye hain। bahut sahaj hain। yeh hai trimoorti brahma-vishnu-shankar। ab brahma ko bhi trimoorti kyon kehte hain? dev-dev mahaadev। ek-do ke oopar rakhte hain, arth kuchh bhi nahin jaante। ab brahma devta kaise ho sakta। prajaapita brahma to yahaan hona chaahiye। yeh baaten koi shaastron mein nahin hain। baap kehte hain main is shareer mein pravesh kar in dvaara tumko samjhaata hoon। inko apna banaata hoon। inke bahut janmon ke ant mein aata hoon। yeh bhi 5 vikaaron ka sannyaas karte hain। sannyaas karne vaale ko yogi, rishi kaha jaata hai। abhi tum raajarishi bane ho। 5 vikaaron ka sannyaas tumne kiya hai to naam badalta hai। tum to raajayogi bante ho। tum pratigya karte ho। woh sannyaasi log to ghar-baar chhod chale jaate hain। yahaan to stri-purush ikatthe rehte hain, pratigya karte hain ham vikaar mein kabhi nahin jaayenge। mool baat hai hi vikaar ki।

tum bachche jaante ho shivbaaba rachayita hai। woh nai rachna rachte hain। woh beejroop, sat chit aananda ka saagar, gyaan ka saagar hai। sthaapna, vinaash, paalna kaise karte hain - yeh baap jaante hain, manushya nahin jaante। phat se kah dete tum bi.ke. to duniya ka vinaash karengi। achha, tumhaare mukh mein gulaab। kehte hain yeh to vinaash ke liye nimitta bani hain। na shaastron ko, na bhakti ko, na gurooon ko maanti hain, sirf apne daada ko maanti hain। lekin baap to khud kehte hain yeh patit shareer hai, mainne inmen pravesh kiya hai। patit duniya mein to koi paavan hota nahin। manushya to jo suni-sunaai baaten sunte hain woh bole dete hain। aisi suni-sunaai baaton se to bhaarat durgati ko paaya hai, tab baap aakar sach sunaae sabki sadgati karte hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap se sukh ka varsa lekar sukh ka devta banna hai। sabko sukh dena hai। raajarishi banne ke liye sarva vikaaron ka sannyaas karna hai।

2) padhaai hi sachchi khuraak hai। sadgati ke liye suni-sunaai baaton ko chhod shreemat par chalna hai। ek baap se hi sunna hai। mohjeet banna hai।

vardaan:- apne asli sanskaaron ko emerge kar sada harshit rahne vaale gyaan swaroop bhav

jo bachche gyaan ka simran kar uska swaroop bante hain woh sada harshit rehte hain। sada harshit rehna - yeh brahman jeevan ka asli sanskaar hai। divya gun apni cheez hai, avgun maaya ki cheez hai jo sangadosh se aa gaye hain। ab use peeth de do aur apne almighty authority ki position par raho to sada harshit rahenge। koi bhi aasuri va vyartha sanskaar saamne aane ki himmat bhi nahin rakh sakenge।

slogan:- sampoornata ka lakshya saamne rakho to sankalp mein bhi koi aakarshan aakarshit nahin kar sakti।

ye avyakt ishaare - ekta aur vishvaas ki visheshta dvaara saphalta sampanna bano

ekta ke liye ek roohaani taaveez sada apne paas rakhna ki regard dena hi regard lena hai। yeh regard ka record saphalta ka avinaashi record ho jaayega। mukh par ek hi saphalta ka mantra ho - “pahle aap'' - yeh mahaamantra man se pakka rahe। yathaartha roop se pahle main ko mitaakar doosre ko aage badhaana so apna badhna samajhte hue is mahaamantra ko aage badhaate saphalta ko paate raho, yeh mantra aur taaveez sada saath rahe to pratyakshata ka nagaada baj jaayega।