शनिवार 25 अप्रैल 2026 की दैनिक मुरली

25-04-2026 praatahmurli om shanti "baapdaada"' madhuban

“meethe bachche - baap doordesh se aaye hain tum bachchon ke liye naya raajya sthaapan karne, tum abhi svarga ke laayak ban rahe ho''

prashn:- jin bachchon ka shivbaaba mein atoot nishchay hai unki nishaani kya hogi?

uttar:- woh okh banda karke baba ki shreemat par chalte rahenge, jo aagya mile। kabhi khyaal bhi nahin aayega ki ismen kuchh nuksaan na ho jaae kyonki aise nishchaybuddhi bachchon ka responsible baap hai। unhein nishchay ka bal mil jaata hai। avastha adol aur achal ho jaati hai।

geet:- tumheen ho maata, tumheen pita ho…

om shanti। yeh mahima kiski suni? jisko sivaae tum bachchon ke duniya mein aur koi jaante nahin hain। yeh hai oonch te oonch baap ki mahima। baaki jiski bhi mahima karte hain woh phaaltu ho jaati hai। oonch te oonch ek hi baap hai। lekin baap ki pahchaan kaun deve। khud aakar aatma ki aur apni pahchaan dete hain। koi bhi manushya ko aatma ki bhi pahchaan hai nahin। bhal kehte hain mahaan aatma, jeev aatma। shareer jab chhoot jaata hai to kehte - aatma nikal jaati hai। shareer murda ho jaata hai। aatma avinaashi hai। woh kabhi khatma nahin hoti। aatma jo star misal hai, woh ati sookshm hai। in aankhon se dekhne mein nahin aati hai। kartavya sab aatma karti hai। parantu ghadi-ghadi deh-abhimaan mein aa jaate hain to kehte hain main phalaana hoon, main yeh karta hoon। vaastav mein karti sab aatma hai। shareer to organs hain। yeh saadhu aadi bhi jaante hain ki aatma bahut sookshm hai, jo bhrakuti ke beech mein rehti hai। parantu unko yeh gyaan nahin hai ki aatma mein yeh part bajaane ke sanskaar hain। koi kehte - aatma mein sanskaar hote nahin, aatma nirlep hai। koi kehte - sanskaaron anusaar janma milta hai। matbhed bahut hai। yeh bhi kisko pata nahin ki kaun si aatmaayen 84 janma leti hain। tum jaante ho ki sooryavanshiyon ko hi 84 ka chakra lagaana padta hai। aatma hi 84 ka chakra lagaae patit banti hai। unko ab paavan kaun banaaye? patit-paavan oonch te oonch ek hi baap hai, unki mahima sabse oonch hai। 84 janma sab to nahin lete। peechhe aane vaale to 84 janma le na saken। sab ikatthe to nahin aate hain। jo pahle-pahle satayug mein aayenge, sooryavanshi raaje aur praja, unhon ke 84 janma hote hain। peechhe to manushyon ki bahut vriddhi hoti hai na। phir koi ke 83 koi ke 80 janma hote hain। vahaan satayug mein to poori 150 varsha aayu hoti hai। koi jaldi mar na sake। yeh baaten baap hi baith samjhaate hain। ab koi parampita paramatma ko nahin jaante hain। baap kehte hain ki jaise tumhaari aatma hai, vaise meri bhi aatma hai। tum sirf janma maran mein aate ho, main nahin aata hoon। mujhe bulaate bhi tab hain jab patit bante hain। jab bahut duhkhi ho jaate hain tab bulaate hain। is samay tum bachchon ko shivbaaba padha rahe hain।

koi poochhte ki yeh kaise maanen ki paramatma aate hain! to unhon ko samjhaana hai ki sab pukaarte hain - he patit-paavan aao। ab woh hai niraakaar। unko apna shareer nahin hai, aana bhi hai patit duniya mein। paavan duniya mein to nahin aayenge। aise samjhaana chaahiye। yeh bhi samjhaana hai ki paramatma itna chhota hai jaise aatma chhoti hai, parantu woh hai manushya srishti ka beejroop, knowledgeful। baap kehte hain ki tum mujhe parampita paramatma kehte ho। pukaarte ho to zaroor aayenge na। gaayan bhi hai ki doordesh ka rahne vaala aaya desh paraaye। abhi baap dvaara maaloom pada hai ki abhi ham paraaye desh arthaat raavan ke desh mein hain। satayug treta mein ham eeshvareey desh arthaat apne desh mein the phir dvaapar se lekar ham paraaye desh, paraaye raajya mein aa jaate hain। vaam maarga mein aa jaate hain। phir bhakti shuru ho jaati hai। pahle-pahle shivbaaba ki bhakti karne lag jaate hain, ve log shiv ka itna bada ling banaate hain, parantu itna bada to woh hai nahin। abhi tumne samjha hai ki aatma aur paramatma mein kya farka hai। woh knowledgeful sada paavan, sukh ka saagar, aanand ka saagar hai। yeh param aatma ki mahima hai na। ab bulaate hain ki he patit-paavan aao। woh hai parampita jo kalpa-kalpa aate hain। doordesh ke rahne vaale musaaphir ko bulaate hain, unki mahima gaate hain। brahma, sarasvati ko to bulaate nahin hain। pukaarte hain niraakaar paramatma ko। aatma bulaati hai ki doordesh ke rahne vaale ab aao desh paraaye kyonki sab patit ban chuke hain। main bhi aaoonga tab, jab raavan raajya khatma hona hoga। main aata bhi hoon - sangam yuge। yeh kisko bhi pata nahin hai। kehte bhi hain ki woh param aatma, bindi hai। aajkal phir kehte hain aatma so paramatma, paramatma so aatma। aatma so paramatma ho na sake। aatma paramatma donon alag-alag hain। roop donon ka ek jaisa hai। parantu aatma patit banti hai, 84 janmon ka part bajaana padta hai। paramatma janma maran rahit hai। agar aatma so paramatma kehte to kya satopradhaan paramatma, tamopradhaan mein aate hain। nahin, yeh to ho na sake। baap kehte hain ki main aata hoon, sarva aatmaon ki service karne। mera janma bhi nahin kaha jaata। main aata hi hoon narkavaasiyon ko svargavaasi banaane। paraaye desh mein aaye hain, apna svarga sthaapan karne। baap hi aakar hamko svarga ka laayak banaate hain। yeh bhi samjhaaya hai ki aur aatmaon ka part apna-apna hai। paramatma janma-maran rahit hai। aate bhi zaroor hain tab to shivraatri manaate hain। lekin woh kab aaye, yeh koi nahin jaante। aise hi shivjayanti manaate aaye hain। zaroor sangam par aaye honge, svarga sthaapan karne। patiton ko paavan banaane zaroor sangam par aayenge na। paavan srishti hai svarga। kehte hain patit-paavan aao। phir zaroor patit duniya ke vinaash ka samay hoga, tab hi paavan duniya sthaapan karenge। yuge-yuge to nahin aate। baap kehte hain - mujhe sangam par hi aakar patit duniya ko paavan banaana hai। yeh paraaya desh hai, raavan ka desh। parantu yeh koi manushya thode hi jaante ki raavan ka raajya chal raha hai। kab se yeh raavan raajya shuru hua, kuchh bhi pata nahin। pahli-pahli mukhya baat aatma aur paramatma ka raaz samjhaana hai, phir samjhaana hai ki woh kalpa ke sangamayug par aate hain paavan banaane। yeh kaam unka hi hai, na ki shreekrishna ka। shreekrishna to khud hi 84 janma le neeche utarte hain। sooryavanshi sab neeche utarte hain। jhaad aadha taaja, aadha puraana thode hi hoga। jadajdeebhoot avastha sabki hoti hai। kalpa ki aayu ka bhi manushyon ko pata nahin hai। shaastron mein lambi chaudi aayu de di hai। yeh baap hi baith samjhaate hain। ismen aur prashn uth na sake। rachta baap sach hi bolte hain। ham itne bi. ke. hain, sab maante hain। to zaroor hai tab to maante hain। aage chal jab nishchay hoga to samajh mein bhi aa jaayega। pahle-pahle manushyon ko yeh samjhaana hai ki parampita paramatma niraakaar doordesh se aaye hain। parantu kis shareer mein aaye? sookshm vatan mein aakar kya karenge? zaroor yahaan aana pade। prajaapita brahma bhi yahaan chaahiye। brahma kaun hai, yeh bhi baap baith samjhaate hain। jismen pravesh kiya hai woh apne janmon ko nahin jaante the to bachche bhi nahin jaante the। bachche bhi tab bante jab main adopt karta hoon। main in (saakaar) sahit bachchon ko samjhaata hoon ki kya tum apne janmon ko bhool gaye ho। abhi srishti ka chakra poora hota hai phir repeat hoga। main aaya hoon paavan banaane ke liye, raajayog sikhaane। paavan banne ka aur koi raasta nahin hai। agar yeh raaz manushya jaante to ganga aadi par snaan karne, mele aadi par jaate nahin। in paani ki nadiyon mein to sadaiv snaan karte rehte hain। dvaapar se lekar karte aaye hain। samajhte hain ki ganga mein dubki maarne se paap naash honge। parantu koi ke bhi paap naash nahin hote hain। pahle-pahle to aatma aur paramatma ka hi raaz bataao। aatmaayen hi paramatma baap ko pukaarti hain, woh niraakaar hai, aatma bhi niraakaar hai। in organs dvaara aatma pukaarti hai। bhakti ke baad bhagwan ko aana hai, yeh bhi drama mein part hai।

baap kehte hain - mujhe nai duniya sthaapan karne aana padta hai। shaastron mein bhi hai ki bhagwan ko sankalp utha to zaroor drama plan anusaar sankalp utha hoga। aage in baaton ko thode hi samajhte the। din-pratidin samajhte jaate hain। baap kehte hain - main tumko nai-nai guhya te guhya baaten sunaata hoon। sunte-sunte samajhte jaate hain। aage aise nahin kehte the ki shivbaaba padhaate hain। ab to achhi reeti samajh gaye hain, aur bhi samajhne ka bahut pada hai। roz samjhaate rehte hain ki kaise kisko samjhaana chaahiye। pahle yeh nishchay karen ki behad ka baap samjhaate hain to woh zaroor satya bataayenge। ismen moonjhane ki bhi baat nahin। bachche koi pakke hain, koi kachche hain। kachcha hai to koi ko samjha nahin sakte hain। yeh to school mein bhi nambarvaar hote hain। bahuton ko yeh sanshay padta hai ki ham kaise samjhen ki parampita paramatma aakar padhaate hain kyonki unhon ki buddhi mein hai shreekrishna ne gyaan sunaaya। ab patit duniya mein to shreekrishna aa nahin sakta। yeh unko siddha karo ki paramatma ko hi aana padta hai, patit duniya aur patit shareer mein। baap yeh bhi samajhte hain ki har ek ki apni-apni buddhi hai। koi to jhat samajh jaate hain। jitna ho sake samjhaana hai। brahman sab ek jaise nahin hote hain। parantu deh-abhimaan bachchon mein bahut hai। yeh baba bhi jaante hain ki nambarvaar hain। direction par bachchon ko chalna pade। bada baba jo kahe, woh maanna chaahiye। gurooon aadi ki to maante aaye ho। ab baap jo svarga mein le jaane vaala hai, unki baat to aankh band kar maanni chaahiye। parantu aise nishchaybuddhi hain nahin। bhal usmein nuksaan ho va phaayda ho, maan lena chaahiye। bhal samjho nuksaan bhi ho jaae। phir bhi baba kehte hain na - hamesha aise samjho ki shivbaaba hi kehte hain, brahma ke liye mat samjho। responsible shivbaaba hoga। unka yeh rath hai, woh theek kar denge। kahenge ki main baitha hoon। hamesha samjho ki shivbaaba hi kehte hain, yeh kuchh nahin jaante। aise hi samjho। ek taraph to nishchay rakhna chaahiye, shivbaaba kehte mera maante raho to tumhaara kalyaan hota rahega। yeh brahma bhi agar kuchh kehte hain, to unka bhi responsible main hoon। tum bachche phikar nahin karo। shivbaaba ko yaad karne se avastha aur hi pakki ho jaayegi। nishchay mein vikarma bhi vinaash honge, bal bhi milega। jitna baba ko yaad karenge utna bal jaasti milega। jo shreemat par chal service karte hain vahi oonch pad paayenge। bahuton mein deh-abhimaan bahut rehta hai। baba dekho sab bachchon se kaise pyaar se chalta hai। sabse baat karte rehte hain। bachchon se poochhte hain ki theek baithe ho! koi takleeph to nahin hai! lav hota hai bachchon ke liye। behad ke baap ko bachchon ke liye bahut-bahut lav hai। jo jitni shreemat par service karte hain us anusaar lav rehta hai। service mein hi phaayda hai। service mein hadidyaan deni hain। koi bhi kaam karte rahenge to woh phir dil par bhi rehte hain ki yeh bachcha first class hai। parantu chalte-chalte kisi par grahchaari bhi baithti hai। maaya ka saamna hota hai na। grahchaari ke kaaran phir gyaan utha nahin sakte। kai to phir karmana seva athak hokar karte hain।

tumhaara kaam hai sabko sukhdhaam ka maalik banaana। kisko duhkh nahin dena। gyaan nahin hai to phir bahut duhkh dete hain। phir kitna bhi samjhaao to samajhte nahin। pahle-pahle samjhaani deni hai aatma aur paramatma ki। kaise aatma mein 84 janmon ka part bhara hua hai, jo avinaashi part hai। kabhi badalne ka nahin hai, drama mein noondha hua hai। yeh nishchay vaala kabhi hilega nahin। bahut hil jaate hain। pichhaadi mein jab bhambhor ko aag lagegi tab achal ban jaayenge। abhi to bahut yukti se samjhaana hai। achhe-achhe bachche to service par rehte hain। dil par chadhe rehte hain। bahut teekhe jaate rehte hain। bahut mehnat karte hain। unko service ka bahut shauk rehta hai। jinmen jo gun hain woh baba varnan karte hain। achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) service mein haddiyaan deni hain, kisi bhi baat mein sanshay nahin uthaana hai। sabko service se sukh dena hai, duhkh nahin।

2) nishchay ke bal se apni avastha ko adol banaana hai। jo shreemat milti hai, usmein kalyaan samaaya hua hai, kyonki responsible baap hai isliye phikar nahin karna hai।

vardaan:- yogayukta sthiti dvaara sookshm va kade bandhanon ko cross karne vaale bandhanmukta bhav

yogayukta ki nishaani hai - bandhanmukta। yogayukta banne mein sabse bada antim bandhan hai - svayan ko samajhdaar samajhkar shreemat ko apne buddhi ki kamaal samajhna arthaat shreemat mein apni buddhi mix karna, jise buddhi ka abhimaan kaha jaata hai। 2-jab kabhi koi kamjori ka ishaara deta hai athva buraai karta hai - yadi us samay jara bhi vyartha sankalp chala to bhi bandhan hai। jab in bandhanon ko cross kar haar-jeet, ninda-stuti mein samaan sthiti banaao tab kahenge sampoorn bandhanmukta।

slogan:- pahle sochna phir karna - yahi gyaani tu aatma ka gun hai।

ye avyakt ishaare - mahaan banne ke liye madhurta aur namrata ka gun dhaaran karo

jaise anjaan bachcha nuksaan vaali cheez ko khilauna samajhta hai to use kuchh dekar chhudaana padta hai, aise jo alpakaal ka maan shaan va alpakaal ki ichchha rakhte hain, unhein maan dekar svayan nirmaan ban jaao। us samay yadi unhein shiksha denge to takraav paida hoga isliye aise samay par yuktiyukta chalan se, paropkaari ban kshama bhaav se sammaan dekar pahle unhein samajhdaar banaao, jisse woh svayan mahsoos kare ki yeh baat nuksaankaarak hai।