शनिवार 23 मई 2026 की दैनिक मुरली

23-05-2026 praatahmurli om shanti "baapdaada"' madhuban

“meethe bachche - raavan ne tumhein bahut peedit kiya hai, abhi tum bhakton ka rakshak bhagwan aaya hai tumhaari peeda ko door karne''

prashn:- sapoot bachchon ki mukhya do nishaaniyaan sunaao?

uttar:- sapoot bachche sada maat-pita ko follow kar takhtansheen banenge। khoob purushaartha mein lage rahenge। 2- unki baap se dil bahut sachchi hogi। sachchi dil vaale sada shreemat par chalenge। agar andar mein sachchaai nahin to yaad mein rah nahin sakte।

geet:- bholenaath se niraala…

om shanti। meethe-meethe bachchon ne yeh bhakti maarga ka geet suna। bhakta is geet ke arth ko nahin jaante। tum bhagwan ke bachche bane ho। bhagwan rakshak hai, bhakton ka। tum bhi rakshak ho bhakton ke। bhakton ki raksha karte ho। kaunsi aaphat hai jo bhagat raksha karne ke liye bhagwan ko bulaate hain? bhakton ko raavan ka bahut duhkh hai। raavan sampradaay peedit hai - duhkhon se। to bholaanaath ko yaad karte hain। woh hai raavan sampadraay, yeh hai raam sampradaay। bhakton ko yeh pata hi nahin hai ki hamaara rakshak kaun hai? bhal gaate hain, bholaanaath rakshak hai। parantu kya raksha karte hain, yeh nahin jaante। tum bachche ab samajhte ho ki bholaanaath shivbaaba hi bigdi ko banaane vaala hai। duniya ko to pata nahin hai ki bhagwan kisko kaha jaata hai। bhagwan ka pata ho to phir bhagwan ki rachna ke aadi-madhya-ant ka bhi pata ho। na bhagwan ko jaante, na rachna ka pata hai isliye aise manushya sampradaay ko blind bhi kaha jaata hai। doosre taraph tum ho, jinko divya drishti mili hai। ab tumhaara naam hi hai brahmaakumaar-kumaariyaan। board par bhi naam laga hua hai - brahmaakumaari eeshvareey vishwa vidyaalay। sirf brahmaakumaariyaan ho nahin sakti। prajaapita brahma hai na। pita ke paas bachche aur bachchiyaan donon hote hain। prajaapita brahma ko hi itne dher bachche ho sakte hain। to samajhna chaahiye yeh behad ka pita hai। yeh bhi jaante hain brahma-vishnu-shankar ko rachne vaala baap hi hai, jisko niraakaar kaha jaata hai। yeh ho gaya behad ka baap। yeh bhi jaante ho parampita paramatma brahma dvaara rachna rachte hain। inki saari rachna hai - sab manushya maatra vaastav mein shivvanshi hain। abhi tum aakar prajaapita brahma ki santaan bane ho। yeh hai nai rachna। parampita paramatma brahma dvaara rachna rachte hain to tumko brahmaakumaar-kumaariyaan kaha jaata hai। itne behad ke bachche hain zaroor behad ka varsa lete honge। bachche jaante hain, ham brahmaakumaar-kumaariyon ko shivbaaba ne adopt kiya hai। shivbaaba kehte hain - tum hamaare bachche ho। tum aatmaayen bhi niraakaar thi। parantu gyaan to saakaar mein chaahiye। tum jaante ho ham aadi sanaatan devi devta dharma ke the, brahma dvaara rachna yahaan hoti hai। shiv jayanti bhi yahaan manaai jaati hai। yahaan magadh desh mein hi janma liya hai। baap kehte hain yeh desh bahut pavitra svarga tha। abhi inko narka, magadh desh kaha jaata hai। phir svarga banna hai। tum bachchon ki buddhi mein hai shivbaaba hamko phir se raajayog sikhaae pavitra banaate hain। gaate bhi hain patit-paavan bhakton ke rakshak bhagwan। bhakta hi pukaarte hain। patit hote hue bhi apne ko patit nahin samajhte hain। baap samjhaate hain - tum sabhi patit ho। paavan duniya satayug ko, patit duniya kaliyug ko kaha jaata hai। baap tumhein sab right bataate hain। laakhon varsha ki to koi cheez hoti nahin। manushya ghor andhiyaare mein hain, samajhte hain - kaliyug to abhi chhota bachcha hai। aur tum jaante ho maut saamne khada hai। andhiyaare aur roshni ka varnan sangam par hi kiya jaata hai। ab tum ghor prakaash mein aaye ho। satayug mein tum yeh varnan nahin kar sakenge। vahaan yeh knowledge hi nahin rehti। is samay baap baith bachchon ko samjhaate hain, tum satayug mein sooryavanshi gharaane ke the phir ant mein aakar shoodravanshi gharaane ke bane ho। ab phir brahman vanshi bane ho। abhi tum ho sarvottam brahman kul ke, tum ho oonch te oonch। yeh eeshvareey kul hai na। baap ke paas aate hain to baba poochhte hain - kiske paas aaye ho? to kehte hain baap ke paas। baap do hain - ek hai laukik, doosra paarlaukik। sabhi saaligraamon ka baap ek hi shiv hai। tumhaari buddhi mein yeh tapakta hai। ham ek baap ke bachche hain, jisse varsa lete hain। niraakaar varsa to saakaar dvaara hi denge na। baap khud kehte hain - main saadhaaran tan mein aakar pravesh karta hoon। ab baap bachchon ko kehte hain bachche, dehi-abhimaani bhav। apne ko aatma samjho। yeh deh vinaashi hai, aatma avinaashi hai। aatma ko hi 84 janma lene padte hain, na ki deh ko। deh to badalti rehti hai, phir doosre mitra-sambandhi milte hain।

abhi aatma ko behad ke baap se varsa lena hai - parampita paramatma dvaara। tum hi sunkar phir dhaaran karte ho। sanskaar tumhaari aatma mein hain। aatma mein hi sanskaar rehte hain। aise nahin ki shareer ke sanskaar kahenge। nahin, tumhaari aatma ke sanskaar tamopradhaan hain। unko ab change karna hai। kaaya kalpatru kaha jaata hai। kaaya kalpa vriksha samaan banti hai। aayu bhi badi rehti hai। tum jaante ho - yahaan to aayu bahut chhoti rehti hai। chhoti aayu mein hi baithe-baithe akaale mrityu ho jaati hai। abhi tum kaal par vijay paate ho। vahaan kaal kabhi khaata nahin। akaale kab shareer nahin chhootta। tum jaante ho - ab yeh shareer boodha hua hai, inko chhodkar naya lena hai। shareer chhodne samay bhi baaje bajte hain, janma lene samay bhi bajte hain। vahaan rone ki baat hi nahin hoti। tumko bhramri ka misaal bhi samjhaaya hai। tum ho brahman-braahmaniyaan। braahmani aur bhramri raashi milti hai। jo kaam bhramri karti hai, vahi tum bhi karte ho। wonder hai na। bhramri ka drishtaanta, kachhuon ka, sarpa ka yeh sab shaastron mein hain। sannyaasi aadi bhi yeh misaal dete hain। abhi tum bachche baap dvaara yeh sab samajh rahe ho। woh to hua bhakti maarga। past ka gaayan karna, iska phir baad mein gaayan hoga। is samay hi baap is tan mein aate hain, inko (brahma ko) bhagwan nahin kaha jaata hai। woh to phir andhashraddha ho jaati hai। aise bhi manushya hain jo raam ko, krishna ko bhagwan samajhte hain। krishna ke liye, raam ke liye bhi kah dete woh to sarvavyaapi hai। koi krishnapanthi, koi raadhe panthi hote hain। raadhe panthi vaale kahenge, sarvatra raadhe hi raadhe hain। krishna panthi kahenge, jidhar dekho krishna hi krishna hai। raam panthi raam hi raam kahenge। samajhte hain raam, krishna se bada hai kyonki raam ko treta mein aur krishna ko dvaapar mein le gaye hain। kitna agyaan hai। ab baap tum bachchon ko samjha rahe hain, kitne dher brahmaakumaar-kumaariyaan hain, zaroor behad ka baap hoga। tum koi se bhi poochh sakte ho, kabhi naam suna hai prajaapita brahma ka? baap ne svarga ki nai rachna rachi hai। gaaya bhi jaata hai brahma dvaara brahman। jab tak tum sab brahman brahma ki mukh vanshaavli nahin bane ho tab tak daade se varsa le nahin sakte। behad ke bachche behad ka varsa baap se hi lete hain। liya tha barobar। barobar svargavaasi the। abhi narkavaasi ban gaye hain, ab phir prajaapita brahma dvaara parampita paramatma vishnupuri svarga rach rahe hain। kitna sahaj hai। shivbaaba poochhte hain - aage tumko yeh gyaan tha? inki aatma hi kehti hai - mere mein yeh gyaan nahin tha। main bhi vishnu ka pujaari tha, jo ham poojya the so ab pujaari aakar banen। ab phir baba aakar pujaari se poojya devta bana rahe hain। tum bachchon ko andar mein khushi rahni chaahiye। parampita paramatma ne aakar hamko adopt kiya hai। manushya, manushya ko adopt karte hain na। bahut manushya hote hain, jinko apne bachche nahin hote hain to adopt karte hain। ab baap jaante hain - mere bachche sab raavan ke ban gaye hain, isliye mujhe aakar phir se adopt karna pade। brahma dvaara apne bachchon ko adopt karte hain। yeh adoption kitni wonderful hai। tum hi jaante ho shivbaaba ne hamko brahma dvaara adopt kiya hai। shiv-baba kehte hain - mainne tum bachchon ko adopt kiya hai, tumko behad sukh ka varsa dene। yeh brahma to de nahin sakte। yeh bhi manushya hai na prajaapita brahma। manushya yeh gyaan nahin dete hain। gyaan ka saagar niraakaar parampita paramatma hi baith yeh gyaan dete hain। brahma ko athva vishnu ko gyaan saagar nahin kaha jaata। in teenon ki mahima alag hai। gyaan saagar, patit-paavan ek baap hai। saari duniya ke manushya maatra unko bulaate hain। angreji mein bhi kehte hain - woh liberator hai। jisse duhkh milta hai, usse liberate kiya jaata hai। baap bhi yahaan aakar raavan se liberate karte hain। raavanraajya bhi yahaan hua hai। yahaan hi raavan ko jalaate hain। jalaakar phir kehte hain, sone ki lanka lootne jaate hain। unko to kuchh pata nahin hai। raavan kya cheez hai, kab ka yeh dushman hai। samajhte hain raam ki seeta churaai gai। yeh nahin samajhte ki ham sab seetaayen hain। ham raavan ki jel mein phansi hui hain। yeh gyaan kismen bhi nahin hai, kathaayen baith sunaate hain।

shivbaaba kehte hain - main doordesh ka rahne vaala aaya hoon is desh paraaye। yeh patit duniya puraani hai na, yeh hai raavan ki duniya। bulaate bhi hain he baba aao ham patit ban gaye hain। baap kehte hain hamko paavan banaane is patit duniya mein aana padta hai। aur mujhe aana bhi us tan mein hai jo pahle number mein paavan tha, jo sundar tha vahi ab shyaam bana hai। kitni wonderful baaten hain। shreekrishna ko shyaam-sundar kyon kehte hain, yeh kisko pata nahin hai। kya ek shreekrishna ko hi sarpa ne dasa? satayug mein thode hi sarpa aadi hote hain। baap kehte hain - yeh antim janma mere kaaran pavitra bano to pavitra duniya ke maalik banenge। sirf mujhe yaad karo aur pavitra bano। alpha ko yaad karo - to be baadshaahi tumhaari hai। yeh hai sahaj raajayog, sahaj raajaai। bachcha paida hua aur varse ka hakdaar bana। yahaan bhi bachche jaante hain ki ham baap ke bane hain to svarga ki raajaai ke ham hakdaar hain। ab baap kehte hain - satopradhaan se tum tamopradhaan ban gaye ho। phir satopradhaan banna hai। yog aur gyaan sikhaane mein ek second lagta hai। bachcha paida hua aur vaaris nishchay kiya। tum baap ke bane ho to raajdhaani ka varsa tumhaara hai। parantu raaja-raani sab to nahin banenge। yeh hai raajayog। raaja-raani, praja, saahu-kaar, gareeb sab chaahiye isliye roodra maala bhi bani hui hai, jo bhakti maarga mein japte hain। tum jaante ho ham raajayog seekhne aaye hain। maat-pita ko follow kar pahle-pahle sooryavanshi, chandravanshi banenge। sapoot bachche woh jo maat-pita ko follow kar takhtansheen banen। purushaartha khoob karna chaahiye। baap kehte hain - mujhe yaad karo to karte nahin, shreemat par chalte nahin hain। andar sachchaai nahin hai। dil sachchi ho to shreemat par chalte, baap ko yaad karte rahen। shreemat par hi tumko daade se varsa milta hai। brahma svarga ka varsa de nahin sakte। daade ki kamaai par potre ka hak rehta hai। baap ki kamaai ke bachche bhaageedaar bante hain to hakdaar hain। yahaan tumko shivbaaba se varsa milta hai। gyaan ratna baap se hi milte hain।

tum jaante ho - ham brahman hi so phir devi-devta banenge। jagat amba kaun hai? baap samjhaate hain - yeh braahmani thi, gyaan-gyaaneshvari thi phir raaj-raajeshvari banti hai। tum bhi aise bante ho। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachcho ko namaste।

dhaarna ke liye mukhya saar:-

1) aatma mein jo tamopradhaanta ke sanskaar hain, unhein yaad ke bal se change karna hai। satopradhaan banna hai।

2) baap se raajaai ka varsa lene ke liye sada sapoot bachcha ban shreemat par chalna hai। sachche baap se sachcha rehna hai। maat-pita ko poora follow karna hai। gyaan ratnon ka daan karte rehna hai।

vardaan:- apne parivartan dvaara nirantar vijay ki anubhooti karne vaale sachche sevaadhaari bhav

jaise nirantar yogi bane ho aise nirantar vijayi bano to sachche sevaadhaari ban jaayenge kyonki vijayi aatma, jab har sankalp, har kadam mein vijay ka anubhav karti hai to unka yeh parivartan dekh anek aatmaon ki seva svatah hoti hai। unke nain roohaaniyat ka anubhav karaate hain, chalan baap ke charitron ka saakshaatkaar karaati hai, mastak se mastakamni ka saakshaatkaar hota hai। aise apni avyakt soorat se seva karne vaali vishesh aatma ko hi sachcha sevaadhaari kaha jaata hai।

slogan:- visheshtaayen va gun daata ki den hain, daata ko dekho vyakti ko nahin।

ye avyakt ishaare - sada achal, adol, ekras sthiti ka anubhav karo

aatmik sthiti ke abhyaas se vaayumandal ko roohaani banaao to aur sab baaten svatah theek ho jaayengi, sab ekmat aur ekras ho jaayenge phir maaya bhi nahin aayegi kyonki vaayumandal shaktishaali hoga। vaayumandal ko shaktishaali banaane ke liye yaad ke programme rakho aur aapas mein unnati ke liye ruh-ruhaan ki classes karo, sneh milan karo। dhaarna ki classes rakho to saphalta mil jaayegi।