शनिवार 20 जून 2026 की दैनिक मुरली

20-06-2026 praatahmurli om shanti "baapdaada"' madhuban

“meethe bachche - tumhaare paas avinaashi gyaan ratnon ka athaah khajaana hai, tum uska daan karo, tumhaare dar se koi bhi vaapis nahin jaana chaahiye''

prashn:- sarva sambandhon ki saccharin baap apne bachchon ko kaun si shreemat dete hain?

uttar:- meethe bachche - apna buddhiyog sab taraph se hataae ek mujhe yaad karte raho। duniya ki koi bhi vastu, mitra sambandhi aadi yaad na aayen kyonki is samay sab duhkh dene vaale hain। vishwa ka maalik banna hai to zaroor 63 janmon ka hisaab-kitaab chuktu karne ki mehnat karni pade। sab kuchh bhool ashareeri bano tab hisaab-kitaab chuktu ho। main sarva sambandhon ki saccharin hoon।

om shanti। baapdaada bachchon se poochhte hain ki kiski yaad mein baithe ho? (shivbaaba ki) bulanda aavaaj mein kehna chaahiye - shivbaaba ki yaad mein baithe hain। tum bachche arthaat aatmaon ka connection hai shivbaaba se। tum shivbaaba ke bante ho in dvaara, kyonki shivbaaba inke dvaara hi milte hain। yeh beech mein dalaal bhi kaha jaata hai। tumhaara dalaal se koi connection nahin hai। yeh to sirf beech mein maarphat hai। len-den ka sabka hisaab-kitaab baap se hona hai, inse nahin। inka bhi len-den baap se hai। yeh bhi us baap ko kehte hain - baba mera sab kuchh aapka hai। tumhein bhi ek to nishchay yeh hai ki ham aatma hain aur doosra yeh bhi nishchay hai ki ham aatmaayen abhi parampita paramatma se varsa le rahe hain। mansa-vaacha-karmana, tan-man-dhan se ham shivbaaba ke madadgaar bante hain। yeh sab kuchh shivbaaba ko arpan kiya hua hai। phir shivbaaba direction dete hain - aise-aise yeh karo। inko kaha jaata hai shreemat।

baap khud kehte hain main is puraane tan mein pravesh karta hoon। yeh bhi patit se paavan ban rahe hain। yeh kisne kaha? shivbaaba ne। yeh bhi paavan ban rahe hain। inka bhi mere saath hisaab-kitaab hai। inke saath koi ka hisaab-kitaab nahin। tum chitthi likhte ho - shivbaaba care of brahma। parantu maaya aisi hai jo nirantar yaad karne nahin deti hai। buddhiyog ghadi-ghadi tod deti hai। agar yahi pakka purushaartha karenge to phir doosra sab kuchh bhool jaayega। shareer bhi bhool jaayega। yeh shareer hoga parantu aatma ko in sab cheezon se naphrat hogi। yeh avastha jamaane ki practice karni hoti hai। ant mein hamko apna shareer bhi yaad na pade। baap kehte hain - apne ko ashareeri samajh mujh baap ko yaad karo। main sadaiv ashareeri hoon, tum bhi ashareeri the। phir tumne part bajaaya। abhi phir tumko part bajaana hai, yeh mehnat hai। vishwa ka maalik banna koi kam baat hai kya। manushya hi vishwa ka maalik ban sakta hai। yeh devtaayen bhi manushya hain parantu inko daiveegun vaale devta kaha jaata hai। lakshmi-naaraayan vishwa ke maalik the, inhon ko apne bachche honge। vahi unko maa-baap maanenge। parantu aajkal manushya andhashraddha se in lakshmi-naaraayan ko tvamev maata cha pita… kehte hain। vaastav mein yeh mahima hai shivbaaba ki। devtaaon ki mahima gaate hain aap sarvagun sampanna...parantu unhon ki pooja kyon karte hain, yeh kisko pata nahin hai। abhi tum aisi mahima nahin gaayenge ki tum maat-pita... haan tum jaante ho shivbaaba woh niraakaar parampita paramatma hai। unse hi sukh ghanere milte hain। baaki jo bhi sambandhi aadi hain unse duhkh hi milta hai। yeh to ek saccharin hai, jisse sarva sambandh ki rasna milti hai isliye baap kehte hain maama, kaaka, chaacha aadi sabse buddhiyog hataae maamekam yaad karo। tum gaate bhi ho duhkh harta sukh karta... sarva ka sadgati daata ek hi hai, vahi hamaara sab kuchh hai। laukik baap se bhi duhkh milta hai। baaki teacher hai jo kisko duhkh nahin dete। teacher paas jaakar padhne se tum shareer nirvaah karte ho। hunar sikhaane vaale bhi hote hain। woh sab alpakaal ke liye teeching karte hain। bhakti mein bhi mahima ek raam athva parampita paramatma ki hi karte hain, unko hi yaad karte hain। vaastav mein bhakti bhi ek ki hi karni hai। woh ek hi tumko poojya banaate hain। tum pahle-pahle ek shivbaaba ki pooja karte ho। unko satopradhaan bhakti kaha jaata hai। phir aatma bhi satopradhaan se sato rajo tamo banti hai। tum samajhte ho ham pujaari bante hain। tum pahle ek shiv ki hi pooja karte ho phir kalaayen kamti hoti jaati hain। bhakti bhi satopradhaan se, sato rajo tamo ban jaati hai। saara drama tumhaare oopar hi bana hua hai। aapehi poojya aapehi pujaari, jo 84 janma poore lete hain, unki hi kahaani hai। unko hi baap baith bataate hain - tumne 84 janma kaise liye hain। hisaab hi unka hai। jo pahle-pahle poojya devi-devta bante hain, vahi pujaari bante hain।

baap kehte hain - main kalpa-kalpa aakar tumko padhaata hoon aur devi-devta dharma ki sthaapna karta hoon, raajayog sikhaata hoon। bhagwan to ek hi hota hai। woh to kehte thikkar bhittar, kan-kan mein paramatma hai। parantu aise to ho nahin sakta। bhagwan ki to mahima aparmaapaar hai। kehte hain - he baba tumhaari gati mat nyaari arthaat tumhaari jo shreemat milti hai, woh sabse nyaari hai। baap ko kehte hi hain gati-sadgati daata parampita paramatma, to buddhi oopar mein jaati hai। duhkh ke time unki hi yaad aati hai। agar raam-seeta buddhi mein ho phir to saara raamaayan buddhi mein aa jaae। tum to pukaarte hi ho, us ek baap ko। sivaae ek baap ke koi bhi saakaari manushya va aakaari devta se buddhi nahin lagaani hai। patit-paavan hai hi ek baap। koi bhi satsang mein jaakar yahi gaate hain - patit-paavan seetaaraam, arth kuchh nahin। yeh sab hai - bhakti maarga ka gaayan। sab raavan ki jel mein hai। bhakti maarga mein bahut bhatakte hain। yahaan bhatakne ki koi baat nahin। baap samjhaate hain, bachchon ko points buddhi mein achhi reeti dhaaran karni hain, padhaai regular karni hai। agar koi kaaran se savere nahin aa sakte to dophar ko aa jaana chaahiye। kisko tang bhi nahin karna hai। saara din pada hai। koi bhi samay jaakar padhna hai। yeh bachchiyaan subah se lekar shaam tak service par hain। saara din service station khule hue hain। koi bhi aaye, unko raasta bataana hai। pahle-pahle to bataana hai - vichaar karo tumko do baap hain। duhkh mein paarlaukik baap ko yaad karte hain na। abhi shivbaaba kehte hain, maamekam yaad karo। maut to saamne khada hai। yeh vahi mahaabhaarat ladaai hai। bhal bade padmapti, karodapti hain, bade-bade makaan aadi banaate hain। parantu woh rahne thode hi hain, yeh sab toot jaane hain। woh samajhte hain - kaliyug ki aayu laakhon varsha hai। inko kaha jaata hai ghor andhiyaara। koi ke paas paise hain, poochhte hain makaan banaayen। baba kahenge paise hain to bhal bana lo। paise bhi to mitti mein mil jaane hain। yeh to tempory hain। nahin to yeh sab paise bhi chale jaayenge। kuchh bhi rahega nahin, bhal banaao। phir usmein geeta paathshaala ka prabandha rakho। jo tumhaare dar par koi bhi aaye unko bhiksha aisi do jo unko ekdam vishwa ka maalik bana do। tumhaare paas athaah gyaan dhan hai, itna koi ke paas nahin hai। tumhaare paas sabse saahookaar woh hai, jinke paas bahut gyaan ratna buddhi mein bhare hue hain। koi bhi aaye to tum unki jholi bhar do। tumhaare paas itna khajaana hai। sirf yeh board laga do - aao to ham aapko sada sukhi svarga ka varsa paane ka raasta bataayen। parantu bachchon mein woh nasha nahin rehta। yahaan nasha chadhta hai, baahar jaane se bhool jaata hai। shauk hona chaahiye। koi bhi aaye unko raasta bataayen jo beda paar ho jaae। tumhaare paas bahut bhaari dhan hai। koi bhi bhikhaari aaye va lakhapti aaye to tum unko bhi bahut ratna de sakte ho। baba yahaan nasha chadhaata hai phir sodawater ho jaata hai। baba tumhaari avinaashi gyaan ratnon se jholi bhar dete hain। parantu nambarvaar hain। kiski takdeer mein hai to poori reeti dhaaran kar lete hain। baba kehte hain - koshish kar tum nirantar yaad mein raho। aise nahin ki centre mein jaakar ek jagah baithna hai। nahin, chalte-phirte jo bhi samay mile baap ko yaad karte rehna hai। hath kaar de, dil arthaat buddhi ka yog baap ke saath ho। baap ki yaad se tumhaara bahut kalyaan hoga। 21 janma ke liye tum saahookaar ban jaate ho। behad ka baap behad ka varsa dete hain। bhaarat svarga tha। ab narka hai।

baap kehte hain - ab mujhe yaad karo to tumhaari aatma satopradhaan ban jaayegi। baap ko yaad karenge to nasha chadhega। hamaare jaisa dhanvaan srishti mein koi nahin hai। baap hi yaad nahin hoga to dhan kahaan se aayega। svarga mein to tum bachchon ko apaar sukh milta hai। shaastron mein to kitni danta kathaayen likh di hain। gaate bhi hain - raam raaja, raam praja... dharma ka upkaar hai। phir kehte raam ki seeta churaai gai, bandaron ki sena li... aage khud bhi padhte the, kuchh bhi samajhte nahin the। ab kitna samajh mein aata hai। kitni wonderful baaten likhi hain। baap kehte hain - mujhe prakriti ka aadhaar lena padta hai। trimoorti mein bhi brahma, vishnu, shankar dikhaate hain। parantu yeh bhi samajhte nahin ki vishnu kaun hai। kahaan ke rahne vaale hain। vishnu ke mandir ko nar-naaraayan ka mandir kehte hain। parantu arth kuchh bhi nahin samajhte hain। vishnu ke yeh do roop lakshmi-naaraayan hain, jo satayug mein raajya karte the। abhi tum manushya se devta ban rahe ho। koi bhi aaye to bolo yeh brahmaakumaar-kumaariyaan hain। to prajaapita brahma sabka baap hua। bahut dher ki dher praja hai। naam to suna hai na। bhagwan ne brahma dvaara brahman rache। baap ne zaroor bachchon ko varsa to diya hoga na। tum bachchon ko vishwa ka maalik banaate hain। tum shivbaaba se varsa paate ho। ek hai laukik baap, doosra hai paarlaukik baap। ab yeh tumko alaukik baap mila hai, yeh to jauhri tha। yeh thode hi kuchh jaanta tha। inke liye kehte hain ki inke bahut janmon ke ant ke janma ke bhi ant mein inmen pravesh karta hoon। vaanaprasthi banne ka rivaaj bhi bhaarat mein hai। 60 varsha ke baad guru ke paas chale jaate hain। baap inmen pravesh kar kehte hain ab tumko ghar chalna hai। mukti sab chaahte hain parantu mukti ko jaante koi bhi nahin। brahm mein leen to koi ho nahin sakte। yeh to srishti ka chakra phirta hi rehta hai, sabko part bajaana hi hai। kehte hain world ki history-geography repeat। yeh anaadi drama bana hua hai। 84 janmon ka part tumko bajaana hi hai। yeh gyaan dance hoti hai। vo log phir damru dikhaate hain। ab sookshm vatan vaasi shankar damru kaise bajaayega।

baap ne samjhaaya hai - tum bandar misal the। to tum bandaron ki sena li। tumhaare aage baba gyaan ka damru baja rahe hain। tumko gyaan dete hain। abhi tumhaari soorat aur seerat donon palta rahe hain। kaam-chita par baith tum kaale ho gaye ho। baba phir tumko gyaan-chita par bithaae soorat aur seerat donon paltaae saanvare se gora bana dete hain। yahaan baba kitna nasha chadhaate hain phir nasha gum kyon hona chaahiye। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap ne jo athaah gyaan ka dhan diya hai, use dhaaran kar svayan bhi saahookaar banna hai aur sabko daan bhi karna hai। jo bhi aaye uski jholi bhar deni hai।

2) baap ki yaad se hi kalyaan hona hai, isliye jitna ho sake chalte-phirte baap ki yaad mein rehna hai। sarva sambandhon ki rasna ek baap se leni hai।

vardaan:- sada busy rahne ki vidhi dvaara vyartha sankalpon ki complain ko samaapta karne vaale sampoorn karmaateet bhav

sampoorn karmaateet banne mein vyartha sankalpon ke toofaan hi vighna daalte hain। is vyartha sankalpon ki complain ko samaapta karne ke liye apne man ko har samay busy rakho, samay ki booking karne ka tareeka seekho। saare din mein man ko kahaan-kahaan busy rakhna hai - yeh programme banaao। roj apne man ko 4 baaton mein busy kar doh 1-milan (roohrihaan) 2-varnan (service) 3-magan aur 4-lagan। isse samay saphal ho jaayega aur vyartha ki complain khatma ho jaayegi।

slogan:- saphalta ko parmaatma birthright samajhne vaale hi sada prasannachit rah sakte hain।

ye avyakt ishaare - sada harshit rahne ke liye apni nature ko saral banaao, sahansheel bano।

saralta laane ke liye sirf ek baat dhyaan par zaroor rakhni hai। apni sthiti stuti ke aadhaar par na ho। kai bachche kartavya ke phal ki ichchha jyaada rakhte hain isliye jab stuti nahin hoti to sthiti halchal mein aa jaati hain। ninda hoti hai to nidhanke ban jaate hain। apni stage ko chhod dhani ko bhi bhool jaate hain isliye stuti ke aadhaar par sthiti nahin rakhna।