बुधवार 26 अगस्त 2026 की दैनिक मुरली

26-08-2026 praatahmurli om shanti "baapdaada"' madhuban

“meethe bachche - tum guarantee karte ho ki ham apne hi yogbal se is bhaarat ko svarga banaayenge, vahaan ek dharma, ek raajya hoga''

prashn:- maaya ke kis vighna se safe rahne vaale bahut achhi kamaal kar sakte hain?

uttar:- maaya ka sabse bada vighna hai - deh-abhimaan mein laakar ek-do ke naam roop mein phansaana। jo bachche is vighna se safe rehte, maaya ke dhokhe se bache rehte, ve bahut kamaal kar dikhaate hain। unki buddhi mein service ke naye-naye khyaalaat chalte rehte hain। service mein unnati tab hogi jab dehi-abhimaani honge।

om shanti। baap aaye hain roohaani bachchon ko shreemat dene। yeh to bachche jaante hain ki thode samay ke andar drama plan anusaar saara kaarya hona hai। ham raavanpuri ko vishnupuri banaate hain। ab baap bhi gupta to padhaai bhi gupta hai। centres to bahut hain। chhote bade gaanv mein centres hain aur bachche bhi bahut hain। aur bhi din-pratidin badhte jaayenge। literature mein bhi likhte hain ki ham is bhaarat bhoomi ko svarga banaakar chhodenge। tumko yeh bhaarat bhoomi bahut pyaari hai kyonki tum jaante ho ki yeh bhaarat hi svarga tha। unko 5 hajaar varsha hue। bhaarat bahut shaandaar tha। tum brahma mukh vanshaavli bachchon ko hi yeh knowledge hai। is bhaarat ko shreemat par svarga banaana pade। sabko raasta bataana hai aur koi khitkhit ki yahaan baat nahin hai। aapas mein baith raay karni chaahiye ki in chitron dvaara aisi kya advertise karen jo akhbaar mein bhi yeh chitra daalen। aapas mein is par seminar karna chaahiye। jaise us government ke log aapas mein milte hain, raay karte hain to bhaarat ko ham kaise sudhaaren। yeh jo itne matbhed ho gaye hain, unko aapas mein milkar theek karen aur bhaarat mein sukh-shanti kaise sthaapan ho। aise tum bhi roohaani paandav government ho, yeh badi eeshvareey government hai। patit-paavan baap hi patit bachchon ko paavan banaakar paavan duniya ka maalik banaate hain। yeh raaz tum bachche jaante ho। mukhya hai hi bhaarat ka aadi sanaatan devi-devta dharma। yeh hai roodra gyaan yagya। roodra kaha jaata hai shivbaaba ko। ab tumko baap ne aakar jagaaya hai, tumko phir auron ko jagaana hai। drama plan anusaar tum jagaate rehte ho। ab tak jis-jis ne jaisa-jaisa purushaartha kiya hai, utna hi kalpa pahle bhi kiya tha। tumhaari roohaani yuddha hai। kabhi maaya ka jor ho jaata hai, kabhi eeshvar ka। kabhi-kabhi to service achhi teji se chalti hai। kabhi kai bachchon mein maaya ke vighna pad jaate hain। maaya ekdam behosh kar deti hai। ladaai ka maidaan to hai na। maaya, raam ki santaan ko behosh kar deti hai। lav-kush ki kahaani bhi hai na। raam ke do bachche dikhaaye hain। yahaan to baba ke dher bachche hain। is samay sab manushya kumbhakran ki neend mein soye hue hain। ve yeh bhi nahin jaante ki parampita paramatma aaya hai - bachchon ko varsa dene। baap bhaarat mein hi aate hain। yeh baat bilkul hi bhool gaye hain। bhaaratvaasi hi svarga ke maalik the, ismen koi shak nahin। parampita paramatma ka janma bhi yahaan hota hai tab to shiv jayanti bhaarat mein manaate hain। to zaroor usne kuchh aakar kiya hoga। buddhi kehti hai ki zaroor baap ne aakar svarga ki sthaapna ki hogi। prerna se thode hi sthaapna karenge। yahaan to tum bachchon ko raajayog sikhaaya jaata hai, yaad ki yaatra sikhaai jaati hai। prerna mein koi aavaaj nahin hota। samajhte hain shankar prerna se vinaash karta, parantu ismen prerna ki baat nahin hai। tum samajh gaye ho ki drama mein unhon ka part hi hai - moosal banaana। ve vinaash arth nimitta bane hue hain। prerna shaastron ka akshar hai, ismen prerna ki to baat hi nahin hai। drama anusaar vinaash to hona hi hai। gaaya hua hai mahaabhaarat ladaai mein yeh moosal aadi kaam mein aaye the, jo past ho gaya hai woh phir repeat hona hai। tum guarantee karte ho ki ham yogbal se svarga ki sthaapna karenge, vahaan ek dharma hoga। to doosre sab dharma kahaan honge? zaroor vinaash ho jaayenge। yeh samajhne ki baat hai। gaaya hua hai - brahma dvaara sthaapna, vishnu dvaara paalna to theek hai। lekin shankar ko to shiv ke saath mila diya hai, yeh wrong hai। shiv-shankar kah dete hain kyonki shankar to koi kaam nahin karte to shiv se mila diya hai। parantu shivbaaba kehte hain mujhe to bahut kaam karna padta hai। sabko paavan banaana padta hai। main is brahma tan mein pravesh kar is saakaar dvaara sthaapna ka kaarya karaata hoon। shankar ka to koi part hai nahin। shiv ki pooja hoti hai। shiv hi kalyaankaari jholi bharne vaala hai। shiv parmaatmaae namah kehte hain na। yeh brahma bhi prajaapita thahra। brahma so vishnu, vishnu so brahma yeh to badi guhya baaten hain। yeh sirf tum bachche hi jaante ho। sensible bachchon ki buddhi mein gyaan jhat samajh mein aa jaata hai। manushya ko kuchh bhi samajh nahin hai ki patit-paavan baap kab aayenge! ab to kaliyug ka ant hai। agar kehte ki kaliyug ke ant mein 40 hajaar varsha pade hain, to abhi kitna aur patit banenge? kitna duhkh sahan karenge? kaliyug mein sukh to hoga nahin। kuchh bhi na jaanne ke kaaran bichaare ghor andhiyaare mein pade hain।

tum bachchon ko aapas mein milkar raay karni chaahiye ki kaise service ko badhaayen। baap plan to bataate rehte hain phir bachchon ko aapas mein milna hai। chitron par achhi reeti samjhaana hai। yeh bhi drama anusaar chitra bante ja rahe hain। bachche jaante hain ki jo-jo samay paas hota jaata hai, hoobhu drama chalta rehta hai। bachchon ki avasthaayen to kab oopar, kab neeche, yeh chalta rahega। baba bhi saakshi hokar dekhta hai। kabhi-kabhi bachchon par grahchaari baithti hai to unko mitaane ke liye prayatna karaate hain। baba ghadi-ghadi kehte hain ki baap ko yaad karo। lekin deh-abhimaan mein aa jaate hain isliye thokren khaate hain, ismen dehi-abhimaani banna pade। parantu bachchon mein deh-abhimaan bahut hai। tum dehi-abhimaani bano to baap ki yaad rahe phir service ki unnati bhi hoti rahegi। jinko oonch pad paana hai, woh sadaiv service mein lage rahenge। takdeer mein agar nahin hai to tadbeer bhi nahin karenge। khud kehte hain ki baba hamko dhaarna nahin hoti hai। buddhi mein nahin baithta। dhaarna agar nahin hoti to khushi bhi nahin rehti hai। jinko dhaarna hoti hai to khushi bhi rehti hai। samajhte hain ki shivbaaba aaya hua hai। baap kehte hain - bachche tum achhi reeti samajhkar phir auron ko bhi samjhaao। koi to service mein lag jaate hain। purushaartha karte rehte hain। tum bachche jaante ho ki jo-jo second beetta hai woh drama mein noondh hai phir aise hi repeat hota hai। bachchon ko hi samjhaaya jaata hai ki baahar bhaashan karte samay to anek prakaar ke manushya aate hain। tum bachche jaante ho ki sabhi ved, shaastra, geeta aadi par hi bhaashan karte hain, unko yeh pata thode hi hai ki yahaan eeshvar apna aur is rachna ke aadi-madhya-ant ka rahasya samjhaate hain। chitron mein kitna achhi tarah dikhaaya hai ki paramatma kaun hai! yeh baaten projector par to samjha nahin sakte। pradarshani mein chitra bhi saamne khade hain aur phir tum samjhaakar poochh bhi sakte ho ki ab bataao ki geeta ka bhagwan kaun hai? gyaan ka saagar kaun hai? pavitrata sukh-shanti ka saagar, liberator guide kaun hai? shreekrishna ke liye to kah nahin sakenge। paramatma ki mahima alag hai। pahle likhaana bhi chaahiye, probe lena chaahiye। sabse sahi bhi leni hai।

(hall mein chidiya lad rahi hain) is samay saari duniya mein ladaai-jhagda hi hai। sab aapas mein ladte rehte hain। 5 vikaar bhi manushya mein gaaye jaate hain। jaanavron ki to baat nahin hai। vicious world aur viceless world manushyon ke liye gaaya hua hai। kaliyug mein hai aasuri sampradaay, satayug mein hain daivi sampradaay। manushya itne tamopradhaan buddhi hain jo bilkul samajhte nahin ki ham hi aasuri sampradaay hain। devtaaon ke aage jaakar gaate bhi hain ham hi neench paapi hain, ham nirgun haare mein koi gun naahi। tum to unhon ko siddha kar bata sakte ho। seedhi ke chitra mein bada clear hai। dikhaaya hua hai ki kaise chadhti kala hai phir utarti kala hai। bhaaratvaasiyon ke liye mukhya hai seedhi ka chitra। yeh hai sabse achhi cheez। is chitra par bahut achha samjha sakte ho। 84 janma poore kar phir pahla number janma lena hai phir utarti kala se chadhti kala mein jaana pade। har ek ka vichaar chalna chaahiye ki sabko raasta kaise bataayen। khyaalaat nahin chalenge to service kaise karenge। chitron par samjhaana bahut sahaj hota hai। satayug ke baad seedhi utarni hi hai। bachche jaante hain ki ab ham transfer ho rahe hain। lekin seedha satayug mein nahin jaate। pahle shantidham mein jaana hai। tum jaante ho ham paartadhaari hain। baaki tumhaare mein bhi nambarvaar hain jo apne ko paartadhaari samajhte hain - is drama ke। duniya mein aisa koi nahin kah sakte ki ham paartadhaari hain। ham likhte bhi hain ki har ek manushya maatra is behad drama ke actors hote hue bhi drama ke mukhya actors, director aur drama ke aadi-madhya-ant ko nahin jaante hain, to woh besmajh hain। is likhne mein koi harja nahin hai। ek kaan se sun doosre se nikaal nahin dena chaahiye। service, service aur service। baba jaante hain ki bachchon par kabhi grahchaari bhi baithti hai। jab grahchaari baithti to kitna nuksaan ho jaata hai, woh baap jaante hain। saahookaar gareeb ban padte hain। kaaran to hota hai na। bahuton ko baba samjhaate bhi rehte hain - bachche naam-roop mein kabhi nahin phansana। nahin to maaya aisi hai jo naak se pakad khadde mein daal degi। maaya bada dhokha de degi। aashik maashook yahaan nahin banna hai। aashik maashook koi vikaar ke liye bante hain, doosre sirf roop par phida hote hain। tum jaante ho centres par bhi aise maaya ke vighna bahut padte hain, ek-do ke naam-roop mein phans jaate hain। maaya aisi prabal hai jo maata, maata ke naam-roop mein, kanya, kanya ke naam-roop mein bhi phans padti hai। purushaartha karte hue bhi maaya ekdam pakad leti hai isliye baba saavdhaani dete hain ki bachche maaya bahut phansaane ki koshish karegi, lekin tumko phansana nahin hai। deh-abhimaan mein nahin aana chaahiye। apne ko aatma samajh baap ko yaad karna hai। maaya ke dhokhe se bachte rehna hai। tum bachchon ko baap gul-gul (phool) banaane aaye hain, tumhein kisi baat mein sanshay nahin aana chaahiye। agar dil mein sanshay aaya to service achhi tarah kar nahin sakenge। andar ghutka khaate rahenge। himmat rakhni chaahiye। time bahut thoda hai। baba ki murli sunenge to utsaah mein aayenge। aatmaprakaash bachcha theek reeti chitron taraph attention de raha hai। baambe vaalon ke bhi dimaag mein aana chaahiye। mukhya chitra ko pahle banaana pade। jaanch karni chaahiye, baba direction dete rehte hain ki kaise chitron mein unnati honi chaahiye। aisi koi yukti racho jo seedhi ka chitra aerodrome par rakha jaae। yeh chitra dekhkar sab khush honge। aakhir samjhenge ki inko mat dene vaala kaun hai। to bachchon ko bahut nasha chadhna chaahiye। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) tum bachche ladaai ke maidaan mein ho, maaya raavan se tumhaari yuddha hai। maaya bahut vighna daalti hai। bachchon ko bahut saavdhaan rehna chaahiye।

2) har ek ko apni unnati ke liye vichaar karna hai। chitron par kaise samjhaayen, service ko kaise badhaayen। chitron mein aisa kya daalen jo manushya sahaj samajh jaaen।

vardaan:- deh-abhimaan ke tyaag dvaara shreshtha bhaagya banaane vaale sarva siddhi swaroop bhav

deh-abhimaan ka tyaag karne arthaat dehi-abhimaani banne se baap ke sarva sambandh ka, sarva shaktiyon ka anubhav hota hai, yeh anubhav hi sangamayug ka sarvashreshtha bhaagya hai। vidhaata dvaara mili hui is vidhi ko apnaane se vriddhi bhi hogi aur sarva siddhiyaan bhi praapta hongi। dehdhaari ke sambandh va sneh mein to apna taaj, takhta aur apna asli swaroop sab chhod diya to kya baap ke sneh mein deh-abhimaan ka tyaag nahin kar sakte! isi ek tyaag se sarva bhaagya praapta ho jaayenge।

slogan:- krodh mukta banna hai to svaartha ke bajaae nihsvaartha bano, ichchhaaon ke roop ka parivartan karo।

ye avyakt ishaare - apvitrata ke beej ko bhi samaapta kar sampoorn svachchha (pavitra) bano

baap ke saath aap sabne bhi paan ka beeda uthaaya hai ki pavitrata dvaara ham prakriti ko bhi paavan karenge। to ye sankalp poora karne ke liye baapdaada chaahte hain ki vishwa ka har ek bachcha pahle lagaav mukta bane - chaahe saadhnon se, chaahe vyakti se। saadhnon ko use karna aur cheez hai, lagaav alag cheez hai। to baapdaada har bachche ko pahle lagaav-mukta banaana chaahte hain।